Puliki sa Patay ng mga Binuhatan o sa Pag-alagad Kang Jehova?

“SORI, puliki ako.” Kini usa sa mga pagtutol nga giatubang sa mga Saksi ni Jehova samtang sila nagasangyaw sa publiko sa maayong balita sa Gingharian. (Mateo 24:14) Ug samtang ang pangangkon nga “puliki ako” usahay walay kalainan sa yanong pasangil, ang kamatuoran mao nga daghang tawo maoy puliki. Sila sa lintunganay natuphan sa “kabalaka niining sistema sa mga butang”​—ang mga kapiot sa pagkinabuhi, pag-agpas sa bayronon, pagpadulong ug pagpauli gikan sa trabahoanan, pagpadako sa kabataan, pag-atiman sa puloy-anan, kotse, ug ubang mga kabtangan.​—Mateo 13:22.

Bisan pa, samtang ang katawhan mahimong tinuod nga puliki, dili daghan ang nalangkit sa mga binuhatan nga sa pagkatinuod mabungahon o produktibo. Kini sama sa gisulat kas-a sa maalamong tawo nga si Solomon: “Kay unsay naangkon sa tawo gikan sa tanan niyang buhat ug gikan sa pagpakigbisog sa iyang kasingkasing diin siya nakagbuhat ilalom sa adlaw? Kay ang tanan niyang mga adlaw ang iyang atubangon nagkahulogan ug mga kasakit ug kagul-anan, usab sa magabii ang iyang kasingkasing dili makapahulay. Kini usab kakawangan man.”​—Ecclesiastes 2:22, 23.

Ang Bibliya nagtawag usab sa maong walay pulos nga kalihokan ug “patayng mga binuhatan.” (Hebreohanon 9:14) Ang mao bang mga buhat nagamando sa imong kinabuhi? Kini angay nga kabalak-an nimo ug dako ingong usa ka Kristohanon, tungod kay ang Diyos “magabalos sa tagsatagsa ka tawo sumala sa iyang buhat.” (Salmo 62:12) Ug sanglit “ang panahon nga nabilin hamubo,” kita ilabina nang angayng mabalaka nga dili kita mag-usik ug panahon tungod sa mga binuhatan nga patay. (1 Corinto 7:29) Apan unsa man gayod ang patayng mga binuhatan? Sa unsang paagi nato sila lantawon? Ug sa unsang paagi kita makaseguro nga kita napuliki sa mga buhat nga may tinuod nga bili?

Pag-ila sa Patayng mga Binuhatan

Sa Hebreohanon 6:1, 2, si Pablo nagsulat: “Tungod niining katarongana, karon nga kita nakabiya na sa nahaunang mga tuluohan mahitungod kang Kristo, manag-uswag kita ngadto sa pagkahamtong, sa dili na pagpahimutang pag-usab sa sukaranan, sama sa, paghinulsol gikan sa patay nga mga binuhatan, ug sa pagtuo ngadto sa Diyos, ang pagtulon-an sa bawtismo ug sa pagpandong sa mga kamot, ang pagkabanhaw sa mga patay ug silot nga dayon.” Matikdi nga “ang nahaunang tuluohan” naglakip sa “paghinulsol gikan sa patay nga mga binuhatan.” Ingong mga Kristohanon, ang mga magbabasa ni Pablo nakahinulsol na gikan sa maong patay nga mga buhat. Sa unsang paagi?

Sa wala pa modawat kang Kristo, pila sa unang siglo nalangkit sa patayng “mga buhat sa unod,” sama sa, “pakighilawas, kahugaw, malaw-ay nga kagawian, pagsimbag diyosdiyos, panglamat,” ug ubang daotang buhat. (Galacia 5:19-21) Kon dili mabantayan, ang maong mga binuhatan motultol ngadto sa ilang espirituwal nga kamatayon. Sa kaluoy, hinuon, kadtong mga Kristohanon mingtalikod na sa ilang malaglagong kurso, naghinulsol, ug “nahinloan.” Mao nga sila nakatagamtam ug mahinlong pagbarog kang Jehova.​—1 Corinto 6:9-11.

