“Nakakita Kog mga Panan-awon sa Diyos”

1-3. (a) Ihulagway ang nakita ug nadungog ni Ezequiel. (Tan-awa ang hulagway sa sinugdan sa kapitulo.) (b) Unsang gahom ang nagpahinabo sa naeksperyensiyahan ni Ezequiel, ug unsay epekto niini kaniya?

SI Ezequiel mitan-aw sa layo, sa lapad ug balason nga kapatagan. Mihiyong ang iyang mga mata, unya kini midako. Dili siya makatuo sa iyang nakita. Gikan sa layo, may nagpadulong nga unos. Pero dili ni ordinaryo nga unos. Samtang ang iyang buhok ug sinina gipalidpalid sa kusog nga hangin gikan sa amihanan, nakakita siyag dako kaayong panganod. Sanag kini tungod sa nagkidlapkidlap nga kalayo, ug sa tan-aw niya ang kasanag niini morag natunaw nga mahalong metal.a Samtang nagpadulong kang Ezequiel ang panganod, misamot ang kabanha​—morag dakong kasundalohan nga nagpaingon.​—Ezeq. 1:4, 24.

² Kining tawhana, nga mga 30 anyos, nakakita sa una sa sunodsunod nga talan-awon nga dili malimtan. Mibati siya nga naa niya “ang kamot ni Jehova,” ang dili mapugngang gahom sa balaang espiritu ni Jehova. Ang ipakita ug ipadungog unya kaniya niana nga espiritu makapahingangha kaayo, mas katingalahan pa kay sa bisan unsang special effect sa mga pelikula karon. Tungod sa mga panan-awon nga makita ni Ezequiel, siya mohapa sa grabeng kahingangha.​—Ezeq. 1:3, 28.

³ Pero gipakita kini ni Jehova dili lang aron mahingangha si Ezequiel. Ang unang panan-awon ni Ezequiel​—sama sa uban pa nga narekord sa iyang nindot nga basahon sa mga tagna—​dunay importanteng kahulogan kaniya ug sa matinumanong mga alagad ni Jehova karon. Busa atong hisgotan ang nakita ug nadungog ni Ezequiel.

4, 5. Unsay kahimtang dihang nakita ni Ezequiel ang panan-awon?

⁴ Basaha ang Ezequiel 1:1-3. Hisgotan una nato ang kahimtang. Tuig kadto sa 613 B.C.E. Base sa atong nakat-onan sa miaging kapitulo, si Ezequiel didto sa Babilonya ug nagpuyo kauban sa ubang destiyero, o binihag, duol sa suba sa Kebar​—lagmit kini maoy suba nga hinimog tawo ug kaagian ug sakayan, ug kini mitipas gikan sa suba sa Euprates ug misumpayg balik sa unahan.

⁵ Ang mga destiyero naggikan sa Jerusalem, nga mga 800 kilometros ang gilay-on.b Ang templo, diin nag-alagad kaniadto ang amahan ni Ezequiel ingong saserdote, nahugawan ug napunog idolatriya. Ang trono sa Jerusalem, diin mahimayaong nagmando kaniadto si David ug Solomon, angay nang ikaulaw. Ang walay pagtuo nga haring si Jehoiakin nadestiyero sab sa Babilonya. Ang gipuli sa trono, si Zedekias, kontrolado sa hari sa Babilonya ug daotan nga tawo.​—2 Hari 24:8-12, 17, 19.

6, 7. Ngano kahang mibati si Ezequiel nga nagkinabuhi siya sa lisod nga panahon?

⁶ Para kang Ezequiel, nga tawong may pagtuo, lagmit kini ang kinalisdang yugto sa iyang kinabuhi. Ang ubang destiyero lagmit naghunahuna: ‘Gibiyaan na ba gyod ta ni Jehova? Kini bang daotan ug gamhanang Babilonya nga nagsimbag daghan kaayong bakak nga diyos magwagtang sa putling pagsimba kang Jehova ug sa iyang pagmando sa yuta?’

⁷ Base niana nga impormasyon, puwede nimong sugdan ang pagtuon niini nga topiko pinaagi sa pagbasa sa unang panan-awon ni Ezequiel nga tin-aw kaayong pagkahulagway. (Ezeq. 1:4-28) Palandonga nga ikaw si Ezequiel, ug imadyina nga imong nakita ang iyang nakita ug nadungog ang iyang nadungog.

