Yishima
10 Yishima ya Solomone.
Mwana mukwa-mana kakwivisa tato chiseke,
alioze mwana chihepuke kakuvwisa naye chinyengo.
2 Upite wakuzuka mu jila yize kuyalitele kuuchi kukuyukisa,
alioze ululi wakulamwina ku kufwa.
3 Yehova kechi kecha akwa-ululi afwe ni zala,
alioze makamina atu api yize anazange.
4 Chileya makapwa chiswale,
alioze chikilikita makapwa pichi.
5 Mwana mukwa-mana kakucha mbuto ha lushiho,
alioze mwana yoze wakuya tulo ha mashimbu a kucha, kakukolesa sonyi.
6 Akwa-ululi matambula yiwape,
alioze mu kanwa lia atu api munaswame ungulungulu.
7 Mukwa-ululi makamwiwuluka ni kumuwahisa,*
alioze jina lia mutu mupi mulikatoka.
8 Yoze ukwete mana makatayiza fumbo,
alioze yoze wakuhanjika yuma ya uhepuke makamona lamba.*
9 Yoze wakulinga yuma yipema makatwama mu ukulungunga,
alioze yoze wakwonga akwo, makamutungununa.
10 Yoze wakutenya akwo liso ni nyonga lipi kakuneha lamba,
alioze yoze wakuhanjika yuma ya uhepuke makamona lamba.
11 Kanwa lia mukwa-ululi lili chishina cha mwono,
alioze mu kanwa lia atu api munaswame ungulungulu.
12 Kole yakukoka vunda,
alioze zango liakufuka uhenge weswe.
13 Mana kali mu kanwa lia yoze uli ni malinjekela,
alioze mbwechi kakuyilamba mu nyima lia yoze keshi mana.
14 Akwa-mana kakutulika kanawa chinyingi,
alioze kanwa lia chihepuke liakukoka unongeso.
15 Pichi kakumona upite ngwe mbonge yenyi yikolo.
Chiswale kakumona lamba mumu lia uswale wenyi.
16 Milimo ya akwa-ululi yakutwala ku mwono,
alioze milimo ya atu api yakutwala ku shili.
17 Yoze wakutayiza fumbo kakusongwela akwo mu jila ya mwono,
alioze yoze wakulengulula fumbo kakupiangula akwo.
18 Yoze wakusweka kole kakuhanjika mahuza,
yoze wakuliongela akwo yuma kapwa chihepuke.
19 Nyi mutu mahanjika chinji, tupalia keshi kuhona,
alioze yoze manyonga yize mamba kapwa chikanyame.
20 Limi lia akwa-ululi liapwa ngwe prata yipema chinji,
alioze mbunge ya atu api kuyishi ulemu.
21 Yuma yize mukwa-ululi akuhanjika yakukwasa* atu anji,
alioze yihepuke kakufwa mumu lia kuhona mana.
22 Yiwape ya Yehova ye yakupwisa mutu pichi,
iye keshi kuweza lamba nilimwe.
23 Kuli chihepuke, kulinga yuma ya sonyi chili ngwe kuheha,
alioze mukwa-malinjekela mana akwete.
24 Yuma yize atu api akwivila woma muyikaawana,
alioze akwa-ululi makaaha yize akuzanga.
25 Muze kangonga mapalika, atu api kechi kapwako nawa,
alioze akwa-ululi kali ngwe fundamentu yize muyinunga ku miaka ya mutolo.
26 Ngwe chize yapwa vinyu yapangaminya ku mazo ni mwishi mu meso,
che chize apwa chileya kuli mwene wenyi.
27 Kuvumbika Yehova chakwokesa miaka ya mwono,
alioze miaka ya atu api makayitepulula.
28 Yuma yize akwa-ululi akushimbwila yakuneha uwahililo,
alioze yuma yize atu api akushimbwila muyikahwa.
29 Jila ya Yehova yapwa chiswamo kuli mukwa-kushishika,
alioze kuli akwa-kalimbalimba yinalumbunuka unongeso.
30 Akwa-ululi kechi keza kaanongesa,
alioze atu api kechi katwama nawa hano hashi.
31 Mu kanwa lia mukwa-ululi mwakutuhuka mana,
alioze limi lia mutu mupi makalipatula.
32 Mu kanwa lia akwa-ululi mwakutuhuka yuma yipema,
alioze mu kanwa lia atu api mwakutuhuka yuma yipi.