Dili tanang Kristohanon, hinuon, ang nagkinahanglan sa paghinulsol gumikan sa daotan o imoral nga mga buhat. Ang sulat ni Pablo sa panguna gitumong sa Hudiyong mga magtutuo, nga daghan kanila sa walay duhaduha hugot nagtuman sa Moisesnong Kasugoan sa wala pa dawata si Kristo. Nan, sa unsang patayng mga binuhatan, nga sila naghinulsol? Sa tino walay sayop sa ilang pagsunod sa mga rituwal ug diyeta nga gikinahanglan sa Kasugoan. Dili ba ang Kasugoan “balaan ug matarong ug maayo”? (Roma 7:12) Oo, apan sa Roma 10:2, 3, si Pablo nagsulti mahitungod sa mga Hudiyo: “Kay saksi ako nila nga sila adunay kasibot alang sa Diyos; apan dili sumala sa tukmang kahibalo; kay, tungod sa kawalay hibangkaagan sa pagkamatarong sa Diyos kondili nagtinguha sa ilang kaugalingong pagkamatarong, sila wala magpasakop sa ilang kaugalingon sa pagkamatarong sa Diyos.”

Oo, ang mga Hudiyo sa sayop nagtuo nga pinaagi sa maigihong pagsunod sa Kasugoan, maangkon nila ang ilang kaluwasan. Si Pablo, hinuon, nagpatin-aw nga “ang tawo pagamatarongon, dili tungod sa mga buhat sa pagbantay sa kasugoan, kondili pinaagi lamang sa pagtuo kang Kristo Jesus.” (Galacia 2:16) Pagkatapos matagana ang lukat ni Kristo, ang buhat sa Kasugoan​—bisag unsa ka diyosnon o kahalangdon—​maoy patayng mga binuhatan ug walay bili bisag pila sa pag-agom ug kaluwasan. Mao nga ang maayog-kasingkasing nga mga Hudiyo nangita sa pag-uyon sa Diyos pinaagi sa paghinulsol sa maong patayng mga binuhatan ug sa pagpabawtismo sa pagsimbolo sa ilang paghinulsol.​—Buhat 2:38.

Unsay atong makat-onan gikan niini? Nga ang patayng mga binuhatan mahimong naglakip ug labaw pa kaysa daotan o imoral nga mga buhat; sila naglakip sa bisan unsang buhat nga patay sa espirituwal, kawang, o dili mabungahon. Apan dili ba tanang mga Kristohanon naghinulsol gikan sa maong patayng mga binuhatan una sa ilang bawtismo? Tinuod, apan ang pila ka Kristohanon sa unang siglo sa ulahi nadakin-as ngadto sa imoral nga panggawi. (1 Corinto 5:1) Ug taliwala sa Hudiyong mga Kristohanon, may kiling sa pagbalik sa pagbatasan sa patayng mga binuhatan sa Moisesnong Kasugoan. Si Pablo nagpahinumdom kanila nga dili na mobalik sa patayng mga binuhatan.​—Galacia 4:21; 5:1.

