“Upwe Pwellifeili Om we Roong, O Jiowa”

“UPWE tolu pei lon ai limelimoch, me upwe pwellifeili om we roongen asor, O Jiowa.” (Kol Fel 26:6, New World Translation) Ren ekkena kapas, King Tafit seni lom lom a pwarata an tuppwol ngeni Jiowa. Iwe nge, met popun atewe epwe “kakkaris le pwellifeili” an Jiowa we roong, me ifa ussun epwe fori ena mettoch?

Ren Tafit, ewe leenien fel ngeni Jiowa, ina ewe imwen fel mangaku fitifengen me ewe roongen asor mi nuumwunuumw ngeni copper, iwe, a nom lon Kipeon, ennefenin Jerusalem lupwen Tafit a nemenem. (1 King 3:4) Ewe roong a chok fisu fiit ttaman le pekin me ruaanu, me a fokkun kis seni ewe roong mi lingemwarar epwe for lon kiannin ewe imwen fel Solomon epwap aueta.a Nge Tafit a pwapwa chapur ren ewe imwen fel mangaku fitifengen me an we roong, pun ina leenien ewe fel mi enlet lon Israel.​—Kol Fel 26:8.

Ra fori asor mi kek, asorun komunio, me asor fan iten tipis won ewe roong, me lon ewe Ranin Omusomusen Tipis mi fis fan eu iteiten ier, a wor asor fan iten unusen ewe muu. Ewe roong me ekkewe asor a wor weween fan iten chon Kraist ikenai. Ewe aposel Paul a awewei pwe ewe roong a liosueta letipen Kot, iwe, me ren letipan, Kot a nguuri eu asor mi fich fan iten amanauen aramas. Iei alon Paul: “Ren chok letipan we a epinikichelo ren ewe asor, ewe inisin Jises Kraist, mi isetiu fan eu chok.”​—Ipru 10:5-​10.

Lupwen ekkewe samol fel ra akkammol mwen ar repwe angang ren ewe roong, ra kan tolu pour lon konik pwe repwe alimelimer. Iwe, a fich ngeni King Tafit an epwe tolu poun kkewe “pwe esissinen [an] limelimoch” mwen an epwe ‘pwellifeili ewe roong.’ A fori “fan wenechar me limochun leluk.” (1 King 9:4) Ika ese tolu poun kkewe, esap pwung an fel ngeni Kot, mi liosutiu ren an ‘pwellifeili ewe roong.’ Pwungun pwe esap Tafit emon chon Lifai me esor wiisan an epwe eani angangen samol-fel ren ewe roong. Inaamwo ika i emon king, nge ese mumuta ngeni an epwe ipwelong lon ewe leeni lukun ewe imwen fel mangaku. Iwe nge, pokiten i emon chon Israel mi tuppwol, a alleasochisi ewe Allukun Moses me a kan ukkuwou an kkewe asor pwe epwe iseta won ewe roong. An pwellifeili ewe roong a wewe ngeni an akkomwa ewe fel mi limelimoch lon manauan.

Ikenai sipwe tongeni appiru fofforun Tafit? Ewer. Sipwe pwal tongeni tolu pouch lon ach limelimoch me pwellifeili an Kot roong ika sipwe anganga ach luku an Jises we asor me angang ngeni Jiowa ren unusen letipach fan ‘pouch me lelukach mi limelimoch.’​—Kol Fel 24:4.

[Pworous fan]

[Sasing lon pekin taropwe 19]

Ewe roong a liosueta letipen Jiowa, iwe, ren letipan, a nguuri eu asor mi fich ren amanauen aramas