Ang Kaakohan Maoy Duyog sa Pagkaila sa Tinuod nga Relihiyon
“Malipayon kadtong nagapatalinghog sa pulong sa Diyos ug nagasunod niini!”—LUCAS 11:28.
1. Sa dihang ilang mailhan ang tinuod nga relihiyon, unsang matang sa katawhan ang maghimo niana nga sentro sa ilang mga kinabuhi?
DILI igo nga mailhan lang ang tinuod nga relihiyon. Kon kita nahigugma sa kon unsay matarong ug matuod, inigkakaplag nato niini, ato kining himoon nga sentro sa atong mga kinabuhi. Ang tinuod nga relihiyon dili lang usa ka pilosopiya sa hunahuna; kini maoy usa ka dalan sa kinabuhi.—Salmo 119:105; Isaias 2:3; itandi ang Buhat 9:2.
2, 3. (a) Giunsa pagpasiugda ni Jesus ang kahinungdanon sa pagbuhat sa kabubut-on sa Diyos? (b) Unsang kaakohan ang nahiluna kang bisan kinsa nga nakaila sa tinuod nga relihiyon?
2 Si Jesu-Kristo nagpasiugda sa pagkahinungdanon nga buhaton kon unsay gipadayag sa Diyos nga maoy Iyang kabubut-on. Sa pagtapos sa kon unsay nailhan nga Wali sa Bukid, si Jesus nagpahibalo nga dili ang tanang nagtawag kaniya nga Ginoo (sa ingon nag-angkong mga Kristohanon) ang makasulod sa Gingharian; kadto lamang nagabuhat sa kabubut-on sa iyang Amahan ang makasulod. Ang uban, matud niya, isalikway ingong “mga mamumuhat sa kalapasan.” Nganong kalapasan? Tungod kay sumala sa giingon sa Bibliya, ang pagkapakyas sa pagbuhat sa kabubut-on sa Diyos maoy sala, ug ang tanang sala maoy kalapasan. (Mateo 7:21-23; 1 Juan 3:4; itandi ang Roma 10:2, 3.) Ang usa ka tawo tingali nakaila sa tinuod nga relihiyon, siya tingali mohatag ug komendasyon niadtong nagtudlo niini, ug siya tingali modayeg pa niadtong nagtuman niini, apan siya adunay kaakohan usab nga ipadapat kini nganha sa iyang kaugalingong kinabuhi. (Santiago 4:17) Kon iyang dawaton kana nga kaakohan, makaplagan niya nga ang iyang kinabuhi mahimong tugob, ug matagamtam niya ang kalipay nga dili matagamtam sa laing paagi.
3 Sa naunang artikulo, gihisgotan nato ang unom sa mga ilhanan sa tinuod nga relihiyon. Ang matag usa niana dili lang motabang kanato sa pag-ila sa tinuod nga relihiyon kondili motanyag usab kanato sa personal sa mga hagit ug mga kahigayonan. Sa unsang paagi?
Unsay Imong Pagsanong sa Pulong sa Diyos?
4. (a) Samtang ang mga bag-ohan mosugod pagpakig-uban sa mga Saksi ni Jehova, unsa ang mapanid-an nila dayon kon bahin sa paggamit sa mga Saksi sa Bibliya? (b) Sa unsang paagi ang pagkagipakaon ug maayo sa espirituwal mag-apektar sa mga alagad ni Jehova?
4 Samtang ang mga Saksi ni Jehova magtuon sa Bibliya uban sa mga bag-ong interesado, daghan niining mga bag-ohan daling makaila nga ang ginatudlo naggikan sa Bibliya. Sa pagtubag sa ilang mga pangutana, sila dili itumong ngadto sa mga doktrina sa simbahan, sa tawhanong mga tradisyon, o sa mga panghunahuna sa inilang mga tawo. Ang Pulong sa Diyos mismo mao ang awtoridad. Sa dihang sila moadto sa Kingdom Hall, ilang mapanid-an nga didto usab ang Bibliya mao ang pangunang tun-anang basahon. Sa madali makaamgo ang sinserong mga nangita sa kamatuoran nga ang usa ka dakong hinungdan sa kalipay nga makita nila taliwala sa mga Saksi ni Jehova mao ang kamatuoran nga sila sa espirituwal maayong pagkapakaon gikan sa Pulong sa Diyos.—Isaias 65:13, 14.
