GUSOK
Ang lawas sa tawo adunay 24 ka buok niining tag-as, yagpis, nagkurbang mga bukog nga naglukob sa haw-ang nga bahin sa dughan. Nahan-ay sa 12 ka paris, kini nahisamag halwa nga nanalipod sa kasingkasing ug sa mga baga. Ang dugo ginahimo diha sa uyok sa mga gusok.
Sa paglalang sa babaye, siya wala himoa sa Diyos nga bulag ug lahi gikan sa lalaki pinaagi sa pag-umol kaniya gikan sa abog sa yuta, sama sa iyang gihimo sa dihang gilalang si Adan. Siya nagkuhag usa ka gusok gikan sa kilid ni Adan, ug gikan niini Siya naghimo alang kang Adan ug usa ka hingpit nga kaparis, ang babayeng si Eva. (Gen 2:21, 22) Bisan pa niana, si Adan nagpabiling usa ka hingpit nga tawo, nga nianang higayona nahiusa ingong ‘bukog sa bukog ug unod sa unod’ uban sa iyang asawa. (Gen 2:23; Deu 32:4) Dugang pa, kini wala makabalda sa mga selula sa pagsanay ni Adan nga makaapekto sa estruktura sa mga gusok sa iyang mga anak nga lalaki o babaye. Ang lalaki ug babaye parehong adunay 24 ka gusok.
Makaiikag nga ang usa ka gusok nga gikuha ingong epekto motubo pag-usab, nga maghulip sa kaugalingon, basta ang periosteum (ang membrana sa nagtapot nga tisyu nga naglukob sa bukog) anaa pa gihapon. Wala hisgoti sa asoy kon gipahinabo ba o wala ni Jehova nga Diyos kini nga pamaagi; apan, ingong Maglalalang sa tawo, ang Diyos tinong nasayod niining talagsaong kapasidad sa mga gusok.
Ang pulong nga “gusok” makaplagan usab diha sa Bibliya sa asoy ni Daniel bahin sa usa ka panan-awon nga gihatag sa Diyos kaniya sa dihang nagmando si Haring Belsazar sa Babilonya. Mitungha ang unang mananap nga naghawas sa dinastiya sa mga magmamando sa Babilonya, nga gisundan sa usa ka mananap nga sama sa usa ka oso, nga naglarawan sa sunod nga “hari,” o linya sa mga magmamando sa kalibotan, nga mao, kadtong sa Medo-Persia. Kining samag-oso nga mananap adunay tulo ka gusok diha sa iyang baba. Kini nga mga gusok lagmit nagpasabot nga ang “hari” nga gisimbolohan sa oso mihimo sa iyang mga pagpangdaog diha sa tulo ka direksiyon, ingon sa gihimo sa Medo-Persia. Sanglit ang numero nga tulo gigamit sa Kasulatan ingong simbolo sa kagrabe o sa pagpasiugda, ang tulo ka gusok mahimong nagpasiugda usab sa kahakog niining simbolikong oso sa pagpanakop ug mga teritoryo.—Dan 7:5, 17; tan-awa ang MANANAP, SIMBOLIKO NGA MGA.