Kinabuhi Luyo sa Kamatayon—Unsay Giingon sa Bibliya?
“Abog ka ug sa abog ka mobalik.”—GENESIS 3:19.
1, 2. (a) Unsa ang nagkadaiyang mga ideya bahin sa Laing-Kinabuhi? (b) Unsay kinahanglan natong susihon aron matino kon unsay ginatudlo sa Bibliya mahitungod sa kalag?
ANG teoriya sa walay kataposang pag-antos maoy sumpaki sa pagtuo diha sa gugma sa Diyos alang sa linalang nga mga butang. . . . Ang pagtuo diha sa silot nga dayon alang sa kalag tungod sa mga sala sa pila ra ka tuig, nga dili kini hatagag higayon nga magtul-id, maoy pagsupak sa tanang diktar sa katarongan,” nag-ingon ang pilosopong Hindu nga si Nikhilananda.
2 Sama kang Nikhilananda, daghan karon ang maduhaduhaon bahin sa pagtulon-an sa way-kataposang pagpaantos. Sa samang hinungdan, ang uban naglisod sa pagsabot sa mga ideya nga sama sa pagkadangat sa Nirvana ug pagkamahiusa uban sa kinaiyahan. Bisan taliwala niadtong nag-angkon nga nagpasukad sa ilang mga pagtuo diha sa Bibliya, adunay nagkalainlaing mga ideya bahin sa kon unsa ang kalag ug unsay mahitabo niini sa dihang kita mamatay. Apan unsa ba gayoy giingon sa Bibliya bahin sa kalag? Aron mahibaloan, kinahanglan natong susihon ang mga kahulogan sa Hebreohanon ug Gregong mga pulong nga gihubad nga “kalag” diha sa Bibliya.
Ang Kalag Sumala sa Bibliya
3. (a) Unsang pulong ang gihubad nga “kalag” diha sa Hebreohanong Kasulatan, ug unsa ang paninugdang kahulogan niini? (b) Sa unsang paagi ang Genesis 2:7 nagpamatuod nga ang pulong “kalag” mahimong magpasabot sa katibuk-ang tawo?
3 Ang Hebreohanong pulong nga gihubad ug “kalag” maoy neʹphesh, ug kini makita sa 754 ka beses diha sa Hebreohanong Kasulatan. Unsay kahulogan sa neʹphesh? Sumala sa The Dictionary of Bible and Religion, kini “sagad nagtumong sa tibuok nga buhing linalang, sa bug-os nga indibiduwal.” Kini gipamatud-an sa paghubit sa Bibliya sa kalag diha sa Genesis 2:7: “Si Jehova nga Diyos nag-umol sa tawo gikan sa abog sa yuta ug naghuyop sa mga buho sa iyang ilong sa gininhawa sa kinabuhi, ug ang tawo nahimong usa ka buhing kalag.” Matikdi nga ang unang tawo “nahimong” usa ka kalag. Sa ato pa, si Adan wala makabaton ug usa ka kalag; siya maoy usa ka kalag—sama nga ang tawo nga mahimong doktor maoy usa ka doktor. Nan, ang pulong “kalag” dinhi nagbatbat sa katibuk-ang tawo.
4. Unsang pulong ang gihubad nga “kalag” diha sa Kristohanon Gregong Kasulatan, ug unsa ang paninugdang kahulogan niining pulonga?
4 Ang pulong nga gihubad ug “kalag” (psy·kheʹ) makita kapin ug usa ka gatos ka beses diha sa Kristohanon Gregong Kasulatan. Sama sa neʹphesh kining pulonga subsob nagtumong sa katibuk-ang tawo. Pananglitan, tagda ang mosunod nga mga pahayag: “Ang akong kalag nasamok.” (Juan 12:27) “Misugod ug kahadlok ang tanang kalag.” (Buhat 2:43) “Magpasakop ang tanang kalag sa labaw nga mga awtoridad.” (Roma 13:1) “Pamulong nga mahupayon sa magul-anong mga kalag.” (1 Tesalonica 5:14) “Ang pipila ka tawo, nga mao, walo ka kalag, ang nadalang hilwas latas sa tubig.” (1 Pedro 3:20) Tin-aw, ang psy·kheʹ, sama sa neʹphesh, nagpunting sa katibuk-ang tawo. Sumala sa eskolar nga si Nigel Turner, kining pulonga “nagpasabot sa kon unsay kinaiyanhong tawhanon, ang pagkatawo, ang materyal nga lawas nga gihuypan sa rûaḥ [espiritu] sa Diyos. . . . Ang pasiugda anaa sa tibuok nga pagkatawo.”
