Kon Nganong ang Panihapon sa Ginoo May Kahulogan Alang Kanimo

GISUGDAN ni Jesu-Kristo ang Panihapon sa Ginoo sa kataposang gabii sa iyang tawhanong kinabuhi. Huwebes sa gabii kadto, Marso 31, ug si Jesus namatay sa Biyernes sa hapon, Abril 1. Sanglit ang mga adlaw sa Hudiyohanong kalendaryo modagan man gikan sa gabii sa usa ka adlaw ngadto sa pagkasunod adlaw, ang Panihapon sa Ginoo ug kamatayon ni Jesus nahitabo sa Nisan 14, 33 K.P.

Nganong gisugdan ni Jesus kini nga panihapon? Unsay kahulogan sa tinapay ug sa bino nga iyang gigamit? Kinsa ang angay moambit? Pila ka higayon nga saulogon kini nga panihapon? Ug sa unsang paagi kini may kahulogan alang kanimo?

Nganong Gisugdan?

Mahitungod sa Panihapon sa Ginoo, gisultihan ni Jesus ang iyang mga apostoles: “Ipadayon ninyo pagbuhat kini sa paghandom kanako.” Sumala sa laing hubad, siya miingon: “Buhata kini ingong paghandom kanako.” (1 Corinto 11:24; The New English Bible) Gani, ang Panihapon sa Ginoo kasagarang gitawag nga Memoryal sa kamatayon ni Kristo.

Si Jesus namatay ingong usa ka maghuhupot-sa-integridad nga nagatuboy sa pagkasoberano ni Jehova ug busa nagpamatuod kang Satanas nga usa ka bakakong mayubiton nga nag-akusar nga nag-alagad lamang sa Diyos ang mga tawong matarong tungod sa hakog nga mga tinguha. (Job 2:1-5) Ang iyang kamatayon nakahatag ug kalipay sa kasingkasing sa Diyos.​—Proverbio 27:11.

Pinaagi sa iyang kamatayon ingong tawong hingpit, si Jesus usab ‘mihatag sa iyang kalag ingong lukat ilis sa daghan.’ (Mateo 20:28) Sa pagpakasala batok sa Diyos, giwala sa unang tawo ang hingpit tawhanong kinabuhi ug ang mga palaaboton niini. Apan “gihigugma pag-ayo sa Diyos ang kalibotan [sa katawhan] nga iyang gihatag ang iyang bugtong Anak, aron ang tanan nga motuo kaniya dili malaglag kondili makabaton ug kinabuhing dayon.” (Juan 3:16) Oo, “ang bayad sa sala mao ang kamatayon, apan ang gasa nga gihatag sa Diyos mao ang kinabuhing dayon diha kang Kristo Jesus nga atong Ginoo.”​—Roma 6:23.

“Nadawat Gikan sa Ginoo”

Nakahatag katin-awan sa paghandom sa kamatayon ni Kristo mao ang mga pulong ni apostol Pablo: “Nadawat ko gikan sa Ginoo ang gikahatag ko usab kaninyo, nga ang Ginoong Jesus sa gabii sa pagbudhi kaniya mikuhag tinapay ug, human nakapasalamat, iyang gipikaspikas kini ug miingon: ‘Kini nagkahulogan sa akong lawas nga igahatag alang kaninyo. Ipadayon ninyo pagbuhat kini sa paghandom kanako.’ Mao usab ang iyang gihimo labot sa kopa, tapos sa panihapon, nga nag-ingon: ‘Kini nga kopa nagkahulogan sa bag-ong pakigtugon tungod sa akong dugo. Ipadayon ninyo pagbuhat kini, nga sama ka subsob sa inyong pag-inom niini, sa paghandom kanako.’ Kay sama ka subsob sa inyong pagkaon niining tinapay ug pag-inom niining kopa, ginasangyaw ninyo ang kamatayon sa Ginoo, hangtod sa iyang pag-anhi.”​—1 Corinto 11:23-26.

Sanglit si Pablo wala man didto uban kang Jesus ug sa 11 ka apostoles sa Nisan 14, 33 K.P., kining impormasyona dayag “nadawat gikan sa Ginoo” pinaagi sa dinasig nga pagpadayag. Gisugdan ni Jesus ang Memoryal “sa gabii nga siya igatugyan” ni Judas ngadto sa relihiyosong mga kaaway nga Hudiyohanon, nga maoy naghulhog sa mga Romano sa paglansang kang Kristo. Kadtong takos sa pag-ambit sa simbolikong tinapay ug bino magahimo niini sa paghandom kaniya.

Pila ka Higayon Kini Saulogon?

