Juan 14:27—“Ang Kalinaw Ibilin Ko Kaninyo”

“Ang kalinaw nga akong gihatag magpabilin kaninyo. Kini nga kalinaw dili mahatag sa kalibotan kaninyo. Ayaw mog kabalaka o kahadlok.”—Juan 14:27, Bag-ong Kalibotang Hubad.

“Ang kalinaw ibilin ko kaninyo. Ang akong kalinaw nga dili sama sa ikahatag sa kalibotan ihatag ko kaninyo. Ayaw kamog kabalaka ug ayaw kahadlok.”—Juan 14:27, Ang Bag-ong Maayong Balita Biblia.

Gisulti kini ni Jesus aron pasaligan ang iyang mga apostoles nga dili sila angayng sobrang mabalaka sa dihang sila makaatubang ug mga problema. Sama niya, makapabilin silang kalmado sa tabang sa Diyos.

Unsa nga kalinaw ang gibilin, o gihatag, ni Jesus sa iyang mga apostoles? Gihatag ni Jesus kanila ang iyang kalinaw, ang mismong kalinaw nga iyang naeksperyensiyahan. Kini nga kalinaw wala magpasabot nga wala gyoy kagubot o kalisdanan. (Juan 15:20; 16:33) Bisan pag si Jesus nakaagig dili makataronganong pagtratar ug sa ulahi gipatay, duna gihapon siyay kalinaw sa hunahuna ug kasingkasing. (Lucas 23:27, 28, 32-34; 1 Pedro 2:23) Nagmalinawon siya kay nahibalo siya nga gimahal ug giuyonan siya sa iyang Amahan, si Jehova.a—Mateo 3:16, 17.

Gihatagan ni Jesus ug kalinaw ang iyang mga apostoles pinaagi sa pagpasalig kanila nga sila gihigugma ug giuyonan niya ug sa iyang Amahan. (Juan 14:23; 15:9, 10; Roma 5:1) Kini nga kalinaw ilang nabatonan tungod sa ilang pagtuo kang Jesus ingong Anak sa Diyos ug nagtabang nila nga madaog ang ilang kahadlok ug kabalaka. (Juan 14:1) Bisag si Jesus dili na unya nila makauban, siya nagsaad nga ang balaang espiritu sa Diyos motabang nila nga magmalinawon ug dili mahadlok. (Juan 14:25-27) Maisogong maatubang sa mga sumusunod ni Jesus ang lisod nga mga kahimtang kay sila nahibalo nga giuyonan sila ni Jehova ug tabangan niya sila.—Hebreohanon 13:6.

Sa dinhi pa si Jesus sa yuta, naandan sa mga tawo nga manghinaot ug kalinaw sa dihang motimbaya. (Mateo 10:12, 13) Pero wala lang manghinaot si Jesus nga magmalinawon ang iyang mga apostoles; iya silang gihatagan ug kalinaw. Dugang pa, ang kalinaw nga gihatag ni Jesus kanila lahi sa bisan unsang kalinaw nga mahatag sa kalibotan.b Ang kalibotan makahatag tingalig kalinaw sa tawo tungod sa iyang maayong relasyon sa uban, kadato, pagkainila, o posisyon. Pero ang kalinaw nga gikan kang Jesus wala magdepende sa mga kahimtang sa kinabuhi. Kana nga kalinaw molungtad hangtod sa hangtod.

Gisulti ni Jesus ang maong mga pulong sa iyang matinumanong mga apostoles sa gabii una siya mamatay. Nianang gabhiona, iyang gisultihan sila nga hapit na siyang mobiya kanila. (Juan 13:33, 36) Nakapaguol to sa iyang mga apostoles. (Juan 16:6) Busa gipasaligan sila ni Jesus aron dili sila mabalaka kon unsay mahitabo dihang mobiya na siya.

Ang gisulti ni Jesus makapadasig pod natong mga Kristohanon karon. Mahimo sab tang magmalinawon. (2 Tesalonica 3:16) Dihang nahimo tang mga tinun-an ni Jesus, nahibaloan nato nga kita gihigugma ug giuyonan niya ug sa iyang Amahan, si Jehova. (Colosas 3:15; 1 Juan 4:16) Ingong resulta, dili ta angayng sobrang mabalaka. Ngano? Tungod kay ang Diyos nagauban kanato.—Salmo 118:6; Filipos 4:6, 7; 2 Pedro 1:2.

Tan-awa kining mubo nga video nga nagsumaryo sa basahon sa Juan.