Pagbantay Batok sa Patayng mga Binuhatan

Ang katawhan ni Jehova karong adlawa kinahanglan gayod nga mag-amping nga dili madakin-as ngadto sa lit-ag sa patayng mga binuhatan. Kita ginaatake sa halos tanang kiliran sa mga pagpiot aron makompromiso sa moral, nga mahimong dili matinud-anon, ug sa paglangkit sa mga buhat sa seksuwal nga kahiwian. Ikasubo, linibo nga mga Kristohanon kada tuig ang nagpadaog sa maong mga pagpiot ug, kon dili mahinulsolon, palagpoton gikan sa Kristohanong kongregasyon. Nan, labaw kaysa kaniadto, ang Kristohanon kinahanglan mosanong sa tambag ni Pablo diha sa Efeso 4:22-24: “Hukasa ninyo ang inyong daang pagkatawo nga dala pa sa inyong karaang paggawi sa kinabuhi ug nga nadunot pinaagi sa mga malimbongong pagpangibog; apan . . . magpabag-o kamo diha sa gahom sa inyong salabotan, ug isul-ob ninyo ang bag-ong pagkatawo nga nalalang sumala sa kabubut-on sa Diyos diha sa tinuod nga pagkamatarong ug kamaunongon.”

Siyempre, ang mga taga-Efeso kinsa gisulatan ni Pablo nakasul-ob na sa bag-ong personalidad sa dakong sukod. Apan gitabangan sila ni Pablo sa pag-apresyar nga ang pagbuhat sa ingon maoy usa ka nagapadayon nga proseso! Kon walay dili mohunong nga panlimbasog, ang mga Kristohanon mahimong maagak ug balik sa patayng mga binuhatan pinaagi sa malimbongong mga pangibog nga nagapadayon ingong makadunot nga impluwensiya. Ang susama tinuod kanato karong adlawa. Kinahanglan kanunay kitang manlimbasog sa pagsul-ob sa bag-ong personalidad, nga dili tugotan kana nga mamansahan sa bisan unsa nga hiyas nga nabatonan sa atong karaang paagi sa kinabuhi. Kinahanglan atong isalindot​—dumtan—​ang bisan unsang matang sa daotang binuhatan sa unod. “Oh kamo nga mga nahagugma kang Jehova, dumti ninyo ang daotan,” awhag sa salmista.​—Salmo 97:10.

Dalayegon, ang dakong kinabag-an sa katawhan ni Jehova karong adlawa nagpatalinghog niining tambag ug nagpabiling hinlo sa moral. Ang pila, hinuon, nahitipas pinaagi sa mga binuhatan nga dili gayod sayop sa ilang kaugalingon apan nga sa kapulihay kawang ug dili mabungahon. Pananglitan, ang pila bug-os nga nalangkit sa mga proyekto sa pagpanapi o sa pagbaton ug materyal nga mga butang. Apan ang Bibliya nagpasidaan: “Apan sila nga maikagon gayod nga mahimong dato mangahulog ngadto sa panulay ug ngadto sa bitik ug daghang binuang ug makadaot nga mga pangibog, nga nagaunlod sa mga tawo ngadto sa kamatayon ug pagkalaglag.” (1 Timoteo 6:9) Alang sa uban, ang sekular nga edukasyon namatud-ang usa ka lit-ag. Tinuod, usa ka tinong ang-ang sa sekular nga edukasyon tingali kinahanglanon sa panarbaho. Apan sa makahurot-panahon nga pangagpas sa taas kalibotanong edukasyon, ang pila nagdaot sa ilang kaugalingon sa espirituwal.

Oo, daghang binuhatan sa ilang kaugalingon tingali dili sayop sa moral. Apan sila bisan pa patay kon sila wala sa pagkatinuod makadugang sa atong kinabuhi karon o makabaton kita ug pag-uyon uban kang Jehova nga Diyos. Ang maong mga binuhatan nag-usik ug panahon ug kusog apan wala makapatungha ug espirituwal nga kaayohan, walay dumalayong kahupayan.​—Itandi ang Ecclesiastes 2:11.