Unsay gipasabot ni Pablo sa mga pulong: “Kay sama ka subsob sa inyong pagkaon niining tinapay ug pag-inom niining kopa, ginasangyaw ninyo ang kamatayon sa Ginoo, hangtod sa iyang pag-anhi”? Ang matinumanon dinihogang mga Kristohanon makig-ambit sa mga simbolo sa Memoryal nga “subsob” hangtod nga sila mamatay, nga sa ulahi pagabanhawon ngadto sa langitnong kinabuhi. Sa atubangan sa Diyos ug sa kalibotan, sila sa ingon masubsob nga magawali sa ilang pagtuo sa tagana ni Jehova sa halad ni Jesus. Hangtod kanus-a? “Hangtod sa iyang pag-anhi,” miingon si Pablo, dayag nga nagkahulogan nga kini nga mga pagsaulog magpadayon hangtod sa pag-anhi ni Jesus sa pagdawat sa iyang dinihogang mga sumusunod ngadto sa langit pinaagi sa pagkabanhaw sa panahon sa iyang “presensiya.” (1 Tesalonica 4:14-17) Kini nahiuyon sa mga pulong ni Kristo ngadto sa 11 ka maunongong mga apostoles: “Sa mahiadto na ako ug makaandam na akog luna alang kaninyo, moanhi ako pag-usab ug pagadawaton ko kamo nganhi uban kanako, aron nga diin gani ako atua usab kamo.”​—Juan 14:3.

Angay bang saulogon ang kamatayon ni Kristo kada adlaw o kaha kada semana? Buweno, gisugdan ni Jesus ang Panihapon sa Ginoo ug gipatay sa Paskuwa, nga maoy paghandom sa Israel sa kaluwasan gikan sa pagkaulipon sa Ehipto. Gani, siya gitawag nga ang “Kristo nga atong paskuwa” tungod kay siya mao ang Kordero nga gihalad alang sa mga Kristohanon. (1 Corinto 5:7) Ang Paskuwa gisaulog kausa lamang sa usa ka tuig, sa Nisan 14. (Exodo 12:6, 14; Levitico 23:5) Kini nagsugyot nga ang kamatayon ni Jesus angay pagasaulogon lamang nga sama ka subsob sa pagsaulog sa Paskuwa​—nga tinuig, dili kada adlaw o kada semana.

Sa daghang kasiglohan gisaulog sa daghang nag-angkong mga Kristohanon ang kamatayon ni Jesus kas-a lamang sa usa ka tuig. Tungod kay gisaulog nila kini sa Nisan 14, sila gitawag nga mga Quartodeciman, nga nagkahulogan “mga tigsaulog sa katorse.” Mahitungod kanila, ang manalaysay nga si J. L. von Mosheim misulat: “Nabatasan sa mga Kristohanon sa Asia Minor ang pagsaulog niining balaang piyesta, agig paghandom sa dihang gisugdan ang panihapon sa Ginoo, ug ang kamatayon ni Jesu-Kristo, sa samang higayon sa dihang nangaon ang mga Hudiyo sa ilang kordero sa Paskuwa, nga gihimo sa gabii sa ika-katorseng adlaw sa unang bulan [Nisan]. . . . Ilang gilantaw nga usa ka sugo nga angay sundon ang panig-ingnan ni Kristo.”

Kahulogan sa mga Emblema

Si Pablo miingon nga si Jesus “mikuhag tinapay ug, human nakapasalamat, iyang gipikaspikas kini.” Kanang samag-biskutso nga tinapay nga gihurno gikan sa harina ug tubig nga walay lebadora (o, igpatubo) kinahanglang pikaspikason aron makaon. Diha sa simbolismo sa Bibliya, ang lebadora nagtimaan sa sala o kadunotan. Nag-awhag sa mga Kristohanon sa Corinto sa pagpalagpot sa usa ka tawong imoral gikan sa kongregasyon, si Pablo miingon: “Wala ba kamo masayod nga ang diyutayng pudyot sa lebadora mopatubo sa tibuok minasa? Kuhaa gikan kaninyo ang daang lebadora, aron kamo mahimong bag-ong minasa, ingon nga kamo minasa nga walay igpatubo. Kay, sa pagkatinuod, si Kristo nga atong paskuwa gikahalad na. Busa saulogon ta ang piyesta, dili uban sa daan nga lebadora, ni sa lebadora sa pagkamadinaoton ug pagkadaotan, kondili sa walay-igpatubong mga tinapay sa pagkamaminatud-on ug kamatuoran.” (1 Corinto 5:6-8) Sanglit ang gamayng pudyot sa aslom nga minasa makapatubo sa tibuok minasa, o hugpong, sa tinapay, sa ingon ang kongregasyon mahimong mahugaw sa mga mata sa Diyos kon ang makapadunot nga impluwensiya sa tawong makasasala dili kuhaon. Kinahanglang kuhaon nila ang “lebadora” gikan sa ilang taliwala, sama nga walay lebadora ang mga Israelinhon diha sa ilang mga balay sa panahon sa Piyesta sa Walay-Lebadorang mga Tinapay nga mosunod sa Paskuwa.

