“Kini ang Adlaw sa Tanang mga Adlaw”
“Pinaagi sa pagdasig diha ako sa adlaw sa Ginoo.”—PINADAYAG 1:10.
1. Unsang “adlaw” nga kita karon nagakinabuhi, ug nganong kining kamatuorana kulbahinam?
“KINI ang adlaw sa tanang mga adlaw. Tan-awa, ang Hari nagmando na!” Kining dramatikong mga pulong nga gipahayag sa ikaduhang presidente sa Watch Tower Bible and Tract Society balik sa 1922 makalipay gihapon kanato karong adlawa. Kini padayong nagapahinumdom kanato nga kita nagkinabuhi na sa labing kulbahinam nga panahon sa tanang kasaysayan, ang panahon sa gitawag diha sa Bibliya nga “ang adlaw sa Ginoo.” (Pinadayag 1:10) Kini tinuod gayod nga mao “ang adlaw sa tanang mga adlaw,” kay mao kini ang panahon dihang ipatuman ni Jehova, pinaagi sa Gingharian ni Kristo, ang tanan Niyang dagkong mga katuyoan ug sa pagbalaan sa Iyang balaan nga ngalan sa atubangan sa tanang kalalangan.
2, 3. (a) Unsa ang kalawigan sa adlaw sa Ginoo? (b) Asa man kita makakuhag kahibalo mahitungod niining adlawa?
2 Kining adlawa nagsugod sa 1914 dihang naentrono si Jesus ingong Hari sa Gingharian sa Diyos. Ug kini magpadayon hangtod sa kataposan sa Usa ka Libo ka Tuig nga Pagmando, sa dihang ‘itugyan ni Kristo ang gingharian ngadto sa iyang Diyos ug Amahan.’ (1 Corinto 15:24) Ang matinumanong mga Kristohanon nagapaabot sa adlaw sa Ginoo sa daghan nang mga kasigloan. Karon, miabot na gayod kini sa kataposan! Unsay kahulogan niining “adlaw sa tanang mga adlaw” alang sa katawhan sa Diyos ug sa kalibotan sa katibuk-an?
3 Ang basahon sa Bibliya daghang ikasugilon kanato bahin sa adlaw sa Ginoo mao ang Pinadayag. Halos ang tanang mga tagna niining basahona natuman sa panahon sa adlaw sa Ginoo. Apan ang Pinadayag mao lamang ang kinatayoktokan sa seryal sa matagnaong mga basahon nag nagapahibalo kanato bahin nianang adlawa. Si Isaias, Jeremias, Ezekiel, ug Daniel, lakip sa uban, nagsulti usab kanato bahin niana. Sa kasagaran, ang ilang gisulti nakatabang kanato sa dugang pagsabot sa mga tagna diha sa Pinadayag. Atong susihon kon sa unsang paagi ang basahon ni Ezekiel ilabina mohatag kanatog kadan-agan bahin sa katumanan sa Pinadayag sa panahon sa adlaw Ginoo.
Ang Upat ka Magkakabayo
4. Sumala sa Pinadayag kapitulo 6, unsay nahitabo sa sinugdanan sa adlaw sa Ginoo?
4 Pananglitan, diha sa ikaunom nga kapitulo sa Pinadayag, gibatbat ni apostol Juan ang dramatikong panan-awon: “Ug nakita ko, ug, tan-awa! ang usa ka puti nga kabayo; ug ang nagkabayo niini may pana; ug kaniya gihatag ang usa ka purongpurong, ug milakaw ug nagmadaogon ug aron sa pagtapos sa pagpanaog.” (Pinadayag 6:2) Kinsa kining madaogong magkakabayo? Walay lain kon dili si Jesu-Kristo, nga naentrono ingong Hari sa Gingharian sa Diyos ug nagkabayo sa pagpukan sa iyang mga kaaway. (Salmo 45:3-6; 110:2) Ang madaogong pagsakay ni Jesus nagsugod balik sa 1914, sa sinugdanan mismo sa adlaw sa Ginoo. (Salmo 2:6) Ang iyang unang pagpanaog mao ang pagtambog kang Satanas ug sa iyang mga demonyo dinhi sa yuta. Unsay resulta niini alang sa katawhan? “Alaot ang yuta ug ang dagat.”—Pinadayag 12:7-12.
