Relihiyon

Kahubitan: Usa ka porma sa pagsimba. Nagalakip kinig usa ka sistema sa relihiyosong mga tinamdan, mga pagtulon-an, ug mga binuhatan; mahimong personal kini, o kaha ginapasiugda sa usa ka kapunongan. Sagad ang relihiyon nagalangkit ug pagtuo sa Diyos o diha sa ubay-ubay nga mga diyos; o nagaisip sa mga tawo, mga butang, mga kailibgon, o mga gahom ingong mga tumong sa pagsimba. Daghang relihiyon gipasukad sa tawhanong pagtuon sa kinaiyahan; aduna usab ing gipadayag nga relihiyon. Adunay matuod nga relihiyon ug bakak.

Nganong adunay daghan kaayong relihiyon?

Ang dili pa dugayng pangtala (tab­u­la­tion) nagkanayon nga adunay 10 ka dagkong relihiyon ug mga 10,000 ka sekta. Niini kanila, mga 6,000 ang nagalungtad sa Aprika, 1,200 sa Estados Unidos, ug mga ginatos didto sa ubang kayutaan.

Daghang butang ang nakaamot sa kaugmaran sa bag-ong relihiyosong mga grupo. Ang uban nag-ingon nga ang lainlaing mga relihiyon nagarepresentar ang tanan sa lainlaing mga paagi sa pagtanyag sa relihiyosong kamatuoran. Apan ang usa ka pagtandi sa ilang mga pagtulon-an ug mga binuhatan uban sa Bibliya nagapakita, hinunoa, nga ang pagkadaiya sa mga relihiyon mao nga ang mga tawo nahimong mga sumusunod sa mga tawo inay kay sa pagpaminaw sa Diyos. Maoy angay pagatagdon nga, sa dakodako gayod, ang mga pagtulon-an nga ilang duyog nga ginauyonan, apan sukwahi sa Bibliya, nagsumikad sa karaang Babilonya. (Tan-awang mga panid 61, 62, ubos sa ulohang “Babilonya nga Bantogan.”)

Kinsa man ang tighulhog sa maong relihiyosong kalibog? Ang Bibliya nagapaila kang Satanas nga Yawa ingong “ang diyos niining sistema sa mga butang.” (2 Cor. 4:4) Kana nagapasidaan kanato nga “ang mga butang nga ginahalad sa mga nasod ilang gihalad ngadto sa mga demonyo, ug dili ngadto sa Diyos.” (1 Cor. 10:20) Nan, pagkaimportante gayod sa pagtino nga kita gayod nagasimba sa matuod nga Diyos, ang Maglalalang sa langit ug yuta, ug nga ang atong pagsimba makapahimuot kaniya!

Ang tanang relihiyon ba madawat sa Diyos?

Maghu. 10:6, 7: “Ang mga anak sa Israel nagbuhat pag-usab niadtong daotan sa mga mata ni Jehova, ug misugod sila sa pag-alagad sa mga Baal ug sa mga larawan ni Astarot ug sa mga diyos sa Sirya ug sa mga diyos sa Sidon ug sa mga diyos sa Moab ug sa mga diyos sa mga anak nga lalaki sa Ammon ug sa mga diyos sa mga Pilistihanon. Busa ilang gibayaan si Jehova ug wala mag-alagad kaniya. Ug niini ang kasuko ni Jehova misilaob batok sa Israel.” (Kon ang usa ka tawo magasimba sa bisan unsang butang o kang bisan kinsang tawo inay kay sa matuod nga Diyos, ang Maglalalang sa langit ug yuta, maoy dayag nga ang iyang porma sa pagsimba dili madawat kang Jehova.)

Mar. 7:6, 7: “Siya [Jesus] miingon kanila [ang Hudiyong mga Pariseo ug mga eskriba]: ‘Maayo gayod nga pagkatagna ni Isaias bahin kaninyong mga salingkapaw, sumala sa nahisulat, “Kining mga tawhana nagapasidungog kanako pinaagi sa ilang mga ngabil, apan ang ilang mga kasingkasing halayo gayod gikan kanako. Maoy kawang nga sila padayong nagasimba kanako, sanglit kay sila nagatudlo sa sugo sa mga tawo ingong mga doktrina.”’” (Walay pagsapayan kon kinsa ang ginaangkon nga gisimba sa usa ka grupo, kon sila nagasunod sa mga pagtulon-an sa mga tawo inay sa dinasig nga Pulong sa Diyos, ang ilang pagsimba maoy kawang.)