 8. Unsay nakita ni Ezequiel sa panan-awon, ug unsay gisimbolohan niini?

⁸ Unsay nakita ni Ezequiel? Sama kinig dako ug katingalahan kaayo nga sakyanan nga morag karo. Kini may upat ka dagkong ligid nga inubanag upat ka talagsaong espiritung mga linalang, nga sa ulahi gipaila ingong mga kerubin. (Ezeq. 10:1) Sa ibabaw nila, naay morag lapad nga salog, o hawan, nga samag yelo, ug ibabaw niana nahimutang ang mahimayaong trono sa Diyos, nga si Jehova mismo ang naglingkod! Apan unsay gisimbolohan sa karo? Ang panan-awon ni Ezequiel haom nga nagsimbolo sa usa ra ka butang: ang langitnong bahin sa mahimayaong organisasyon ni Jehova sa tibuok uniberso. Nganong makaingon ta niana? Konsideraha ang tulo ka butang.

 9. Sa unsang paagi ang pagmando ni Jehova sa iyang mga linalang sa langit haom sa pagkahulagway sa sakyanan?

⁹ Si Jehova ang magmamando sa iyang mga linalang sa langit. Matikdi nga niini nga panan-awon, ang trono ni Jehova nahimutang sa ibabaw sa mga kerubin. Sa ubang parte sa Pulong sa Diyos, si Jehova gihulagway sab nga naglingkod sa trono ibabaw o taliwala sa iyang mga kerubin. (Basaha ang 2 Hari 19:15; Ex. 25:22; Sal. 80:1) Siyempre, dili literal nga naglingkod siya ibabaw sa mga kerubin​—nga mora bag kinahanglan siyang alsahon sa maong gamhanang espiritung mga linalang—​sama ra nga dili siya kinahanglang mosakay sa literal nga karo. Apan ang mga kerubin nagsuportar sa iyang pagkasoberano, ug makahimo siya sa pagpadala kanila bisan asa sa uniberso sa pagtuman sa iyang kabubut-on. Sila, sama sa tanang balaang anghel sa Diyos, nagpatuman sa mga desisyon ni Jehova ingong iyang mga alagad, o representante. (Sal. 104:4) Nianang paagiha, si Jehova “nagsakay” ibabaw nilang tanan, nga naggiya nila ingong ilang magmamando, ug sila morag usa ka dakong sakyanan.

10. Unsay nagpakita nga dili lang upat ka kerubin ang naglangkob sa langitnong karo?

¹⁰ Dili lang mga kerubin ang gisimbolohan sa karo. Ang mga kerubin nga nakita ni Ezequiel upat ka buok. Kanang numeroha sagad gigamit sa Bibliya bahin sa pagkakompleto​—apil tanan, walay kulang. Busa haom nga ang presensiya sa upat ka kerubin nagsimbolo sa tanang maunongong espiritung mga anak sa Diyos. Matikdi sab nga ang mga ligid ug bisan ang mga kerubin napunog mata, nga nagpakita sa pagkamabinantayon ug pagkaalerto sa daghan pa, dili lang sa gipakita nga upat ka espiritung mga linalang. Ug ang giingon ni Ezequiel bahin sa karo nagpaila nga kini dako, mao nga bisan ang dagkong kerubin morag gagmay tan-awon. (Ezeq. 1:18, 22; 10:12) Sa susama, ang langitnong bahin sa organisasyon ni Jehova dako, nga gilangkoban ug mas daghan pa kay sa upat ka kerubin.

11. Unsang susamang panan-awon ang nakita ni Daniel, ug unsay atong ikahinapos?

¹¹ Si Daniel dunay susamang panan-awon sa langit. Si propetang Daniel nadestiyero sa siyudad sa Babilonya sa taas nga panahon, ug gihatagan sab siyag panan-awon sa langit. Makapainteres kay sa maong panan-awon, ang trono ni Jehova duna poy mga ligid. Ang panan-awon ni Daniel nagpokus sa kadako sa espiritung pamilya ni Jehova sa langit. Si Daniel nakakitag “kaliboan ka libo . . . ug napulo ka libo ka napulo ka libo” nga espiritung mga anak sa Diyos nga nagtindog sa atubangan ni Jehova. Sila nagtigom ingong langitnong Korte, dayag nga ang matag usa may kaugalingong dapit. (Dan. 7:9, 10, 13-18) Dili ba haom lang nga maghunahuna ta nga kining nagtigom nga mahimayaong espiritung mga persona mao sab ang gitumong sa panan-awon ni Ezequiel?