5. Unsang makuyaw nga mga panag-away ang nagsunod sa Magkakabayo sa puting kabayo, ug unsang kagahom ang nabatonan sa matag usa ka panag-way?
5 Dayon dunay nagsunod diha sa panan-awon nga tulo ka makuyaw nga mga panag-away: usa ka pula nga kabayo nga nagsimbolo sa kagutom, ug usa ka luspad nga kabayo nga diin ang magkakabayo niini ginganlag “Kamatayon.” Bahin sa ikaupat nga kabayo, atong mabasa: “Ug nakita ko, ug, tan-awa! usa ka luspad nga kabayo; ug ang nagkabayo niini ginganlag Kamatayon. Ug ang Hades nagsunod kaniya. Ug kini sila gihatagan ug kagahom aron ilang dag-on ang ikaupat ka bahin sa yuta, aron sa pagpamatay pinaagi sa espada ug sa gutom ug sa kamatay ug pinaagi sa mapintas nga mga mananap sa yuta.”—Pinadayag 6:3-8; Mateo 24:3, 7, 8; Lucas 21:10, 11.
6. Unsay epekto diha sa yuta niining tulo ka makahahadlok nga mga kabayo ug mga magkakabayo?
6 Tinuod mahitungod sa tagna, ang katawhan grabeng nag-antos gikan sa gubat, gutom, ug sakit sukad sa 1914. Apan ang ikaupat ka magkakabayo mopatay usab pinaagi sa “mapintas nga mga mananap sa yuta.” Kini ba nahimong iladong bahin sa tagna sukad sa 1914? Ang pagtuki sa laing kaamgid nga tagna ni Ezekiel makatabang aron mapatin-aw kining bahin sa tagna.
7. (a) Unsang tagna ang gipayahag ni Ezekiel bahin sa Jerusalem? (b) Sa unsang paagi natuman kining tagnaa?
7 Tingali nagsulat sa mga lima ka tuig una pa sa pagkapukan sa Jerusalem sa 607 W.K.P., mitagna si Ezekiel ug makalilisang nga silot alang sa mga Hudiyo tungod sa ilang pagkadili-matinumanon. Siya nagsulat ilalom sa pagdasig: “Unsa pa kaha kong ipadala ko ang akong upat ka madaotong mga buhat sa paghukom—espada ug gutom ug mga mabangis nga mananap ug kamatay—sa ibabaw sa Jerusalem aron sa paglaglag sa tawo ug sa mananap gikan niini.” (Ezekiel 14:21; 5:17) Natuman ba kini sa literal balik niadto? Sa walay duhaduha nag-antos ang Jerusalem gikan sa kagutom ug gubat dihang nagkaduol ang kataposan niini. Ug ang gutom sa kasagaran mopahinabog sakit. (2 Cronicas 36:1-3, 6, 13, 17-21; Jeremias 52:4-7; Lamentaciones 4:9, 10) Dunay bay literal nga hampak sa mapintas nga mga mananap niadtong panahona? Tingali dunay mga kaso sa mga tawo nga nadala o tingali napatay sa mga mananap, sanglit gitagna usab kini ni Jeremias—Levitico 26:22-33; Jeremias 15:2, 3.
8. Unsang bahin ang gidula sa mapinyas nga mananap sa panahon sa adlaw sa Ginoo?
8 Unsay ikasulti bahin karong panahona? Diha sa ugmad nang mga nasod, ang ihalas nga mga mananap dili peligrosong problema sa niadto. Apan, diha sa laing mga nasod, ang ihalas nga mga mananap padyaong namiktima, ilabina kon atong ilakip ang mga bitin ug mga buaya taliwala sa “mabangis nga mga mananap sa yuta.” Ang maong makalilisang nga mga kamatayon panagsa rang mataho sa internasyonal nga mga mantalaan, apan sila namatikdan. Ang librong Planet Earth—Flood naghisgot bahin sa daghang mga tawo sa India ug Pakistan nga “nangamatay sa kasakit gikan sa mga paak sa malala nga mga bitin” samtang naningkamot sa pag-ikyas gikan sa mga baha. Ang India Today mitaho diha sa usa ka baryo sa West Bengal diin gibanabang 60 ka babaye ang namatyag mga bana tungod sa mga pag-atake sa tigre. Kining maong mga trahedya mahimo unyang komun sa umaabot dihang mabungkag ang tawhanong katilingban ug dihang mograbe ang kagutmanan.