5. (a) Unsang hagit ang gipadayag ngadto niadtong naniid sa mga Saksi ni Jehova? (b) Sa unsang paagi sila makaambit sa kalipay sa mga Saksi?
5 Kon nailhan nimo kini, unsay pagsanong nimo niini? Kon masabtan nimo kini, sa tukma ikaw dili mahimong usa lang ka way-lihok nga maniniid, ni magtinguha ka nga maingon. Gipakita sa Bibliya nga kadtong “mga tigpaminaw lamang” apan dili “mga magbubuhat sa pulong” maoy ‘nagalimbong sa ilang kaugalingon pinaagi sa bakak nga pangatarongan.’ (Santiago 1:22) Gilimbongan nila ang ilang kaugalingon kay sila wala makaila nga bisan pag unsa tingaliy giingon nila, ang pagkapakyas nila sa pagsugot sa Diyos nagpakita nga sila wala gayod mahigugma kaniya. Ang pag-angkon sa pagtuo nga wala paluyohi sa mga binuhatan maoy pagtuo nga patay. (Santiago 2:18-26; 1 Juan 5:3) Sa kasukwahi, ang usang gitukmod sa gugma kang Jehova nga mahimong “magbubuhat sa pulong” mahimong “malipayon sa iyang pagbuhat niini.” Oo, sumala sa gisaysay ni Jesu-Kristo, “malipayon kadtong nagapatalinghog sa pulong sa Diyos ug nagabantay niini!”—Santiago 1:25; Lucas 11:28; Juan 13:17.
6. Kon gipabilhan gayod nato ang Pulong sa Diyos, unsang kahigayonan ang atong paningkamotan nga mapahimuslan sa personal?
6 Ang maong kalipay molalom samtang mouswag ka sa kahibalo sa kabubut-on sa Diyos ug magpadapat sa dugang pang mga butang nga imong nakat-onan. Unsa ka dakong paningkamot ang imong himoon sa pagtuon sa Pulong sa Diyos? Ang tinagpulo ka libong indibiduwal nga walay kabangkaagan nanlimbasog aron makatuon sa pagbasa, nga nagbuhat niini sa tino aron sila makabasa sa Kasulatan ug makatudlo niana sa ubang mga tawo. Ang uban mobangon ug sayo kaayo matag buntag aron makagugol silag pila ka panahon sa matag adlaw sa pagbasa sa Bibliya ug sa mga tabang sa pagtuon sa Bibliya, sama sa Ang Bantayanang Torre. Samtang sa personal imong abaniron pagbasa ang Bibliya o tan-awon ang mga kasulatan nga gitumong sa ubang materyal nga tun-anan, matikdi pag-ayo ang mga balaod ug mga sugo ni Jehova, ug tinguhaa nga hisabtan ang daghang prinsipyo nga anaa niana aron magagiya kanato. Palandonga kon unsay gipadayag sa matag bahin mahitungod sa Diyos, sa iyang katuyoan, ug sa iyang mga pakiglabot sa katawhan. Itugot ang panahon nga pagaumolon niini ang imong kasingkasing. Palandonga kon adunay mga paagi nga imong ikapadapat sa bug-os pa ang tambag sa Bibliya diha sa imong kinabuhi mismo.—Salmo 1:1, 2; 19:7-11; 1 Tesalonica 4:1.
Bug-os ba ang Imong Debosyon Kang Jehova?
7. (a) Sa unsang paagi ang doktrinang Trinidad nag-impluwensiya sa paningkamot sa katawhan sa pagsimba sa Diyos? (b) Unsa ang mahimong mahitabo inigkahibalo sa usa ka tawo sa kamatuoran bahin kang Jehova?