Roma 10:2, 3: “Saksi ako kanila nga sila adunay kasibot alang sa Diyos; apan dili sumala sa hustong kahibalo; kay, gumikan sa pagkawalay kabangkaagan sa pagkamatarong sa Diyos apan naningkamot sa pagtukod sa ilang kaugalingon, sila wala magpailalom sa pagkamatarong nga iya sa Diyos.” (Mahimong ang mga tawo adunay sinulat nga Pulong sa Diyos apan walay tukmang kahibalo sa nasulat niana, sanglit kay sila wala man sa husto matudloi. Mahimong bation nila nga sila masiboton alang sa Diyos, pero sila tingali wala magabuhat sa iyang gisugo. Ang ilang pagsimba dili makapahimuot sa Diyos, di ba mao?

Tinuod ba nga adunay maayo diha sa tanang relihiyon?

Kadaghanan sa mga relihiyon nagatudlo man nga ang usa ka tawo dili gayod mamakak o mangawat, ug uban pa. Pero igo na ba kana? Ikaw ba malipay sa pag-inom sa usa ka basong tubig nga may hilo tungod kay adunay nagpasalig kanimo nga kadaghanan sa imong mainom maoy tubig?

2 Cor. 11:14, 15: “Si Satanas nagatakoban man sa iyang kaugalingon ingong manulonda sa kahayag. Busa dili gayod ikahibulong nga ang iyang mga ministro padayon usab nga nagatakoban sa ilang kaugalingon ingong mga ministro sa pagkamatarong.” (Dinhi kita gipahimangnoan nga dili ang tanan nga nagagikan kang Satanas mangil-ad tan-awon. Ang usa sa iyang dakong mga paagi sa paglimbong sa katawhan mao ang bakak nga relihiyon sa tanang matang, nga ngadto sa pipila niini iyang gihimo ang panagway nga maorag maayong tan-awon.)

2 Tim. 3:2, 5: “Ang mga tawo . . . nagabaton sa dagway sa diyosnong pagkamahinalaron apan nagapanghimakak sa gahom nii- ni; ug magpahilayo kamo gikan kanila.” (Nga walay pagsapayan sa ilang panggawas nga mga pag-angkon sa gugma sa Diyos, kon kadtong imong gipakig-ubanan sa pagsimba wala sa tim-os magpadapat sa iyang Pulong diha sa ilang kaugalingong mga kinabuhi, ang Bibliya nagaagda kanimo nga isalindot ang maong panag-uban.)

Husto ba ang pagbiya sa relihiyon sa mga ginikanan sa usa?

Kon ang gitudlo sa atong mga ginikanan maoy gikan gayod sa Bibliya, kinahanglan nga kita motapot niana. Bisan pa kon atong masayran nga ang ilang relihiyosong mga buhat ug mga pagtulon-an dili uyon sa Pulong sa Diyos, ang atong mga ginikanan takos man sa atong pagtahod. Apan unsa na man kon imong masayran nga ang pipila ka batasan sa imong mga ginikanan makadaot sa panglawas ug makapamubo sa kinabuhi sa usa ka tawo? Mosundog ka ba kanila ug dasigon ang imong mga anak sa pagbuhat niana, o sa pagkamatinahoron bug-os mo bang ipakig-ambit kanila ang imong nakat-onan? Nga susama, ang kahibalo sa kamatuoran sa Bibliya magdalag kaakohan. Kon posible, ato gayong ipaambit sa mga membro sa pamilya ang atong nakat-onan. Kinahanglan kitang maghimog desisyon: Kita ba gayod nahigugma sa Diyos? Gusto ba gayod natong mosunod sa Anak sa Diyos? Ang atong pagbuhat niana hayan gikinahanglan nga atong biyaan ang relihiyon sa atong mga ginikanan aron sagopon ang matuod nga pagsimba. Piho nga dili tukma nga tugotan ta ang atong debosyon ngadto sa atong mga ginikanan nga mahimong mas dako kay sa atong gugma sa Diyos ug kang Kristo, di ba mao? Si Jesus miingon: “Ang mahigugma sa iyang amahan o inahan labaw pa kanako dili takos kanako; ug ang mahigugma sa iyang anak nga lalaki o anak nga babaye labaw pa kanako dili takos kanako.”—Mat. 10:37.

