Ekkena kapas lón ach ei lesenin rán ikenái ra áiti ngenikich pwe Jiowa ese máicha wóón an tipáchem. A fangafangéch le ngeni ekkewe ekkóch. Jemes a pwal erá pwe lupwen Jiowa a fang tipáchem, i “esap song ngeni ena emén mi tingor.” Ese fókkun mochen ach sipwe meefi weires atun sia tingorei an emmwen. Ren enletin, a fen pesekich ach sipwe kútta emmwen seni. (SalF. 2:​1-6) Nge ifa ussun ren kich? Sia tongeni áppirú Jiowa me áiti ngeni ekkewe ekkóch met sia silei? (Kölf. 32:8) A suuk ngeni néún Jiowa kewe aramas chómmóng alen ar repwe áiti ngeni ekkewe ekkóch met ra silei. Áwewe chék, sia kan ákkáiti ekkewe minefé lón ewe angangen afalafal. Ekkewe mwán mi ásimaw ra mosonottam le álisi ekkewe chónálillisin mwichefel me ekkewe mwán mi papatais ar repwe silei ifa ussun repwe féri wiser kewe lón ewe mwichefel. Me ekkewe mi lipwákéch lón angangen kaúún me túmúnún ekkewe imw sia áeá fán iten ach fel ngeni Jiowa, ra álillis le ákkáiti ekkewe rese kon sipeéch lón ekkena angang. w24.09 28-29 ¶11-12

Ámi kena Chón Kraist mwán, ren ámi oupwe fich ngeni ewe wis mwán mi ásimaw, a lamot oupwe “itéch,” weween, oupwe itéch me ren chón ewe mwichefel pokiten ámi féfféréch me ese wor met emén epwe tongeni tipimwáál ngenikemi wóón. (1 Tim. 3:2) Pwal och, a lamot kopwe itéch me ren aramasen lúkún. Ekkewe esap iir chón lúkú, ra tongeni esiita met ka eáni lúkú, nge itá esap wor popun repwe tipemwárámwáreiti wenecharóm are féfférum. (Tan. 6:​4, 5) Pwisin eisinuk, ‘Ngang mi itéch me ren chón ewe mwichefel me chón lúkún ewe mwichefel?’ Iká en emén mi “efich minne mi múrinné,” iwe, ka kútta ekkewe napanap mi múrinné ekkewe ekkóch ra napanapeni me ereniir úkúúkún óm aúcheaniir ren napanaper kana. (Tait. 1:8) Ka pwal pwapwa le féri minne mi múrinné fán iten ekkewe ekkóch, pwal mwo nge ekkewe mettóch rese ekieki pwe kopwe pwal féri fán iter. Pwata a fókkun lamot ngeni ekkewe mwán mi ásimaw ena napanap? Pún iir ra áeá lape ngeni ar fansoun le túmúnú ewe mwichefel me apwénúetá wiser kewe. (1 Pit. 5:​1-3) Ikáámwo ina, nge ewe pwapwa a toriir seni ar angang fán iten ekkewe ekkóch a fókkun luluuló seni minne ra pennúkúóló.—Féf. 20:35. w24.11 20-21 ¶3-5

Ekkewe chónálillisin mwichefel ra eáni eú angang mi aúchea lón ekkewe mwichefel. Ewe aposel Paul a aúcheani ekkena mwán mi túppwél. Áwewe chék, atun a mak ngeni ekkewe Chón Kraist lón Filipai, a apachaalong an kapwong ngeni ekkewe chónálillisin mwichefel me mwán mi ásimaw. (Fil. 1:1) Chómmóng mwán are alúwél mi papatais, ra fókkun pwapwa lón wiser we chónálillisin mwichefel. Áwewe chék, Devan a 18 ierin atun a poputá le wiseni ena wis chónálillisin mwichefel. Nge pwal emén itan Luis a poputá le wiseni ena wis mwirin an a fen 50 ierin. Met meefian ren ei wis chónálillisin mwichefel? Iei met a apasa: “Úa fókkun pwapwa le angang fán iten chiechiei kewe lón mwichefel. Ra pwáári watteen tong ngeniei, iwe iei úa tongeni pwáár ngeniir ái tongeer.” Chómmóng chónálillisin mwichefel ra pwal meefi ena. Iká en emén mwán are át mi fen papatais nge kesaamwo emén chónálillisin mwichefel, ka tongeni achocho óm kopwe wiseni ena wis? w24.11 14 ¶1-3