7 Alang sa minilyong tawo, usa ka kahupayan ang pagkasayod nga ang matuod nga Diyos dili usa ka Trinidad. Ang katin-awan nga “kini usa ka misteryo” wala gayod makapatagbaw kanila. Sa unsang paagi masuod sila sa usa ka Diyos nga dili hisabtan? Ingong sangpotanan nianang pagtulon-ana, nakiling sila sa dili pagpakabana sa Amahan (kansang ngalan wala gayod nila madungog diha sa simbahan) ug sa pagsimba kang Jesus ingong Diyos o sa pagpunting sa ilang pagsimba kang Maria (kinsa sumala sa gitudlo nila mao ang “Inahan sa Diyos”). Apan ang ilang mga kasingkasing nalipay sa dihang usa sa mga Saksi ni Jehova nag-abli sa Bibliya ug nagpakita kanila sa personal nga ngalan sa Diyos, ang Jehova. (Salmo 83:18) Ang usa ka babayeng taga-Venezuela nalipay kaayo sa dihang gipakita kaniya ang balaang ngalan nga sa literal gihalog niya ang batan-ong Saksi nga nagpaambit kaniya nianang bililhong kamatuoran ug miuyon nga magbaton ug usa ka pagtuon sa Bibliya sa balay. Sa dihang ang maong mga tawo masayod nga gitumong ni Jesus ang iyang Amahan nga “akong Diyos ug inyong Diyos” ug gitawag ni Jesus ang iyang Amahan nga “ang bugtong matuod nga Diyos,” sila makaamgo nga ang gitudlo sa Bibliya bahin sa Diyos dili kay dili hisabtan. (Juan 17:3; 20:17) Samtang masayran nila ang mga hiyas ni Jehova, sila masuod kaniya, mosugod pag-ampo kaniya, ug magtinguha nga pahimut-an siya. Unsa ang sangpotanan?
8. (a) Tungod sa ilang gugma kang Jehova ug sa ilang tinguha nga pahimut-an siya, unsay nahimo sa milyonmilyong tawo? (b) Nganong ang Kristohanong bawtismo hinungdanon gayod?
8 Sulod sa miaging napulo ka tuig, 2,528,524 ka tawo sa unom ka kontinente ug kawhakawhaang kapuloan ang nagpahinungod sa ilang mga kinabuhi kang Jehova ug unya nagpasimbolo sa maong pagpahinungod pinaagi sa bawtismo sa tubig. Usa ka ba kanila, o ikaw ba nagapangandam na karon nga magpabawtismo? Ang bawtismo maoy usa ka halandumong hitabo sa kinabuhi sa matag matuod nga Kristohanon. Si Jesus nagsugo sa iyang mga sumusunod nga maghimog mga tinun-an sa katawhan sa tanang nasod ug magbawtismo kanila. (Mateo 28:19, 20) Mamatikdan usab nga pagkahuman dayon sa pagbawtismo mismo ni Jesus si Jehova mismo mipahayag gikan sa mga langit, nga miingon: “Ikaw mao ang akong Anak, ang hinigugma; giuyonan ko ikaw.”—Lucas 3:21, 22.
9. Aron mahuptang padayon ang inuyonang relasyon uban kang Jehova, unsay gikinahanglan sa atong bahin?
9 Ang inuyonang relasyon uban kang Jehova maoy butang nga pagamahalon. Kon nasudlan na nimo kanang relasyona pinaagi sa pagpahinungod ug pagpabawtismo, likayi ang bisan unsang magdaot niana. Ayaw tugoti nga ang mga kabalaka sa kinabuhi ug pagkabalisa sa materyal nga mga butang magduso niana sa ikaduhang dapit. (1 Timoteo 6:8-12) Pagkinabuhi gayod nga nahiuyon sa tambag sa Proverbio 3:6: “Sa tanan nimong mga dalan matikdi [si Jehova], ug siya mismo magatul-id sa imong mga dalan.”
Unsa ka Lalom Naapektahan Ka sa Gugma ni Kristo?
10. Nganong ang atong pagsimba kang Jehova dili magpahinabo nga dili nato pakabanaon si Jesus?
10 Siyempre, ang tukmang pagpabili kang Jehova ingong ang bugtong matuod nga Diyos dili magpahinabo nga ang usa ka tawo dili magpakabana kang Jesu-Kristo. Sa kasukwahi, ang Pinadayag 19:10 nag-ingon: “Ang pagpanaksi bahin kang Jesus maoy nagapalihok sa pagpropesiya.” Gikan sa Genesis hangtod sa Pinadayag, ang inspiradong mga panagna naghatag ug mga detalye mahitungod sa papel ni Jesu-Kristo diha sa katuyoan ni Jehova. Ingong usa ka tawo nga nasinati nianang mga detalyeha, ang makaiikag nga hulagway mogawas nga walay mga pagtuis ug sayop nga mga ideya nga maoy sangpotanan sa bakak nga mga pagtulon-an sa Kakristiyanohan.
