‘Magpadayon sa Pagpaabot Niini’

1, 2. (a) Unsang mga pangutana ang mahimong isukna nimo sa imong kaugalingon? (b) Sa unsang kahimtang nagkinabuhi ang pipila sa 12 ka manalagna, ug unsang tinamdan ang nabatonan ni Miqueas?

UNSA na ka dugay ang imong pagpaabot nga wad-on ni Jehova ang pagkadaotan gikan sa yuta? Unsa ka dugay nga imo gihapon kining paaboton? Kasamtangan, unsang tinamdan ang imong pagabatonan ug unsay epekto niini sa imong pagkinabuhi? Tin-aw nga ang imong mga tubag maoy lahi unya sa iya sa mga hinimba nga nagabuhat lang kon unsay ilang gusto, nga nagdahom nga mahilangit.

² Samtang imong gipaabot kanang dakong adlaw, ang mga basahon nga sinulat sa 12 ka manalagna makatabang kaayo. Daghan kanila ang nagkinabuhi sa dihang nagsingabot ang paghukom sa Diyos. Pananglitan, si Miqueas nag-alagad ingong manalagna sa dihang nagsingabot ang silot sa Samaria diha sa mga kamot sa mga Asiryano niadtong 740 W.K.P. (Tan-awa ang talaan sa mga petsa sa mga panid 20 ug 21.) Sa ulahing panahon, nga sama ka segurado, miabot ang adlaw ni Jehova batok sa Juda. Sanglit si Miqueas wala mahibalo sa eksaktong panahon sa paglihok sa Diyos, siya ba mihukom nga magpaabot na lamang nga walay buhaton, nga magdahom nga molihok na unta ang Diyos sa dili madugay? Kini ang mga pulong ni Miqueas: “Bahin kanako, magalantaw ako kang Jehova. Magpakita ako ug mahulatong tinamdan sa Diyos sa akong kaluwasan. Ang akong Diyos mamati kanako.” (Miqueas 7:7) Oo, kay masaligon kon unsay umaabot, si Miqueas nahisamag usa ka aktibong magbalantay ibabaw sa usa ka bantayanang torre.—2 Samuel 18:24-27; Miqueas 1:3, 4.

 3. Tungod kay nagsingabot ang pagkalaglag sa Jerusalem, unsang panglantaw ang gipadayag ni Habacuc ug ni Sofonias?

³ Sunod, pangitaa si Sofonias ug Habacuc diha sa talaan sa mga petsa. Matikdi nga kining duha nag-alagad sa dihang duol na ang kalaglagan sa Jerusalem niadtong 607 W.K.P. Bisan pa niana, wala sila mahibalo kon duol na bang ipatuman sa Diyos ang paghukom o kadto maoy halayo pag daghang dekada. (Habacuc 1:2; Sofonias 1:7, 14-18) Si Sofonias misulat: “‘Magpadayon kamo sa paghulat kanako,’ mao ang giingon ni Jehova, ‘hangtod sa adlaw nga ako motindog alang sa mga inagaw, kay ang akong hudisyal nga hukom mao . . . aron ibubo kanila ang akong mahukmanong pagsaway, ang tanan nakong nagasilaob nga kasuko.’” (Sofonias 3:8) Ug komosta man si Habacuc, kinsa nagkinabuhi sunod gayod kang Sofonias? Si Habacuc misulat: “Ang panan-awon alang pa sa tinudlong panahon, ug kini nagadali paingon sa kataposan, ug kini dili magbakak. Bisan pa kon kini malangan, padayon sa pagpaabot niini; kay kini matuman gayod. Kini dili maulahi.”—Habacuc 2:3.

