Kuli A-Roma
5 Kashika, amu hatupwisa akwa-ululi mumu lia ufulielo wetu, tuwahililenu ni sambukila yize tuli nayo ni Zambi kupalikila muli Mwene wetu Yesu Kristu, 2 yoze mumu lia ufulielo wetu muli iye, wazulwile jila hanga tutambule chawana cha keke, chawana chize tunatambula haliapwila. Kashika, tuwahililenu mumu lia kutalatala chetu cha kutambula uhenya wa Zambi. 3 Hi chino wika ko, alioze tuwahililenu* nawa ha kumona lamba, mumu tunanyingika ngwetu lamba liakuneha kunyongonona; 4 kunyongonona chakuneha utayizo wa Zambi; utayizo wa Zambi wakuneha kutalatala, 5 chikwo nawa, kutalatala kuchishi kukolesa sonyi; mumu zango lia Zambi alizukwile mu mambunge jetu kupalikila mu spiritu yisandu, yize atuhele.
6 Kwamba pundu, ha shimbu lialita lia Zambi, Kristu yafwila akwa-shili. Iye kalingile chino muze te kutushi tachi. 7 Chikalu umwe kufwila mukwa-ululi; chipwe ngwe hali mutu mupema hanji umwe mahamuka kumufwila. 8 Alioze Zambi hanatusolwela zango lienyi linji mumu Kristu watufwilile muze te tuchili akwa-shili. 9 Nyi hanatupwisa akwa-ululi kupalikila mu manyinga jenyi, mutuhasa kupwa ni shindakenyo ngwetu, kumakatulamwina ku utenu wa Zambi kupalikila muli iye. 10 Mumu nyi muze twapwile akwa-kole atuwanyishine ni Zambi kupalikila mu kufwa cha Mwanenyi, mutuhasa kupwa ni shindakenyo ngwetu, kumakatulamwina kupalikila mu mwono wenyi, se hitunalivwashana ni Zambi. 11 Hi chino wika ko, alioze twakuwahilila nawa muli Zambi kupalikila muli Mwene wetu Yesu Kristu yoze muli iye twahashile kulivwashana ni Zambi.
12 Kashika, chizechene ngwe kuli mutu umuwika shili yanjilile hano hashi ni ku shili kufwa chanjilile, chocho kufwa chahetele kuli atu eswe, mumu eswe te hanavulumuna . . . 13 Mumu muze te kanda kuchipwa Shimbi, shili yapwile hano hashi, alioze nyi kukushi shimbi, niumwe keshi kumusopesa ha shili yenyi. 14 Chipwe chocho, kufwa chayulile chize kuli Alama ndo kuli Mose, chayulile nawa chipwe kuli waze kalingile shili ngwe yize Alama alingile, mwenawo chizulie cha yoze te meza.
15 Alioze chawana cha Zambi kuchishi ngwe shili ya Alama, mumu atu anji kakufwa mumu lia shili ya mutu umuwika. Alioze chawana cha keke ya Zambi kupalikila muli mutu umuwika Yesu Kristu chapwa chinene. Kupalikila mu chawana chacho, Zambi kakuyukisa atu anji! 16 Chawana cha Zambi ni shili ya mutu umuwika chinalise nawa mu jila yino, upatwilo uze wejile mumu lia shili ya mutu umuwika, wapwile uhiso. Alioze chawana cha Zambi chize chejile mumu lia shili yinji, chapwile kupwisa atu akwa-ululi. 17 Nyi kufwa chayulile mumu lia shili ya mutu umuwika, mutuhasa kupwa ni shindakenyo ngwetu, waze akutambula chawana cha keke ni chawana cha ululi, makatwama ni mwono hanga akayule ngwe mianangana kupalikila muli mutu umuwika, Yesu Kristu!
18 Kashika, ngwe chize Zambi hanahisa atu eswe ha mulonga wa mutu umuwika, chizechene nawa ku chitanga cha ululi cha mutu umuwika atu eswe hanapwisa akwa-ululi hanga akatambule mwono. 19 Mumu chizechene ngwe ku uhulia wa mutu umuwika anji apwile yivulumunyi, chizechene nawa ku kwononoka cha mutu umuwika anji kumakapwa akwa-ululi. 20 Shimbi kayihanyine hanga yisolole zwalala chize atu apwile akwa-shili. Alioze kuze shili yokele ni chawana cha keke chokele chinji kuhiana. 21 Chizechene ngwe shili yayulile ni kuneha kufwa, ni chawana cha keke ya Zambi necho chinayulu haliapwila kupalikila mu ululi. Chino muchikaneha mwono wa mutolo kupalikila muli Yesu Kristu Mwene wetu.