12. Nganong proteksiyon para nato ang pagtuon sa mga bahin sa Kasulatan sama sa panan-awon ni Ezequiel labot sa langitnong karo?

¹² Si Jehova nahibalo nga proteksiyon kanatong mga tawo ang pagpokus sa atong hunahuna sa espirituwal nga katinuoran​—“ang mga butang nga dili makita,” nga maoy pagtawag niana ni apostol Pablo. Ngano? Kay ingong pisikal nga mga linalang, tendensiya nato nga magpokus sa “mga butang nga makita,” ang pisikal nga mga butang nga atong gikabalak-an, nga temporaryo lang. (Basaha ang 2 Corinto 4:18.) Sagad pahimuslan ni Satanas ang maong tendensiya ug hayloon ta nga mahimong tawo nga unodnon ug panghunahuna. Aron tabangan ta sa pagsukol niana, si Jehova mahigugmaong nagtaganag mga mensahe sama niining sa tagna ni Ezequiel, nga magpahinumdom nato sa makapahingangha ug halangdon kaayong pamilya ni Jehova sa langit!

13, 14. (a) Giunsa paghulagway ni Ezequiel ang mga ligid nga iyang nakita? (b) Nganong haom nga ang karo ni Jehova dunay mga ligid?

¹³ Sa sinugdan, si Ezequiel nagpokus sa upat ka kerubin, ug sa Kapitulo 4 niini nga publikasyon, atong makita kon unsay itudlo kanato bahin kang Jehova niana nga mga linalang ug sa ilang talagsaong hitsura. Apan nakita ni Ezequiel ang upat ka ligid tapad sa maong mga kerubin, dayag diha sa upat ka kanto, nga nagpormag dako kaayong kuwadrado. (Basaha ang Ezequiel 1:16-18.) Kini samag krisolito, mahalong bato nga sihag o medyo sihag ug dalag (yellow) o dalagong-berde (yellowish-green) ang kolor. Kini nindot kaayo ug naggilakgilak.

¹⁴ Ang panan-awon ni Ezequiel nagpasiugda pag-ayo sa mga ligid sa karo. Dili ba talagsaon kaayo ang maong kombinasyon? Trono nga dunay mga ligid! Kon maghisgot ug trono, tingali maghunahuna ta nga kana naa lang sa usa ka lugar, ug haom lang kay ang mga hari sa yuta limitado rag gigamhan nga mga lugar. Apan ang pagmando ni Jehova lahi kaayo sa bisan unsang pagmando sa tawo. Sumala sa hapit nang mahibaloan ni Ezequiel, ang gahom ni Jehova ingong magmamando walay limitasyon. (Neh. 9:6) Kini nga Soberano makagamit gyod sa iyang awtoridad bisan asa!

15. Unsay namatikdan ni Ezequiel sa porma ug gidak-on sa mga ligid?

¹⁵ Si Ezequiel nahingangha sa kadako sa mga ligid. Siya misulat: “Ang mga yantas niini habog kaayo ug makapahingangha.” Tingali ma-imagine nato nga mihangad si Ezequiel aron makita ang naggilakgilak nga dagkong yantas nga halos miabot sa langit. Ug iyang gidugang kining makapainteres nga detalye: “Ang yantas sa tanang upat [ka ligid] punog mata sa palibot.” Pero tingali, ang labing kahibulongan sa tanan mao ang porma sa mga ligid. Siya miingon: “Kon tan-awon ang hitsura ug gambalay niini daw ang usa ka ligid anaa sa sulod sa usa ka ligid.” Unsay ipasabot niana?

16, 17. (a) Unsay hitsura sa giingon nga “ang usa ka ligid anaa sa sulod sa usa ka ligid”? (b) Unsay gipaila sa mga ligid bahin sa pagkadaling maniobrahon sa sakyanan ni Jehova?

¹⁶ Ikaingon nga ang matag ligid nga nakita ni Ezequiel maoy duha ka ligid nga giusa​—ang usa ka ligid gibutang nga pababag sa laing ligid. Kanay hinungdan kon nganong mahimo niining mga ligira ang giingon ni Ezequiel: “Dihang kini moabante, makaadto kini bisan asa sa upat ka direksiyon nga dili na kinahanglang moliso.” Unsay atong makat-onan niini nga mga ligid bahin sa langitnong karo nga nakita ni Ezequiel?