Jos. 24:14: “Karon kahadloki ninyo si Jehova ug sa kinasingkasing ug sa kamatuoran alagaron ninyo siya, ug isalikway ang mga diyos nga ginaalagaran sa inyong mga amahan sa unahan sa Suba ug sa Ehipto, ug mag-alagad kamo kang Jehova.” (Nagkahulogan kana ug kausaban gikan sa relihiyon sa ilang mga katigulangan, di ba no? Aron makaalagad kang Jehova nga madawaton, gikinahanglan nilang isalikway ang bisan unsang mga imahen nga gigamit sa maong relihiyon ug hinloan ang ilang mga kasingkasing sa bisan unsang tinguha alang sa maong mga butang.)

1 Ped. 1:18, 19: “Kamo nasayod nga dili pinaagi sa mga butang madugta, uban sa salapi o bulawan, nga kamo gitubos gikan sa inyong walay hinungdan nga paggawi nga napanunod gikan sa inyong mga ginikanan. Kondili sa bililhong dugo, sama nianang walay tatsa ug walay buling nga nating karnero, nga iya gayod ni Kristo.” (Busa, ang unang mga Kristohanon mibiya sa maong mga tradisyon sa ilang mga katigulangan, nga ang maong mga tradisyon dili gayod makahatag kanila ug walay kataposang kinabuhi. Ang pagpasalamat sa halad ni Kristo nagpaikag kanila sa pagwagtang sa bisan unsang butang nga nagpakawang sa ilang mga kinabuhi, nga walay tinuod nga kahulogan tungod kay sila wala magpasidungog sa Diyos. Dili ba gayod kita maghupot sa samang tinamdan?)

Unsa ang panghunahuna sa Bibliya maylabot sa panagtapo sa pagtuo?

Giunsa man pagtamod ni Jesus ang relihiyosong mga lider kinsa nagpakaaron-ingnon nga matarong apan walay pagtahod sa Diyos? “Si Jesus miingon kanila: ‘Kon ang Diyos mao pa ang inyong Amahan, higugmaon unta ninyo ako, kay ako gikan sa Diyos ug mianhi ako. Ako wala moanhi sa akong kaugalingong pagbulot-an lamang, kondili Siya ang nagpadala kanako. . . . Kamo gikan sa inyong amahan ang Yawa, ug kamo buot sa pagbuhat sa mga tinguha sa inyong amahan. Kana siya maoy mamumuno sukad pa sa iyang sinugdan, ug siya wala mobarog nga malig-on sa kamatuoran, kay ang kamatuoran wala man kaniya. Sa dihang mamakak siya, siya nagasulti sumala sa iyang kaugalingong kinaiya, kay siya usa ka bakakon ug amahan sa bakak. Tungod kay ako, sa laing bahin, nagsulti sa kamatuoran, kamo dili motuo kanako. . . . Mao kiniy hinungdan nga kamo dili magpatalinghog, kay kamo dili gikan sa Diyos.’”—Juan 8:42-47.

Mao bay pagpasundayag ug pagkamaunongon ngadto sa Diyos ug sa iyang matarong mga sukdanan kon ang iyang mga alagad mosagop diha sa relihiyosong panag-igsoonay niadtong kinsa sa ilang kaugalingon nagabuhat sa ginatunglo sa Diyos o kinsa nagauyon sa maong mga buhat? “Dili kamo magpakigkauban kang bisan kinsa nga nagapakaigsoon nga usa ka makihilawason o tawong dalo o tigsimbag diyosdiyos o tigpasipala o palahubog o tikasan, dili gani magpakigsalo sa pagpangaon uban sa maong tawo. . . . Ni ang mga makighilawason, ni tigsimbag mga diyosdiyos, ni mga mananapaw, ni mga bayot, ni mga kawatan, ni mga tawong dalo, ni mga palahubog, ni mga tigpasipala, ni mga tikasan ang makapanunod sa gingharian sa Diyos.” (1 Cor. 5:11; 6:9, 10) “Bisan kinsa . . . buot mahigala sa kalibotan nagahimo sa iyang kaugalingon nga kaaway sa Diyos.” (Sant. 4:4) “O kamo nga nahigugma kang Jehova, dumti ang daotan. Siya nagabantay sa mga kalag sa iyang mga maunongon.”—Sal. 97:10.

2 Cor. 6:14-17: “Ayaw kamo pagpayugo nga dili pareho uban sa mga dili magtutuo. Kay unsa may kalabotan sa pagkamatarong ug sa pagkadaotan? O unsa may pakig-ambitan sa kahayag uban sa kangitngit? Dugang pa, adunay unsang panag-uyon tali kang Kristo ug kang Belyal? O unsa mang bahina nga nabatonan sa tawong matinumanon uban sa dili magtutuo? Ug unsa may pakig-uyonan sa templo sa Diyos uban sa mga idolo? . . . ‘“Busa panggula kamo gikan kanila, ug magpalain sa inyong kaugalingon,” nagaingon si Jehova, “ug ayaw na paghikap sa mahugaw nga butang”’; ‘“ug pagadawaton ko kamo.”’”