5. Ang mga hayop ba mga kalag? Isaysay.
5 Makaiikag, diha sa Bibliya ang pulong “kalag” mapadapat dili lamang nganha sa mga tawo kondili nganha usab sa mga hayop. Pananglitan, sa pagbatbat sa paglalang sa mga linalang sa dagat, ang Genesis 1:20 nag-ingon nga ang Diyos nagsugo: “Pasagdi nga modagsang sa katubigan ang panon sa buhing mga kalag.” Ug sa sunod nga adlaw sa pagpanglalang, ang Diyos miingon: “Pasagdi nga ang yuta magpatungha sa buhing mga kalag sumala sa ilang mga matang, ang hayop nga maaghop ug ang nagakamang nga hayop ug ang mabangis nga mananap sa yuta sumala sa iyang matang.”—Genesis 1:24; itandi ang Numeros 31:28.
6. Unsay ikaingon bahin sa paggamit sa Bibliya sa pulong “kalag”?
6 Busa, ang pulong “kalag” ingon sa pagkagamit diha sa Bibliya nagtumong sa usa ka tawo o usa ka hayop o sa kinabuhing gipahimuslan nianang tawhana o hayopa. (Tan-awa ang kahon sa ibabaw.) Ang kabatbatan sa Bibliya sa kalag maoy yano, walay-sumpaki, ug dili gubot tungod sa komplikadong mga pilosopiya ug mga patuotuo sa mga tawo. Busa, ang dinaliang pangutana nga kinahanglang isukna mao, Sumala sa Bibliya, unsay mahitabo sa kalag panahon sa kamatayon?
Ang mga Patay Walay Kaamgohan
7, 8. (a) Unsay gipadayag sa Kasulatan bahin sa kahimtang sa mga patay? (b) Paghatag ug mga pananglitan gikan sa Bibliya nga nagpakitang ang kalag mahimong mamatay.
7 Ang kahimtang sa mga patay gitin-aw diha sa Ecclesiastes 9:5, 10, diin atong mabasa: “Ang mga patay walay nahibaloan nga bisan unsa . . . Walay pangagpas, walay plano, walay kahibalo o pangutok, sulod sa lubnganan.” (Moffatt) Busa, ang kamatayon maoy kahimtang sa pagkawala-maglungtad. Ang salmista misulat nga sa dihang mamatay ang usa ka tawo, “siya mobalik sa iyang yuta; nianang adlawa ang iyang mga hunahuna mahanaw.” (Salmo 146:4) Ang mga patay walay kaamgohan, walay kalihokan.
8 Sa gipahayag ang sentensiya diha kang Adan, ang Diyos miingon: “Abog ka ug sa abog ka mobalik.” (Genesis 3:19) Sa wala pa siya umola sa Diyos gikan sa abog sa yuta ug hatagig kinabuhi, si Adan wala maglungtad. Sa dihang siya namatay, siya mibalik ngadto nianang kahimtanga. Kamatayon ang iyang silot—dili pagbalhin ngadto sa laing kalibotan. Nan, unsay nahitabo sa iyang kalag? Sanglit diha sa Bibliya ang pulong “kalag” sagad nagtumong lamang sa usa ka tawo, sa dihang kita moingon nga si Adan namatay, kita nagaingon nga ang kalag nga ginganlag Adan namatay. Kini tingali morag katingad-anang pamation sa usa ka tawong nagtuo sa pagkadili-mamatay sa kalag. Bisan pa niana, ang Bibliya nag-ingon: “Ang kalag nga makasala—kini mismo mamatay.” (Ezequiel 18:4) Ang Levitico 21:1 naghisgot bahin sa “usa ka namatay nga kalag” (usa ka “minatay,” The Jerusalem Bible). Ug ang mga Nazareo gimandoan nga dili moduol sa “bisan unsang patay nga kalag” (“usa ka patayng lawas,” Lamsa).—Numeros 6:6.