9. Unsang laing matang sa “mananap” ang nakapahinabog kagubot ug pag-antos sa katawhan sulod ning sigloha?
9 Apan nagpasumbingay si Ezekiel ug laing matang sa “mananap” sa dihang siya miingon: “Adunay pagsabotsabot sa iyang mga propeta sa tunga kaniya, sama sa nagangulob nga leon, nga nagkuniskunis sa tukbonon. Gilamoy nila ang mga kalag . . . Ang iyang mga prinsipe sa taliwala niya ingon sa lobo nga nagakuniskunis sa tukbonon.” (Ezekiel 22:25, 27) Busa ang mga tawo makalihok nga samag mga mananap usab, ug pagkadako sa pag-anots sa katawhan gikan sa maong mga manununkob sa atong siglo! Daghan ang nangamatay diha sa mga kamot sa samag mananap nga mga kriminal ug mga terorista. Oo, kapin sa usa ka paagi ang kamatayon nakakuhag dagayang ani sa mga biktima gikan sa “mapintas nga mga mananap sa yuta.”
10. Ang paglista ni Juan sa gubat, gutom, sakit, ug mapintas nga mananap nga nagapahinabog kamatayon nakatabang kanato sa pagkakita ug unsa?
10 Ang listahan sa gubat, gutom, sakit, ug mapintas nga mga mananap sa panan-awon ni Jaun nakatabang kanato sa pagkakita nga ang mga kasakit nga gianto sa Jerusalem sa 607 W.K.P. natugbangan sa daghang higayon sa atong adlaw. Ang adlaw sa Ginoo sa ingon nagkahulogan nag pag-antos sa kalibotan, ilabina tungod kay ang mga magmamando sa tawo midumili sa pagpasakop nianang Magkakabayo, ang naentronong Hari, si Jesu-Kristo. (Salmo 2:1-3) Apan, unsay ikasulti bahin sa katawhan sa Diyos? Unsay kahulogan sa adlaw sa Ginoo alang kanila?
Gisukod ang Templo
11. Diha sa Pinadayag 11:1, gisugo si Juan sa pagbuhat ug unsa, ug may kalabotan kini sa unsa nga templo?
11 Diha sa Pinadayag 11:1, si apostol Juan miingon: “Unya gihatagan ako ug sukdanan nga daw sungkod sa dihang siya miingon kanako: ‘Tumindog ka ug sukda ang sangtuwaryo sa templo sa Diyos ug ang halaran ug ang tanang magsisimba sa sulod niini.’” Kining pagsukod diha sa templo nga nakita sa panan-awon makahuloganon kaayo alang sa katawhan sa Diyos. Unsang sangtuwaryo sa templo ang gisukod ni Juan? Dili ang literal nga Hudiyohanong templo nga maoy gisimbahan ni Juan sa wala pa siya nahimong usa ka Kristohanon. Kadtong temploha gisalikway ni Jehova, ug kadto gilumpag sa 70 K.P. (Mateo 23:37–24:2) Hinunoa, kadto mao ang kahikayan sa dakong espirituwal nga templo ni Jehova. Diha niining mahulagwayong templo, ang dinihogang mga Kristohanon nag-alagad ingong luyoluyong mga saserdote diha sa yutan-ong sawang.—Hebreohanon 9:11, 12, 24; 10:19-22; Pinadayag 5:10.
12. Kanus-a natukod ang templo, ug unsay nahitabo mahitungod niini sa unang siglo
12 Kanang temploha natukod sa 29 K.P. dihang gidihogan si Jesus ingong hataas nga saserdote. (Hebreohanon 3:1; 10:5) Kini dunay 144,000 ka luyoluyong mga saserdote, ug sa unang siglo daghan kanila ang gipili, gitimrihan, ug unya namatay nga matinumanon. (Pinadayag 7:4; 14:1) Apan sa dihang nangamatay kadtong unang-siglong mga Kristohanon, sila nangatulog sa lubnganan, wala dayon banhawa didto sa langit. (1 Tesalonica 4:15) Dugang pa, human sa unang siglo usa ka dakong apostasiya ang misulod, ug ang saserdotehanong dinihogang mga Kristohanon gilibotan sa nagtubong “mga bunglayon,” mga apostata. (Mateo 13:24-30) Sa nanglabayng kasiglohan sukad niadto, kini ang gibangong mga pangutana: ‘Timrihan ba ang tanang 144,000 ka luyoluyong mga saserdote?’ ‘Kadto bang nangamatay nga matinumanon banhawon aron sa pag-alagad sa langitnong sangtuwaryo?’ Ang pagsukod sa templo nga nakita sa panan-awon nagpakita nga ang tubag sa matag usa niining mga pangutanaha maoy oo. Ngano?
