Ikaw ba “Nagasubay sa Dalan sa Pagkamaabiabihon?”
MAINIT kadto nga adlaw. Ang grupo sa mga Saksi ni Jehova, batan-on ug tigulang, kuging nagtrabaho, nanglimpiyo, namintura, ug nagbuhat sa nagkalainlaing mga trabaho sa pag-ayo sa Kingdom Hall. Sa pagkahapon, gikapoy na sila, ug ang uban nanglingkod aron makapahulayg kadiyut.
Dayon, misulod ang tulo nilang igsoong mga babayeng Saksi, nga nagdalag mga sandwich, sopas, keyk, kape, tsa, ug ubang mainom. Unsa ka maayo nga sorpresa alang sa gikapoyng mga kalag! Ang kinabubut-on nga pagpakitag pagkamaabiabihon ug gugma sa tulo ka igsoong babaye wala lamang makapapresko sa mga trabahante sa pisikal kondili nakaamot usab ug kainit ug mahigugmaong espiritu taliwala sa tanang kaubanan sa mga igsoong lalaki ug babaye didto niadtong hapona.
Usa ka Timaan sa Tinuod nga Kristiyanidad
Ang pagkamaabiabihon ug gugma, sa pagkatinuod, dili limitado alang lamang niining linain nga mga okasyon. Mahitungod sa iyang tinuod nga mga sumusunod, ang Tagmugna sa tinuod nga Kristiyanidad, si Jesu-Kristo, nag-ingon: “Pinaagi niini ang tanan mahibalo nga kamo mao ang akong mga disipulo kon kamo adunay paghigugma sa usag usa.” Maingon man, gitambagan ni apostol Pablo ang iyang isigka-Kristohanon: “Sunda ang dalan sa pagkamaabiabihon.” (Juan 13:35; Roma 12:13) Sa laing pulong, ang dalan sa pagkamaabiabihon nga ginapalihok sa dili mahakugong gugma sa uban maoy paagi sa kinabuhi sa tinuod nga mga Kristohanon.
Apan, kining mga hiyasa, dili awtomatikong motungha inigkahimo sa usa nga Kristohanon. Hinunoa, kinahanglang magkugi ang usa aron maugmad sila. Ilabinang matuod kini sa kalibotan karon, diin ang gugma sa kadaghanang tawo nabugnaw, sumala sa gitagna sa Bibliya. (Mateo 24:12) Apan pagkalahi kon makita kining mga hiyasa! Diha sa suod nga pamilya, malipay ang mga membro sa pamilya sa ilang pag-ubanay ug malipay sa pagpalabay sa panahon uban sa pamilya. Maingon man, kon ang mga membro sa kongregasyon magkauban sa regular diha sa mga tigom, sa pag-alagad sa kanataran, ug sa ubang mga okasyon, tinuod nga magkasuod sila sa usag usa. Mahimo silang tinuod nga mga higala, tingali mas suod pa kay sa membro sa pamilya. (Proverbio 18:24) Kining bugkos sa panaghigalaay taliwala sa isigka-saksi ni Jehova nahimong malig-ong salipod batok sa dili maayong mga impluwensiya sa kalibotan.
Ang Katungdanan sa Kristohanong Babaye
Bisag gitambagan ang tanang mga Kristohanon “sa pagsubay sa dalan sa pagkamaabiabihon,” ang Kristohanong mga babaye adunay dakong katungdanan niining bahina. Sa pagkatinuod, dili ba tinuod nga mga babaye kasagaran, ilabina sa mga asawa, ang mobuhat sa daghang buluhaton may labot sa pagpakitag pagkamaabiabihon? Kon manapit ang bana ug mga igsoon sa kongregasyon sa balay alang sa Kristohanong panag-ubanay, dili ba ang asawa ang manghinlo pagkatapos? Bisan ug makatabang ang mga anak ug bana, ug andam nga motabang, dili malikayan nga ang asawa ang may kaakohan sa pagtino nga ang tanan giatiman pag-ayo.
Sa dalayegon, daghang Kristohanong mga asawa mapanglimbasogon sa pagpakita sa tinuod nga pagkamaabiabihon sa ilang espirituwal nga mga igsoong lalaki ug babaye. Tagda, pananglitan, si Dip Yee, usa ka bug-os panahong ministro sa Hong Kong kansang bana maoy usa ka ansiano sa lokal nga kongregasyon. Bisag mohatag kinig daghang trabaho kaniya kon manapit silag mga igsoong lalaki ug babaye, usahay ang tibuok grupo sa pagtuon sa libro, sa ilang balay, malipayon siyang magpakitag pagkamaabiabihon. “Simple lamang ang among pagkaon,” miingon siya. “Maanindot kaayong tan-awon ang mga igsoon nga malipay kaayo sa pag-ubanay ug mapalig-on niana.” Tinuod, pinaagi sa ilang pagkamaabiabihon ang Kristohanong mga babaye adunay dakong bahin sa pagtukod ug mainitong espiritu diha sa kongregasyon.