 4. Sa unsang mga kahimtang nanagna si Sofonias ug Habacuc, ug unsay ilang tinamdan?

⁴ Ang kahimtang sa panahon sa pagpahayag sa Sofonias 3:8 ug Habacuc 2:3 mohatag ug bililhong kalamdagan. Sa usa ka panahong miingon ang pipila ka Hudiyo, “Si Jehova dili magbuhat ug maayo, ug siya dili magbuhat ug daotan,” si Sofonias nagmantala sa “adlaw sa kasuko ni Jehova.” Nianang adlawa ang kaawayng mga nasod ug ang masukihong mga Hudiyo makaagom sa kasuko sa Diyos. (Sofonias 1:4, 12; 2:2, 4, 13; 3:3, 4) Maghunahuna ka bang si Sofonias nahadlok sa mahukmanong pagsaway ug kasuko sa Diyos? Sa kasukwahi, siya gisultihan nga magpadayon sa “pagpaabot niini.” ‘Unsa na man si Habacuc?’ basin mahibulong ka. Siya gisultihan usab nga siya kinahanglang ‘magpadayon sa pagpaabot niini.’ Husto ka sa paghinapos nga si Sofonias ug si Habacuc dili ingong wala magtagad sa umaabot, nga nagkinabuhi nga sila maorag naghunahuna nga ang kahimtang dili gayod mausab. (Habacuc 3:16; 2 Pedro 3:4) Hinuon, sama sa nahisgotan na, ang hinungdanong punto nga gikauyonan sa duha ka manalagna mao nga silang duha kinahanglang ‘magpadayon sa pagpaabot.’ Ug imong nahibaloan kini: Ang gipaabot sa maong duha ka manalagna nahitabo gayod niadtong 607 W.K.P. Busa ang ilang pagpadayon sa “pagpaabot” napamatud-an nga usa ka maalamong dalan.

5, 6. Tungod kay nahibalo kon hain na kita sa agos sa panahon diha sa pagkatuman sa katuyoan sa Diyos, unsang tinamdan ang angay natong batonan?

⁵ Ikaw sama rang makapaneguro nga moabot gayod “ang adlaw sa kasuko ni Jehova” batok sa presenteng sistema sa mga butang; kini mahimong usa ka tinuod nga panghitabo, nga aktuwal ug kasaligan. Lagmit nga wala ka magduhaduha niana. Sama kang Sofonias ug Habacuc, wala ka mahibalo sa eksaktong panahon sa pag-abot nianang adlawa. (Marcos 13:32) Bisan pa niana, moabot gayod kini, ug ang pagkatuman sa tagna sa Bibliya sa imong panahon kusganong nagpaila nga duol na kining moabot. Busa, ang gipasiugda ni Jehova ngadto sa mga manalagna mapadapat kanimo—‘Magpadayon sa pagpaabot niini.’ Ug hinumdomi kining absolutong kamatuoran: Ang atong Diyos mao lamang ang Diyos nga ‘molihok alang sa usa nga magpadayon sa pagpaabot kaniya.’—Isaias 64:4.

⁶ Mahimong ipakita nimo ang hustong tinamdan sa pagpaabot, nga magpasundayag pinaagi sa imong ginabuhat nga ikaw masaligon nga moabot “ang adlaw sa kasuko ni Jehova” sa eksaktong panahon. Ang imong pagkakombinsir niana ug pagpahaom sa imong mga buhat sa imong pagtuo maoy kaharmonya sa giingon ni Jesus. Iyang giawhag ang mga apostoles ug ang tanang dinihogang mga Kristohanon: “Baksi ang inyong hawak ug pasigaha ang inyong mga lampara, ug magpakasama kamo sa mga tawong nagapaabot sa ilang agalon . . . Malipayon kadtong mga ulipona nga sa pag-abot sa agalon makaplagang nagabantay! Sa pagkatinuod ako magaingon kaninyo, Iyang baksan ang iyang kaugalingon ug pahiragon sila sa lamesa ug duolon ug alagaran sila.” (Lucas 12:35-37) Oo, ang hustong tinamdan sa pagpaabot magpadayag ug pagkamasaligon nga moabot ang dakong adlaw ni Jehova nga dili maulahi bisag usa ka gutlo sumala sa iyang katuyoan.

7, 8. (a) Unsay sangpotanan sa pagpasundayag sa Diyos ug pailob? (b) Giawhag kita ni Pedro nga ipasundayag ang unsang tinamdan?