11. Sa unsang paagi ang pagkakat-on kon unsay tinuod nga gitudlo sa Bibliya bahin sa Anak sa Diyos nakaapektar sa usa ka babaye sa Polandia?
11 Ang pagkasabot sa kamatuoran bahin sa Anak sa Diyos mahimong may dakong epekto diha sa usa ka tawo. Kana ang kahimtang ni Danuta, usa ka babayeng taga-Polandia. Siya may pakigkontak sa mga Saksi ni Jehova sulod sa walo ka tuig, nalipay sa ilang gitudlo, apan wala maghimo sa matuod nga pagsimba nga iyang dalan sa kinabuhi. Unya nadawat niya ang usa ka kopya sa librong Ang Labing Bantogang Tawo nga Nabuhi Sukad, nga nagpadayag sa kinabuhi ni Kristo sa paagi nga sayong hisabtan.a Sa gabii na kaayo, gibuksan niya ang libro, nga nagplano nga mobasag usa lang ka kapitulo. Hinuon, sa kaadlawon na lamang, sa nahuman niya pagbasa ang libro, nga gibutang niya kana. Mihilak siya. “Jehova, pasayloa ako,” siya nangaliyupo. Ingong sangpotanan sa iyang nabasa, iyang nasabtan nga mas tin-aw kay sukad masukad ang gugmang gipakita ni Jehova ug sa iyang Anak. Iyang naamgohan nga sulod sa walo ka tuig sa pagkaingrato gitalikdan niya ang tabang nga sa kamapailobon gipaabot sa Diyos kaniya. Niadtong 1993 siya nabawtismohan ingong simbolo sa iyang pagpahinungod kang Jehova pinasukad sa pagtuo kang Jesu-Kristo.
12. Sa unsang paagi ang tukmang kahibalo kang Jesu-Kristo mag-apektar sa atong mga kinabuhi?
12 Ang “tukmang kahibalo sa atong Ginoong Jesu-Kristo” nalangkit sa pagkahimong aktibo ug mabungahong Kristohanon. (2 Pedro 1:8) Sa unsang gidak-on makigbahin ka sa maong kalihokan, nga magpakig-ambit sa mensahe sa Gingharian sa uban? Ang gidak-ong masarangan sa mga indibiduwal sa pagbuhat apektado sa daghang kahimtang. (Mateo 13:18-23) Dili kita makausab sa pila ka kahimtang; makausab kita sa uban. Unsay motukmod kanato sa pag-ila ug paghimo sa mga kausaban nga mahimong buhaton? Si apostol Pablo misulat: “Ang gugma nga iya sa Kristo nagatukmod kanamo”; sa laing mga pulong, ang gugma nga iyang gipakita sa pagtugyan sa iyang kinabuhi alang kanato maoy talagsaon kaayo nga samtang modako ang atong pagpabili niini, ang atong mga kasingkasing mismo dulot nga matandog. Ingong sangpotanan, atong maamgohan nga labing dili tukma nga kita magpadayon pagpangagpas sa mahakogong mga tumong ug magkinabuhi lamang sa pagtagbaw sa kaugalingon. Sa kapulihay, ipasibo nato ang atong mga pagkabutang aron kahatagan ug unang dapit ang buluhatong gitudlo ni Kristo nga pagabuhaton sa iyang mga tinun-an.—2 Corinto 5:14, 15.
Bulag Gikan sa Kalibotan—Sa Unsang Gilapdon?
13. Nganong angay nga dili kita makigbahin sa usa ka relihiyon nga naghimo sa kaugalingon niini nga bahin sa kalibotan?
13 Dili lisod nga makita ang rekord nga nahimo sa Kakristiyanohan ug sa ubang mga relihiyon kay buot nilang mahimong bahin sa kalibotan. Ang salapi sa simbahan gigamit sa pagsuportar sa rebolusyonaryong kalihokan. Ang mga pari nahimong mga gerilya. Sa sunodsunod nga adlaw, ang mga mantalaan adunay mga taho bahin sa relihiyosong mga pundok sa lainlaing mga bahin sa yuta nga nagabugnoay sa usag usa. Ang dugo nagtulo sa ilang mga kamot. (Isaias 1:15) Ug sa tibuok kalibotan ang klero nagpadayon sa pagsulay pagmaneobra sa politikanhong kahimtang. Ang matuod nga mga magsisimba walay bahin niini.—Santiago 4:1-4.