Pin. 18:4, 5: “Akong nadungog ang laing tingog gikan sa langit nga nag-ingon: ‘Gumola kamo kaniya, akong katawhan, kon dili ninyo buot nga makaambit uban kaniya sa iyang mga sala, ug kon dili ninyo buot nga makadawat ug bahin sa iyang mga hampak. Kay ang iyang kasal-anan nagatipun-og sungko sa langit, ug nahinumdoman sa Diyos ang iyang daotang binuhatan.’” (Para sa mga detalye, tan-awang lintunganayng ulohang “Babilonya nga Bantogan.”)

Ang pagpasakop ba ngadto sa organisadong relihiyon gikinahanglan?

Kadaghanan sa relihiyosong mga organisasyon nagpatunghag daotang bunga. Dili kay naorganisar ang mga grupo nga kana maoy daotan. Apan daghan ang nagpasiugda ug mga porma sa pagsimba nga gipasukad sa bakak nga mga pagtulon-an ug rituwalistiko gayod inay kay magtaganag dalisay espirituwal nga giya; kini sa dili hustong paagi gigamit sa pagkontrol sa kinabuhi sa mga tawo alang sa hinakog nga mga tumong; kini hinobrang nabalaka sa mga pagkolekta ug kuwarta ug sa dinayandayanan nga mga balay sa pagsimba inay kay sa espirituwal nga mga bili; ang ilang mga membro sagad salingkapaw. Dayag nga walay si bisan kinsa nga nahigugma sa pagkamatarong nga gustong magpasakop sa maong organisasyon. Apan ang matuod nga relihiyon makapahayahay nga lahi nianang tanan. Bisan pa niana, aron sa pagtuman sa mga kinahanglanon sa Bibliya, kinahanglan kini nga maorganisar.

Heb. 10:24, 25: “Mamalandong kita alang sa pagdinasigay sa usag usa sa gugma ug maayong binuhatan, sa dili pagbiya sa panagkatigom sa atong kaugalingon, ingon sa batasan sa pipila, kondili sa paglinig-onay sa usag usa, ug ilabina gayod sa makita ninyo nga ang adlaw nagakahiduol na.” (Sa pagtuman niining Kasulatanhong sugo, kinahanglang adunay Kristohanong mga tigom nga atong matambongan sa paaging masubayon. Ang maong kahikayan magapalig-on kanato sa pagpakitag gugma ngadto sa uban, dili sa pagtagad lamang sa kaugalingon.)

1 Cor. 1:10: “Karon nagaaghat ako kaninyo, mga igsoon, pinaagi sa ngalan sa atong Ginoong Jesu-Kristo nga kamong tanan kina- hanglang magasulti nga mausahon, ug nga wala gayoy pagkabahinbahin sa taliwala kaninyo, kondili kamo mahiusa gayod sa samang panghunahuna ug sa samang han-ay sa pangisip.” (Ang maong panaghiusa dili gayod makab-ot kon ang mga indibiduwal dili magkatigom, makakuhag kaayohan gikan sa samang espirituwal nga programa sa pagpakaon, ug sa pagtahod sa galamiton nga pinaagi niana ang maong instruksiyon gitagana. Tan-awa usab ang Juan 17:20, 21.)

1 Ped. 2:17: “Higugmaa ang tibuok katilingban sa kaigsoonan.” (Kana ba nagalakip lamang niadtong magakatigom alang sa pagsimba diha sa linaing pribadong balay? Dili gayod; kana maoy internasyonal nga panag-igsoonay (katilingban), ingon sa gipakita sa Galacia 2:8, 9 ug 1 Corinto 16:19.)

Mat. 24:14: “Kining maayong balita sa gingharian igawali sa tibuok pinuy-anang yuta alang sa pamatuod ngadto sa tanang kanasoran; ug unya moabot ang kataposan.” (Aron ang tanang kanasoran mahatagan ug higayon sa pagkadungog sa maayong balita, ang pagsangyaw kinahanglang buhaton diha sa mahapsay nga paagi, inubanan sa angay nga pagdumala. Ang gugma sa Diyos ug sa silingan sa usa nagpahinabo sa mga tawo sa tibuok yuta sa paghiusa sa ilang mga panikaysikay sa pagbuhat niining buluhatona.)

