Isulti ang Putling Pinulongan ug Mabuhing Walay Kataposan!

“Pangitaa ninyo si Jehova, pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”—SOFONIAS 2:3.

 1. (a) Unsang mga metodo ang gigamit sa mga estudyante sa pagkat-on ug langyawng pinulongan? (b) Nganong isulti ang putling pinulongan?

MAKAT-ONAN sa mga estudyante ang usa ka bag-ong pinulongan pinaagi sa paggamit sa gramarya nga metodo o gisulting-pinulongan nga metodo. Ubos sa gramarya nga metodo, kasagarang mogamit silag mga teksbok ug tun-an ang kalagdaan sa gramatika. Ubos sa gisulting-pinulongan nga metodo, suhiron nila ang mga tingog ug mga sumbanan sa pulong nga isulti sa ilang magtutudlo. Ang duha ka metodo magamit sa pagkat-on sa “putling pinulongan.” Ug hinungdanon nga kita magasulti niining pinulongana kon laoman nato nga “pagatagoan sa adlaw sa kasuko ni Jehova.”​—Sofonias 2:1-3; 3:8, 9.

 2. Sa unsang paagi makakat-on kita sa butang matawag kalagdaan sa gramatika sa putling pinulongan?

² Ang pangunang teksbok nga gamiton sa pagkat-on sa putling pinulongan mao ang Bibliya. Ang makugihong pagtuon niini ug sa gibase-sa-Bibliyang mga basahon magtudlo kanimo sa matawag nga kalagdaan sa gramatika sa putling pinulongan. Ang usa ka pagtuon sa balay sa Bibliya nga gidumala sa usa sa mga Saksi ni Jehova maoy maayong pagsugod. Alang niadtong nagpahinungod sa Diyos, ang regular ug makugihong pagtuon sa Kasulatan maoy kinahanglanon. Apan duna bay epektibo pa gayod nga mga paagi sa pagkat-on sa putling pinulongan? Ug unsang mga benepisyo ang mosangpot sa pagsulti niini?

Kon Unsaon Pagkat-on sa Putling Pinulongan

 3. Unsa ang usa ka paagi sa pagkat-on sa putling pinulongan?

³ Usa ka paagi sa pagkat-on sa putling pinulongan mao ang pagkonektar sa mga kamatuoran nga imong nahikat-onan uban sa mga punto nga imo nang nasayran, ingon nga tingali anam-anam nga ikonektar sa usa ka estudyanteg pinulongan ang lainlaing kalagdaan sa gramatika. Pananglitan, sa usa ka panahon tingali imong nasayran na nga si Jesu-Kristo mao ang Anak sa Diyos, apan gamay ra ang imong nasayran bahin sa iyang mga katungdanan. Sukad niadto, tingalig natudloan ka sa pagtuon sa Bibliya nga si Kristo karon nagamando na ingong langitnong Hari ug sa iyang Usa ka Libo ka Tuig nga Pagmando, ang masinugtanong katawhan pagabayawon ngadto sa kahingpitan. (Pinadayag 20:5, 6) Oo, ang pagdugtong sa bag-ong mga ideya uban sa nasayran na mopausbaw sa imong pagsabot sa putling pinulongan.

 4. (a) Unsa ang laing paagi sa pagkat-on sa ‘mga kalagdaan sa gramatika’ sa putling pinulongan, ug unsang asoy sa Bibliya ang gigamit sa pag-ilustrar niini? (b) Unsay nahitabo sa milihok si Gideon ug ang iyang tulo ka gatos ka tawo? (c) Ang asoy bahin kang Gideon nagatudlo sa unsang leksiyon?