9. Unsay gipasabot sa Bibliya sa dihang kini nag-ingon nga ang “kalag [ni Raquel] migula”?
9 Apan, unsa na man ang pahayag diha sa Genesis 35:18 bahin sa makapasubong pagkamatay ni Raquel, nga nahitabo sa dihang siya nanganak sa iyang ikaduhang anak nga lalaki? Didto atong mabasa: “Samtang ang iyang kalag migula (tungod kay siya namatay) iyang ginganlan siyag Ben-oni; apan ang iyang amahan nagtawag kaniyang Benjamin.” Kini bang kasulatana nagpasabot nga si Raquel nakabaton ug butang sa kahiladman nga migawas sa pagkamatay niya? Dili gayod. Hinumdomi, ang pulong “kalag” mahimong magtumong usab sa kinabuhi nga nabatonan sa usa ka tawo. Busa niining kahimtanga ang “kalag” ni Raquel yanong nagpasabot sa iyang “kinabuhi.” Kanay hinungdan nga ang ubang mga hubad sa Bibliya naghubad sa mga pulong “ang iyang kalag migula” ingong “ang iyang kinabuhi nagkaupos” (Knox), “siya miginhawa sa iyang kataposang gininhawa” (JB), ug “ang iyang kinabuhi mibiya kaniya” (Bible in Basic English). Walay nagpaila nga usa ka misteryosong bahin ni Raquel nagpadayong buhi sa pagkamatay niya.
10. Sa unsang paagi ang kalag sa gibanhawng anak lalaki sa babayeng balo “mibalik kaniya”?
10 Kini susama sa pagkabanhaw sa anak lalaki sa usa ka babayeng balo, nga nasulat sa 1 Hari kapitulo 17. Diha sa 1Ha 17 bersikulo 22, atong mabasa nga samtang si Elias miampo nga giub-an ang batang lalaki, “si Jehova namati sa tingog ni Elias, mao nga ang kalag sa bata mibalik kaniya ug siya nabuhi.” Sa makausa pa, ang pulong “kalag” nagkahulogang “kinabuhi.” Busa, ang New American Standard Bible mabasa: “Ang kinabuhi sa bata mibalik kaniya ug siya nabuhi pag-usab.” Oo, ang kinabuhi, dili ang usa ka morag anino, ang mibalik sa batang lalaki. Nahiuyon kini sa giingon ni Elias ngadto sa inahan sa batang lalaki: “Tan-awa, ang imong anak [ang katibuk-ang tawo] buhi.”—1 Hari 17:23.
Unsa ang Bahin sa Espiritu?
11. Nganong ang pulong “espiritu” wala magtumong sa mibulag-sa-lawas nga bahin sa usa ka tawo nga nagpadayong buhi human sa kamatayon?
11 Ang Bibliya nag-ingon nga sa dihang ang tawo mamatay, “ang iyang espiritu mogula, siya mobalik sa iyang yuta.” (Salmo 146:4) Nagkahulogan ba kini nga ang usa ka walay-lawas nga espiritu literal nga mopahawa ug magpadayong buhi human mamatay ang usa ka tawo? Dili kana mahimo, kay ang salmista sunod miingon: “Nianang adlawa ang iyang mga hunahuna mahanaw” (“ang tanan niyang panghunahuna matapos,” The New English Bible). Nan, unsa ba ang espiritu, ug sa unsang paagi kini “mogula” gikan sa usa ka tawo panahon sa iyang pagkamatay?
