Si Kristo Aktibong Nagapangulo sa Iyang Kongregasyon
“Ang Diyos sa atong Ginoong Jesu-Kristo . . . naghimo kaniya nga ulo ibabaw sa tanang butang alang sa kongregasyon.”—EFESO 1:17, 22.
ANG mga Saksi ni Jehova walay ginaila nga tawo ingong ilang pangulo. Ang ilang gambalay sa organisasyon walay katumbas sa papa sa Iglesya Romana Katolika, sa mga patriarka sa Sidlakanhong Ortodoksong mga Iglesya, o sa mga pangulo sa ubang mga iglesya ug mga sekta sa Kakristiyanohan. Ang ilang pagkamaunongon maoy ngadto kang Jesu-Kristo, ang Ulo sa Kristohanong kongregasyon, kinsa mipahayag: “Usa ra ang inyong Pangulo, si Kristo.”—Mateo 23:10.
2. Nganong ginaila sa mga Saksi ni Jehova si Kristo ingong Ulo sa Kristohanong kongregasyon, apan unsang mga pangutana ang ikasukna?
2 Sa Pentekostes si apostol Pedro nagpamatuod: “Si David wala mosaka sa mga langit, kondili siya mismo nagaingon, ‘Si Jehova miingon sa akong Ginoo: “Lumingkod ka sa akong tuo nga kamot, hangtod igabutang ko ang imong mga kaaway nga tumbanan sa imong mga tiil.”’ Busa pahibaloa ang tibuok balay sa Israel sa pagkatino nga ang Diyos naghimo kaniya nga Ginoo ug Kristo, kining Jesus nga inyong gilansang.” (Buhat 2:34-36) Apan bisan tuod nagaila nga sa 33 K.P. si Jesus gihimong Ginoo ug Ulo sa kongregasyon, makiling ba ta sa pag-isip kaniya ingong pasibong naglingkod sa tuo nga kamot ni Jehova, nga nagpaabot sa pag-entrono kaniya niadtong 1914? Bug-os ba kitang nahibalo nga sukad sa sinugdan si Kristo aktibong nagapangulo sa iyang kongregasyon?
Balaang Paagi sa Aktibong Pagmando
3 Sa gabii una pa sa iyang pagkamatay, si Jesus miingon ngadto sa iyang matinumanong mga apostol: “Sa inyong kaayohan nga ako mopahawa. Kay kon ako dili mopahawa, ang magtatabang dili moanha kaninyo; apan kon ako mopahawa, siya akong ipadala kaninyo.” (Juan 16:7) Iyang ipadala dili ang usa ka persona kondili ang aktibong gahom. Iyang gitin-aw kini sa dayong pagkayab sa langit, nga miingon ngadto sa nagtigom niyang mga tinun-an: “Igapadala ko kaninyo kadtong gisaad sa akong Amahan. Kamo, hinunoa, magpabilin sa siyudad hangtod nga masul-oban na kamo sa gahom gikan sa kahitas-an.”—Lucas 24:49.
4. Sa unsang paagi ang balaang espiritu gigamit sukad sa Pentekostes?
4 Ang matinumanong mga tinun-an ni Jesus nagpabilin sa dapit sa Jerusalem hangtod sa Pentekostes. Niadtong adlawa sila “napuno sa balaang espiritu,” sumala sa gisaad. Si Pedro nagpamatuod: “Tungod kay siya [Jesus] nahituboy na ngadto sa tuo nga kamot sa Diyos ug nakadawat sa gisaad nga balaang espiritu gikan sa Amahan, siya mibubo niini nga inyong nakita ug nadungog.” (Buhat 2:4, 33) Sa maong paagi gipanganak ni Jehova kadtong unang mga Kristohanon ingong iyang espirituwal nga mga anak. (Galacia 4:6) Gawas pa, nadawat ni Jesus ang espiritu gikan sa iyang Amahan ingong usa ka paagi sa aktibong pagdumala sa iyang kongregasyon sa yuta gikan sa iyang langitnong posisyon sa tuo nga kamot sa Diyos.