⁷ Nagpaabot na ang modernong-panahong mga alagad sa Diyos sa wala pa matukod ang gingharian sa Diyos sa langit niadtong 1914 ug nagpaabot sukad niadto. Dili kay wala silay ginabuhat samtang nagpaabot. Sa kasukwahi, nagpadayon silang aktibo sa ilang hinatag-sa-Diyos nga buluhatong pagsangyaw. (Buhat 1:8) Ugaling, pamalandonga kini: Kon miabot pa ang dakong adlaw ni Jehova niadtong 1914, unsa kahay imong kahimtang? Bisan pag nahitabo kana 40 ka tuig kanhi, niadtong panahona ikaw ba usa ka tawo “diha sa balaang mga buhat sa panggawi ug mga buhat sa diyosnong pagkamahinalaron”? (2 Pedro 3:11) Ug komosta ang mga membro sa inyong pamilya nga maoy mga Saksi o ang imong suod kaayong mga higala diha sa kongregasyon? Tin-aw nga kadtong panahona sa pagpaabot maoy nagbukas sa dalan sa kaluwasan alang kanimo ug sa daghang sama kanimo, sumala sa gipakita sa 2 Pedro 3:9. Tungod kay wala dayon laglaga ni Jehova ang tibuok daotang sistema human matukod ang Gingharian, ang daghan nakaarang sa paghinulsol, sama nga ang mga taga-Nineve nakaarang sa paghinulsol ug sila wala mangalaglag. Aduna kitay bug-os nga katarongan sa pag-uyon sa mga pulong ni apostol Pedro: “Isipa ang pailob sa atong Ginoo ingong kaluwasan.” (2 Pedro 3:15) Ug posible karong panahona nga ang mga indibiduwal maghinulsol o magbag-o sa ilang kinabuhi ug panghunahuna.

⁸ Tinuod, ang usa ka Kristohanon mahimong dili interesadong maghunahuna sa kahimtang sa kapanahonan ni Miqueas, Sofonias, ug Habacuc. “Kon buot sabton,” siya basin moingon, “kadto dugay na kaayo!” Apan unsang mga pagtulon-an ang atong makat-onan? Ato nang nahisgotan ang tambag ni Pedro nga ang mga Kristohanon angay nga mahimong mga tawo sa “balaang mga buhat sa panggawi ug mga buhat sa diyosnong pagkamahinalaron.” Human gayod sa maong mga pulong, gipasiugda ni Pedro ang laing panginahanglan—nga kinahanglan kitang “nagapaabot ug nagabutang kanunay sa hunahuna sa presensiya sa adlaw ni Jehova.” (2 Pedro 3:11, 12) Busa, angay natong ‘ibutang kanunay sa hunahuna’ kanang adlawa, nga ‘nagapaabot niana.’

 9. Nganong angay kitang ‘magpadayon sa pagbantay’?

⁹ Kon kita nag-alagad kang Jehova sulod sa pipila pa ka tuig o sa daghan nang katuigan, kita ba ‘nagapadayon sa pagbantay ug nagapakita sa samang tinamdan sa pagpaabot’ nga gipakita ni Miqueas? (Roma 13:11) Tinuod, ingong mga tawo, atong gipangandoy nga mahibalo kon kanus-a moabot ang kataposan ug kon pipila na lang ang nahibiling panahon hangtod mahitabo kana. Apan angay natong dawaton ang kamatuoran nga dili gayod nato mahibaloan kana. Hinumdomi ang mga pulong ni Jesus: “Kon nahibaloan pa sa tagbalay kon unsang yugtoa sa pagbantay moabot ang kawatan, magpabilin unta siyang nagmata ug dili motugot nga lungkabon ang iyang balay. Tungod niini pamatud-i usab ninyo nga kamo andam, tungod kay sa takna nga wala ninyo hunahunaa, ang Anak sa tawo moabot.”—Mateo 24:43, 44.

