Met A Pwosiiti Lon New York City

EWE esissin sia kuna ikei a fen pacheta won eu lein an ewe Watchtower Society imwen for puk lon Brooklyn, New York, poputa seni orun 1950. Ewe esissin ekkewe chon feilo angang, tourist, me pwal ekkoch mi kukkuna a achema ngeniir ar repwe alleani ewe Paipel iteiten ran. Ei taropwe mi mak mwirin seni emon nengnginin Chon Pwarata, a aitingenikich ochchun ei achechchem.

“Ua foffos ngeni emon chienei chon sukul ussun met ua mochen fori lupwen ua sochungio seni high school. A fokkun meseik lupwen ua poputa le fos ussun Bethel, ewe ofesilapen Chon Pwarata Jiowa. A ereniei pwe a fen nonnom New York City ren unusen manauan. An we famili rese achocho ngeni lamalam, nge iteiten lesossor lupwen a newu ewe asam mwocho, a kuna ewe esissin mi apasa ‘Akkalleani An Kot We Kapas ewe Paipel mi Piin.’ Ina popun, neminnewe a alleani noun we Paipel iteiten ran mwen a feilo sukul.”

“Lupwen neminnewe a mwokut seni ewe telinimw, a apasa pwe ewe mettoch a pwosiiti lon New York City, an ese chuen kuna ewe minen achechchem le alleani noun we Paipel lupwen a keran nennelo. Nge pokiten ewe esissin won an ewe Watchtower imwen for puk, a fen eoreni le akkalleani ewe Paipel. Iwe, a chuen alleani ewe Paipel iteiten ran!”

A mmen murinno ach poputani ewe ran ren ach ekis alleani an Kot we Kapas! Ika sia fori ena mettoch, ese mwaal sipwe miritiiti an ewe aposel Paul kewe kapas: “Ekkewe taropwe mi fel . . . mi tongeni atipatchemokelo usun ewe angangen amanau ren luku Kraist Jises.”​—2 Timoti 3:15-​17.