Tungod sa tanang butang nga nalangkit sa pagpakitag pagkamaabiabihon, kini nagkinahanglan ug pagkamakugihon ug pagsakripisyo sa kaugalingon sa Kristohanong mga babaye. Apan makasalig sila nga ang ilang mga kahago sa gugma gipabilhan ug dako sa ilang mga bana ug sa ubang mapasalamatong mga dumadawat. Tinuod, usahay dunay pila nga dili magpakitag apresasyon sa ginahimo ngadto kanila, apan dili kana katarongan sa pagkaluya sa buut o magmasub-anon, o mohunong sa pagkadili-maabiabihon. Hinumdomi, samtang makalipay ang pagdawat ug mga pahayag sa pasalamat gikan sa uban ug sa masayod nga giapresyar ang atong mga paningkamot, buot kitang magpakitag pagkamaabiabihon tungod kay mao kini ang matarong ug mahigugmaong butang nga buhaton. Labaw sa tanan, makalipay kang Jehova nga atong ginabuhat kana.
Pagbaton ug Timbang nga Hunahuna
Niining mga adlawa nga mahal ang mga palaliton, ang uban nagapanuko sa pagpakitag pagkamaabiabihon tungod kay ilang gibati nga dili sila makaarang sa pagbuhat niini. Dinhi importante nga magbaton kitag timbang nga hunahuna niining butanga. Samtang makahatag dugang kalipay sa okasyon nga dunay espesyal nga pagkaon o ilimnon, dili kini ang importante. Maalamong gipunting kini sa Pulong sa Diyos: “Mas maayo pa ang sud-ang utanon diin anaa ang gugma kay sa karne sa pinatambok nga baka ug ang pagdumot anaa niana.” (Proverbio 15:17) Kon unsay atong nabatonan ug idalit dili mao ang importante. Ang importante ug ginaapresyar mao ang makadasig nga pag-ubanay ug ang espiritu sa gugma nga atong ipakita.
Palandonga ang kahimtang ni Fung Hing, igsoong babaye sa iyang 40 nga panuigon nga adunay masupakong bana. Nagpuyo siya sa usa ka gamayng kuwarto sa usa ka dakong pangbalay sa publiko sa Hong Kong. Dili siya adunahan. Sa pagkatinuod, may part-time siyang trabaho aron makasapar sa kita sa pamilya. Apan, mahinatagon siya sa iyang nabatonan. Kon magsangyaw ang mga Saksi sa kongregasyon sa iyang mga silingan, kanunay niya silang dapiton aron makatimo ug diyutay. Kining mahigugmaong pagtagad giapresyar dili lamang sa iyang isigka-Kristohanon kondili nagpakita usab nga dili kinahanglang adunahan ang usa aron makapakitag tinuod nga pagkamaabiabihon.
Apan, bisag unsa pa natog paningkamot aron mahimong timbang ang atong paglingawlingaw, tingali makita nato nga kinahanglang hunongon ang pila ka butang aron makapakitag tinuod nga pagkamaabiabihon. Takos ba kini sa bili? Oo, kon kita gipalihok sa tinuod Kristohanong gugma. Kay mag-unsa ang gugma kon walay pagsakripisyo? Si Jehova ug si Jesus nagpakitag gugma sa katawhan pinaagi sa paghimog dagkong mga sakripisyo—si Jehova mihalad sa iyang Anak, ug si Jesus ang iyang kaugalingong hingpit nga kinabuhi.—Juan 3:16; 15:13.
Ang unang mga Kristohanon misunod ug mahigugmaong lakang. Mahitungod sa mga igsoon sa Macedonia, si apostol Pablo misulat: “Bisan pa sa dakong pagsulay ilalom sa kasakitan ang ilang madagayaon nga kalipay ug ang ilang tuman nga kakabos miawas hinuon ngadto sa kadagaya sa ilang pagkamahinatagon. Kay ako makapamatuod, oo, sumala sa ilang maarangan, ug labaw pa gani sa ilang maarangan, naghangyo sila kanamo ug gani namugos nga tugotan sila sa malulutong pagtabang.” (2 Corinto 8:2-4) Ang ilang “tuman nga kakabos” ug ang ilang “paghatag nga labaw sa ilang maarangan” nakahimo sa ilang pagkamahinatagon nga mas tiunay ug makatandog.