10. Unsang mga pagtulon-an ang imong makat-onan gikan sa kinabuhi ug panglantaw ni apostol Juan?

¹⁰ Ang giingon ni Jesus daw susama sa gisulat ni Miqueas, Sofonias, ug Habacuc. Apan si Jesus nagpasiugda sa punto, dili alang sa katawhan sa karaang panahon, kondili alang sa iyang mga sumusunod, alang gayod kanato. Ang daghang debotadong mga Kristohanon nagpadapat gayod sa tambag ni Jesus; ilang ‘gipamatud-an nga sila andam,’ nga nagpadayon sa pagpaabot. Si apostol Juan maoy usa ka maayong panig-ingnan niini. Siya maoy usa sa upat nga didto sa Bukid sa mga Olibo nga nangutana kang Jesus bahin sa kataposan sa sistema sa mga butang. (Mateo 24:3; Marcos 13:3, 4) Tuig 33 K.P. kadto, apan dili makasusi si Juan ug bisan unsang talaan sa mga petsa sa pagtino kon unsa na ka duol ang kataposan. Karon, hunahunaang milabay na ang mga 60 ka tuig sukad niadto. Si Juan tigulang na, apan siya wala batiag kalaay ug siya nagpadayon sa pagpaabot. Sa kasukwahi, sa dihang nabatian niyang miingon si Jesus: “Oo; ako moanha sa madali,” si Juan mitubag: “Amen! Umari ka, Ginoong Jesus.” Wala magbasol si Juan sa iyang paagi sa pagkinabuhi. Kombinsido siya nga sa dihang ipatuman ni Jehova ang iyang paghukom, gantihan usab Niya ang matag usa sumala sa iyang mga buhat. (Pinadayag 22:12, 20) Bisan kon kanus-a ipatuman ang maong paghukom, buot ni Juan nga ‘maandam,’ sumala sa gitambag ni Ginoong Jesus. Mao ba usab kanay imong pagbati?

11. Sa unsang paagi ang katawhan sa panahon ni Miqueas ug ni Oseas lahi kanila?

¹¹ Tagda ang laing pagtulon-an nga atong makat-onan gikan sa mga manalagna nga nagkinabuhi sa nagsingabot ang panahong ipatuman na ang mga paghukom ni Jehova, ang una batok sa Israel ug unya batok sa Juda. Samtang si Miqueas ‘nagpadayon sa pagbantay ug nagpakitag nagapaabot nga tinamdan,’ ang daghan alirong kaniya wala maghimo niana. Sila nahimong mga “nagdumot sa maayo ug nahigugma sa pagkadaotan.” Si Miqueas nagpasidaan nga kon sila dili mag-usab, sila “magpakitabang kang Jehova, apan siya dili motubag kanila.” (Miqueas 3:2, 4; 7:7) Ang kontemporaryo ni Miqueas nga si Oseas migamit ug mga pulong kabahin sa pagpanguma sa dihang giawhag niya ang mga sakop sa amihanang gingharian sa Israel: “Pagpugas kamo ug binhi sa pagkamatarong; pag-ani kamo sumala sa mahigugmaong-kalulot. Pagtikad kamo ug yuta nga arang matikad, sa dihang may panahon pa sa pagpangita kang Jehova.” Bisan pa sa maong pag-awhag, ang kadaghanan wala mamati. Sila “nagdaro sa pagkadaotan,” mao nga pagkadili-matarong ang ilang giani. (Oseas 10:12, 13) Sila nahimong konsentidor o naghimo pa sa hiwi nga mga buhat, nga ‘misalig sa ilang kaugalingong dalan’ inay sa mga dalan ni Jehova. Mahimong maghunahuna ang pipila karon, ‘Sa unsang paagi kadto nahitabo sa matuod nga mga magsisimba nga nagpuyo didto mismo sa Yutang Saad?’ Gipakita ni Oseas nga ang pangunang hinungdan sa ilang suliran mao ang tinamdan nga sama sa tinamdan nga angay natong pagalikayan kon gusto natong magpadayon sa pagpaabot sa dakong adlaw ni Jehova. Ang pagkahimong hayahay sa kinabuhi ug “nangabusog.”

12. (a) Unsang dili-maayong panghitabo taliwala sa mga Israelinhon sa wala pa ang 740 W.K.P. ang gipaila ni Oseas? (b) Sa unsang mga paagi gipadayag sa katawhan nga sila “nangabusog”?