Tan-awa usab ang lintunganayng ulohang “Organisasyon.”

Ang paghigugma ba sa silingan sa usa mao gayod ang bililhon?

Walay duda bahin niana, ang maong gugma importante. (Roma 13:8-10) Apan ang pagka-Kristohanon nagalangkit ug labaw pa kay sa pagkahimong maluloton lang ngadto sa atong silingan. Miingon si Jesus nga ang iyang matuod nga mga tinun-an sa pagkatalagsaon mailhan pinaagig ilang gugma alang sa usag usa, alang sa mga isigkamagtutuo. (Juan 13:35) Ang kahinungdanon niana gipasiugda nga sublisubli diha sa Bibliya. (Gal. 6:10; 1 Ped. 4:8; 1 Juan 3:14, 16, 17) Apan, gipakita ni Jesus nga ang mas labaw pa ganing importante mao ang atong gugma sa Diyos mismo, nga ginapakita pinaagig atong pagtuman sa iyang mga sugo. (Mat. 22:35-38; 1 Juan 5:3) Aron ikapasundayag ang maong gugma, gikinahanglan ta nga magtuon ug magpadapat sa Pulong sa Diyos ug magkatigom uban sa mga isigkaalagad sa Diyos alang sa pagsimba.

Ang paghupot ba ug personal nga relasyon uban sa Diyos mao gayod ang hinungdanong butang?

Tino nga kana importante. Ang pagtambong lamang sa relihiyosong mga serbisyo diha sa pormalistikong paagi dili makapuli niana. Apan gikinahanglan ta nga magmabinantayon. Ngano? Sa unang siglo, dihay mga tawo kinsa naghunahuna nga nabatonan nila ang maayong relasyon uban sa Diyos apan sila gibutyag ni Jesus nga nasayop gayod. (Juan 8:41-44) Ang apostol nga si Pablo misulat bahin sa pipila kinsa dayag nga masiboton sa ilang pagtuo ug lagmit naghunahuna nga sila nakahupot ug maayong relasyon uban sa Diyos pero wala makasabot kon unsa gayod ang gikinahanglan aron makabaton sa pag-uyon sa Diyos.—Roma 10:2-4.

Ato kayhang mabatonan ang maayo personal nga relasyon uban sa Diyos kon isipon ta nga dili kaayo hinungdanon ang iyang mga sugo? Ang usa niini mao nga kita makanunayong magkatigom uban sa atong mga isigkamagtutuo.—Heb. 10:24, 25.

Kon sa personal basahon ta ang Bibliya, igo na ba kana?

Tinuod nga daghang tawo dakog makat-onan pinaagig personal nga pagbasa sa Bibliya. Kon ang ilang motibo mao ang pagkat-on sa kamatuoran bahin sa Diyos ug sa iyang mga katuyoan, ang ilang ginabuhat maoy dalayegon uyamot. (Buh. 17:11) Apan, sa pagkamatud-anon sa atong kaugalingon, ato ba gayong masabtan ang bug-os nga kahulogan nianang tanan kon walay tabang? Ang Bibliya naghisgot bahin sa usa ka tawo nga may inilang katungdanan apan may pagkamapainubsanon sa pag-ila sa iyang panginahanglan ug tabang sa pagsabot sa tagna sa Bibliya. Ang maong tabang gitagana pinaagig membro sa Kristohanong kongregasyon.—Buh. 8:26-38; itandi ang ubang mga reperensiya maylabot kang Felipe diha sa Buhat 6:1-6; 8:5-17.

Siyempre, kon ang usa ka tawo mobasa sa Bibliya apan dili kana ipadapat sa iyang kinabuhi, diyutay lang kanag kaayohan kaniya. Kon siya nagatuo niana ug nagapadapat niana, siya mopakig-uban sa mga alagad sa Diyos diha sa regular nga mga tigom sa kongregasyon. (Heb. 10:24, 25) Moduyog usab siya kanila sa pagpaambit sa “maayong balita” ngadto sa ubang mga tawo.—1 Cor. 9:16; Mar. 13:10; Mat. 28:19, 20.

Sa unsang paagi maila sa usa ka tawo kon hain ang hustong relihiyon?