¹⁷ Ang mga ligid nga ingon niana ka dako layo kaayog maabot bisan sa usa lang ka tuyok. Gani, gipakita sa panan-awon nga kini sama ka paspas sa kilat! (Ezeq. 1:14) Dugang pa, kining talagsaong mga ligid nga makadagan sa upat ka direksiyon ug dali kaayong maniobrahon dili gyod masundog sa mga inhenyero. Kini nga sakyanan makausab ug direksiyon nga dili momenor o moliko! Apan wala lang ni basta magdagan nga walay hibangkaagan. Ang mga mata sa mga yantas nagpaila nga kining sakyanana nahibalo pag-ayo sa tanan diha sa palibot niini, sa matag direksiyon.

18. Unsay atong makat-onan sa kadako sa mga ligid ug sa kadaghan sa mga mata?

¹⁸ Busa unsay gitudlo ni Jehova kang Ezequiel​—ug sa tanang matinumanong katawhan​—labot sa langitnong bahin sa Iyang organisasyon? Tagda kon unsa nay atong nakita. Kini mahimayaon ug makapahingangha, base sa nagkidlapkidlap nga materyales sa mga ligid ug sa gidak-on niini. Kini nahibalo sa tanan, base sa kadaghan sa mata sa mga ligid. Ang mga mata mismo ni Jehova nakakita sa tanang butang. (Prov. 15:3; Jer. 23:24) Duna sab siyay milyonmilyong alagad nga mga anghel nga iyang ikapadala bisan asa sa uniberso, ug walay matago sa ilang panan-aw ug sila moreport ug balik sa ilang Soberano.​—Basaha ang Hebreohanon 1:13, 14.

19. Unsay gitudlo kanato sa kapaspason ug sa pagkadaling maniobrahon sa karo maylabot kang Jehova ug sa langitnong bahin sa iyang organisasyon?

¹⁹ Dugang pa, atong nakita nga ang karo paspas kaayo ug daling maniobrahon. Hunahunaa kon unsa ka lahi ang tawhanong gobyerno, institusyon, ug mga organisasyon kon itandi sa langitnong bahin sa organisasyon ni Jehova! Kini sila napakyas sa pagsulbad sa mga problema sa kalibotan ug dili makapasibo sa kausaban sa kahimtang, mao nga sila dili molampos ug sila malaglag. Pero ang karo ni Jehova hingpit nga nagpakita sa pagkamakataronganon ug pagkadaling mopasibo sa Diyos, nga maoy nagkontrolar niini. Sumala sa gipaila sa iyang ngalan, mahimo siyang bisan unsa nga gikinahanglan sa pagtuman sa iyang kabubut-on. (Ex. 3:13, 14) Pananglitan, dali ra siyang mahimong gamhanang Manggugubat nga makig-away para sa iyang katawhan, pero dali ra pod dayon siyang mahimong maluluy-on nga Tigpasaylo sa mga sala, nga nagahupay ug nagapasig-uli bisan niadtong nahugno pag-ayo nga mahinulsolong mga makasasala.​—Sal. 30:5; Isa. 66:13.

20. Nganong angay tang mahingangha sa karo ni Jehova?

²⁰ Tungod niining panan-awon ni Ezequiel, makapangutana ta, ‘Nahingangha ba gyod ko sa karo ni Jehova?’ Angay natong hinumdoman nga ang karo nagsimbolo sa realidad nga nagakahitabo karon. Dili gyod nato angayng hunahunaon nga si Jehova, ang iyang Anak, ug ang tanang anghel wala makakita sa mga problema nga nakapaluya nato. Dili sab ta mabalaka nga ang Diyos malangan sa pagtagana sa atong gikinahanglan o nga ang iyang organisasyon mapakyas sa pagpasibo sa kalit nga mga kausaban niining kalibotana. Angay natong hinumdoman nga ang organisasyon ni Jehova aktibo gyod ug nagaabante. Gani, si Ezequiel nakadungog ug tingog sa langit nga nag-ingon: “Nagtuyok nga mga ligid, abante!” (Ezeq. 10:13) Makapahingangha gyod ang pagpamalandong sa paagi sa pagpalihok ni Jehova sa iyang organisasyon. Pero, angayng mas mahingangha ta kang Jehova mismo.

