Kaalam Alang sa Mata

● Ang mata talagsaong pagkabuhat. Kini dili lang nindot kondili gamhanan usab. Ang librong Visual Impact, Visual Teaching nag-ingon nga “kuwarenta porsiyento sa mga nerve fiber sa utok konektado sa retina,” usa ka nipis nga tissue nga naghanig sa sulod sa mata.

Tukmang gitawag ni Jesu-Kristo ang mata ingong “lampara sa lawas.” Sa pagpatin-aw, siya miingon: “Kon yano ang imong mata [tim-os, nakapokus sa maayo], ang imong tibuok lawas mahimong hayag; apan kon daotan ang imong mata, ang imong tibuok lawas mahimong ngitngit.” (Mateo 6:22, 23) Gipahinumdoman kita ni Jesus niining mga pulonga kon nganong ang atong mata gamhanan nga makaimpluwensiya sa atong hunahuna, pagbati, ug lihok. Ang maayong hunahuna makapadan-ag sa kinabuhi; ang daotang hunahuna makapangitngit sa kinabuhi.

Pananglitan, palandonga ang mga pulong ni Jesus diha sa Mateo 5:28, 29: ‘Ang matag usa nga padayong magtan-aw nga maibogon sa usa ka babaye nakapanapaw na uban kaniya diha sa iyang kasingkasing. Karon, kon ang imong tuong mata makapandol kanimo, lusoka kini [sa mahulagwayong pagkasulti].’ Ang iyang punto? Ang mata nga motan-aw nga may daotang pangibog makapukaw ug daotang tinguha nga kon makahigayon, ang tawo hayan makahimog imoral nga buhat ug mawad-an sa pag-uyon sa Diyos.—Santiago 1:14, 15.

Busa maayo gyod nga magpugong sa kaugalingon, bisag lisod kini nga samag paglugit ug mata! Takos bang ibaylo ang kinabuhing walay kataposan sa daklit nga kalipay?

Ang atong ginatan-aw makahaling usab ug kahakog. Busa ang Bibliya nagpasidaan kanato nga ang hakog nga “tinguha sa mga mata . . . wala magagikan sa Amahan, apan nagagikan sa kalibotan. Dugang pa, ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”—1 Juan 2:16, 17.

Ang Bibliya ba estrikto ra kaayo? Dili! Kon kita dili mosunod sa mga prinsipyo niini, kita magkaproblema ug dili magmalipayon. (Galacia 6:7, 8) Kon kita mamati sa Pulong sa Diyos ug sa kaalam niini alang sa atong mahulagwayong mata, kita magmalipayon. “Malipayon kadtong nagapatalinghog sa pulong sa Diyos ug nagasunod niini,” miingon si Jesus. (Lucas 11:28) Dugang pa, sila may paglaom nga mabuhing walay kataposan sa yuta, samtang kadtong mata nga imoral o hakog mawad-ag kinabuhi ug kalipay.