Mahitungod sa walay-lebadorang tinapay sa Memoryal, si Jesus miingon: “Kini nagkahulogan sa akong lawas nga igahatag alang kaninyo.” (1 Corinto 11:24) Ang tinapay naghawas sa hingpit unodnong lawas ni Jesus, nga mahitungod niini si Pablo misulat: “Sa pagtungha [ni Jesus] sa kalibotan siya miingon: ‘“Ang mga sakripisyo ug mga halad wala mo tinguhaa, apan usa ka lawas ang imong giandam alang kanako. Ikaw wala mahimuot sa tibuok nga mga halad nga sinunog ug mga halad sa sala.” Unya miingon ako, “Tan-awa! ako mianhi (diha sa linukot nga basahon kini nahisulat bahin kanako) sa pagtuman sa imong kabubut-on, Oh Diyos.”’ . . . Pinaagi sa maong ‘kabubut-on’ kita gihimong balaan pinaagi sa halad sa lawas ni Jesu-Kristo sa makausa ug sa tanang panahon.” (Hebreohanon 10:5-10) Ang hingpit tawhanong lawas ni Jesus walay sala ug nagsilbing usa ka halad lukat alang sa katawhan.​—Hebreohanon 7:26.

Human nakaampo labot sa kopa sa pulang bino nga walay-sambog, si Jesus miingon: “Kini nga kopa nagkahulogan sa bag-ong pakigtugon tungod sa akong dugo.” (1 Corinto 11:25) Laing hubad mao kini: “Kini nga kopa nagkahulogan sa bag-ong pakigtugon nga gipanghimatud-an pinaagi sa akong dugo.” (Moffatt) Sama nga ang dugo sa gihalad nga mga baka ug kanding nagpalig-on sa Kasugoan sa pakigtugon tali sa Diyos ug sa nasod sa Israel, sa ingon ang dugo nga gibubo ni Jesus diha sa kamatayon nagpalig-on sa bag-ong pakigtugon. Ang kamatuoran nga gihisgotan kanang pakigtugona makatabang kanato sa pag-ila sa takos nga mga mag-aambit sa mga emblema sa Memoryal.

Kinsa ang Angay Moambit?

Ang dinihogang mga sumusunod ni Jesus, nga anaa sa bag-ong pakigtugon, ang takos moambit sa mga emblema sa Memoryal. Kini nga pakigtugon gihimo tali sa Diyos ug sa espirituwal nga Israel. (Jeremias 31:31-34; Galacia 6:16) Apan ang bag-ong pakigtugon sa ulahi mohatag ug mga panalangin sa tanang masinugtanong katawhan, ug ikaw mahimong usa sa mga dumadawat sa maong mga panalangin.

Ang mga mag-aambit sa mga emblema sa Memoryal kinahanglang kauban sa personal nga pakigtugon alang sa Gingharian nga gihimo ni Jesus. Sa dihang gisugdan kini nga pangaon, gisultihan ni Jesus ang iyang maunongong mga apostoles: “Ako nagahimog usa ka pakigtugon uban kaninyo, maingon nga naghimog pakigtugon ang akong Amahan kanako, alang sa usa ka gingharian.” (Lucas 22:29) Ang pakigtugon sa Gingharian nga gihimo sa Diyos uban kang Haring David nagpunting sa unahan sa pag-abot ni Jesus, ang usa nga momando sa walay kataposan diha sa langitnong Gingharian. Ang 144,000 ka espirituwal nga Israelinhon, nga makigbahin sa pagmando uban kaniya, gilarawan nga nagbarog sa langitnong Bukid sa Sion uban sa Kordero, si Jesu-Kristo. Inigkabanhaw, sila magmando uban kang Kristo ingong kaubang mga hari ug mga saserdote. (2 Samuel 7:11-16; Pinadayag 7:4; 14:1-4; 20:6) Ang mga membro lamang sa bag-ong pakigtugon ug kauban sa personal nga pakigtugon ni Jesus ang takos makig-ambit sa mga emblema sa Panihapon sa Ginoo.