13. Ang pagukod ni Juan sa sangtuwaryo sa templo nagagarantiya ug unsa, ug unsay nahitabo una pa sa adlaw sa Ginoo?
13 Tungod kay diha sa tagna sa Bibliya ang pagsukod sa usa ka butang sa kasagaran nagpakita nga ang katuyoan ni Jehova alang nianang butanga tino nga matuman. (2 Hari 21:13; Jeremias 31:39; Lamentaciones 2:8) Busa, ang panan-awon ni Juan sa pagsukod sa sangtuwaryo sa templo maoy usa ka garantiya nga sa panahon sa adlaw sa Ginoo, ang tanang katuyoan ni Jehova bahin sa templo matuman. Kaharmoniya niini ug sumala sa tanang ebidensiya, kadtong sakop sa dinihogan nga namatayng matinumanon gisugdan sa pagbanhaw ngadto sa ilang gisaad nga dapit diha sa langitnong sangtuwaryo sa 1918. (1 Tesalonica 4:16; Pinadayag 6:9-11) Apan komusta ang nanghibilin sa 144,000?
14. Unsay nahitabo sa dinihogang mga Kristohanon sa wala pa ug sa panahon sa unang gubat sa kalibotan?
14 Bisan sa wala pa magsugod ang adlaw sa Ginoo, ang dinihogang mga Kristohanon nga migula gikan sa apostatang Kakristiyanohan misugod sa pagtigom ngadto sa usa ka separadong organisasyon. Sila nakatukod ug maayong rekord sa pagkamatinumanon sa pagpahayag sa pagkahinungdanon sa tuig 1914, apan niadtong mahukmanong tuig, dihang nagsugod sa pag-antos sa panglupig, ‘pagyatak.’ Miabot kini sa kinatayoktokan sa 1918 dihang ang mga direktor sa Watch Tower Society gibilanggo, ug ang organisadong buluhaton sa pagsangyaw halos nahunong. Niadtong yugtoa, sila daw ‘gipatay.’ (Pinadayag 11:2-7) Unsay kahulogan sa pagsukod sa sangtuwaryo sa templo alang niining mga Kristohanon?
15. Unsay kahulogan sa pagsukod sa templo diha sa panan-awon alang sa katawhan sa Diyos sa mga adlaw ni Ezekiel?
15 Sa tuig 593 W.K.P., 14 ka tuig human nga nalumpag ang templo ni Jehova sa Jerusalem, si Ezekiel nakakita diha sa panan-awon sa balay ni Jehova. Gilibot siya sa tanang bahin niining temploha ug nagtan-aw dihang gisukod ang tanang bahin niini. (Ezekiel, kapitulo 40–42) Unsay kahulogan niini? Si Jehova mismo misaysay: Ang pagsukod sa templo nagpailag usa ka pagsulat sa katawhan ni Ezekiel. Kon magmapainubsanon sila, maghinulsol sa ilang mga kalapasan, ug mosunod sa mga balaod ni Jehova, sultihan sila sa mga sukod sa templo. Kini sa dayag nagpadasig kanila sa paglaom nga moabot ra ang adlaw nga pagawason ang katawhan ni Jehova gikan sa Babilonya ug magsimba pag-usab kang Jehova diha sa iyang literal nga templo.—Ezekiel 43:10, 11.
16. (a) Nagapasalig ug unsa alang sa katawhan sa Diyoa balit sa 1918 ang pagsukod ni Juan sa sangtuwaryo sa templo? (b) Sa unsang paagi kini natuman?