⁴ Ang laing paagi sa pagkat-on sa ‘mga lagda sa gramatika’ sa putling pinulongan mao ang paghanduraw sa mga hitabo sa Bibliya. Sa pag-ilustrar: Sulayi ang ‘pagtan-aw ug pagpamati’ sa asoy nga nahitala sa Maghuhukom 7:15-23. Tan-awa! Gibahin sa Israelinhong maghuhukom nga si Gideon ang iyang mga panon ngadto sa tulo ka kompaniya nga tagsa ka gatos ug tawo ang matag usa. Sa kangitngitan hilom silang milugsong gikan sa Bukid Gilboa ug giliyokan ang kampo sa nangatulog nga mga Midianhon. Armado ba kaayo sila, kadtong tulo ka gatos? Dili sa militaryong paagi. Aw, sila sa pagkamatamayon kataw-an ra sa mapahitas-ong mga militarista! Ang matag tawo may usa ra ka trompeta, usa ka dakong tibod, ug usa ka sulo sulod sa tibod. Apan pamati! Sa usa ka pagsignal, gihuyop sa usa ka gatos ka tawong uban ni Gideon ang ilang mga trompeta ug gibuak ang ilang mga tibod. Maingon usab ang duha ka gatos pang uban. Gipataas sa tanan ang nagdilaab nga mga sulo, nga imo silang mabatian nga naninggit: “Ang espada ni Jehova ug ni Gideon!” Nakapalisang kaayo kadto sa mga Midianhon! Sila nagkapandolpandol sa paggula sa ilang mga tolda, nga ang ilang mga mata nga nagpiratpirat pa namudlat tungod sa kalisang sa nanglumpat nga mga siga nga gidan-agan ang mga dagway sa landong ug nahaling ang supertisyosong kahadlok. Sa misugod ­pagkalagiw ang mga Midianhon, gipadayon sa paghuyop sa mga tawo ni Gideon ang ilang mga trompeta, ug gipahinabo sa Diyos nga mag-unay ang ilang mga kaaway. Pagkagamhanang leksiyon sa putling pinulongan! Ang Diyos makaluwas sa iyang mga alagad nga walay tawhanong puwersang militar. Dugang pa, “Dili pagabiyaan ni Jehova ang iyang katawhan tungod sa iyang dakong ngalan.”​—1 Samuel 12:22.

 5. Sa unsang paagi ang Kristohanong mga tigom makatabang sa pagdalisay sa atong sinultihan?

⁵ Sa dihang ang mga estudyante tudloan sa usa ka langyawng pinulongan pinaagi sa gisulting-pinulongan nga metodo, sulayan nila ang pagsubli sa mga tingog ug mga sumbanan sa pulong sa magtutudlo. Pagkamaayong kahigayonan ang pagsulti sa putling pinulongan sa panahon sa Kristohanong mga tigom! Dinha kita makadungog sa uban nga magpahayag sa ilang kaugalingon sa maong pinulongan sa Kasulatanhong kamatuoran, ug kita makapribilehiyo sa pagkomento mismo. Mahadlok ba kita nga basin makasulti kitag sayop? Ayaw itugot nga kana maoy atong pangunang kabalak-an, kay ang usa ka sayop nga malulutong tul-iron sa ansiano nga magdumala sa usa ka tigom sama sa senemanang Pagtuon sa Bantayanang Torre makapadalisay sa atong sinultihan. Busa, tambong ug pakig-ambit sa regular sa Kristohanong mga tigom.​—Hebreohanon 10:24, 25.

Pagyuhot sa mga Kahugawan

 6. Nganong may dakong kalainan tali sa mga Saksi ni Jehova ug sa relihiyosong mga organisasyon sa Kakristiyanohan?

⁶ Kadtong nagapahayag sa katuyoan ni Jehova ug nagapahayag sa iyang langitnong Gingharian nagasulti sa putling pinulongan ingong iyang mga Saksi. Sila nagapaila sa iyang ngalan ug nagaalagad kaniya “abaga sa abaga,” o uban ang panag-uyon. (Sofonias 3:9) Bisan pag ang mga relihiyon sa Kakristiyanohan nagbaton sa Bibliya, sila wala magsulti sa putling pinulongan o magtawag sa ngalan sa Diyos diha sa pagtuo. (Joel 2:32) Sila walay nahiusang mensahe nga gibase sa Kasulatan. Ngano? Kay ilang gibutang ang relihiyosong mga tradisyon, mga kalibotanong pilosopiya, ug politikanhong mga pag-unong nga labaw sa Pulong sa Diyos. Ang ilang mga katuyoan, mga paglaom, ug mga metodo maoy iya niining daotang kalibotan.