(1) Diha sa unsa gipasukad ang mga pagtulon-an niini? Kini ba gikan sa Diyos, o ang kadaghanan niana gikan sa mga tawo? (2 Tim. 3:16; Mar. 7:7) Mosukna, pananglitan: Diin man gitudlo sa Bibliya nga ang Diyos usa ka Trinidad? Diin man nga kana nag-ingon nga ang tawhanong kalag dili mamatay?

(2) Tagda kon kana ba nagapaila sa ngalan sa Diyos. Si Jesus miingon sa pag-ampo ngadto sa Diyos: “Akong gipaila ang imong ngalan ngadto sa mga tawo nga imong gihatag kanako gikan sa kalibotan.” (Juan 17:6) Siya mipatugbaw: “Si Jehova nga imong Diyos mao ang kinahanglan mong simbahon, ug ngadto ka- niya lamang nga ikaw mohimog balaang pag-alagad.” (Mat. 4:10) Nagtudlo ba ang imong relihiyon nga ‘si Jehova ang kinahanglan mong simbahon’? Nakaila ka ba sa Persona nga gipaila nianang ngalana—sa iyang mga katuyoan, iyang mga buhat, iyang mga hiyas—aron bation mo nga ikaw masaligong makaduol gayod kaniya?

(3) Ginapasundayag ba ang matuod nga pagtuo diha kang Jesu-Kristo? Nagalangkit kinig apresasyon sa bili sa halad sa tawhanong kinabuhi ni Jesus ug sa iyang katungdanan karon ingong langitnong Hari. (Juan 3:36; Sal. 2:6-8) Ang maong apresasyon ginapakita pinaagig pagsunod kang Jesus—sa personal nagapakig-ambit ug masiboton diha sa buluhaton nga iyang gitudlong ipabuhat sa iyang mga sumusunod. Ang matuod nga relihiyon aduna nianang pagtuoha nga inubanan sa mga buhat.—Sant. 2:26.

(4) Kana ba gayod maoy rituwalistiko, usa ka pormalidad, o usa ba ka paagi sa kinabuhi? Ang Diyos kusganong dili modawat sa relihiyon nga usa ka pormalismo lamang. (Isa. 1:15-17) Ang matuod nga relihiyon nagabayaw sa sukdanan sa Bibliya sa moralidad ug mahinlong sinultihan inay kay sa mahuyang nga pagduyog sa popular nga mga hilig. (1 Cor. 5:9-13; Efe. 5:3-5) Ang mga membro niana nagabanaag sa mga bunga sa espiritu sa Diyos diha sa ilang kinabuhi. (Gal. 5:22, 23) Busa, sila nga nagatapot sa matuod nga pagsimba mailhan sanglit kay sila matim-oson mang nagapanlimbasog sa pagpadapat sa mga sukdanan sa Bibliya sa ilang mga kinabuhi dili lamang diha sa ilang mga dapit tigomanan kondili diha sa ilang pamilyahanong kinabuhi, sa ilang sekular nga trabaho, sa eskuwelahan, ug sa lulinghayaw.

(5) Ang mga membro ba niana nagahigugma gayod sa usag usa? Si Jesus miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Ang maong gugma mosaylo pa sa rasanhon, sosyal, ug nasodnong mga utlanan, nga nagapahiusa sa mga tawo diha sa dalisay nga pag-inigsoonay. Malig-on kaayo kining gugmaha nga nagahimo kanilang lahi kaayo. Sa dihang ang mga nasod magpakiggubat, kinsa man ang adunay igong gugma alang sa ilang Kristohanong mga igsoon sa ubang kayutaan nga sila nagadumili sa pagbakyaw ug mga armas ug patyon sila? Mao kana ang gibuhat sa unang mga Kristohanon.

(6) Kana ba separado gayod gikan sa kalibotan? Si Jesus miingon nga ang iyang matuod nga mga sumusunod “dili bahin sa kalibotan.” (Juan 15:19) Sa pagsimba sa Diyos diha sa paagi nga iyang ginauyonan nagakinahanglan nga ang atong kaugalingon magpabiling “walay buling sa kalibotan.” (Sant. 1:27) Ikaingon ba kana kanilang kang kansang kaklerohan ug ubang mga membro nakiglambigit sa politika, o kang kansang kinabuhi gitumong ga- yod sa materyalistikanhon ug unodnong mga kailibgon?—1 Juan 2:15-17.