16 Sa susama, kon kadtong nangaluyang mga Kristohanon balik sa 1918 magpaubos sa ilang kaugalingon ug maghinulsol sa tanang mga kalapasan nga ilang nahimo, sila pagawason ug makabaton sa panalangin ni Jehova ug bug-os makadula sa ilang bahin diha sa iyang kahikayan sa templo. Ug mao kini ang nahitabo. Sumala sa Pinadayag 11:11, sila ‘mitindog,’ o sa mahulagwayong paagi gibanhaw. Ang nalangkit nga pagkabanhaw diha sa panan-awon ni Ezekiel naglandong sa pagpasig-uli sa mga Hudiyo sa ilang kaugalingong yuta. (Ezekiel 37:1-14) Kining modernong ‘pagkabanhaw’ maoy pagkapasig-uli sa katawhan sa Diyos gikan sa ilang naluya, halos inaktibong kahimtang, ngadto sa usa ka buhi, mahimsog nga kahimtang nga diin sila makadula sa bug-os nga bahin sa pag-alagad kang Jehova. Ang maong ‘pagkabanhaw’ nahitabo sa 1919.
Ang Gamayng Linukot nga Basahon
17. (a) Ihubit ang panan-awon ni Juan diha sa Pinadayag 10:1. (b) Kinsa ang manulonda nga nakita ni Juan, ug sa panahon sa unsang adlaw nga ang panan-awon matuman?
17 Diha sa Pinadayag 10:1, nakakita si Juan ug “usa ka kusgang manulonda nga mikunsad gikan sa langit, siya sinul-oban ug panganod, ug sa iyang ulo dihay usa ka balangaw, ang iyang nawong maingon sa adlaw, ug ang mga batiis maingon sa mga haligi sa kalayo.” Kini daw kaamgid sa mga panan-awon ni Jehova nga nakita sa miagi ni Ezekiel ug ni Juan mismo. (Ezekiel 8:2; Pinadayag 4:3) Apan ang nakita ni Juan dinhi maoy usa ka manulonda, dili si Jehova. Busa, hayan kadto mao ang dakong manulondang Anak ni Jehova, si Jesu-Kristo, kinsa “mao ang dagway sa dili-makita nga Diyos.” (Colosas 1:15) Dugang pa, gilarawan sa Pinadayag 10:2 si Jesus nga nagbarog sa usa ka posisyon nga may dakong kagahom, diin ang “iyang tuo nga tiil diha niya itunob sa dagat, ug ang iyang wala nga tiil diha niya itunob sa yuta.” Busa ang dakong manulonda naghawas kang Jesus sa panahon sa adlaw sa Ginoo.—Tan-awa ang Salmo 8:4-8; Hebreohanon 2:5-9.
18. (a) Unsay gisugo kang Juan nga kaonon? (b) Diha sa sama nga panan-awon, unsay gisugo kang Ezekiel nga kaonon, ug uban sa unsang epekto?
18 Si Jesus, diha sa iyang magilakong dagway sa panan-awon, dunay gamayng basahon sa iyang kamot, ug gisugo si Juan sa pagkuha sa basahon ug sa pagkaon niini. (Pinadayag 10:8, 9) Niining paagiha, si Juan dunay kaagi sama kang Ezekiel, kinsa gisugo usab sa pagkaon sa basahon nga nakita diha sa panan-awon. Sa kaso ni Ezekiel, si Jehova mismo ang mitunol sa basahon ngadto sa propeta, ug nakita ni Ezekiel nga “didto nahisulat ang pagbakho ug pag-agulo ug pagminatay.” (Ezekiel 2:8-10) Si Ezekiel mitaho: “Unya ako mikaon niini, ug sa akong baba kini ingon sa katam-is sa dugos.” (Ezekiel 3:3) Unsay kahulogan sa pagkaon sa basahon alang kang Ezekiel?
19. (a) Unsay gihawasan sa pagkaon ni Ezekiel sa basahon? (b) Kinsa ang dumadawat sa mapait nga mga mensahe nga gisugo si Ezekiel sa pagwali?
19 Sa matin-aw, nasudlan ang basahon ug dinasig nga mga impormasyong matagnaon. Dihang gikaon ni Ezekiel ang basahon, iyang gidawat ang komisyon sa pagpadayag niining impormasyona sa usa ka sukod nga kini nahimong bahin kaniya. (Itandi ang Jeremias 15:16.) Apan ang unod sa basahon dili matam-is alang sa uban. Ang basahon puno sa “pagbakho ug pag-agulo ug pagminatay.” Alang kang kinsa kining mapait nga mensahe? Sa unang higayon, si Ezekiel gisultihan: “Anak sa tawo, lakaw, umadto ka sa balay sa Israel, ug makigsulti ka sa akong pulong kaniya.” (Ezekiel 3:4) Sa ulahi, ang mensahe ni Ezekiel mikaylap sa paglakip sa paganong mga nasod sa palibot.—Ezekiel, kapitulo 25–32.