 7. Unsang mga kalainan tali sa mga Saksi ni Jehova ug sa bakak nga mga relihiyon ang gipaila sa 1 Juan 4:4-6?

⁷ Ang Kakristiyanohan​—sa pagkamatuod, ang bug-os nga imperyo sa kalibotan sa bakak nga relihiyon​—wala magsulti sa samang pinulongan sama sa mga Saksi ni Jehova. Makaiikag, niadtong nagsulti sa putling pinulongan, si apostol Juan misulat: “Kamo nagagikan sa Diyos, . . . ug sila inyo nang gidaog, tungod kay siya nga nahiusa kaninyo labaw pa kaniya nga nahiusa sa kalibotan. Sila nagagikan sa kalibotan; kana ang hinungdang sila nagasulti sa nagagikan sa kalibotan ug ang kalibotan nagapatalinghog kanila. Kita nagagikan sa Diyos. Siya nga nagbaton sa kahibalo sa Diyos nagapatalinghog kanato; siya nga wala magagikan sa Diyos dili magapatalinghog kanato.” (1 Juan 4:4-6) Ang mga alagad ni Jehova midaog sa bakak nga mga magtutudlo tungod kay ang Diyos, kinsa nahiusa sa iyang katawhan, “labaw kay [sa Yawa, kinsa] nahiusa sa kalibotan,” ang dili-matarong tawhanong katilingban. Sanglit ang mga apostata “nagagikan sa kalibotan” ug nagbaton sa daotang espiritu niini, “sila nagasulti sa butang nagagikan sa kalibotan ug ang kalibotan nagapatalinghog kanila.” Apan ang karnerohong mga indibiduwal nagapatalinghog niadtong nagagikan sa Diyos, kay nakaamgo nga ang katawhan ni Jehova nagasulti sa putling pinulongan sa kamatuoran sa Bibliya nga gitagana pinaagi sa iyang organisasyon.

 8. Kinsa ang tawo sa kalapasan?

⁸ Ang usa ka dakong apostasiya gitagna, ug ang ‘misteryo sa pagkamalapason’ naglihok na sa unang siglo K.P. Sa nahaigong panahon, ang mga tawo nga nagdawat​—o nagpahimulos—​sa mga katungdanan sa pagkamagtutudlo diha sa kongregasyon nanudlog daghang bakak nga mga doktrina. Ang ilang pinulongan dili putli. Busa mitungha ang daghag-sakop nga “tawo sa kalapasan,” ang klero sa Kakristiyanohan, nga nagapos sa bakak relihiyosong mga tradisyon, kalibotanong pilosopiya, ug dikasulatanhong mga pagtulon-an.​—2 Tesalonica 2:3, 7.

Putling Pinulongan Nadungog sa Tibuok Kalibotan

 9. Unsa ang relihiyosong mga panghitabo sulod sa ika-19ng siglo?

⁹ Diyutay rang mga tawo nga nahadlok sa Diyos ang ‘nakigbugno sa lisod nga bugno alang sa pagtuo nga gitugyan ngadto sa mga balaan.’ (Judas 3) Diin ba hikaplagan ang maong mga magtutuo? Sa kasiglohan, gihuptan sa bakak nga relihiyon ang kadaghanan diha sa espirituwal nga kangitngitan, apan nailhan sa Diyos ang pipila nga nagbaton sa iyang pag-uyon. (2 Timoteo 2:19) Apan taliwala sa komersiyal, industriyal, ug sosyal nga kausaban sa ika-19ng siglo, mitungha ang mga tingog nga nalahi sa katibuk-ang kaguliyang sa bakak nga relihiyon. Gipaningkamotan sa gagmayng mga pundok ang pagsabot sa kahulogan sa mga ilhanan sa kapanahonan ug pagtagna sa ikaduhang pag-abot ni Jesus, apan dili ang tanan nagsulti sa putling pinulongan.