14. (a) Unsay kinahanglang likayan nato sa personal aron kita magpabiling bulag gikan sa kalibotan? (b) Unsay makatabang nato sa paglikay nga malit-agan sa kalibotanong mga tinamdan ug mga buhat?
14 Apan labaw pa niana ang nalangkit sa pagkabulag gikan sa kalibotan. Ang kalibotan ilado sa pagkamahigugmaon sa salapi ug kon unsay mapalit sa salapi, sa tinguha sa personal nga kadungganan, ug sa walay-puas nga pagpangagpas sa kalingawan, uban sa mga butang sama sa pagkawalay tiunayng pagkamahunahunaon sa uban, pagbakak ug mapasipad-anong sinultihan, pagsukol sa awtoridad, ug kapakyasan sa pagpakitag pagpugong-sa-kaugalingon. (2 Timoteo 3:2-5; 1 Juan 2:15, 16) Tungod sa atong pagkadili-hingpit mismo, kita sa usa ka paagi magpabanaag usahay nianang mga tarasa. Unsay makatabang nato sa atong pakigbisog nga malikayan ang maong mga lit-ag? Kinahanglang pahinumdoman nato ang atong kaugalingon kon kinsay nakaingon sa mga taras sa kalibotan. “Ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Bisan pag morag makapadani kaayo ang usa ka dalan, bisan pag pila ka ubang tawo ang nagkinabuhi sa ingon, sa dihang mahibalo kita nga ang pangunang kaaway ni Jehova, si Satanas nga Yawa, mao ang nagapaluyo niini, atong pagaamgohon nga kini mangil-ad kaayo.—Salmo 97:10.
Asa Kutob Makaabot ang Imong Gugma?
15. Sa unsang paagi ang dili-mahakogong gugma nga imong napanid-an nagtabang kanimo sa pag-ila sa tinuod nga relihiyon?
15 Sa una nimong pagpakig-uban sa mga Saksi ni Jehova, ang gugmang gipadayag sa ilang taliwala sa walay duhaduha maoy nakadani kanimo tungod sa pagkalahi niini sa espiritu sa kalibotan. Ang pagpasiugda sa dili-mahakogong gugma nagpalahi sa maputling pagsimba ni Jehova gikan sa tanang ubang dagway sa pagsimba. Mahimong kini mao ang nagkombinsir kanimo nga ang mga Saksi ni Jehova nagatuman gayod sa tinuod nga relihiyon. Si Jesu-Kristo mismo miingon: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.”—Juan 13:35.
16. Unsa ang mga kahigayonan nga mahimong anaa nga sa tagsatagsa kita makapauswag sa atong gugma?
16 Ang mao bang hiyas nagpaila usab nga usa ka sa mga tinun-an ni Kristo? Aduna bay mga paagi nga ikaw makapauswag sa imong pagpakita sa gugma? Sa walay duhaduha kitang tanan makapauswag. Ang gugma dili lamang pagkamahigalaon sa uban diha sa Kingdom Hall. Ug kon atong ipakita ang gugma ngadto lamang niadtong nahigugma kanato, unsa ba kita ka lahi gikan sa kalibotan? “Labaw sa tanang butang, paghupot ug mainit nga gugma alang sa usag usa,” ang Bibliya nag-agda. (1 Pedro 4:8) Kang kinsa ba mahimo kitang magpakitag labaw nga gugma? Ang Kristohanong igsoong lalaki o babaye ba kansang kagikan maoy lahi sa atoa ug kansang paagi sa pagbuhat sa pila ka butang makapapikal kanato? Ang usa ba si kinsa, ingong sangpotanan sa sakit o pagkatigulang, dili makatambong nga regular sa mga tigom? Ang ato bang kapikas sa kaminyoon? O, tingali, ang ato bang nagakatigulang nga mga ginikanan? Ang pipila nga maayog nabuhat aron ipadayag ang mga bunga sa espiritu, lakip ang gugma, mibati nga samag ila kining nakat-onan pag-usab sa dihang ilang naatubang ang lisod kaayong mga kahimtang nga mahimong motungha aron ihatag ang hapit bug-os nga pag-atiman sa usa ka membro sa pamilya nga nahimong grabe ka baldado. Siyempre, bisan pag nag-atubang niining mga kahimtanga, ang atong gugma angay nga moabot usab sa gawas sa atong kaugalingong panimalay.