¹² Sa pagkasulod sa katawhan sa Diyos sa Yutang Saad, nga maoy usa ka yuta diin nagaagay ang gatas ug dugos, sila nagtagamtam ug kadagaya. Unsay ilang sanong? Si Oseas nagpahayag sa mga pulong ni Jehova: “Sumala sa ilang sibsibanan, mao man ang pagkabusog nila. Sila nangabusog ug ang ilang kasingkasing nabayaw. Mao nga sila nalimot kanako.” (Oseas 13:6) Kasiglohang miagi, gipasidan-an sa Diyos ang iyang katawhan sa mao mismong kapeligrohan. (Deuteronomio 8:11-14; 32:15) Bisan pa niadto, sa mga panahon ni Oseas ug Amos, ang mga Israelinhon nalimot kang Jehova ug sa iyang mga sugo—“sila nangabusog.” Si Amos mihatag kanato ug espesipikong mga detalye. Siya mihisgot nga daghan ang nakabaton ug luhong mga kasangkapan sa ilang mga balay, ug ang pipila ka pamilya nakabaton pag ikaduhang mga balay. Sila lamian kaayog mga pagkaon, nag-inom ug lami nga bino gikan sa piniling mga sudlanan, ug naghaplas ug “piniling mga lana” sa ilang mga panit, tingali ingong mga pahumot. (Amos 3:12, 15; 6:4-6) Lagmit nahibalo ka nga walay usa sa maong mga butang sa kinabuhi ang daotan, apan ang sobrang pagtagad niana makadaot gayod.

13. Unsang kahuyangan ang nakita sa mga Israelinhon, bisan kon sila dato o kabos?

¹³ Tinuod, dili tanan sa amihanang gingharian ang nangadato ug “nangabusog”? Ang pipila maoy kabos ug naglisod sa pangabuhi ug sa pagpakaon sa pamilya. (Amos 2:6; 4:1; 8:4-6) Mao usab kanay kahimtang karon sa daghang bahin sa yuta. Ang tambag ba sa Diyos nga anaa sa Oseas 13:6 mapadapat bisan sa mga kabos sa karaang Israel, ug kini ba mapadapat karon? Mapadapat gayod. Gipakita ni Jehova nga bisan kon dato man o dili ang usa ka matuod nga magsisimba, angay siyang magbantay nga dili mapuliki kaayo sa materyal nga mga butang sa kinabuhi aron dili siya ‘malimot sa Diyos.’—Lucas 12:22-30.

14. Nganong haom nga atong pamalandongon ang atong kaikag sa pagpaabot?

¹⁴ Tungod kay nagkinabuhi kita sa panahong makalingi kita sa nangagi ug tungod sa pagkatuman sa daghan kaayong tagna sa Bibliya, aduna kitay dugang katarongan nga mahimong igmat, andam, magpaabot. Apan, unsa na man kon nagpaabot na kitag taastaas nga panahon, tingali sa daghan na kaayong katuigan? Nanlimbasog kita kanhi sa ministeryo ug mihimog personal nga mga desisyon nga nagpasundayag nga kita nagtuo nga duol na ang adlaw ni Jehova. Apan wala pa kini moabot. Nagpadayon ba kita sa pagpaabot? Makasukna kita sa personal niining pangutanaha, ‘Maikagon ba gihapon akong nagpaabot o kini ba nabugnaw na?’—Pinadayag 2:4.

15. Unsay pipila ka ilhanan nga basin nagkaawop ang atong kaikag sa pagpaabot?

¹⁵ Masukod nato ang atong kaikag sa pagpaabot sa daghang paagi, apan nganong dili susihon ang mga kinaiya nga makita diha sa kahubitan ni Amos sa mga tawo sa iyang adlaw nga “nangabusog”? Samtang ato kanang susihon, atong matino sa atong kaugalingon kon may kiling ba kita sa pagkatagbaw o ‘pagkabusog.’ Ang usa ka Kristohanon nga sa nangaging katuigan nagpasundayag sa iyang kaikag sa pagpaabot diha sa iyang panghunahuna ug mga aksiyon basin mosugod sa pagpanlimbasog sa pagbatog mas maluhong balay o mahalong kotse, labing modernong estilo sa sinina, mahalong mga kosmetiks ug alahas, o sa dekalidad nga bino ug daghang pagkaon. Wala isugyot sa Bibliya nga kita mag-ermitanyo, nga dili magbaton ug kasarangang kalingawan. Ang tawo nga naghago sa pagbuhat angayng “mokaon ug moinom ug magpahimulos ug maayo sa tanan niyang kahago.” (Ecclesiastes 3:13) Bisan pa niana, adunay kapeligrohan nga ang usa ka Kristohanon maghatag ug sobrang pagtagad sa pagkaon, ilimnon, ug sa personal nga panagway. (1 Pedro 3:3) Miingon si Jesus nga nabalhin ang pagtagad sa pipila ka dinihogan sa Asia Minor, nga nagpamatuod nga usa kini ka kapeligrohan alang sa mga Kristohanon. (Pinadayag 3:14-17) Ang susamang butang nahitabo ba kanato? Kita ba “nangabusog,” nga tingali napuliki sa materyal nga mga butang? Nagkaawop ba ang atong kaikag sa pagpaabot?—Roma 8:5-8.