5, 6. (a) Unsa ang laing galamiton nga gihatag kang Kristo aron siya makaarang sa pagmando sa iyang kongregasyon sa yuta? (b) Ihatag ang ispisipikong mga pananglitan giunsa paggamit ni Jesus ang maong galamiton alang sa iyang mga tinun-an ug sa pagpaluyo sa buluhaton sa pagwali.
5 Dugang pa, si apostol Pedro misulat mahitungod kang Jesus: “Siya anaa sa tuo nga kamot sa Diyos, kay siya miadto man sa langit; ug ang mga manulonda ug mga pagbulot-an ug mga gahom nailalom man kaniya.” (1 Pedro 3:22) Busa, ang mga manulonda maoy laing galamiton nga ipagamit ni Jehova kang Kristo alang sa aktibong pagpangulo sa Kristohanong kongregasyon.
6 Busa, inigkabasa nato diha sa basahong Mga Buhat nga “ang manulonda ni Jehova” o “usa ka manulonda sa Diyos” milihok sa pagpaluyo sa Kristohanong buluhaton sa pagwali o mibalda alang sa mga sakop sa Kristohanong kongregasyon, anaa ang tanang katarongan sa pagtuo nga ang maong mga manulonda milihok ilalom sa pagdumala ni Kristo Jesus. (Buhat 5:19; 8:26; 10:3-7, 22; 12:7-11; 27:23, 24) Ingong “si Miguel ang arkanghel,” si Kristo may mga manulonda nga iyang masugo, ug iyang gigamit sila sa aktibong pagpangulo sa Kristohanong kongregasyon sa unang siglo K.P.—Judas 9; 1 Tesalonica 4:16.
Usa ka Makitang Nagamandong Lawas
7. Unsa pa ang laing galamitong gigamit ni Kristo sa pagtultol sa iyang kongregasyon, ug unsang mga kasulatan ang nagahisgot niining “katungdanan sa pagkamagtatan-aw”?
7 Ang Kasulatan nagapaila usab nga gigamit ni Jesu-Kristo ang usa ka grupo sa mga lalaki ingong nagamandong lawas sa paghatag ug direksiyon sa iyang kongregasyon sa yuta. Sa sinugdan, ang maong nagmandong lawas daw nalangkoban lamang sa 11 ka apostol. Sa nagtinguha sa kabubut-on ni Jehova sa puli ni Judas Iskariote, si Pedro nagkutlo sa Salmo 109:8, nga nagaingon: “Ipakuha sa lain ang iyang katungdanan sa pagkamagtatan-aw.” Unya, sa ilang pag-ampo kang Jehova, si Pedro ug ang iyang mga kauban mihangyo sa Diyos nga itudlo ang lalaki “nga mokuha sa dapit sa maong ministeryo ug pagkaapostol, nga gikan niana mibulag si Judas.” Si Matias gitudlo sa pag-alagad “kauban sa napulog-usa ka apostol.”—Buhat 1:20, 24-26.
8. Unsang duha ka unang panig-ingnan nga nagapakita sa paagi sa paggamit ni Kristo sa mga membro sa makitang nagamandong lawas?
8 Ang unang nahitala nga hitabo sa pagtuman sa 12 ka apostol sa maong “katungdanan sa pagkamagtatan-aw” ingong nagmandong lawas maoy sa dihang ilang gitudlo ang mga lalaking may katakos sa espirituwal sa pag-alagad sa ilang mga igsoon sulod sa unang kongregasyon. (Buhat 6:1-6) Ang ikaduhang hitabo maoy sa dihang si Filipe misugod sa pagwali bahin kang Kristo ngadto sa mga Samaritanhon. Ingong resulta niini, “ang mga apostol sa Jerusalem . . . nagpadala kang Pedro ug kang Juan ngadto kanila.” Maoy tapos lamang makapatong sa ilang mga kamot ang maong hawasnong mga membro sa nagmandong lawas diha sa mga Samaritanhon nga sila ‘nagsugod sa pagkadawat sa balaang espiritu.’—Buhat 8:5, 14-17.