Pagsangyaw sa Gingharian—Unsa ka Hinungdanon Kini Kanimo?
17. Kon kita sa personal nakabatog kaayohan gikan sa mga pagduaw sa mga Saksi ni Jehova, angay nga mobati kita karon nga natukmod sa pagbuhat sa unsa?
17 Usa ka hinungdanong paagi nga atong ipakita ang gugma alang sa atong isigkatawo maoy pinaagi sa pagsangyaw kanila mahitungod sa Gingharian sa Diyos. Usa lamang ka pundok sa katawhan ang nagabuhat niining buluhatona nga gitagna ni Jesus. (Marcos 13:10) Kini sila mao ang mga Saksi ni Jehova. Kita sa personal nakabatog kaayohan niini. Karon atong pribilehiyo nga tabangan ang uban. Kon nabatonan nato ang hunahuna sa Diyos bahin sa butang, kining buluhatona mahimong hinungdanon diha sa atong mga kinabuhi.
18. Sa unsang paagi ang atong pagbasa sa librong Mga Saksi ni Jehova—Mga Magmamantala sa Gingharian sa Diyos mag-impluwensiya sa atong bahin mismo sa pagsangyaw sa Gingharian?
18 Ang kulbahinam nga asoy kon sa unsang paagi ang mensahe sa Gingharian nakaabot ngadto sa labing hilit nga mga bahin sa yuta sulod niining kataposang mga adlaw giasoy diha sa librong Mga Saksi ni Jehova—Mga Magmamantala sa Gingharian sa Diyos. Kon kini anaa sa inyong pinulongan, ayawg pakyasa ang pagbasa niini. Ug samtang imo kining gibasa, matikdi ilabina ang tanang paagi nga gipakig-ambitan sa mga indibiduwal aron makasangyaw mahitungod sa Gingharian. Aduna bay pipila kansang panig-ingnan masundog nimo? Adunay daghang kahigayonan nga abli kanatong tanan. Hinaot ang atong gugma kang Jehova magtukmod nato aron pahimuslan gayod kini.
19. Sa unsang paagi makabaton kitag kaayohan kon atong dawaton ang kaakohan nga duyog sa pagkaila sa tinuod nga relihiyon?
19 Kon sa ingong paagi kita magkugi sa pagbuhat sa kabubut-on ni Jehova, kita makakaplag sa tubag sa pangutana, Unsa ang kahulogan sa kinabuhi? (Pinadayag 4:11) Kita dili na magsukarap, nga gipasagdang mibati ug kahaw-ang. Walay karera nga niana mahimong ideboto nimo ang imong kaugalingon nga maghatag ug mas dakong katagbawan kay sa tibuok-kasingkasing nga pagkugi sa pag-alagad kang Jehova nga Diyos. Ug talagsaon gayod ang kaugmaong gitagana niini! Hangtod sa hangtod nga makapatagbawng kinabuhi sa iyang bag-ong kalibotan, diin kita makasarang sa paggamit sa bug-os sa atong mga katakos nga nahiuyon sa mahigugmaong katuyoan nga alang niana ang Diyos naglalang sa katawhan.
[Footnote]
a Gipatik sa Watchtower Bible and Tract Society of New York, Inc.
Unsaon Nimo Pagtubag?
◻ Nganong bililhon nga ang usa ka relihiyon magadawat sa Bibliya ingong Pulong sa Diyos ug magapasidungog kang Jehova ingong matuod nga Diyos?
◻ Unsay gitudlo sa matuod nga relihiyon bahin sa papel ni Jesus ingong Manunubos?
◻ Nganong ang mga Kristohanon kinahanglang magpabiling bulag gikan sa kalibotan ug magapakita sa dili-mahakogong gugma?
◻ Unsa ang papel sa pagsangyaw sa Gingharian diha sa tinuod nga relihiyon?
[Hulagway sa panid 16]
Ang bawtismo maoy usa ka bililhong lakang sa pagdawat sa mga kaakohan sa matuod nga pagsimba. Kada bulan, mga 25,000 ang nagahimo sa maong lakang sa tibuok kalibotan
Rusya
Senegal
Papua New Guinea
T.B.A.
[Hulagway sa panid 17]
Ang pagpakig-ambit sa kamatuoran sa Bibliya sa uban maoy bahin sa matuod nga pagsimba
T.B.A.
T.B.A.
Brazil
Hong Kong