12. Unsay gipasabot sa Hebreohanon ug Gregong mga pulong nga gihubad ug “espiritu” diha sa Bibliya?
12 Diha sa Bibliya ang mga pulong nga gihubad ug “espiritu” (Hebreohanon, ruʹach; Grego, pneuʹma) sa paninugdan nagkahulogang “gininhawa.” Sa ingon, inay nga “ang iyang espiritu mogula,” ang hubad ni R. A. Knox nagagamit sa mga pulong “ang gininhawa mobiya sa iyang lawas.” (Salmo 145:4) Apan labaw pa ang gipasabot sa pulong “espiritu” kay sa buhat sa pagginhawa. Pananglitan, sa pagbatbat sa pagkalaglag sa mga tawo ug sa mga hayop panahon sa tibuok-yutang Lunop, ang Genesis 7:22 nag-ingon: “Ang tanan nga niana ang gininhawa sa puwersa [o, espiritu; Hebreohanon, ruʹach] sa kinabuhi naglihok diha sa iyang mga buho sa ilong, nga mao, ang tanan nga diha sa mamalang yuta, namatay.” Busa ang “espiritu” mahimong magtumong sa puwersa-sa-kinabuhi nga naglihok diha sa tanang buhing mga linalang, mga tawo ug mga hayop, ug nagpadayong buhi tungod sa pagginhawa.
13. Sa unsang paagi ang espiritu mobalik ngadto sa Diyos sa panahon nga mamatay ang tawo?
13 Nan, unsay gipasabot niini sa dihang ang Ecclesiastes 12:7 miingon nga sa dihang ang usa ka tawo mamatay, “ang espiritu mismo mobalik ngadto sa matuod nga Diyos nga maoy mihatag niini”? Nagkahulogan ba kini nga ang espiritu sa literal mopanaw latas sa kawanangan ngadto sa presensiya sa Diyos? Walay ingon niana ang gipasabot. Sanglit ang espiritu mao ang puwersa-sa-kinabuhi, kini “mobalik ngadto sa matuod nga Diyos” sa diwa nga ang bisan unsang paglaom sa umaabot nga kinabuhi alang nianang tawhana sa pagkakaron bug-os nasandig sa Diyos. Ang Diyos lamang ang makapasig-uli sa espiritu, o puwersa-sa-kinabuhi, nga magpahinabo nga ang tawo mabuhi pag-usab. (Salmo 104:30) Apan katuyoan ba sa Diyos nga buhaton kana?
“Siya Mobangon”
14. Unsay giingon ug gihimo ni Jesus aron sa paghupay ug paglipay sa mga igsoong babaye ni Lazaro sa pagkamatay sa ilang igsoon?
14 Diha sa gamayng lungsod sa Betania, mga tulo ka kilometros sa sidlakan sa Jerusalem, si Maria ug Marta nagbangotan sa wala-sa-panahon nga pagkamatay sa ilang igsoon, si Lazaro. Si Jesus naguol usab sama kanila, kay siya may gugma alang kang Lazaro ug sa iyang mga igsoong babaye. Sa unsang paagi mapahupay ni Jesus ang mga managsoong babaye? Dili pinaagi sa pag-asoy kanila ug usa ka tinuis nga sugilanon, kondili pinaagi sa pagtug-an kanila sa kamatuoran. Si Jesus yanong miingon: “Mobangon ang imong igsoon.” Dayon miadto si Jesus sa lubnganan, ug iyang gibanhaw si Lazaro—nagpasig-uli sa kinabuhi sa usa ka tawo nga patay na sulod sa upat ka adlaw!—Juan 11:18-23, 38-44.