Personal nga Pagpangulo ni Kristo
9. Si Kristo kanunay bang milihok pinaagi sa mga manulonda o sa nagmandong lawas? Ihatag ang usa ka pananglitan.
9 Busa, sukad sa sinugdan sa Kristohanong kongregasyon, nabatonan ni Kristo ang balaang espiritu, mga manulonda, ug makitang nagamandong lawas nga magamit niya aron makaarang siya makahimo sa aktibong pagpangulo sa iyang mga tinun-an sa yuta. May panahong siya milihok sa personal. Pananglitan, si Kristo personal nga nagkabig kang Saulo sa Tarso. (Buhat 9:3-6) Tulo ka adlaw sa ulahi si Jesus nakigsulting direkta ngadto sa “usa ka tinun-an” nga ginganlag si Ananias. Sa pagpadayag kaniya sa tulog-pilong misyon nga diha sa iyang hunahuna alang kang Saulo, si Jesus miingon: “Kining tawhana maoy usa ka pinili nga panudlanan alang kanako sa pagdala sa akong ngalan ngadto sa kanasoran ingon man ngadto sa mga hari ug sa mga anak sa Israel.” (Buhat 9:10-15) Si Kristo nagtawag kang Saulo alang sa usa ka linaing buluhaton. Sa ingon si Saulo nahimong usa ka apostol, o pinadala, nga mas nailhang si apostol Pablo.
10. Giunsa sa personal pagdumala ni Kristo ang buluhaton sa pagwali?
10 Si Kristo personal nga nagdumala sa buluhatong pagwali. Pinaagi sa balaang espiritu nga nadawat gikan sa iyang Amahan si Jehova, iyang unang gipalihok ang misyonaryong mga panaw ni Pablo ug naikag sa personal niana. Atong mabasa: “Ang balaang espiritu miingon: ‘Igahin kanako si Bernabe ug si Saulo alang sa buluhaton nga niini ako silang gitawag.’ . . . Busa kining mga tawhana, nga gipadala sa balaang espiritu, miadto sa Seleucia, ug gikan didto sila misakayg sakayan” sa unang misyonaryong panaw. (Buhat 13:2-4) Hinuon, ang balaang espiritu, ang aktibong gahom ni Jehova, dili ‘makasulti’ sa usa ka butang ni ‘makapadala’ sa usa ka tawo sa kaugalingon. Ang usang naggamit sa espiritu sa pagtultol sa mga butang dayag mao si Kristo, ang Ulo sa kongregasyon.
11. Unsay nahitabo panahon sa ikaduhang misyonaryong panaw ni Pablo, ug giunsa sa pagpakita niini sa tin-aw nga gigamit ni Jesus ang espiritu sa pagtultol sa buluhaton sa pagwali?
11 Kining paggamit ni Jesus sa espiritu samtang aktibo niyang gipangulohan ang unang mga Kristohanon tin-awng gipakita diha sa talaan sa ikaduhang misyonaryong panaw ni Pablo. Tapos sa pagduaw pag-usab sa mga kongregasyon sa Lysinia (usa ka rehiyon sa Asia Minor) nga natukod panahon sa unang misyonaryong paglibot, si Pablo ug ang iyang mga kauban sa pagpanaw dayag nagtuyo nga mipaingon sa kasadpan agi sa Romanhong probinsiya sa Asia. Nganong wala nila ipadayon ang ilang plano? “Tungod kay sila gidid-an man sa balaang espiritu sa pagpahayag sa pulong didto sa distrito sa Asia.” (Buhat 15:36, 40, 41; 16:1-6) Apan kinsay migamit sa balaang espiritu ni Jehova sa paggiya kanila? Ang sunod nga bersikulo nagatubag. Kini nagapakita nga dihang sila nagpaingon sa amihanan, nga nagplano sa pagwali sa Bitinia, “wala sila tugoti sa espiritu ni Jesus.” (Buhat 16:7) Oo, si Jesu-Kristo migamit sa espiritu nga iyang nadawat gikan sa iyang Amahan sa aktibong pagtultol sa buluhatong pagwali. Buot niya ug sa iyang Amahan si Jehova nga mokaylap ang maayong balita ngadto sa Uropa, busa nadawat ni Pablo ang usa ka panan-awon mahitungod niana.—Buhat 16:9, 10.