10. Haing “ikaduhang pag-anhi” nga grupo ang gipili sa Diyos sa pagsulti sa putling pinulongan, ug nganong dayag nga ang kamot ni Jehova nag-uban kanila?

¹⁰ Niadtong 1879, hinunoa, natin-aw kon unsang tingog sa “ikaduhang pag-anhi” ang gipili ni Jehova aron sa pagsulti sa putling pinulongan ingong iyang mga Saksi. Niadto ang usa ka gamayng grupong nagtuon sa Bibliya nga gipangunhan ni Charles Taze Russell nagtigom sa Pittsburgh, Pennsylvania, U.S.A. Natino nila nga ang ikaduhang pag-abot ni Jesus magsugod sa iyang dili-makitang presensiya, nga diha sa unahan ang panahon sa kasakitan sa kalibotan, ug kini sundan sa Usa ka Libo ka Tuig nga Pagmando ni Kristo nga magpasig-uli sa Paraiso sa yuta, uban sa kinabuhing dayon alang sa masinugtanong mga tawo. Sa Hulyo 1879 kining mga Estudyante sa Bibliya misugod sa pagpatik sa magasin nga karon nailhang Ang Bantayanang Torre. Sa unang isyu 6,000 ka kopya lang ang naapod-apod. Apan “ang kamot ni Jehova” nag-uban niadtong mga Saksi, kay kining magasina karon gipatik na sa 111 ka pinulongan, nga may aberids nga pag-imprenta nga kapig 15,000,000 sa matag isyu.​—Itandi ang Buhat 11:19-21.

11, 12. Unsa ang pila ka Kasulatanhong mga kamatuoran nga nasabtan niadtong nagsulti sa putling pinulongan?

¹¹ Pinaagi sa Bibliya ug sa mga basahon sa mga Saksi ni Jehova, ug ilabina pinaagi sa pagmantala sa maayong balita niining madasigong mga Kristohanon, ang putling pinulongan nahibaloan sa tibuok nga yuta. Ug pagkadagkong mga benepisyo ang gipahimuslan niadtong nagasulti niini! Inay sa pag-ingon nga ‘Ang Diyos maoy Diyos, si Kristo maoy Diyos, ug ang Espiritu Santo maoy Diyos’ diha sa misteryosong pinulongan sa Trinitarianismo, sila uyon sa baroganan sa Bibliya nga si Jehova mao ang Labing Hataas, si Jesu-Kristo ingong ubos mao ang Iyang Anak, ug ang balaang espiritu mao ang kahibulongang aktibong gahom sa Diyos. (Genesis 1:2; Salmo 83:18; Mateo 3:16, 17) Ang mga nagsulti sa putling pinulongan nahibalo nga ang tawo wala maugmad gikan sa ubos nga matang sa kinabuhi apan gilalang sa usa ka mahigugmaong Diyos. (Genesis 1:27; 2:7) Sila nahibalo nga ang kalag mohunong sa paglungtad sa pagkamatay​—usa ka kamatuoran nga magwagtang sa kahadlok sa mga patay. (Ecclesiastes 9:5, 10; Ezekiel 18:4) Ang impiyerno gisabot nga mao ang komung lubnganan sa katawhan, dili usa ka dapit sa kalayonhong pagsakit nga gimugna sa mapintasong diyos. (Job 14:13) Sila nahibalo usab nga ang pagkabanhaw mao ang hinatag-sa-Diyos nga paglaom sa mga patay.​—Juan 5:28, 29; 11:25; Buhat 24:15.