15. Unsay sanong ni Marta sa gisulti ug gibuhat ni Jesus?
15 Si Marta nahibulong ba sa mga pulong ni Jesus nga si Lazaro “mobangon”? Dayag nga wala, kay siya mitubag: “Ako nahibalo nga siya mobangon sa pagkabanhaw sa kataposan nga adlaw.” Siya may pagtuo na sa saad sa usa ka pagkabanhaw. Dayon si Jesus miingon kaniya: “Ako ang pagkabanhaw ug ang kinabuhi. Siya nga nagapasundayag ug pagtuo kanako, bisan pa siya mamatay, makadangat sa kinabuhi.” (Juan 11:23-25) Ang milagro sa pagkabalik ni Lazaro sa kinabuhi nagpalig-on sa iyang pagtuo ug nagsilsil sa pagtuo diha sa uban. (Juan 11:45) Apan unsa sa tukma ang gipasabot sa terminong “pagkabanhaw”?
16. Unsay kahulogan sa pulong “pagkabanhaw”?
16 Ang pulong “pagkabanhaw” gihubad gikan sa Gregong pulong a·naʹsta·sis, nga sa literal nagkahulogang “pagtindog pag-usab.” Ang Hebreohanong mga maghuhubad sa Grego naghubad sa a·naʹsta·sis nga may mga pulong nga nagkahulogang “pagbuhi pag-usab sa patay” (Hebreohanon, techi·yathʹ ham·me·thimʹ).a Sa ingon, ang pagkabanhaw naglangkit sa pagbangon sa tawo gikan sa way-kinabuhing kahimtang sa kamatayon—pagpasig-uli ug pagpabuhi pag-usab sa kinaiyahan sa kinabuhi sa indibiduwal.
17. (a) Nganong dili suliran ni Jehova nga Diyos ug ni Jesu-Kristo ang pagbanhaw sa mga indibiduwal? (b) Unsay gisaad ni Jesus bahin niadtong anaa sa handomanang mga lubnganan?
17 Kay way-kinutoban ang kaalam ug hingpit ang panumdoman, si Jehova nga Diyos daling makabangon sa usa ka tawo. Ang paghinumdom sa kinaiyahan sa kinabuhi sa mga patay—ilang mga kinaiya, ilang personal nga kasaysayan, ug sa tanang detalye sa ilang pagkamao—dili suliran alang kaniya. (Job 12:13; itandi ang Isaias 40:26.) Dugang pa, sumala sa gipaila sa kasinatian ni Lazaro, si Jesu-Kristo andam ug makaarang sa pagbanhaw sa mga patay. (Itandi ang Lucas 7:11-17; 8:40-56) Sa pagkatinuod, si Jesu-Kristo miingon: “Ang takna nagasingabot diin kadtong tanan nga anaa sa handomanang mga lubnganan makadungog sa iyang [kang Jesus nga] tingog ug managpanggula.” (Juan 5:28, 29) Oo, si Jesu-Kristo nagsaad nga kadtong tanang anaa sa handomanan ni Jehova pagabanhawon. Tin-aw, sumala sa Bibliya, ang kalag mamatay, ug ang kasulbaran sa kamatayon mao ang pagkabanhaw. Apan binilyong tawo ang nabuhi ug namatay. Kinsa taliwala kanila ang anaa sa handomanan sa Diyos, nga nagpaabot sa pagkabanhaw?
18. Kinsay pagabanhawon?
18 Kadtong nagsubay sa matarong nga dalan ingong mga alagad ni Jehova pagabanhawon. Apan, minilyong ubang katawhan ang namatay nga wala magpakita kon kaha sila mosunod sa matarong nga mga sukdanan sa Diyos. Mahimong sila walay hibangkaagan sa mga kinahanglanon ni Jehova o kulang ug igong panahon aron himoon ang gikinahanglang kausaban. Kining uban usab anaa sa handomanan sa Diyos ug busa pagabanhawon, kay ang Bibliya nagsaad: “Aduna unyay pagkabanhaw sa mga matarong ug sa mga dili-matarong.”—Buhat 24:15.
19. (a) Unsang panan-awon ang nadawat ni apostol Juan mahitungod sa pagkabanhaw? (b) Unsay ‘gitambog ngadto sa lanaw nga kalayo,’ ug unsay kahulogan nianang mga pulonga?
