Ewe Mwú A Kinikinfesen

KA SILEI pwata ei mwán a kamwekisietiw úfan ei? Jiowa a ereni pwe epwe féri ena. Ei mwán itan Ahia, néún Kot we soufós. En mi silei met weween soufós? Emén aramas Kot a kan ereni usun met epwe fis lón fansoun mwach.

Ahia a kan fós ngeni Jeropoam me ikeei ie. Jeropoam, i néún Salomon chón angang mi watte wisan. Lupwen Ahia a chuuri Jeropoam wóón ewe al, Ahia a féri eú mettóch mi ámáirú. A pwiliti ewe mineféén sekit a úféúf, iwe a kamwetiw lón 12 kinikin. A ereni Jeropoam: ‘Angei 10 kinikin fán pwisin itom.’ Ka silei pwata Ahia a ngeni Jeropoam 10 kinikin?

Ahia a áweweei ngeni pwe Jiowa epwe angei ewe mwú seni Salomon. A apasa pwe Jiowa epwe ngeni Jeropoam 10 einang. Weween pwe ruu chék ekkewe einang repwe nóm fán nemenien néún Salomon we itan Rehopoam.

Lupwen Salomon a rong minne Ahia a ereni Jeropoam, a fókkun song. A sótun nieló Jeropoam. Nge Jeropoam a súló Isip. Mwirin och fansoun, Salomon a máló. A king ren úkúkún 40 ier nge iei, néún we Rehopoam a seikitá ngeni king. Me lón Isip, Jeropoam a rong pwe Salomon a máló, iwe a liwinsefálito Israel.

Rehopoam esap emén king mi múrinné. A fen kirikiringaw ngeni ekkewe aramas lap seni seman we Salomon. Jeropoam me ekkóch mwán mi wis tekia ra ló chuuri King Rehopoam, iwe ra tingorei an epwe kirekiréch ngeni ekkewe aramas. Nge Rehopoam ese aúseling ngeniir. Nge a lapóló an kirikiringaw seni lóóm. Iwe, ekkewe aramas ra seikaatá Jeropoam an epwe king wóón 10 ekkewe einang, nge ekkewe ruu einang Peniamin me Juta ra nónnóm fán nemenien ar we king Rehopoam.

Jeropoam ese mochen pwe néún kewe aramas repwe feiló Jerusalem le féri ar fel lón án Jiowa we imwenfel. Ina popun a féri rúúemén ululun kou kolt, iwe a etipetipa ekkewe aramas seni ekkewe 10 einang pwe repwe fel ngeniir. Ekiseló chék ewe fénú a uren atai allúk me féffér mi efeiengaw.

Mei pwal wor fitikoko lón mwúún ekkewe ruu einang. Ese mwo tori nimu ier mwirin án Rehopoam wiliti king, nge ewe kingen Isip a feito pwe epwe maun ngeni Jerusalem. A angei chómmóng pisek aúchea seni án Jiowa we imwenfel. Iwe, ese nómottam échún ewe imwenfel.