Kon kabos man o dato ang usa, ug bisan pa sa modernong mga kasangkapan, nagkinahanglan gihapon ug panahon, kusog, ug kahinguhaan sa pagpakitag pagkamaabiabihon. Nan, ang pangutana mao: Andam ba kita sa panglimbasog aron ang uban makatagamtam sa mga panalangin sa Kristohanong panag-uban? Hinumdomi, “ang mahinatagong kalag mahimong matambok,” miingon ang sanglitanan sa Bibliya, “ug ang dagayang magpatubig sa uban siya usab dagayang patubigan.” Mapahalipayan kita sa hunahuna nga kon magpakita kita ug pagkamaabiabihon sa pagsunod sa gipahayag sa sugo ni Jehova ug sa pagsundog sa iyang dakong panig-ingnan, kita sa ingon “nagapahulam kang Jehova.”—Proverbio 11:25; 19:17.
Kinsay Dapiton?
“Kon magdalit ikaw ug pangaon o panihapon,” miingon kas-a si Jesus, “ayaw pagdapita ang imong mga higala o ang imong mga igsoon o ang imong mga paryenti o imong datong mga silingan.” Ngano? “Kay basi dapiton ka nila ug mabaslan ka.” (Lucas 14:12) Ang punto nga gipadayag ni Jesus dinhi dili ang pagdapit sa atong mga higala ug mga paryenti sa pagpangaon. May mga panahon nga nalipay usab siya sa pagpangaon uban sa iyang mga higala, sama sa balay ni Maria ug Marta. Ang ideya mao nga ang atong pagpakitag pagkamaabiabihon dili pinalihok sa hunahuna nga makadawat ug balos.
Sumala sa padayong gipakita ni Jesus, ang una natong tagdon sa pagdapit mao kadtong makapahimulos ug dako gikan sa pag-ubanay. (Lucas 14:13) Ilakip kadtong nagkinahanglan ug pagdasig, kadtong bag-o pa sa kamatuoran, mga maulawon, ug mga tigulang. Ang makalig-ong epekto ning pag-ubanay makita sa gipahayag ni Oi Yuk, usa ka tigulang nga igsoong babaye nga madasigon kaayo apan nag-antos sa dili maayong panglawas: “Kanunay akong dapiton sa mga igsoon sa ilang mga salosalo ug nagpakitag kalulot kanako sa daghang mga paagi. Nalipay kaayo ako nga mahimong bahin sa dakong pamilya!”
Sa matin-aw, labaw pa kay sa pag-ubanay ang katuyoan niini nga salosalo. Kini maoy pagdasigay sa usag usa ug sa paglig-on sa bugkos sa gugma taliwala sa isigkamagsisimba ni Jehova. Busa, kinahanglang hatagan ug pasiugda ang pagpatunhay sa makalig-on ug makadasig nga palibot imbes sa pagkadaghan sa pagkaon ug sa ilimnon. Busa, angay hatagan ug pagtagad ang tanang mga kalihokan ug mga pagsultihay niining mga okasyona. Samtang dili kinahanglang isentro ang tanang kalihokan diha sa Bibliya ug ang tanang mga pagsultihay sa Kasulatan, malaamon ug mahigugmaon nga tipigan kini kanunay nga makalig-on ug makapadasig. Ang maindigong mga dula, walay hinungdang panglibak, o ang pagdaot sa dungog kinahanglang likayan.—Efeso 4:29, 31.
Dagayang Ganti ang Naghulat sa Maabiabihon
Bisan pa dili angay magpakitag pagkamaabiabihon uban sa hunahuna nga may makuhag balik, kining hunahunaa wala magpasabot nga ang maabiabihong tawo wala gayoy madawat nga ganti. Sa kasukwahi, ang pagpakita ug tinuod nga pagkamaabiabihon mohatag daghang ganti, bisag wala pangitaa. Makatabang kini sa usa sa pagkaplag ug bag-ong mga higala, ug makalig-on sa daang mga bugkos. Makadasig usab kini sa uban sa pag-ugmad sa espiritu sa pagkamahinatagon ug pagkamaabiabihon. (Lucas 6:38; Proverbio 11:25) Labaw sa tanan, tinoon sa labing maabiabihong Persona sa uniberso, ang atong mahigugmaong Maglalalang si Jehova nga Diyos, nga ang tinuod nga mga maabiabihon dili gayod mag-antos ug kakulangan, tungod kay iyang gipabilhan kadtong “nagasubay sa dalan sa pagkamaabiabihon” sama sa iyang gihimo.