21, 22. Unsay naghawid sa karo? Ipatin-aw.

²¹ Human ipakita kang Ezequiel ang mga ligid, gidala ang iyang atensiyon sa ibabaw niini, ug iyang nakita ang “samag hawan nga mikidlap nga daw makapahinganghang yelo.” (Ezeq. 1:22) Ibabaw sa mga ulo sa kerubin, nagkidlapkidlap ang kahayag sa sihag ug lapad nga hawan. Pero ang mga magbabasa nga suheto sa mga makina tingali mahibulong niini nga sakyanan. Sila tingali mangutana: ‘Unsa may naghawid sa salog ibabaw sa mga ligid? Ug giunsa pag-obra sa mga ligid nga wala may ehe nga naghawid niini?’ Hinumdomi nga kining sakyanana dili malimitahan sa mga balaod sa kinaiyahan, kay kini simbolikal lang ug naghulagway kon unsay naa sa langit. Matikdi sab ang giingon: “Ang espiritu nga naglihok sa buhing mga linalang diha usab sa mga ligid.” (Ezeq. 1:20, 21) Unsang espiritu ang naglihok sa mga kerubin ug sa mga ligid?

²² Walay duhaduha, kadto mao ang balaang espiritu ni Jehova, ang labing gamhanang puwersa sa uniberso. Kining aktibong puwersa maoy naghawid sa sakyanan, nagpadagan niini, ug nagkontrolar sa dungan kaayo nga paglihok sa mga ligid niini. Base niana, atong sundan ang mga mata ni Ezequiel samtang motan-aw siya sa Usa nga nagkontrolar sa karo.

23. Unsang mga pulong ang gigamit ni Ezequiel sa paghulagway kang Jehova, ug ngano?

²³ Basaha ang Ezequiel 1:26-28. Sa katibuk-an niini nga panan-awon, si Ezequiel sagad naggamit ug mga pulong nga “hitsura,” “sama,” ug “nahisama.” Pero niining mga bersikuloha, mas daghang beses niya kining gigamit. Kahibulongan kaayo ang iyang mga nakita, maong morag naglisod siya kon unsaon kini pag-asoy. Nakakita siyag “samag batong sapiro, ug kini samag usa ka trono.” Ma-imagine ba nimo ang trono nga gikulit gikan sa dako ug asul kaayong sapiro? Ug didto, naglingkod ang halangdon kaayong persona. Ang iyang “hitsura sama nianang sa tawo.”

24, 25. (a) Unsay gipahinumdom kanato sa balangaw sa palibot sa trono ni Jehova? (b) Unsa usahay ang epekto niana nga mga panan-awon sa mga tawo nga may pagtuo?

²⁴ Kining halangdong persona mailhan lang sa iyang katibuk-ang porma, kay si Jehova naggilakgilak sa himaya nga samag kalayo gikan sa hawak paubos ug gikan sa hawak pataas. Ma-imagine nato nga gihiyong ni Ezequiel ang iyang mata ug gilandongan kini samtang nagtan-aw sa mahimayaong persona. Sa kataposan, nakita ni Ezequiel ang makapainteres kaayo nga bahin sa panan-awon: “Siya gipalibotag kahayag nga sama nianang sa balangaw [o, rainbow] diha sa panganod sa adlaw nga nag-ulan.” Nakasulay na ba ka nga puwerte nimong lipaya dihang nakakitag balangaw? Kana magpahinumdom gyod nato kon unsa ka mahimayaon ang atong Maglalalang! Kanang nindot, punog kolor nga arko diha sa langit magpahinumdom sab nato sa pakigsaad sa kalinaw nga gihimo ni Jehova human sa Lunop. (Gen. 9:11-16) Bisag siya ang Labing Gamhanan, siya maoy Diyos sa kalinaw. (Heb. 13:20) Ang kalinaw naghari sa iyang kasingkasing ug kini natagamtam sa tanan niyang matinumanong magsisimba.

²⁵ Unsay epekto kang Ezequiel pagkakita niya sa himaya ni Jehova nga Diyos? Siya misulat: “Dihang nakita nako kini, ako mihapa.” Tungod sa iyang kahingangha ug kahadlok sa Diyos, si Ezequiel mihapa. Mao sab nay reaksiyon sa ubang propeta dihang nakadawat silag panan-awon kang Jehova. Tungod sa ilang nakita, sila nahingangha ug mibating ubos kaayo. (Isa. 6:1-5; Dan. 10:8, 9; Pin. 1:12-17) Pero ngadtongadto sila napalig-on pag-ayo sa mga gipakita kanila ni Jehova. Seguradong mao pod nay nahitabo kang Ezequiel. Busa unsay angayng epekto kanato dihang magbasa tag ingon niini nga mga asoy sa Kasulatan?