16. Nganong dili makahatag ug kaayohan sa atong mga anak ang pagdasig kanila sa pagpanlimbasog alang sa “nangabusog” o hamugaway nga pagkinabuhi?

¹⁶ Ang atong nagkaawop nga kaikag sa pagpaabot sa dakong adlaw ni Jehova madayag diha sa tambag nga atong ihatag sa atong mga anak o sa uban. Ang usa ka Kristohanon mahimong mangatarongan: ‘Gipalabi ko ang dili pagkuhag taas nga edukasyon o karera kay nagtuo ko nga ang kataposan duol na kaayo. Gusto kong paneguroon karon nga ang akong mga anak makabatog edukasyon nga makahatag kanilag hamugaway nga kinabuhi.’ Ang pipila sa panahon ni Oseas basin may susamang mga panghunahuna. Kon mao, nakahatag bag kaayohan sa ilang mga anak ang tambag sa mga ginikanan nga nasentro sa “nangabusog” o hamugaway nga estilo sa kinabuhi? Ug kon ang ilang mga anak niadtong panahona nangagpas ug hamugaway nga kinabuhi, unsa kahay ilang kahimtang niadtong 740 W.K.P., sa dihang ang Samaria gipukan sa mga Asiryanhon?—Oseas 13:16; Sofonias 1:12, 13.

17. Sa unsang paagi kita makasundog gayod kang Miqueas?

¹⁷ Sama sa matuod nga mga magsisimba sa karaang mga panahon, kita makasalig nga ang gisaad sa Diyos matuman sa tukmang panahon, sa iyang tinudlong panahon. (Josue 23:14) Ang manalagnang si Miqueas maalamong nagpadayag ug mahulatong tinamdan alang sa Diyos sa iyang kaluwasan. Tungod kay makaarang kita sa pagpalandong sa kagahapon, makasusi kita sa iyang talaan sa panahon ug makasabot nga si Miqueas nagkinabuhi sa panahon nga ang Samaria hapit nang mapukan. Komosta man kita ug ang atong panahon karon? Kon hinumdoman nato ang atong kagahapon, tin-aw ba nga nakahimo kitag maalamong mga desisyon o pagpili, sama sa mga desisyon bahin sa sekular nga karera, estilo sa kinabuhi, ug sa bug-os-panahong ministeryo? Tinuod, wala kita mahibalo ‘sa maong adlaw ug takna.’ (Mateo 24:36-42) Sa walay duhaduha kita nagagawi nga maalamon kon kita nag-ugmad sa tinamdan nga sama sa kang Miqueas ug nagalihok nga uyon niana. Ug sa dihang si Miqueas gantihan ug kinabuhi sa napasig-uling paraiso sa yuta, pagkadako unya sa atong kalipay sa pagkahibalo nga kita nakabatog kaayohan gikan sa iyang matagnaong mensahe ug panig-ingnan sa pagkamatinumanon! Kita mahimo unyang buhing pamatuod nga si Jehova mao ang Diyos sa kaluwasan!

18, 19. (a) Unsang umaabot nga katalagman ang gipunting ni Abdias? (b) Sa unsang paagi si Abdias mihatag ug paglaom sa Israel?