(7) Ang mga membro ba niana maoy aktibong mga saksi maylabot sa Gingharian sa Diyos? Si Jesus mitagna: “Kining maayong balita sa gingharian igawali sa tibuok pinuy-anang yuta alang sa pamatuod ngadto sa tanang kanasoran; ug unya moabot ang kataposan.” (Mat. 24:14) Unsa mang relihiyona ang nagamantala gayod sa Gingharian sa Diyos ingong paglaom sa katawhan inay kay dasigon ang mga tawo sa pagtutok ngadto sa tawhanong pagmando sa pagsulbad sa ilang mga suliran? Ang imo bang relihiyon nagasangkap kanimo aron makig-ambit niining buluhatona, ug buhaton kana gikan sa balay ngadto sa balay ingon sa gitudlo ni Jesus sa iyang mga apostol nga buhaton?—Mat. 10:7, 11-13; Buh. 5:42; 20:20.

Nagatuo ba ang mga Saksi ni Jehova nga ang ilaha mao lamang ang matuod nga relihiyon?

Tan-awang mga panid 377, 378, ubos sa “Mga Saksi ni Jehova.”

Nganong ang pipila sa mga tawo adunay pagtuo samtang ang uban walay pagtuo?

Tan-awang lintunganayng ulohang “Pagtuo.”

Kon Adunay Moingon—

‘Di ko interesado sa relihiyon’

Mahimong tubagon mo: ‘Dili kana magpatingala kanako. Daghang tawo sama sa imong panghunahuna. Makapangutana ako, Ingon ba niana kanunay ang imong gibati?’ Dayon tingali modugang: ‘Ang usa sa mga butang nga nakapatagad kanako mao ang pagkakaplag nga hapit tanang dagkong doktrina nga gitudlo sa mga iglesya karon dili makita diha sa Bibliya. (Hayan gamiton ang anaa sa mga panid 377, 378, ubos sa “Mga Saksi ni Jehova,” nga sa linain nagapasiugda sa Gingharian. Sa pagpalahi, ipunting kon unsa ang gituohan sa mga Saksi ni Jehova, ingong sa gilaraw sa mga panid 373-375.)’

Tan-awa usab ang mga panid 16, 17.

‘Adunay hilabihang pagkasalingkapaw sa relihiyon’

Mahimong tubagon mo: ‘Tinuod, ako uyon kanimo. Daghan ang nagasangyaw ug usa ka butang ug sukwahi ang pagkinabuhi. Apan tug-ani ako, Unsa man ang imong pagbati bahin sa Bibliya? (Sal. 19:7-10)’

‘Ako maayog kinabuhi. Husto ang akong pagtratar sa akong mga silingan. Kana igo nang relihiyon alang kanako’

Mahimong tubagon mo: ‘Tungod kay nag-ingon ka man nga maayo kag kinabuhi, dayag nga nagapahimulos ka sa kinabuhi, di ba husto? . . . Makagusto ka kaha sa pagpuyo ubos sa matang sa mga kahimtang nga gihubit dinhi sa Pinadayag 21:4? . . . Matikdi kon unsa ang gisulti sa Juan 17:3 nga gikinahanglan aron makaambit niana.’

Tan-awa usab ang panid 367.

‘Dili ko interesado sa organisadong relihiyon. Ako nagatuo nga ang personal nga relasyon uban sa Diyos mao ang may bili’

Mahimong tubagon mo: ‘Kana nagapainteres kanako. Ingon ba niana kanunay ang imong gibati? . . . Ikaw ba nagpakig-uban na sa miagi sa usa ka relihiyosong grupo? . . . (Dayon tingali gamiton ang materyal sa mga panid 366-368.)’

‘Dili ko uyon sa tanan nga gitudlo sa akong iglesya, pero wala koy nakita nga kinahanglang mobalhin sa lain. Manlimbasog hinuon ko sa pagpauswag sulod sa akong kaugalingon’

Mahimong tubagon mo: ‘Ginaapresyar ko ang imong pagsulti niana kanako. Mapaneguro ko nga mouyon ka nga ang importante gayod alang kanatong tanan mao ang pagbaton sa pag-uyon sa Diyos, di ba mao?’ Dayon tingali modugang: (1) ‘Nagahatag ang Diyos kanatong tanan ug butang nga sa kaugdang pagapalandongon dinhi sa Pinadayag 18:4, 5. . . . Bisan pa kon sa personal dili ta ginabuhat ang daotang mga butang, ang Bibliya nagabutyag nga kita makaambit sa kadaot kon kita nagasuportar niining mga organisasyona. (Tan-awa usab ang lintunganayng ulohang “Babilonya nga Bantogan.”)’ (2) (Tingali gamiton usab ang materyal sa mga panid 368-370.) (3) ‘Ang Diyos nagapangita sa mga tawo nga nahigugma sa kamatuoran, ug siya nagatigom kanila alang sa hiniusang pagsimba. (Juan 4:23, 24)’

