Kuli A-Roma
3 Kuyuka chika chiliho ha kupwa Ka-Yunda? Hanji ulemu uka uliho ha kupwa ngalami? 2 Chili kuyuka chahiana ha yuma yeswe. Chikuma chitangu, Zambi hanakunjika maliji jenyi asandu kuli A-Yunda. 3 Mba yika muyilingiwa? Nyi amwe a kuli ayo kapwile ni ufulielo, shina Zambi mecha kushishika mumu lia kuhona cho cha ufulielo? 4 Kwamba pundu, ka! Alioze, Zambi akapwe wamwenemwene chipwe ngwe atu eswe mapwa akwa-mahuza. Ngwe chize chinasonewa ngwo: “Hanga chikasoloke ngwo uli mukwa-ululi mu maliji je, chikwo nawa ukakumbe muze makakupatwila.” 5 Alioze, nyi kachi uhenge wetu muusolola ululi wa Zambi, kuchi mutwamba? Ngwetu Zambi yoze wakufwetesa ni utenu kanapu chihenge nyi? (Ngunahanjika maliji wano ngwe mutu.) 6 Ka, hi chocho ko! Mumu nyi chapwa chocho, kuchi Zambi makapatwila akwa-hashi?
7 Alioze, nyi kachi mahuza jami kakusolola pundu umwenemwene wa Zambi ni kufumanyisa uhenya wenyi, kuchi mba ananguhisa ngwe nguli chivulumunyi? 8 Mba mumu liaka kutushi kwamba ngwetu: “Tulingenu yuma yipi, mba yuma yipema muyiza?” Mumu atu amwe kakutulamikiza ngwo twakuhanjika yuma ngwe yino. Upatwilo wa atu jacho unalite ni ululi.
9 Mba ha shindakenyo yika twaheta? Shina yetu kutwahiana nyi? Ka! Mumu hitunasolola ngwetu chipwe A-Yunda hanji A-Ngresia, eswe kali mu chiyulo cha shili. 10 Ngwe chize chinasonewa ngwo: “Kukushi niumwe mukwa-ululi, chipwe umuwika, ka; 11 kukushi niumwe yoze uli ni malinjekela; hanji umwe yoze wakufupa Zambi wakuhi. 12 Eswe hanahambuluka mu jila ya Zambi, eswe hanapu amokomoko; niumwe wakulinga yipema wakuhi, chipwe umuwika, ka.” 13 “Miliu yo yili ngwe fuka liawashi; maliji jo hanazala ni mahuza.” “Kali ni ulembe wa kapela ku mivumbo yo.” 14 “Makanwa jo kanazala too ni mashingo ni usasu.” 15 “Molu jo kakutambuka hanga amwange manyinga.” 16 “Mashimbu eswe o kakuneha luyinda munji kuli atu ni kwakokela lamba, 17 o kanyingikine jila ya sambukila.” 18 “Keshi kuvwila Zambi woma.”
19 Tunanyingika ngwetu, yeswe yize Shimbi jakwamba, jakuhanjikila hali waze ali mushi lia Shimbi, hanga makanwa eswe akahole kuluu ni akwa-hashi eswe akahie kumeso ja Zambi. 20 Mumu Zambi keshi kupwisa mutu niumwe mukwa-ululi ha kukaula shimbi, shimbi jakunyingikisa lume ngwo, mutu hanavulumuna.
21 Haliapwila chakuhona kukaula Shimbi, hanasolola ululi wa Zambi uze Shimbi ni Aprofeta akuhana uchela. 22 Chipwe ngwe mutu mapwa wa ku munyachi weswawo, yoze uli ni ufulielo, ufulielo muli Yesu Kristu mahasa kupwa mukwa-ululi kumeso ja Zambi. Mumu Zambi keshi katonde. 23 Mumu eswe hanavulumuna, kashika keshi kuheta ku uhenya wa Zambi. 24 Zambi kakwamona ngwe akwa-ululi mumu lia ndando ya ukuule yize Yesu Kristu afwetele hanga aalamwine. Zambi kahanyine chawana* chacho mumu lia keke yenyi. 25 Zambi kahanyine Kristu ngwe chawana hanga atu apwe ni sambukila ni Zambi ha kufuliela ha manyinga a Kristu. Iye kalingile chino hanga asolole ululi wenyi, mumu Zambi te kanasolola uhomboloji ni kukonekena shili yize alingile kunyima. 26 Chikwo nawa, hanga asolole ululi wenyi haliapwila muze mapwisa mukwa-ululi mutu yoze wakufuliela muli Yesu.
27 Shina mutu katamba kulisamba? Ka. Shimbi yika yakumukwika kulisamba? Shina yili shimbi yize yakwamba ngwo yize iye akulinga yili yilemu? Ka, yili shimbi yize yakwamba ngwo katamba kupwa ni ufulielo. 28 Mumu tunashindakenya ngwetu, Zambi kakupwisa mutu mukwa-ululi ha ufulielo wenyi hi hakwononokena shimbi ko. 29 Zambi kali Zambi ya A-Yunda wika nyi? Hi Zambi ya atu akwa-mavungu ko nawa nyi? Ewa, iye kali nawa Zambi ya atu akwa-mavungu. 30 Amu Zambi ali umuwika, iye makapwisa ngalami akwa-ululi kupalikila mu ufulielo wo, makapwisa nawa yilima akwa-ululi mumu lia ufulielo wo. 31 Shina chino chinalumbunuka ngwo, twashiha shimbi mumu lia ufulielo wetu? Ka, hi chocho ko! Alioze, twakolesa shimbi.