¹² Kadtong nagsulti sa putling pinulongan nagapakitag pagtahod sa dugo ug sa kinabuhi. (Genesis 9:3, 4; Buhat 15:28, 29) Sila nakaamgo nga ang yutan-ong kinabuhi ni Kristo mao ang bili sa lukat nga gibayad alang sa masinugtanong mga tawo. (Mateo 20:28; 1 Juan 2:1, 2) Sila dili gayod moampo sa “mga santos,” kay nahibalo nga ang ilang mga pag-ampo kinahanglang itumong ngadto kang Jehova nga Diyos pinaagi kang Jesu-Kristo. (Juan 14:6, 13, 14) Sanglit ang Pulong sa Diyos nagasupak sa pagsimbag diyosdiyos, ang mga imahen wala gamita sa ilang pagsimba. (Exodo 20:4-6; 1 Corinto 10:14) Ug malikayan nila ang mga kapeligrohan sa demonismo kay sila nagasalikway sa espiritismo, nga ginasupak usab diha sa Bibliya.​—Deuteronomio 18:10-12; Galacia 5:19-21.

13. Nganong kadtong nagsulti sa putling pinulongan wala malibog?

¹³ Ang mga alagad ni Jehova, nga nagasulti sa putling pinulongan, wala malibog bahin sa kon diin na sila sa agos sa panahon. Gitudloan sila ni Jehova nga sila anaa na sa “panahon sa kataposan,” uban ni Jesus nga presente ingong mahimayaong dili-makitang espiritu. (Daniel 12:4; Mateo 24:3-14; 2 Timoteo 3:1-5; 1 Pedro 3:18) Uban sa gamhanang langitnong mga puwersa sa iyang luyo, si Kristo hapit nang mosakay aron sa pagpakigbugno sa pagpatuman sa hukom sa Diyos batok niining sistema sa mga butang. (Daniel 2:44; Pinadayag 16:14, 16; 18:1-8; 19:11-21) Oo, ug kadtong nagsulti sa putling pinulongan puliki sa pagmantala sa maayong balita nga ang Gingharian sa Diyos ubos kang Kristo sa dili madugay magdala sa talagsaong mga panalangin alang sa tanang masinugtanong katawhan sa usa ka paraisong yuta. (Isaias 9:6, 7; Daniel 7:13, 14; Mateo 6:9, 10; 24:14; Lucas 23:43) Kanang tanan, ug igo rang nakarasan nato ang ibabaw! Sa pagkamatuod, ang putling pinulongan mao ang labing tugob, labing bililhong pinulongan sa yuta!

14. Unsang ubang mga kaayohan ang napahimuslan niadtong nagsulti sa putling pinulongan?

¹⁴ Ang mga benepisyo nga gipahimuslan niadtong nagsulti sa putling pinulongan nag-apil sa “pakigdait sa Diyos” nga nagabantay sa mga kasingkasing ug mga gahom sa hunahuna. (Filipos 4:6, 7) Sila nagasugot sa mga kasugoan sa Bibliya, nga nagapausbaw sa kahimsog, kalipay, ug sa katagbawan nga nagagikan sa pagpahimuot kang Jehova. (1 Corinto 6:9, 10) Oo, ug ang mga nagsulti sa putling pinulongan nagbaton sa paglaom sa kinabuhing dayon diha sa gisaad nga bag-ong kalibotan sa Diyos.​—2 Pedro 3:13.

