Repotun Ekkewe Chon Afalafala Ewe Muu

“Oua Sileilap Ussun ewe Paipel”

LUPWEN Jises a tori 12-ierin a pworacho le fos ngeni ekkewe nouwisin lamalam lon Jerusalem, “ir meinisin mi auselinga i ra weitifengennir ren an tipatchem o ren an kapas.” (Luk 2:47) Ussun we chok ikenai, chommong chon angangen Jiowa mi kukkun ra pworacho le fos ngeni nour kewe sense me chiener kewe chon sukul ussun Kot me ewe Paipel, me fan chommong ra pwapwa ren uwaan ar foffor.

Tiffany, 14 ierin, a fiti eu class atun ar poraus ussun ewe oesini lon Paipel ussun ewe 70 wiik mi wewe ngeni ier mi mak lon Taniel 9:24-​27. Ewe sense a apasawu ekis chok poraus ussun ekkewe wokisin nge ese kon aweweochu ewe poraus.

Le poputaan, Tiffany a pireir le eitiata poun. “Nge,” iei alon we, “ua fokkun osukosuk pwe ese kon lien ffatoch aweween ekkewe wokisin. Ina minne ua muttir chok le eitata pei.” Ewe sense a mairu pwe mei wor emon mi tongeni apasa och mettoch ussun ei poraus, popun pun lape ngeni ekkewe chon sukul ra weires le weweiti.

Ewe sense a mut ngeni an Tiffany awewei ewe oesini nge a uta le fos. Lupwen a wes, ewe class a fokkun fanelo chok. Tiffany a ekis niuokkus. Iwe mwirin, chon ewe class ra fokkun episipis.

“Am aua ingeituk, Tiffany, am aua ingeituk,” ewe sense a apasa fan chommong. A apasa pwe a silei pwe mei pwal wor lamoten ekkena wokisin, nge Tiffany ewe aemonun aramas a aweweochu ekkewe wokisin ngeni. Le muchuloon ewe class, a eisini Tiffany ewe popun pwata a sileilap ussun ewe Paipel.

A polueni, “pokiten ngang emon Chon Pwarata Jiowa. Semei me inei ra awewe ngeniei ena oesini fan chommong mwen ai upwe weweiti.”

Chienan kewe chon sukul ra pwal mairu ren an silei ussun ewe Paipel. Emon leir a ereni Tiffany: “Iei ua keran silei ewe popun Chon Pwarata Jiowa ra feilo imw me imw; pokiten oua sileilap ussun ewe Paipel.” Ekkewe ekkoch ra pwon pwe resap chuen amangaua i ussun an kewe luku.

Lupwen Tiffany a ereni seman me inan we ussun met a fis, ra pese ngeni an epwe anounou ngeni noun we sense ewe puk Knowledge That Leads to Everlasting Life. Lupwen a fori alor me aiti ngeni ewe sense ewe kinikin mi awewei ussun an Taniel oesini, a muttir nouni ewe puk me a kilisou ngeni.

Pwungun pwe, lupwen ekkewe sarafo Chon Kraist ra pworacho le fos ussun minne semer me iner kewe ra fen aiti ngeniir ussun Kot me ewe Paipel, ra aitochuolo me alingalo Jiowa me wato feioch ngeni pwisin ir.​—Mattu 21:15, 16.