Daniele

7 Ha mwaka utangu wa kuyula cha Beleshazare mwanangana wa Babilonia, Daniele yalota, muze te anapombo ha muhela wenyi, yamona usolwelo. Chocho yasoneka chilota chacho. Kasonekene yuma yeswe yize amwene mu chilota. 2 Daniele yamba ngwenyi:

“Mu usolwelo uze namwene ufuku, namwene fuji jiwana ja mwilu jinavundula kalunga-lwiji munene. 3 Mu kalunga-lwiji te munatuhuka tushitu anene-anene awana, tushitu jacho te kanalise umwe ni mukwo.

4 “Kashitu mutangu te kanalifu ni ndumba, iye kapwile ni mapulwa ngwe a pupa. Namutalile ndo muze amutukwile mapulwa jenyi, yamuzundula ni kumumanyisa ni molu aali ngwe mutu, yamwaha mbunge ya mutu.

5 “Yikusoloka kashitu mukwo wamuchaali yoze te unalifu ni ursu. Sali lienyi limwe te linazunduka, te kanakwata pachi jitatu ku kanwa lienyi. Yamwamba ngwo: ‘Katuka, liako yifwo yinji.’

6 “Muze te ngunanungu ni kutala, yikusoloka kashitu mukwo yoze te unalifu ni changwi, alioze hanyima lienyi te hali mapulwa awana ngwe a kajila. Kashitu wacho kapwile ni mitwe yiwana, yamwaha wata hanga ayule.

7 “Kulutwe, muze nanungine ni kumona usolwelo ufuku, yingumona kashitu wamuchiwana, kashitu wacho kakukolesa woma ni mwongo, iye kapwile ni mazo anene-anene a utale. Kapwile ni kulia, kufwenyonya ni kuliata-liata yize te yakusalaho. Kashitu wacho te kanalise ni tushitu akwo waze aliangile kusoloka, iye kapwile ni kumi lia mbinga. 8 Muze te ngunalihulikila ha mbinga jacho, hakachi kajo yihasoka lumbinga mukwo mukehe, mbinga jitangu jitatu yajitukula ha mutwe wenyi. Yingumona ngwo, ha lumbinga wacho hapwile meso waze te analifu ni meso ja atu, ni kanwa lize te linahanjika yuma ya kulizata.

9 “Yingununga ni kutala ndo muze asele ngunja, chocho Mukulu wa Matangwa yatwama. Mazalo jenyi kapwile atoma ngwe chiwe, kambu jenyi japwile ngwe wanda utoma. Ngunja yenyi yapwile milengi ya kahia, maroda jayo kapwile a kahia kaze kanalekwoka. 10 Kulutwe lienyi te kunakatuka lwiji wa kahia. Tununu yisuho tununu te kanamulingila, tununu kumi yisuho tununu kumi, te kanamana kumeso jenyi. Chota cha usopelo yichiputuka kusopa, yazulula mikanda.

11 “Yingununga ni kutala mumu lia maliji a kulizata waze lumbinga te anahanjika. Yingununga ni kutala ndo muze ashihile kashitu wacho, ni kumunongesa ha kumwocha ha jiko. 12 Alioze, tushitu akwo yaatambula wata, yecha hanga atwame ni mwono ha shimbu limwe ni kangonde umwe.

13 “Muze nanungine ni kumona usolwelo ufuku, yingumona umwe walifwa ni mwana wa mutu, kaneza mu malelwa a mwilu, yamutayiza ahete kuli Mukulu wa Matangwa, yamutwala kuli iye. 14 Yamwaha wata, ulemu, ni umwe wanangana, hanga atu, mavungu ni akwa-malimi eka ni eka amulingile. Wata wenyi uli wa mutolo, kuuchi keza kahwa, wanangana wenyi kechi kaunongesa.

15 “Alioze, yami Daniele yinguputuka kulifwita chinji mu mbunge yami, mumu usolwelo uze namwene wangukolesele woma. 16 Yingukundama kuli umwe wa kuli waze te anamanako, hanga ngumuhule ulumbunwiso wa yuma yacho, iye yangukumbulula ni kungulumbunwina yuma yacho ngwenyi:

17 “‘Tushitu wano anene-anene awana, kali mianangana awana waze makakatuka hashi. 18 Alioze, asandu ja mwe Chitunda makatambula wanangana, muupwa ni wo ku miaka yeswe, ewa, ku miaka yeswe.’

19 “Alioze yami te ngunazange kunyingika chinji hakutwala kuli kashitu wamuchiwana, yoze te unalise ni tushitu akwo eswe. Iye te kakola chinji woma, kapwile ni mazo a utale, ni yala ya unengu, iye te kakulia, kufwenyonya ni kuliata-liata yize te yakusalaho. 20 Yinguzanga nawa kunyingika hakutwala ku kumi lia mbinga jize japwile ku mutwe wenyi, ni hakutwala ku lumbinga mukwo yoze wasokele, mba mbinga jikwo jitatu jiholoke kulutwe lienyi, lumbinga yoze te uli ni meso, ni kanwa lize te linahanjika yuma ya kulizata, yoze wapwile munene kuhiana mbinga jikwo.

21 “Yingununga ni kutala muze lumbinga te analimiki ni asandu ni kwakumba, 22 ndo muze ejile Mukulu wa Matangwa, yasambisa asandu ja mwe Chitunda, yikuheta shimbu lize atesele hanga asandu azuke wanangana.

23 “Iye yamba ngwenyi: ‘Kashitu wamuchiwana, kanalumbunuka wanangana wamuchiwana uze muukakatuka hashi. Muukalisa ni mawanangana akwo eswe, makalia chifuchi cheswe, kuchiliata-liata ni kuchifwenyonya. 24 Kumi lia mbinga jinalumbunuka mianangana kumi waze makakatuka ku wanangana uze. Kulutwe lio mukukasoloka nawa mwanangana mukwo yoze makalisa ni mianangana atangu, iye makakumba mianangana atatu. 25 Iye makahanjika maliji a kulimika ni mwe Chitunda, ni kununga ni kumwesa lamba asandu ja mwe Chitunda. Makeseka kwalumuna mashimbu ni shimbi, makaakunjika mu moko jenyi ha shimbu limwe, mashimbu ni chipinji cha shimbu. 26 Chota cha usopelo yichiputuka kusopa, yamutambula wata wenyi hanga amushihe ni kumunongesa.

27 “‘Chocho, wanangana, wata ni unene wa mawanangana mwishi lia malilu eswe, yayihana kuli asandu ja mwe Chitunda. Wanangana wo uli wa mutolo, akwa-kuyula eswe makalingila ayo ni kwononokena.’

28 “Hano he hanasulila lusango yono. Alioze yami Daniele, manyonga jami kangukolesele woma unji, yinguhonga.* Alioze, yingufunga yuma yino yeswe mu mbunge.”