26. Sa unsang paagi lagmit napalig-on si Ezequiel sa maong panan-awon?

²⁶ Kon naluya man si Ezequiel tungod sa mga pagduhaduha bahin sa kahimtang sa katawhan sa Diyos didto sa Babilonya, seguradong napalig-on siya sa maong panan-awon. Dili gyod importante kon ang matinumanong katawhan sa Diyos didto ba sa Jerusalem o sa Babilonya o sa laing lugar. Maabot gyod sila sa mahimayaong karo ni Jehova! Duna bay gamhanang nasod ilalom ni Satanas nga makabarog batok sa Diyos, kinsa nagkontrolar sa ingon niana ka mahimayaong organisasyon sa langit? (Basaha ang Salmo 118:6.) Nakita sab ni Ezequiel nga ang langitnong karo dili layo sa mga tawo. Gani, ang mga ligid niini midapat sa yuta! (Ezeq. 1:19) Busa interesado kaayo si Jehova sa iyang matinumanong katawhan nga nadestiyero. Bisan asa pa sila, ang mahigugmaong pag-atiman sa ilang Amahan makaabot gyod kanila!

27. Unsay kahulogan sa panan-awon ni Ezequiel kanato karon?

²⁷ Duna bay kahulogan ang panan-awon ni Ezequiel kanato karon? Oo! Hinumdomi nga gipangusgan pa gyod ni Satanas ang iyang pag-atake sa putling pagsimba kang Jehova. Gusto gyod niyang bation nato nga kita nag-inusara, layo, ug dili maabot sa atong langitnong Amahan ug sa iyang organisasyon. Ayaw gyod tugoti nga makasulod sa imong hunahuna ug kasingkasing kini nga mga bakak! (Sal. 139:7-12) Sama kang Ezequiel, daghan tag rason nga mahingangha. Tingali dili ta mohapa sama niya. Pero dili ba angay tang mahingangha sa gahom, kapaspason, pagkadaling mamaniobra, pagkadaling mopasibo, ug sa dakong himaya sa langitnong bahin sa organisasyon ni Jehova sa tibuok uniberso?

28, 29. Unsay nagpakita nga ang karo ni Jehova nagaabante niadtong miaging siglo?

²⁸ Hinumdomi sab nga ang organisasyon ni Jehova dunay yutan-ong bahin. Tinuod, ang yutan-ong bahin gilangkoban ug dili hingpit nga mga tawo. Pero hunahunaa kon unsa nay nalampos ni Jehova dinhi sa yuta! Sa tibuok kalibotan, natabangan ni Jehova ang mga tawo sa paghimog mga butang nga dili nila mahimo nga silasila ra. (Juan 14:12) Bisag paklion lang nato ang mga panid sa librong Gingharian sa Diyos Nagmando Na! kita mapahinumdoman na sa katingalahang nalampos sa buluhatong pagsangyaw sa miaging siglo. Mapahinumdoman sab ta kon unsa na ka dako ang nahimo sa organisasyon ni Jehova sa pag-edukar sa tinuod nga mga Kristohanon, sa pagdaog sa mga kaso sa korte, ug bisan sa paggamit sa modernong teknolohiya sa pagtuman sa kabubut-on sa Diyos!

²⁹ Kon atong konsiderahon ang tanang nahimo sa pagpasig-uli sa putling pagsimba sa kataposang mga adlaw niining daotang sistema sa mga butang, mahimong mas tin-aw nga ang karo ni Jehova nagaabante. Pagkadakong pribilehiyo nga sakop ta niini nga organisasyon ug nag-alagad ta sa ingon niana nga Soberano!​—Sal. 84:10.

30. Unsay atong hisgotan sa sunod nga kapitulo?

³⁰ Pero ang panan-awon ni Ezequiel daghan pag itudlo kanato. Sa sunod nga kapitulo, hisgotan natog dugang ang upat ka makapahingangha nga “buhing linalang,” o kerubin. Unsay ilang itudlo kanato bahin sa atong mahimayaong Soberano, si Jehova nga Diyos?