¹⁸ Ang atong pagkamasaligon adunay lig-ong pasikaranan. Pananglitan, hunahunaa ang mubo nga matagnaong basahon ni Abdias. Kini naghisgot ilabina sa karaang Edom, nga nagpadayag sa paghukom ni Jehova batok sa maong katawhan nga nagdaogdaog sa ilang “igsoon,” ang Israel. (Abdias 12) Nahitabo gayod ang gitagna nga kalaglagan, sumala sa atong nahisgotan sa Kapitulo 10 niining libroha. Ang mga Babilonyanhon ubos ni Nabonido nagbihag sa Edom sa tungatunga sa ikaunom ka siglo W.K.P., ug ang Edom nahanaw na ingong usa ka nasod. Hinuon, adunay laing hinungdanong ideya sa mensahe ni Abdias, usa ka ideya nga may kalabotan sa atong pagpadayon sa pagpaabot sa dakong adlaw ni Jehova.

¹⁹ Nahibalo ka nga ang kaawayng nasod (Babilonya) nga naglaglag sa Edom nagpatuman usab sa silot sa Diyos sa iyang dili-matinumanong katawhan. Niadtong 607 W.K.P., gilaglag sa mga Babilonyanhon ang Jerusalem ug gibihag ang mga Hudiyo. Unya ang yuta nahimong kamingawan. Kana ba mao ang kataposan sa mga butang? Dili. Pinaagi ni Abdias gitagna ni Jehova nga ang mga Israelinhon makabawi sa ilang yuta. Sa Abdias 17, imong mabasa kining makapadasig nga saad: “Mahiadto sa Bukid sa Zion kadtong makaikyas, ug kana mahimong balaan; ug mapanag-iya sa balay ni Jacob ang mga butang nga ilang panag-iyahon.”

20, 21. Nganong ang Abdias 17 makapahupay kanato?

²⁰ Gipamatud-an sa kasaysayan nga natuman ang gipamulong ni Jehova pinaagi ni Abdias. Kana gitagna sa Diyos, ug kana natuman. Ang libolibong binihag gikan sa Juda ug Israel namalik niadtong 537 W.K.P. Sa tabang ni Jehova, gihimo sa mga nahibalik ang kamingawan nga usa ka malunhawng paraiso. Imong nabasa sa Isaias 11:6-9 ug 35:1-7 ang mga tagna bahin sa maong kahibulongang kausaban. Ang labing hinungdanon mao ang pagkatukod pag-usab sa matuod nga pagsimba, nga nasentro sa natukod pag-usab nga templo ni Jehova. Busa ang Abdias 17 mahimong laing pamatuod alang kanato nga kasaligan ang mga saad ni Jehova. Kana kanunayng matuman.

²¹ Gitapos ni Abdias ang iyang tagna pinaagi niining mapasiugdahong mga pulong: “Ang pagkahari maiya ni Jehova.” (Abdias 21) Kay nagsalig sa maong saad, ikaw nagapaabot sa mahimayaong panahon sa dihang si Jehova magamando pinaagi ni Jesu-Kristo nga walay pagsupak sa tibuok uniberso, nga apil ang atong planeta. Bisan kon ikaw nagpaabot sa mubo pang panahon o sa daghan nang katuigan sa dakong adlaw ni Jehova—uban sa moresultang mga panalangin—makapaneguro ka sa bug-os nga matuman gayod ang maong binase-sa-Bibliya nga mga gilaoman.

22. Nganong buot nimo nga ang imong panglantaw magpadayag kon unsay giingon sa Habacuc 2:3 ug Miqueas 4:5?

²² Busa haom nga sublion ang pasalig ni Habacuc, nga mapadapat gayod sa atong panahon: “Ang panan-awon alang pa sa tinudlong panahon, ug kini nagadali paingon sa kataposan, ug kini dili magbakak. Bisan pa kon kini malangan, padayon sa pagpaabot niini; kay kini matuman gayod. Kini dili maulahi.” (Habacuc 2:3) Bisan pag ang dakong adlaw ni Jehova maorag nalangan gikan sa tawhanong panglantaw, ang iyang adlaw moabot gayod sumala sa gieskedyul niana. Kana ang gisaad ni Jehova. Busa, kadtong nag-alagad kang Jehova sa daghan nang katuigan ug kadtong bag-o pang nagsimba kaniya magkauban sa pagpadayon nga masaligon sama nianang gipahayag sa Miqueas 4:5: “Kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.”