Si Kristo Nagpaluyo sa mga Sakop sa Nagmandong Lawas
12, 13. Sa panahon sa unang pagduaw ni Pablo sa Jerusalem ingong Kristohanon, unsay nahitabo nga nagpakita nga gipaluyohan ni Kristo ang mga desisyon nga gihimo sa mga igsoong may katungdanan nianang siyudara?
12 Sa panahon sa unang kontak ni apostol Pablo sa mga tinun-an sa Jerusalem, masabtan nga sila nagpanuko sa pagpakigkita kaniya. “Busa gitabangan siya ni Bernabe ug gidala siya ngadto sa mga apostoles.” (Buhat 9:26, 27) Si Pablo migugol ug 15 ka adlaw uban kang apostol Pedro. Iyang natagbo usab ang igsoon ni Jesus sa inahan nga si Santiago, nga niadto usa sa mga ansiano sa kongregasyon sa Jerusalem. (Galacia 1:18, 19) Ang sunod nga mga teksto sa Mga Buhat nagapakitang ang mga ansiano sa Jerusalem nahimong bahin sa nagmandong lawas sa unang Kristohanong kongregasyon, uban ang 12 ka apostoles.—Buhat 15:2; 21:18.
13 Panahon sa iyang duha-ka-semanang pagpuyo sa Jerusalem, si Pablo misangyaw ngadto sa mga Hudiyo nga Gregog pinulongan, apan “sila naninguha sa pagpatay kaniya.” Si Lucas midugang nga “sa namatikdan kini sa mga igsoon, ilang gidala siya ngadto sa Cesarea ug didto gipagikan siya padulong sa Tarso.” (Buhat 9:28-30) Apan kinsay nagpaluyo sa maong maalamong desisyon? Katuigan sa ulahi, sa nag-asoy sa samang yugto sa iyang kinabuhi, si Pablo mipahayag nga si Jesus nagpakita kaniya ug nagpahimangno kaniya nga mopahawa dayon sa Jerusalem. Sa mitutol si Pablo, si Jesus midugang: “Pumahawa ka, kay ipadala ko ikaw ngadto sa mga nasod sa halayo.” (Buhat 22:17-21) Si Kristo suod nagbantay sa mga butang gikan sa kahitas-an ug milihok pinaagi sa mga igsoong may katungdanan sa Jerusalem ug direktang nakigsulti kang Pablo.
14. Unsang pagtandi sa mga talaan sa Mga Buhat ug sa Galacia ang nagapakitang si Kristo nagtultol sa mga butang maylabot sa tigom sa nagmandong lawas bahin sa sirkunsisyon?
14 Sa susama, ang atentibong pagbasa sa Kasulatan nagapakita sa tin-aw nga si Kristo nagpaluyo sa hinungdanong tigom sa nagmandong lawas aron sa paghusay sa suliran kon kaha ang Hentil nga mga Kristohanon angay bang magpailalom sa sirkunsisyon ug sa Kasugoan ni Moises o dili ba. Ang basahon sa Mga Buhat nagaingon nga dihang mitungha ang isyu, “ilang [pihong ang mga membrong may katungdanan, o ang mga ansiano, sa kongregasyon sa Antioquia] gihikay nga si Pablo ug si Bernabe ug ang uban pa kanila motungas ngadto sa mga apostoles ug sa mga ansiano sa Jerusalem bahin niining gilantugian.” (Buhat 15:1, 2) Apan sa dihang gisugid ni Pablo ang mga kahimtang nga mitultol ngadto sa iyang pagtungas sa Jerusalem aron ipahusay ang isyu sa sirkunsisyon, siya miingon: “Mitungas ako sumala sa pinadayag.” (Galacia 2:1-3; itandi ang 1:12.) Ingong ang aktibong Ulo sa kongregasyon, buot ni Kristo nga mahusay sa tibuok makitang nagmandong lawas kining hinungdanong doktrinal nga butang. Pinaagi sa balaang espiritu, iyang gigiyahan ang mga hunahuna niining mga lalaking debotado sa paghimo sa ilang desisyon.—Buhat 15:28, 29.
