Met sia tongeni káé seni met ewe aposel Paul a ereni ekkewe chón Tesalonika? A lamot sipwe eáni mirit atun sia rong och mettóch ese tipeeú ngeni met sia káé seni Paipel, are atun sia rong eú pwóróus mi ámáirú. Lón ewe Soviet Union, chón oput kich ra ngeni chienach kewe mwán Chón Kraist eché taropwe ra erá pwe seni ewe ofesilap lón New York. Ena taropwe a pesei ekkóch ekkena Chón Kraist ar repwe féraatá eú mwicheich mi pwisin imuuló wóón an. Ussun itá mi fen enlet ena taropwe. Nge ekkena Chón Kraist mi túppwél rese tupuló. Ra mirititi pwe ewe pwóróus lón ena taropwe ese tipeeú ngeni met ra fen káé. Lón ei fansoun, fán ekkóch, chón oput ewe enlet ra áeá ekkewe mettóch, áwewe chék ren ewe Internet me social media pwe ra mochen achocho le orukorukakich me etipefesenikich. Sisap “mut ngeni emén an epwe ekkesiwili [ach] ekiek mi pwúng,” nge sipwe fen túmúnúkich ren ach pwisin etittina iká minne sia róng are álleani ra tipeeú ngeni ekkewe pwóróus mi enlet sia fen káé.—2 Tes. 2:2; 1 Jon 4:1. w24.07 12 ¶14-15

Ewe kefil mi lamot seni meinisin emén a tongeni eáni, ina an filaatá an epwe fangoló manawan ngeni Jiowa me pachelong lein chón an we familien chón fel ngeni. Jiowa a mochen án meinisin repwe féri ena. Pwata? A mochen ar repwe chiechiéch ngeni me kúna manaw tori feilfeiló. (Tut. 30:​19, 20; Kal. 6:​7, 8) Iwe nge, Jiowa ese echchimwa emén an epwe angang ngeni. A mut ngeni emén me emén ar repwe pwisin filaatá met repwe féri. Nge ifa ussun iká emén Chón Kraist a féri eú tipis mi chou? Iká ese áier, iwe a lamot an epwe katowu seni ewe mwichefel. (1 Kor. 5:13) Ikáámwo ina, nge Jiowa a fókkun mochen án ena emén epwe liwiniti. Ren enletin, ina ewe popun mi aúchea a awora ewe méén kepich, pwe epwe musoló tipisin ewe chón tipis mi áier. Ach we Kot mi tong a pesei chókkewe mi féri tipis mi chou ar repwe áier.—Sek. 1:3; Rom 2:4; Jem. 4:8. w24.08 14 ¶1-2

Atun ewe aposel Jon a makkeei néún we aúlúngátin taropwe, ekkóch ekkewe aramas ra achéwú pwóróus mi mwáál me efisi tipefesen lón ewe mwichefel. Nge ekkóch ra chúen sópweeló le “feffetál lón ewe enlet.” Ra álleasochisi Jiowa me ‘sópweeló le manaweni manawer me ren an kewe allúk.’ (2 Jon 4, 6) Ekkena Chón Kraist mi túppwél ra efisi án Jon pwapwa me ra pwal apwapwaai Jiowa. (SalF. 27:11) Ifa ewe lesen fán itach? Túppwél epwe atoto ach pwapwa. (1 Jon 5:3) Áwewe chék, sia pwapwa ren ach silei pwe sia apwapwaai Jiowa. Jiowa a fókkun pwapwa atun a kúna ach ttiisenikich ekkewe mettóch mi ngaw me álleasochisi an kewe allúk. Ekkewe chónláng ra pwal pwapwa. (Luk 15:10) Kich sia pwal tongeni pwapwa atun sia kúna án pwiich kewe akkamwéchú ar túppwél, pwal mwo nge atun ra nóm lón weires are kúna sóssót. (2 Tes. 1:4) Iwe, atun án Setan ei ótót epwe móróló, sipwe pwapwa pwe sia akkamwéchú ach túppwél ngeni Jiowa. w24.11 12 ¶17-18