19 Si apostol Juan may kulbahinam nga panan-awon bahin sa mga binanhaw nga nagtindog atubangan sa trono sa Diyos. Nagbatbat niini, siya misulat: “Ang dagat nagtugyan sa mga patay nga diha niini, ug gitugyan sa kamatayon ug sa Hades ang mga patay nga diha nila, ug sila gihukman nga tagsa-tagsa sumala sa ilang mga buhat. Ug gitambog ang kamatayon ug ang Hades ngadto sa lanaw nga kalayo. Kini nagakahulogan sa ikaduhang kamatayon, ang lanaw nga kalayo.” (Pinadayag 20:12-14) Hunahunaa kon unsay kahulogan niana! Ang tanang patay nga anaa sa handomanan sa Diyos pagawason gikan sa Hades, o Sheol, ang komong lubnganan sa katawhan. (Salmo 16:10; Buhat 2:31) Unya “ang kamatayon ug ang Hades” igatambog ngadto nianang gitawag ug “lanaw nga kalayo,” nga nagsimbolo sa bug-os nga kalaglagan. Ang komong lubnganan sa katawhan dili na maglungtad.
Usa ka Talagsaong Palaaboton!
20. Ang minilyon nga patay karon pagabanhawon ngadto sa unsang matang sa palibot?
20 Sa dihang ang milyonmilyon bangonon sa pagkabanhaw, dili sila mahibalik sa kinabuhi diha sa way-sulod nga yuta. (Isaias 45:18) Mahigmata sila diha sa maanindot nga mas maayong palibot ug makadiskobreng andam na ang mga puy-anan, besti, ug daghang pagkaon alang kanila. (Salmo 67:6; 72:16; Isaias 65:21, 22) Kinsay mohimo niining tanang pagpangandam? Dayag, ang mga tawo nagpuyo na sa bag-ong kalibotan sa dili pa magsugod ang yutan-ong pagkabanhaw. Apan kinsa?
21, 22. Unsang talagsaong palaaboton ang anaa sa unahan alang niadtong nagkinabuhi sa “kataposang mga adlaw”?
21 Ang katumanan sa tagna sa Bibliya nagpakita nga kita nagkinabuhi na sa “kataposang mga adlaw” niining sistema sa mga butang.b (2 Timoteo 3:1) Sa dili madugay, si Jehova nga Diyos mobalda sa tawhanong kahikayan ug magpapas sa pagkadaotan gikan sa yuta. (Salmo 37:10, 11; Proverbio 2:21, 22) Nianang panahona, unsay mahitabo sa mga nag-alagad nga matinumanon sa Diyos?
22 Dili laglagon ni Jehova ang mga matarong uban sa mga daotan. (Salmo 145:20) Wala gayod siya magbuhat sa maong butang, ug dili siya mohimo niana sa dihang iyang hinloan ang yuta sa tanang pagkadaotan. (Itandi ang Genesis 18:22, 23, 26.) Sa pagkatinuod, ang kataposang basahon sa Bibliya naghisgot bahin sa ‘usa ka dakong panon sa katawhan, nga walay tawong makaihap, gikan sa tanang kanasoran ug mga tribo ug katawhan ug mga pinulongan,’ nga nagagula sa “dakong kasakitan.” (Pinadayag 7:9-14) Oo, usa ka dakong panon ang makalabang-buhi sa dakong kasakitan diin ang presenteng daotang kalibotan matapos, ug sila mosulod sa bag-ong kalibotan sa Diyos. Didto, ang masinugtanong katawhan makapahimulos sa bug-os sa kahibulongang tagana sa Diyos sa pagpagawas sa katawhan gikan sa sala ug kamatayon. (Pinadayag 22:1, 2) Sa ingon, ang “dakong panon” dili na gayod makaagom ug kamatayon. Pagkatalagsaong palaaboton!
Kinabuhi nga Walay Kamatayon
23, 24. Unsay imong kinahanglang buhaton kon buot nimong matagamtam ang kinabuhi nga walay kamatayon diha sa Paraiso sa yuta?