Walay duhaduha ikaw nanlimbasog pag-ayo nga mapuliki sa takos espirituwal nga mga kalihokan. Makatabang, hinuon, ang regular nga pagsusi sa imong kaugalingon. Matag karon ug unya, mahimo kang mosukna sa imong kaugalingon ug mga pangutana sama sa: ‘Ang ako bang pakig-ambit sa pag-alagad ug pagtambong sa tigom nagaantos tungod ako nagkuha ug dili kinahanglanon sekular nga trabaho?’ ‘May panahon ba ako sa lulinghayaw apan diyutay ra ug panahon sa personal ug pamilya nga pagtuon?’ ‘Gigugol ko ba ang dakong panahon ug kusog sa pag-atiman alang sa materyal nga mga kabtangan apan napakyas sa pag-atiman alang sa mga nanginahanglan diha sa kongregasyon, sama sa mga masakiton ug mga tigulang?’ Ang mga tubag niining mga pangutanaha tingali mopakita sa usa ka panginahanglan sa imong bahin sa paghatag ug dakodako nga pagpabili sa espirituwal nga mga binuhatan.

Magmapuliki sa Pag-alagad Kang Jehova

Sama sa giingon sa 1 Corinto 15:58, nga “magmadagayaon sa buluhaton sa Ginoo.” Labaw sa tanan mao ang pagwali-sa-Gingharian ug paghimog-tinun-an nga buluhaton. Sa 2 Timoteo 4:5, si Pablo nag-aghat: “Himoa ang pagwali sa Maayong Balita nga imong buluhaton sa kinabuhi, diha sa mabug-osong pag-alagad.” (Jerusalem Bible) Ang mga ansiano ug ministeryal nga alagad usab may dakong buluhaton sa pag-atiman sa panginahanglan sa panon. (1 Timoteo 3:1, 5, 13; 1 Pedro 5:2) Ang mga ulo sa pamilya​—kadaghanan nag-inusara nga ginikanan—​usab may mabug-at nga kaakohan sa pag-atiman alang sa ilang pamilya ug pagtabang sa ilang kabataan nga magtubo diha sa ilang relasyon uban sa Diyos. Ang maong mga buluhaton mahimong makapalapoy, ngani usahay, dili mabangbang. Apan halayo gikan sa pagkahimong patay, sila nagadala ug tinuod nga katagbawan!

Ang suliran mao: Sa unsang paagi ang usa makahigayon sa pagtuman ning tanang kinahanglanon mapuslanong mga binuhatan? Disiplina sa kaugalingon ug personal nga pagkaorganisado maoy hinungdanon. Sa 1 Corinto 9:26, 27, si Pablo nagsulat: “Ako wala magdalagan nga walay tumong; ang akong sinumbagan dili ingon sa nagabatibatig sumbag sa hangin; hinunoa ginabun-og ko ang akong lawas ug ginapanton ko kini, basin unya nga sa tapos ako makasangyaw ngadto sa uban, ako pagahukman na hinuon nga dili diay takos sa pag-apil sa bangga.” Usa ka paagi sa pagpadapat sa prinsipyo niining tekstoha mao ang popanahong pagsusi sa imong personal naandan nga kalihokan ug estilo sa pagkinabuhi. Ikaw lagmit makadiskobre nga ikaw makasalikway sa ubay-ubay wala kinahanglana nga kalihokan nga nagahurot sa imong panahon ug kusog.

Pananglitan, dako ba sa imong kusog ug panahon ang gigugol sa pagtan-aw sa TV, lulinghayaw, pagbasa ug kalibotanong basahon, o kalingawan? Sumala sa usa ka artikulo sa The New York Times, ang aberids nga hamtong sa Tinipong Bansa nagpatuyang diha “sa kapin lamang sa 30 ka oras kada semana” sa pagtan-aw sa TV. Segurado, ang maong panahon mahimong maggamit sa mas maayo! Ang asawa sa usa ka nagapanaw nga magtatan-aw nagtaho: “Halos sa bug-os gisalindot ko ang tanang makahurot ug panahon, sama sa pagtan-aw sa telebisyon.” Ang resulta? Nabasa niya ang duha-ka-tumo nga ensiklopedia sa Bibliya nga Insight on the Scriptures sa iyang katibuk-an!