Gamita Kana o Mawala Kana

15. Sa unsang paagi ikaw makabatog benepisyo gikan sa maayong pagsabot sa putling pinulongan?

¹⁵ Aron isulti nimo ang putling pinulongan sa bag-ong kalibotan, kinahanglang ikaw mahibalo pag-ayo niana aron mahimo kining pinulongan nga diha niana ikaw maghunahuna. Sa dihang nagatuon ang usa ka tawo ug usa ka pinulongan, sa sinugdan siya maghunahuna diha sa iyang lumad nga pinulongan ug maghubad sa iyang mga hunahuna nganha sa bag-ong pinulongan. Apan sa pagkahimo niyang mas hanas diha sa bag-ong pinulongan, siya magsugod sa paghunahuna diha niana nga dili na kinahanglan ang paghubad. Sa susama, pinaagi sa makugihong pagtuon, ikaw makabatog maayong pagsabot sa putling pinulongan nga ikaw mahibalo kon unsaon sa pagpadapat sa mga balaod ug mga prinsipyo sa Bibliya aron sa pagsulbad sa mga suliran ug sa pagpabilin sa “dalan sa kinabuhi.”​—Salmo 16:11.

16. Unsay mahitabo kon dili nimo gamitong regular ang putling pinulongan?

¹⁶ Kinahanglang gamiton nimong regular ang putling pinulongan, o ikaw mawad-an sa katakos sa pagsulting maayo niana. Sa pag-ilustrar: Pila ka tuig kanhi, ang pipila kanato nakakat-on ug usa ka langyawng pinulongan. Tingali makahinumdom kitag pila ka pulong sa maong pinulongan apan lagmit nawad-an kitag kahanas niana tungod kay wala nato kana gamita sa kanunay. Ang samang butang mahimong mahitabo sa putling pinulongan. Kon dili nato kana gamitong regular, kita mawad-an sa atong kahanas niana, ug kana may makapasubong sangpotanan sa espirituwal. Busa isulti natong regular kini panahon sa mga tigom ug sa Kristohanong ministeryo. Kining maong mga buluhaton, inubanan sa personal nga pagtuon, makapaarang nato sa pagsulti sa mga butang sa tukmang paagi diha sa putling pinulongan. Ug pagkahinungdanon kana!

17. Unsay nagailustrar nga ang pagsulti mahimong moluwas sa kinabuhi o makapatay?

¹⁷ Ang pagsulti mahimong moluwas sa kinabuhi o makapatay. Kini gipakita panahon sa usa ka kabangian tali sa Israelinhong tribo sa Epraim ug sa Maghuhukom nga si Jepte sa Gilead. Sa pag-ila sa mga taga-Epraim nga misulay sa pagkalagiw tabok sa Subang Jordan, ang mga taga-Gilead migamit sa pulong-sinyas nga “Shibboleth,” nga may tingog nga “sh.” Ang mga lalaki sa Epraim nagpadayag sa ilang kaugalingon ngadto sa mga magbalantay nga taga-Gilead sa mga tabokanan sa Jordan pinaagi sa pagsultig “Sibboleth” inay “Shibboleth,” nga sayop naglitok sa unang tingog sa pulong. Ingong sangpotanan, 42,000 ka taga-Epraim ang gipatay! (Maghuhukom 12:5, 6) Sa susama, ang gitudlo sa klero sa Kakristiyanohan tingali susamag tingog sa putling pinulongan niadtong wala kaayo masinati sa kamatuoran sa Bibliya. Apan ang pagsulti sa bakak relihiyosong paagi mahimong makapatay sa adlaw sa kasuko ni Jehova.

Magpabilin Kitang Nahiusa

18, 19. Unsa ang kahulogan sa Sofonias 3:1-5?