23 Makasalig ba kita niining talagsaong paglaom? Segurado gayod! Si Jesu-Kristo mismo nagpaila nga aduna unyay panahon nga ang mga tawo magkinabuhi nga dili na gayod mamatay. Sa dayon nang pagkabanhaw sa iyang higalang si Lazaro, gisultihan ni Jesus si Marta: “Ang matag usa nga buhi ug nagapasundayag ug pagtuo kanako dili gayod bisan kanus-a mamatay.”—Juan 11:26.
24 Buot ba nimo nga mabuhing walay kataposan sa Paraiso sa yuta? Nangandoy ka ba nga makita pag-usab ang imong mga minahal? “Ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod,” miingon si apostol Juan. (1 Juan 2:17) Karon na ang panahon aron mahibalo kon unsa ang kabubut-on sa Diyos ug magmatinguhaon sa pagkinabuhi nga nahiuyon niana. Dayon ikaw, uban sa milyonmilyon pang uban nga nagabuhat na sa kabubut-on sa Diyos, mahimong mabuhing walay kataposan sa Paraiso sa yuta.
[Mga footnote]
a Bisan tuod ang pulong “pagkabanhaw” dili makita diha sa Hebreohanong Kasulatan, ang paglaom sa pagkabanhaw tin-awng gipahayag sa Job 14:13, Daniel 12:13, ug Oseas 13:14.
b Tan-awa ang Kahibalo nga Motultol sa Kinabuhing Walay Kataposan, gipatik sa Watchtower Bible and Tract Society of New York, Inc., mga panid 98-107.
Nahinumdom Ka Ba?
◻ Unsa ang paninugdang kahulogan sa orihinal-nga-pinulongang mga pulong nga gihubad ug “kalag”?
◻ Unsay mahitabo sa kalag panahon sa kamatayon?
◻ Sumala sa Bibliya, unsa ang kasulbaran sa kamatayon?
◻ Unsang talagsaong palaaboton ang naghulat sa mga matinumanon karon?
[Kahon sa panid 15]
“Kalag” Ingong ang Kinabuhi sa Usa ka Linalang
Usahay, ang pulong “kalag” magpunting sa kinabuhi nga gitagamtam sa usa ka tawo o hayop. Kini wala mag-usab sa kabatbatan sa Bibliya sa kalag ingong usa ka tawo o hayop. Sa pag-ilustrar: Kita moingon nga ang usa maoy buhi, nga nagkahulogang siya usa ka buhing tawo. Makaingon usab kita nga siya nakabaton ug kinabuhi. Sa samang paagi, ang usa ka buhing tawo maoy usa ka kalag. Bisan pa niana, samtang siya buhi, ang “kalag” mahimong hisgotan ingong usa ka butang nga iyang nabatonan.
Pananglitan, ang Diyos miingon kang Moises: “Ang tanang tawo nga nagtinguha sa imong kalag patay na.” Tin-aw, ang mga kaaway ni Moises nagtinguha sa paghunos sa iyang kinabuhi. (Exodo 4:19; itandi ang Josue 9:24; Proverbio 12:10.) Gigamit ni Jesus ang pulong sa samang paagi sa dihang siya miingon: “Ang Anak sa tawo mianhi . . . sa paghatag sa iyang kalag nga usa ka lukat baylo sa daghan.” (Mateo 20:28; itandi ang 10:28.) Sa matag kahimtang, ang pulong “kalag” nagkahulogang “kinabuhi sa usa ka linalang.”
[Mga hulagway sa panid 15]
Silang tanan maoy mga kalag
[Credit Line]
Hummingbird: U.S. Fish and Wildlife Service, Washington, D.C./Dean Biggins
[Hulagway sa panid 17]
Gipasundayag ni Jesus nga ang kasulbaran sa kamatayon mao ang pagkabanhaw
[Hulagway sa panid 18]
“Ang matag usa nga buhi ug nagapasundayag ug pagtuo kanako dili gayod bisan kanus-a mamatay.”—Juan 11:26