20. Unsay nahitabo sa dihang gikaon ni Juan ang gamayng basahon, ug unsay misangpot sa iyang paghimo niini?
20 Sa kaso ni Juan, ang resulta sa iyang pagkaon sa basahon managsama. Siya mitaho: “Ug gikuha ko ang gamayng basahon gikan sa kamot sa manulonda ug akong gikaon kini, ug matam-is kini sa akong baba nga daw dugos; apan sa gitulon ko kini ang akong tiyan mibati sa kapait.” (Pinadayag 10:10) Matam-is usab alang kang Juan ang basahon dihang gikaon kini. Makalipay ang pulong ni Jehova nga mahimong bahin kaniya. Apan ang mensahe dunay mapait nga bahin. Mapait alang kang kinsa? Si Juan gisultihan: “Kinahanglan magahimo ikaw pag-usab ug propesiya labot sa daghang mga tawo ug mga nasod ug mga pinulongan ug mga hari.”—Pinadayag 10:11.
21. (a) Unsay gihimo sa dinihogang mga Kristohanon sa 1919 nga katugbang sa pagkaon ni Juan sa gamayng basahon, ug uban sa unsang epekto? (b) Unsay misangpot sa Kakristiyanohan ug sa kalibotan sa katibuk-an?
21 Sa unsang paagi natuman kining tanan sa panahon sa adlaw sa Ginoo? Sumala sa mga kamatuoran sa kasaysayan, balik sa 1919 gidawat sa matinumanong mga Kristohanon ang pribilehiyo sa pag-alagad kang Jehova sa bug-os nga kini nahimong bahin kanila, ug tinuod nga tam-is gayod kadto. Apan ang ilang panalangin ug pribilehiyo mapait alang sa uban—ilabina sa klero sa Kakristiyanohan. Ngano? Tungod kay maisogong giwali niining matinumanong dinihogang mga Kristohanon ang tanang mensahe ni Jehova alang sa katawhan. Dili lamang giwali nila ang “maayong balita sa gingharian” kondili ilang giyagyag usab ang patayng espirituwal nga kahimtang sa Kakristiyanohan ug sa kalibotan sa katibuk-an.—Mateo 24:14; Pinadayag 8:1–9:21; 16:1-21.
22. (a) Sa unsang dakong paagi nga gigamit ni Jehova ang dinihogan sa panahon sa adlaw sa Ginoo? (b) Unsay kahulogan sa adlaw sa Ginoo alang sa kalibotan ni Satanas ug sa katawhan sa Diyos?
22 Kining matinumanong grupo sa mga Kristohanon gigamit ni Jehova sa pagtigom sa mga nanghibilin sa 144,000 aron matimrihan, ug sila nanguna sa pagtigom sa dakong panon, nga dunay yutan-ong paglaom. (Pinadayag 7:1-4, 9, 10) Kining dakong panon nagadulag usa ka dakong bahin sa mga katuyoan ni Jehova niining yutaa, ug ang pagtungha niini nakahatag dakong kalipay sa langit ug sa yuta. (Pinadayag 7:11-17; Ezekiel 9:1-7) Busa, kining “adlwa sa tanang mga adlaw” nagkahulogan nag pag-antos sa kalibotan ni Satanas apan dagayang mga panalangin alang sa katawhan ni Jehova. Atong tan-awon, karon, kon sa unsang paagi kini magpadayong tinuod dihang nagapadayon ang adlaw sa Ginoo.
Makasaysay Ka Ba?
◻ Unsa ang adlaw sa Ginoo?
◻ Unsang malaglagong bahin ang gidula sa “mapintas nga mga mananap sa yuta” sa panahon sa adlaw sa Ginoo?
◻ Unsang pasalig ang gihatag ni Jehova pinaagi sa pagsukod ni Juan sa sangtuwaryo sa templo?
◻ Unsay kahulogan sa pagkaon ni Juan sa gamayng basahon alang sa dinihogang nanghibilin sa 1919?
◻ Sa pagkakaron, unsay kahulogan alang sa katawhan sa Diyos ug sa kalibotan sa katibuk-an ang adlaw sa Ginoo?
[Hulagway sa panid 13]
Ang pagsukod ni Juan sa templo naghatag lig-ong garantiya sa dinihogan sa adlaw sa Ginoo