‘Maayo ang tanang relihiyon; adunay inyo, ug adunay ako’

Mahimong tubagon mo: ‘Dayag nga ikaw tawo nga matinugoton. Pero ginaila mo usab nga kitang tanan nagakinahanglan ug giya nga gitagana sa Pulong sa Diyos, ug maoy hinungdan nga ikaw adunay relihiyon, di ba husto kana?’ Dayon tingali modugang: ‘Dinhi sa Mateo 7:13, 14 ang Bibliya nagatagana kanato ug pipila ka bililhong giya diha sa mga pulong ni Jesus. (Basaha kana.) . . . Nganong ingon man niana kaha?’

Tan-awa usab ang mga panid 362, 363.

‘Basta motuo ka kang Jesus, dili na gayod kinahanglan kon unsang iglesyaha ka magpasakop’

Mahimong tubagon mo: ‘Walay pagduhaduha bahin niana, hinungdanon ang pagtuo diha kang Jesus. Ug gidawat ko nga niana ang gipasabot mo mao ang pagdawat sa tanan nga iyang gitudlo. Sa walay duhaduha imong napanid-an, ingon nga ako nakapaniid, nga daghan ang nagaingon nga sila mga Kristohanon wala man gayod magkinabuhi nianang ngalana nga ilang giangkon.’ Dayon tingali modugang: (1) ‘Matikdi kon unsa ang gisulti ni Jesus dinhi sa Mateo 7:21-23.’ (2) ‘Adunay kahibulongang kaugmaon alang kanilang nagatagad gayod sa pagkaplag kon unsa ang kabubut-on sa Diyos ug unya buhaton kana. (Sal. 37:10, 11; Pin. 21:4)’

‘Unsa may nagapahunahuna kanimo nga aduna lamang ing usa ka relihiyon nga husto?’

Mahimong tubagon mo: ‘Sa walay duhaduha, adunay sinsero nga mga tawo sa hapit tanang relihiyon. Pero kon unsa ang bililhon mao ang giingon sa Pulong sa Diyos. Pila man ka matuod nga mga pagtuo ang gipunting niana? Matikdi ang nahisulat dinhi sa Efeso 4:4, 5.’ Dayon tingali modugang: (1) ‘Kana nagauyon sa gibutyag sa ubang mga teksto. (Mat. 7:13, 14, 21; Juan 10:16; 17:20, 21)’ (2) ‘Busa, ang hagit nga atong kinahanglang atubangon mao ang pag-ila nianang relihiyona. Unsaon ta man sa pagkaila niana? (Tingali gamitong materyal sa mga panid 368-370.)’ (3) (Tan-awa usab ang anaa sa mga panid 373-375, ubos sa ulohang “Mga Saksi ni Jehova.”)

‘Basahon ko lang ang akong Bibliya sa balay ug mag-ampo sa Diyos sa pagsabot’

Mahimong tubagon mo: ‘Milampos ka na ba sa pagbasa sa interong Bibliya sa pagkakaron?’ Dayon tingali modugang: ‘Samtang buhaton mo kana, imong makaplagan ang makapainteres kaayo diha sa Mateo 28:19, 20. . . . Kini hinungdanon sanglit kay kana nagapakita nga si Kristo nagagamit ug ubang mga tawo sa pagtabang kanato aron masabtan kon unsa ang nalangkit sa pagkahimong tinuod nga Kristohanon. Uyon niana, ang mga Saksi ni Jehova nagatanyag sa pagduaw sa mga tawo sa ilang balay alang sa usa ka oras o mas pa sa matag semana, nga walay bayad, sa paghisgot sa Bibliya. Makagugol ba ako ug pipila lang ka minutos aron ipakita kanimo ang paagi sa paghimo niini?’

Tan-awa usab ang panid 368.

‘Gibati ko nga ang relihiyon maoy pribadong butang’

Mahimong tubagon mo: ‘Komun nga tinamdan kana karong mga adlawa, ug kon ang mga tawo dili gayod interesado sa mensahe sa Bibliya, kami malipay sa pag-adto sa ubang mga balay. Pero imo bang naamgohan nga ang rason nga ako mianhi sa paghibalag kanimo mao nga kini ang gisugo ni Jesus nga buhaton sa iyang mga sumusunod? . . . (Mat. 24:14; 28:19, 20; 10:40)’