Usa ka Talagsaong Desisyon
15, 16. (a) Unsay gipabuhat sa nagmandong lawas kang Pablo sa pagkauli niya gikan sa iyang ikatulong misyonaryong panaw? (b) Nganong kining instruksiyona tingali daw talagsaon, ug nganong gisunod kadto ni Pablo? (c) Unsang pangutana ang motungha?
15 Ang laing makaiikag nga pananglitan sa aktibong pagtultol ni Kristo sa mga butang gikan sa langit mao ang nahitabo tapos sa ikatulong misyonaryong panaw ni Pablo. Si Lucas misugid nga sa pagkauli sa Jerusalem, gihimo ni Pablo ang bug-os nga taho ngadto sa mga membro sa nagmandong lawas nga diha. Si Lucas misulat: “Si Pablo miuban kanamo sa pag-adto kang Santiago; ug didto ang tanang ansiano. Ug iyang gipangomosta sila ug gisaysay nga detalyado ang mga butang nga nahimo sa Diyos taliwala sa mga nasod pinaagi sa iyang ministeryo.” (Buhat 21:17-19) Tapos makadungog kang Pablo, ang nagtigom nga lawas mihatag kaniyag tin-awng instruksiyon, nga mipahayag: “Buhata kining among igaingon kanimo.” Ilang gisugo siya nga moadto sa templo ug sa dayag ipasundayag nga siya wala “magtudlo sa tanan nga Hudiyo sa taliwala sa mga nasod sa pagbulag kang Moises, nga nagsugo kanila nga dili na pagsirkunsidar sa ilang mga anak ni sa pagsunod sa maugdang nga mga batasan.”—Buhat 21:20-24.
16 Pagaduhaduhaan tingali sa usa ang pagkamaalamon niining instruksiyona. Sumala sa ato nang nakita, katuigan nga nangagi si Santiago, ug tingali ang ubang ansiano nga presente sa duha ka okasyon, nagpapahawa kang Pablo sa Jerusalem tungod kay nameligro ang iyang kinabuhi pinaagi sa “mga Hudiyo nga Gregog pinulongan.” (Buhat 9:29) Bisan pa niini, gisunod ni Pablo ang mando, nga nahiuyon sa iya nang giingon sa 1 Corinto 9:20. Apan ang samang mga hinungdan mopatunghag samang mga epekto. “Ang mga Hudiyo gikan sa [Romanhong probinsiya sa] Asia” nagpahinabog kagubot ug naninguha sa pagpatay kang Pablo. Ang madaling aksiyon lamang sa Romanong mga sundalo ang nagluwas kaniya gikan sa kamatayon. (Buhat 21:26-32) Sanglit si Kristo mao ang aktibong Ulo sa kongregasyon, nganong iyang gipahinabo nga ang nagmandong lawas nagsugo kang Pablo sa pag-adto sa templo?
17. Sa unsang paagi kining talagsaong desisyon misangpot nga pagbuot sa Diyos, ug unsay ginapaila niini?
17 Ang tubag nadayag diha sa nahitabo sa ikaduhang gabii tapos sa pagdakop kang Pablo. Nakahatag siyag maayong pamatuod ngadto sa magubotong panon nga nagtinguha sa pagpatay kaniya ug, sa sunod adlaw, ngadto sa Sanhedrin. (Buhat 22:1-21; 23:1-6) Sa ikaduhang panahon siya hapit mapatay. Apan niadtong gabhiona, si Jesus nagpakita kaniya ug miingon: “Magmaisogon ka! Kay maingon nga ikaw nakahatag ug bug-os nga pamatuod sa mga butang mahitungod kanako sa Jerusalem, ikaw magapamatuod usab sa Roma.” (Buhat 23:11) Hinumdomi ang tulog-pilong misyon nga gitagna ni Kristo alang kang Pablo. (Buhat 9:15) Gidala ni Pablo ang ngalan ni Kristo ngadto sa “kanasoran” ug ngadto sa “mga anak sa Israel,” apan ang panahon miabot na niadto aron siya magpamatuod “ngadto sa mga hari.” Tungod sa maong desisyon sa nagmandong lawas, si Pablo nakaarang sa pagpamatuod ngadto sa Romanong mga prokurador si Felix ug si Festo, ngadto kang Haring Herodes Agripa II, ug, sa kataposan, sa Romanong Emperador Nero. (Buhat, mga kapitulo 24-26; 27:24) Kinsay makaduda nga si Kristo nagpaluyo niining tanan?
