Mga Magmamantala sa Gingharian Nagtaho
“Sukli ang Yawa, ug Siya Mokalagiw Gikan Kaninyo”
SA UNANG siglo, usa ka pundok sa mga deboto sa “mga kalaki sa salamangka” sa Efeso misanong sa Kristohanong mensahe pinaagi sa publikong pagsunog sa ilang mga libro bahin sa salamangka. (Buhat 19:19) Ang gibanabanang bili niining mga libroha maoy 50,000 ka buok salapi. Kon ang asoy sa Bibliya nagtumong sa denaryo, nga usa ka Romanhong salapi nga plata, mobili kadto ug labing menos $37,000!
Karong adlawa daghan ang sa usa ka panahon nanag-iya ug literatura nga naghisgot bahin sa okulto apan nagpasundayag ug determinasyon nga susama nianang sa karaang mga taga-Efeso. Tagda ang mosunod nga kasinatian gikan sa Canada.
Mga lima ka tuig kanhi, usa sa mga Saksi ni Jehova nagsangyaw gikan sa balay ngadto sa balay sa dihang sa usa ka pultahan usa ka babaye nga ginganlag Nora literal nga nagbitad kaniya ngadto sa balay. Latas sa daghang katuigan sa espirituwal nga pagsusi, si Nora nakatigom ug ginatos ka relihiyoso ug espiritistikanhong mga libro, apan buot siyang masayod kon unsay giingon sa Bibliya bahin sa paglaom sa mga patay. Ang Saksi nagtanyag kaniya sa tract nga Unsay Paglaom Alang sa Namatayng mga Minahal? Natubag ang mga pangutana ni Nora, ug siya midawat ug suskrisyon sa mga magasing Bantayanang Torre ug Pagmata!
Sa ulahi siya mibalhin ug wala nay kontak sa mga Saksi ni Jehova. Hinunoa, mipadayon siya sa pagdawat sa mga magasin pinaagig koreyo didto sa iyang bag-ong adres. Nagpidido usab siya ug pipila sa binase sa Bibliyang mga publikasyon nga nahisgotan diha sa mga magasin. Sa paglabay sa pila ka panahon, usa sa mga Saksi ni Jehova miabot sa iyang pultahan. Sanglit nadani nga ang Saksi direktang mikutlo sa Bibliya sa dihang nagtubag sa mga pangutana, gidawat siya ni Nora ug gipabalik siya alang sa dugang mga panaghisgot.
Hinunoa, ang Saksi nalisdan sa pagkontak pag-usab kang Nora. Ang balikbalik nga mga pagduaw gihimo sa lainlaing panahon sa adlaw ug sa lainlaing panahon sa semana nga walay kalamposan. Hinunoa, sa ngadtongadto ang iyang paglahutay gigantihan, ug nakaani siyag maayong mga resulta. Usa ka regular nga pagtuon sa Bibliya ang nasugdan, nga sa pag-insistir ni Nora kasagaran gihimo tulo ka beses sa usa ka semana. Ang mga butang nga iyang nakat-onan nagtukmod kaniya sa pagpakigsulti sa mga higala ug mga membro sa pamilya, nga miresulta nga ang tulo kanila mihangyo nga magtuon sa Bibliya uban sa mga Saksi ni Jehova.
Pinaagi sa iyang pagtuon si Nora nakaapresyar nga adunay daghang bakak nga relihiyon ug bakak nga mga propeta apan usa lamang ka dalan paingon sa kinabuhi. Sulod sa daghang katuigan nagapangita siya sa mga tubag sa iyang mga pangutana diha sa bakak nga mga relihiyon, apan tapos makakat-on kon unsay giingon sa Bibliya bahin sa mga demonyo, siya milihok sama sa karaang mga taga-Efeso nga nahisgotan sa Buhat 19:19. Iyang gihinloan ang iyang librarya ug, sulod sa daghang adlaw, nagsunog ug kapin sa usa ka libong libro nga naghisgot bahin sa okulto ug bakak relihiyosong mga pagtulon-an. Lakip sa mga publikasyon nga gisunog, ang usa ka hugpong sa upat ka libro mobili ug kapin sa $800!
Dayag nga wala mahimuot sa gibuhat ni Nora, ang mga demonyo naghasi kaniya sulod sa duha ka semana. Apan, kining daotang mga espiritu wala makadani kaniya nga mohunong sa pagtuon sa Bibliya ug sa iyang pagpakig-uban sa modernong-adlaw nga organisasyon ni Jehova.
Ang maong mga kasinatian nag-ilustrar pag-ayo sa kamatuoran sa mga pulong sa Bibliya: “Busa, magpasakop kamo sa Diyos; apan sukli ang Yawa, ug siya mokalagiw gikan kaninyo.”—Santiago 4:7.