Ikaw tingali usab nanginahanglan sa paghunahuna sa unsang kinutoban ikaw makapayano sa imong estilo sa pagkinabuhi. Matud ni Solomon: “Matam-is ang pagkatulog sa usa ka mamumuo, walay sapayan kong mokaon siya ug diyutay o daghan; apan ang kadagaya sa usa nga dato dili motugot kaniya sa pagkatulog.” (Ecclesiastes 5:12) Ang kadaghanan ba sa imong panahon ug kusog gihatag sa pag-atiman sa dili kinahanglanon materyal nga mga kabtangan? Tinuod, sa nagkadaghan ang atong gipanag-iya, nagkadaghan ang butang atong mentinahon, ipaseguro, ipaayo, ug panalipdan. Dili ba alang sa imong kaayohan ang yanong paghikaw sa imong kaugalingon sa pila ka mga kabtangan?

Ang pagbaton ug realistikong eskedyul maoy laing paagi sa paggamit ug maayo sa imong panahon. Ang maong eskedyul molakip sa panginahanglan sa usa alang sa paglingaw ug paglulinghayaw. Apan ang intereses sa espirituwalidad angayng hatagan ug pinalabi. Kinahanglan gahinan ug panahon ang pagtambong sa tanang tigom sa kongregasyon sa regular. Tingali imong tinoon ug abante kon unsang mga adlaw o gabii ang ihatag sa pagwali sa maayong balita nga buluhaton. Pinaagi sa maampingon nga pagplano, ikaw ngani mahimong makadugang sa imong pakig-ambit diha sa pag-alagad, tingali pag-alagad ingong oksilyare payunir matag karon ug unya. Seguroa, hinuon, sa pag-eskedyul ug panahon alang sa personal ug pamilyang pagtuon, lakip ang mabug-osong pagpangandam alang sa mga tigom. Pinaagi sa pagkaandam, dili lamang kay daghan ka mismo ug mapupo gikan sa mga tigom apan labaw pang makaarang sa “pagdasig sa gugma ug maayong binuhatan” pinaagi sa imong mga komento.​—Hebreohanon 10:24.

Ang pagpangita ug panahon alang sa pagtuon tingali magkinahanglan sa paghimo ug pila ka sakripisyo. Pananglitan, ang pamilyang Bethel sa tibuok kalibotan mobangon ug sayo kada buntag sa paghisgot sa inadlaw nga teksto. Posible ba alang kanimo sa pagpalit ug diyutay nga panahon kada buntag alang sa personal nga pagtuon? Ang salmista nag-ingon: “Nakabangon na ako sa banagbanag sa kabuntagon, nga ako makatuaw alang sa tabang. Sa imong mga pulong ako naglaom.” (Salmo 119:147) Siyempre, ang pagbangon ug sayo nagkinahanglan sa pag-eskedyul ug makataronganong oras alang sa pagkatulog aron ikaw makasugod sa sunod adlaw nga piskay ug nakapahulay.

Ang mga Kaayohan sa Pagkapuliki sa Pag-alagad Kang Jehova

Ang pagbaton ug “dagayang buluhaton diha sa Ginoo” nagkinahanglan sa pagplano, pagdisiplina, ug pagsakripisyo sa kaugalingon. Apan ikaw makatagamtam sa dili maihap nga mga kaayohan ingong sangpotanan. Busa magmapuliki, dili diha sa patay o kawang nga binuhatan kondili diha sa pag-alagad kang Jehova. Tungod kay pinaagi sa maong mga binuhatan nga ikaw makapakita sa imong pagtuo, makaangkon sa pag-uyon sa Diyos, ug, sa kataposan, sa ganti sa kinabuhing walay kataposan!

[Hulagway sa panid 28]

Ang paghimo ug realistikong eskedyul nagatabang sa Kristohanon sa paggamit sa iyang panahon nga mas maalamon