Si Kristo Aktibo Pang Nagapangulo sa Iyang Kongregasyon
18. Unsay giingon ni Jesu-Kristo una mosaka sa langit?
18 Usa pa mobiya sa iyang mga tinun-an ug mosaka ngadto sa tuo nga kamot sa iyang Amahan, si Jesu-Kristo mipahayag: “Ang tanang pagbulot-an gikahatag kanako sa langit ug sa yuta. Busa panlakaw kamo ug himoang mga tinun-an ang katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang akong gisugo kaninyo. Ug, tan-awa! ako magauban kaninyo sa tanang adlaw hangtod sa konklusyon sa sistema sa mga butang.”—Mateo 28:18-20.
19 Ang basahon sa Mga Buhat, sa pag-asoy sa kasaysayan sa unang katuigan sa Kristiyanidad, nagapakita nga dili kaduhaduhaang gigamit ni Kristo ang iyang pagbulot-an pinaagi sa aktibong pagpangulo sa iyang kongregasyon sa yuta. Iyang gibuhat kini pinaagi sa balaang espiritu, mga manulonda, ug sa nagmandong lawas nga nalangkoban sa 12 ka apostoles ug sa mga ansiano sa kongregasyon sa Jerusalem. Si Jesus mipahayag nga siya magauban sa iyang mga tinun-an hangtod gayod sa konklusyon sa sistema sa mga butang, diin kita ania na karon. Sa sunod nga artikulo, atong makita sa unsang paagi siya mao gihapon ang aktibong Ulo sa Kristohanong kongregasyon ug sa unsang paagi siya nagapangulo sa iyang “mga karnero” karong adlawa.
Mga Puntong Hinumdoman
◻ Nganong ang mga Saksi ni Jehova walay giila nga tawo ingong ilang pangulo?
◻ Giunsa paggamit ni Kristo ang balaang espiritu sa pagpangulo sa unang Kristohanong kongregasyon?
◻ Giunsa paggamit ni Kristo ang mga manulonda sa pagpangulo sa unang-siglong mga Kristohanon?
◻ Giunsa paggamit ni Kristo ang usa ka makitang nagamandong lawas sa pagdumala sa iyang kongregasyon sa yuta?
◻ Sa unsang paagi may panahong personal nga gitultolan ni Kristo ang mga butang?
1. Sa unsang paagi ang pila ka membro sa mga iglesya sa Kakristiyanohan nagatubag sa pangutana, ‘Kinsa ang inyong pangulo?’ apan unsay tubag niana sa mga Saksi ni Jehova?
3. Unsay gisaad ni Jesus nga ipadala ngadto sa iyang mga tinun-an, ug nganong kita nahibalo nga siya wala maghisgot sa usa ka persona?
19. Giunsa paggamit ni Kristo ang iyang hinatag-Diyos nga pagbulot-an sa unang siglo, ug unsay pagatun-an sa sunod nga artikulo?
[Mapa sa panid 12]
(Alang sa bug-os nga pagkahan-ay sa teksto, tan-awa ang publikasyon)
Ikaduhang Misyonaryong Panaw ni Pablo
MACEDONIA
BITINIA UG PONTO
Filipos
Tesalonica
Troas
GALACIA
CAPADOCIA
ASIA
Antioquia
Iconio
Listra
CILICIA
Derbe
LICIA
Tarso
PANFILIA
Seleucia
Antioquia
[Hulagway sa panid 10]
Si Kristo nangulo usab sa iyang kongregasyon pinaagi sa usa ka makitang nagmandong lawas