Yoshua

19 Chela chamuchiali yichiholokela hali Simeone, kulita ni usoko wo. Chihinga cho chapwile mukachi ka chihinga cha A-Yunda. 2 Chihinga cho chapwile chino: Mbia-Shipa ni Shipa, Molada, 3 Haza-Shuale, Mbala, Ezeme, 4 Ele-Tolade, Mbetule, Horoma, 5 Zikalage, Mbete-Markabo, Haza-Suza, 6 Mbete-Lebaote ni Sharuhene. Mambonge 13 ni yihunda yamo. 7 Ayine, Rimone, Etere ni Ashane, mambonge awana ni yihunda yamo, 8 ni yihunda yeswe yize te yajingilika mambonge jacho ndo ku Mbalata-Mbia, Ramate wa ku uto. Chino chapwile chihinga cha munyachi wa Simeone, kulita ni usoko wo. 9 Chihinga cha munyachi wa Simeone kachichijile ku chihanda cha A-Yunda, mumu chihanda cha A-Yunda chapwile chinene chinji kuli ayo. Kashika, munyachi wa Simeone watambwile chimwe chihanda mukachi ka chihinga cha A-Yunda.

10 Chela chamuchitatu yichiholokela ha munyachi wa A-Zapulone, kulita ni usoko wo, njiza ya chihinga cho yahetele ndo ku Saride. 11 Njiza yacho yiyiya ku chitokelo, yiyiheta ndo ku Mareale, yiyipalika ku Ndabeshe mba yiyiheta ndo ku chikulo chize chapwile kulutwe lia Njokename. 12 Njiza ya Saride, yiyiya ku chivumbuko, yiyipalika ndo mu njiza ya Chiselote-Tabore, yiyipalika ku Ndaberata mba yiyikanduka ndo ku Yafia. 13 Kuzekwene, yiyinunga ku chivumbuko ndo ku Ngate-Hefere ni Ete-Kazini, yiyiya ndo ku Rimone, yiyilitanda ndo ku Nia. 14 Njiza yiyikondoloka ku sango, yiyiya ndo ku Hanatone, yiyisulila ku chikulo cha Ifitahele, 15 ni ku Katate, Nahalale, Shimerone, Idala ni Mbeteleme. Mambonge wano eswe kapwile 12 ni yihunda yamo. 16 Chino chapwile chihinga cha munyachi wa Zapulone kulita ni usoko wo. Wano e apwile mambonge ni yihunda yamo.

17 Chela chamuchiwana yichiholokela hali Yisaka, kulita ni usoko wo. 18 Njiza yo yayile ndo ku Yezerele, Chesulote, Shuneme, 19 Hafaraime, Shione, Ana-Harate, 20 Rabite, Kishione, Ebeze, 21 Remete, Ene-Nganime, Ene-Hada ni Mbete-Pazeze. 22 Njiza yo yahetele ndo ku Tabore, Shahazume ni Mbete-Shemeshe, yiyisulila ku Yordau. Mambonge kapwile 16 ni yihunda yamo. 23 Chino che chapwile chihinga cha munyachi wa Yisaka kulita ni usoko wo, mambonge ni yihunda yamo.

24 Chela chamuchitano yichiholokela ha munyachi wa Ashe, kulita ni usoko wo. 25 Njiza yenyi yapwile Helekata, Hali, Mbetene, Akasafa, 26 Alameleke, Amanda ni Mishala. Ku chitokelo, yahetele ku Karmela ni ku Shihore-Libnate. 27 Yiyitalikisa ku chivumbuko ndo ku Mbete-Ndagone, yiyiheta ku Zapulone, ku sango, chize ku chikulo cha Ifitahele, yiyiheta ku Mbete-Emeke ni ku Niele. Yiyilitanda ndo ku Kabule, sali lia umama, 28 yiyiya ndo ku Heprone, Rehobo, Hamone ni Kana, yiyinunga ndo ku Sendone Yinene. 29 Njiza yiyitalikisa ku Rama, yiyiya ndo ku mbonge ya kukolesa ya Teru. Njiza yiyitalikisa nawa ndo ku Hosa, yiyisulila ku kalunga-lwiji ku chifuchi cha Akaziba, 30 Uma, Afeke ni Rehobo. Mambonge wano eswe kapwile 22 ni yihunda yamo. 31 Chino che chapwile chihinga cha munyachi wa Ashe, kulita ni usoko wo. Wano e apwile mambonge ni yihunda yamo.

32 Chela chamuchisambano yichiholokela ha munyachi wa Napatali, kulita ni usoko wo. 33 Njiza ya chifuchi cho yiyiputukila ku Helepe, ku mutondo unene ku Zananime, yiyipalikila ku Adamenikebe ni ku Njabanele, yiyiya ndo ku Lakumi, yiyisulila ku Yordau. 34 Njiza yiyitalikisa ku chitokelo ndo ku Azanote-Tabore, yiyilitanda ku Hukoke, yiyiheta ku chifuchi cha Zapulone, ku uto, ku chifuchi cha Ashe, ku chitokelo, ku chifuchi cha Yunda ni ku Yordau, ku chivumbuko. 35 Mambonge a kukolesa kapwile Zidime, Zere, Hamate, Rakata, Chinerote, 36 Adama, Rama Hazore, 37 Kendeshe, Endreya, Ene-Hazore, 38 Yirone, Migidalele, Horeme, Mbete-Anate ni Mbete-Shemeshe. Mambonge wano eswe kapwile 19 ni yihunda yamo. 39 Chino che chapwile chihinga cha munyachi wa Napatali, kulita ni usoko wo, mambonge ni yihunda yamo.

40 Chela chamuchishimbiali yichiholokela ha munyachi wa Ndane, kulita ni usoko wo. 41 Njiza ya chihinga cho yapwile Zora, Esheteole, Ire-Shemeshe, 42 Shalabini, Ajalone, Itela, 43 Elone, Timna, Ekrone, 44 Eleteke, Ngibetone, Mbalata, 45 Yehude, Mbene-Baraka, Ngate-Rimone, 46 Mejakone, Rakone ni njiza yalisulangana ni Yopa. 47 Alioze, chifuchi cha Ndane chapwile chikehe chinji kuli ayo. Kashika, yaya ni kwasa jita ni A-Lesheme, yaakumba ni kwashiha ni katana. Mba yatambula chifuchi ni kutwamamo, yaluka Lesheme jina lia Ndane, kulita ni jina lia kalamba ko Ndane. 48 Chino che chapwile chihinga cha munyachi wa Ndane, kulita ni usoko wo. Wano e apwile mambonge ni yihunda yamo.

49 Chocho, yahwisa kulitetela chifuchi ngwe chihinga, kulita ni njiza. Kusulaho, A-Izalele yahana kuli Yoshua, mwana wa Nune, chihinga mukachi ko. 50 Kulita ni shimbi ja Yehova, yamwaha mbonge yize etele, Timna-Sera, ku chifuchi cha ku mulundu wa Eframe. Iye yatungulula mbonge ni kutwamamo.

51 Chino che chapwile chihinga chize sasendote Eleazare, Yoshua mwana wa Nune ni miata akwo a mu Izalele, ahanyine kulita ni chela chize atele mu Shilo kumeso ja Yehova, ku chikolo cha mbalaka ya kulikungulwila. Chocho, yahwisa kuteta chifuchi.