¹⁸ Sa pagtumong sa dili-matinumanong Jerusalem sa karaan ug sa iyang modernong katumbas, ang Kakristiyanohan, kini giingon sa Sofonias 3:1-5: “Alaot siya nga nagasukol ug nagahugaw sa iyang kaugalingon, ang siyudad nga malupigon! Siya wala magpatalinghog sa tingog; siya wala modawat ug disiplina. Siya wala mosalig kang Jehova. Siya wala magpaduol sa iyang Diyos. Ang iyang mga prinsipe sa iyang taliwala maoy mga leyon nga nagangulob. Ang iyang mga maghuhukom maoy mga lobo sa kagabhion nga wala mag-ut-ot sa mga bukog hangtod sa buntag. Ang iyang mga manalagna maoy lampingasan, mga tawo nga mabudhion. Ang iyang mga saserdote mismo nagpasipala sa butang balaan; gilapas nila ang kasugoan. Si Jehova matarong sa iyang taliwala; siya dili mobuhat sa pagkadili-matarong. Sa buntag-buntag iyang gipadayon sa paghatag ang iyang hudisyal nga hukom. Sa maadlaw kini walay kulang. Apan ang usang dili matarong wala makailag kaulaw.” Unsay kahulogan nianang mga pulonga?

¹⁹ Ang karaang Jerusalem ug modernong-adlaw nga Kakristiyanohan mingsukol batok kang Jehova ug naghugaw sa ilang kaugalingon pinaagi sa bakak nga pagsimba. Ang buhat nga daotan sa ilang mga pangulo misangpot sa panglupig. Bisan pa sa balikbalik nga mga pasidaan sa Diyos, sila wala magpatalinghog ug magpaduol kaniya. Ang ilang mga prinsipe nahisama sa mga leyon nga mapintason, nga sa kahambogiro wala manumbaling sa pagkamatarong. Samag manunukob nga mga lobo, giwataswatas sa ilang mga maghuhukom ang hustisya. Ang ilang mga manalagna ‘nagpasipala sa butang balaan ug naglapas sa kasugoan’ sa Diyos. Busa si Jehova duol nang ‘magtigom sa mga nasod ug magtapok sa mga gingharian, aron igabubo diha kanila ang iyang kayugot, ang bug-os niyang nagdilaab nga kasuko.’​—Sofonias 3:8.

20. (a) Unsay pagabuhaton aron maluwas sa adlaw sa kasuko ni Jehova? (b) Sa unsang paagi makalaom ka sa pagtagamtam sa walay-kataposang mga panalangin gikan sa Diyos?

²⁰ Ang adlaw sa kasuko ni Jehova tuling nagsingabot. Busa, aron maluwas ngadto sa bag-ong kalibotan sa Diyos, kat-oni ug isulti ang putling pinulongan sa walay langan. Pinaagi lamang sa pagbuhat niana nga ikaw makakaplag ug panalipod gikan sa espirituwal nga kadaotan karon ug gikan sa tuling-nagsingabot tibuok-kalibotang katalagman. Ang mga Saksi ni Jehova nagapahayag sa adlaw sa kasuko sa Diyos ug sa makapalipay nga mensahe sa iyang Gingharian. Pagkadako sa ilang kahimuot sa pagsulti bahin sa himaya sa iyang pagkahari! (Salmo 145:10-13) Mahiusa uban kanila, ug ikaw makalaom nga makatagamtam sa kinabuhing dayon ug sa ubang mga panalangin gikan sa Tagmugna sa putling pinulongan, ang Soberano Ginoong Jehova.

Unsaon Nimo Pagtubag?

◻ Unsay pila ka paagi sa pagkat-on sa putling pinulongan?

◻ Nganong mapuslanon ang pagsulti sa putling pinulongan?

◻ Unsay mahitabo kon dili nimo gamitong regular ang putling pinulongan?

◻ Sa unsang paagi ang usa ka tawo maluwas sa adlaw sa kasuko ni Jehova ug makatagamtam sa walay-kataposang mga panalangin?

[Hulagway sa panid 16]

Si Gideon ug ang iyang mga tawo naghuyop sa ilang mga trompeta ug nagpataas sa ilang mga sulo

[Hulagway sa panid 18]

Sukad sa 1879 natin-aw nga si Charles Taze Russell ug ang iyang mga kaubanan gigamit sa Diyos sa pagpausbaw sa putling pinulongan

[Mga hulagway sa panid 20]

Nahiusa ka ba sa mga Saksi ni Jehova sa pagsulti sa putling pinulongan?