Ang espiritu sa Diyos nagpanghimatuod uban sa espiritu sa mga dinihogan nga sila Iyang mga anak ug kaubang mga manununod ni Kristo. Si Pablo misulat: “Ang espiritu gayod mao ang magapanghimatuod uban sa atong espiritu nga kita mga anak sa Diyos. Nan, kon kita mga anak, kita usab mga manununod: sa pagkatinuod mga manununod sa Diyos, apan isigkamanununod uban kang Kristo, kon kita moantos uban kaniya aron kita usab pagahimayaon uban kaniya.” (Roma 8:16, 17) Ang balaang espiritu sa Diyos, o aktibong gahom, naglalang diha sa mga dinihogan ug pasalig nga sila gitakda alang sa langitnong kinabuhi. Ilang gilantaw nga gitumong kanila ang tanang butang nga gipamulong sa Kasulatan mahitungod sa langitnong kinabuhi ug andam sa pagsakripisyo sa tanang yutan-ong mga butang, apil ang tawhanong kinabuhi. Bisan tuod ang kinabuhi sa Paraiso sa yuta matahom, wala sila nianang paglaoma. (Lucas 23:43) Usa ka tino ug dili-mabag-ong langitnong paglaom nga wala ipasukad sa bakak nga relihiyosong mga hunahuna naghatag kanila sa katungod sa pag-ambit sa mga emblema sa Memoryal.

Si Jehova dili-mahimuot kon ang usa ka tawo magpadayag sa iyang kaugalingon ingong usa ka tinawag aron mahimong langitnong hari ug saserdote kon siya dili tinawag alang niana. (Roma 9:16; Pinadayag 22:5) Gipatay sa Diyos si Kore tungod sa pagpangahas sa pagkahimong saserdote. (Exodo 28:1; Numeros 16:4-11, 31-35) Busa, unsay ikasulti kon ang kusganong mga emosyon o relihiyosong mga hunahuna kanhi motukmod sa usa ka tawo sa sayop nga pag-ambit sa mga emblema sa Memoryal? Nan siya kinahanglang mohunong sa pag-ambit ug mapainubsanong mag-ampo alang sa kapasayloan sa Diyos.​—Salmo 19:13.

Kon sa Unsang Paagi Ka Apektado

Dili kinahanglang moambit ang usa ka tawo sa mga emblema sa Memoryal aron makabaton ug kaayohan sa halad lukat ni Jesus ug makadawat ug kinabuhing walay kataposan dinhi sa yuta. Pananglitan, walay gipakitang timaan ang Bibliya nga ang mahinadlokon sa Diyos nga mga tawo sama kang Abraham, Sara, Isaac, Rebecca, Boaz, Ruth, ug David miambit niini nga mga emblema. Apan sila ug ang tanang uban nga nagatinguha ug kinabuhing walay kataposan dinhi niini nga globo kinahanglang magbaton ug pagtuo sa Diyos ug kang Kristo ug sa tagana ni Jehova nga halad lukat ni Jesus. (Juan 3:36; 14:1) Ang tinuig nga pagsaulog sa kamatayon ni Kristo nagsilbing usa ka pahinumdom sa maong dakong halad.

Ang bili sa halad ni Jesus gipakita sa dihang miingon si apostol Juan: “Nagasulat ako kaninyo niining mga butanga aron kamo dili makasala. Apan, kon may makasala man gayod, kita adunay katabang uban sa Amahan, si Jesu-Kristo, ang usa nga matarong. Ug siya mao ang halad-pasighiuli alang sa atong mga sala, ug dili lamang sa ato rang mga sala kondili sa mga sala usab sa tibuok kalibotan.” (1 Juan 2:1, 2) Ang dinihogang mga Kristohanon makaingon nga si Jesus “mao ang halad-pasighiuli alang sa [ilang] mga sala.” Bisan pa, siya usab maoy halad alang sa mga sala sa tibuok kalibotan, nga nagpaposible sa kinabuhing dayon alang sa matinumanong katawhan diha sa Paraiso nga yuta nga karon haduol na kaayo!

Pinaagi sa pagtambong sa pagsaulog sa kamatayon ni Kristo, ikaw makabaton ug kaayohan gikan sa makapukaw-sa-hunahuna nga pakigpulong sa Bibliya. Ikaw mapahinumdoman kon unsay nahimo ni Jehova nga Diyos ug ni Jesu-Kristo alang kanato. Magantihon sa espirituwal ang pakigtigom uban niadtong adunay lalom nga pagtamod sa Diyos ug kang Kristo ug sa halad lukat ni Jesus. Ang okasyon hayan molig-on sa imong tinguha nga mahimong usa ka dumadawat sa dili-takos nga kalulot sa Diyos, nga motultol sa kinabuhing dayon. Kami kinasingkasing nagadapit kanimo nga makigtigom uban sa mga Saksi ni Jehova human sa pagsalop sa adlaw sa Abril 6, 1993, sa paghandom sa kamatayon ni Jesu-Kristo tungod kay ang Panihapon sa Ginoo mahimong may dakong kahulogan alang kanimo.