Asonekene Marku

15 Ha chimenemene, asasendote a lutwe, ni makulwana, ni alongeshi a shimbi, ewa, Akwa-Kuyula eswe yatwama punga hanga amone yize malinga. Mba yakasa Yesu, yamutwala ni kumukunjika kuli Pilatu. 2 Pilatu yamuhula ngwenyi: “Yena uli Mwanangana wa A-Yunda nyi?” Yesu yamukumbulula ngwenyi: “Yena mwene unachambe.” 3 Alioze, asasendote a lutwe amulamikijine yuma yinji. 4 Pilatu yamuhula nawa ngwenyi: “Kushi kukumbulula nichimwe nyi? Achivwa yuma yipwahaha anakulamikiza.” 5 Alioze, Yesu kamukumbulwile nichimwe, chocho Pilatu wakomokene.

6 Ha mashimbu a chiwanyino, Pilatu kapwile ni chako cha kutusula funge umuwika yoze mbunga te akumwita. 7 Ha shimbu liacho, umwe lunga avuluka ngwo, Mbarapa kapwile mu zuwo lia ususu hamwe ni yingalwe akwo, waze ha uhulia wo ashihile atu. 8 Chocho, mbunga yaya maha Pilatu, yaputuka kumwita hanga aalingile ni kulita ni ndako yenyi. 9 Mba Pilatu yaahula ngwenyi: “Shina nunazange hanga ngutusule Mwanangana wa A-Yunda?” 10 Mumu Pilatu te kananyingika ngwenyi, asasendote a lutwe kakunjikile Yesu kuli iye mumu lia chipululu. 11 Alioze, asasendote a lutwe yasupwila mbunga hanga atusule Mbarapa. 12 Cheka nawa, Pilatu yaahula ngwenyi: “Mba yika natamba kulinga ni mutu yoze yenu nwakuvuluka ngwenu, Mwanangana wa A-Yunda?” 13 O akololokele chikolo ngwo: “Muhatenu ha mutondo* wa lamba!” 14 Pilatu yamba kuli ayo ngwenyi: “Mumu liaka? Upi uka alinga?” Cheka nawa, o yakololoka chikolo ngwo: “Muhatenu ha mutondo* wa lamba!” 15 Pilatu yazanga kuvwisa mbunga kuwaha, kashika yatusula Mbarapa. Mba muze hatuma kulamba Yesu ni shikote, yamuhana hanga amushihile ha mutondo wa lamba.

16 Maswalale yamutwala ha yiize lia zuwo lia nguvulu Pilatu, mba yasanyika chizavu cheswe cha maswalale. 17 O yamujika hina lichiuluka, yayinda chipangula cha mbimbo yamujikacho ku mutwe; 18 yaputuka kumwamba ngwo: “Tunakumeneka, Mwanangana wa A-Yunda!” 19 Yamulamba lumbungu ku mutwe, yamufwila mate ni kufulamana kuli iye ngwe kanamuwayila. 20 Muze te hahwisa kumukekuna, yamuzula hina lichila, yamujika mazalo jenyi. Mba yamutwala haze hanga amuhate ha mutondo wa lamba. 21 Mu jila, Yaalitakana ni umwe lunga wa ku Serene, jina lienyi Semone, tato ya Alexandre ni Rufu te kanakatuka ku munda. Yamushinjila hanga ambate mutondo* wa lamba.

22 Chocho, yatwala Yesu ku chihela chize avuluka ngwo, Ngolongota, liji lize linalumbunuka ngwo, “Chihela cha Kola.” 23 Yamwaha vinyu yakuchinga ni mira, alioze kayinwine. 24 Mba yamuhata ha mutondo wa lamba, yalitetela mazalo jenyi hakachi ko ni kuta chela hanga anyingike chize mutu ni mutu matambula. 25 Yesu kamuhachilile ha mutondo wa lamba ha ola yamuchitatu.* 26 Chisoneko cha chitela chenyi chasonewene helu ngwo: “Mwanangana wa A-Yunda.” 27 Chikwo nawa, yaahata eji aali ha mitondo ya lamba hamuwika ni Yesu, umuwika sali lienyi lia utata, mukwo sali lienyi lia umama. 28* —— 29 Atu waze apwile ni kupalika yaputuka kuhunga mitwe, ni kumuchoka ngwo: “Woloo! Yena wazangile kupuzula tembele ni kuyitunga nawa ha matangwa atatu, 30 lilamwine yena mwene, sunuka ha mutondo* wa lamba.” 31 Chizechene nawa, asasendote a lutwe hamwe ni alongeshi a shimbi yakekuna Yesu ni kuliamba mukachi ko ngwo: “Walamwinyine akwo; alioze mwene kahashile kulilamwina! 32 Kristu mwe Mwanangana wa A-Izalele, asunuke haliapwila ha mutondo* wa lamba. Nyi twachimona, mutumufuliela.” Chipwe waze aahachilile ha mitondo* ya lamba sali lienyi no amuchokele.

33 Muze ola yamuchisambano* te hiyaheta, mu chifuchi cheswe yimupwa milima pwi, ndo ha ola yamuchilivwa.* 34 Mba ha ola yamuchilivwa, Yesu yakololoka chikolo ni liji mwilu ngwenyi: “Eli, Eli, lama sambatani?” chinalumbunuka ngwo: “Zambi yami, Zambi yami, mumu liaka wangwehuka?” 35 Atu amwe waze apwile hakamwihi, ha kuchivwa yamba ngwo: “Ivwenu! Iye kanasanyika Eliya.” 36 Mba umwe yazomboka, yanda shiponja yayichupika mu vinyu yapangaminya, yayipachika ku songo lia mutondo yamwaha hanga anwe, ni kwamba ngwenyi: “Mwechenu! Tutale nyi Eliya meza ni kumusunwisa.” 37 Alioze, Yesu yakololoka ni liji linene, mba yafwa.* 38 Hohene, hina lia muma musandu, yilipulika hakachi yihanda yiali, chize kwilu ndo kwishi. 39 Kapitau wa maswalale yoze wapwile hakamwihi nenyi ni kumona chize Yesu afwile, yamba ngwenyi: “Chamwenemwene, kumana yono te Mwana wa Zambi.”

40 Kwapwile nawa mapwo waze te anamanyina kusuku ni kutala. Hakachi ko hapwile Maria Ka-Mandala, ni Maria naye ya Tiangu Mukepe, ni ya Yosefwe, ni Salome. 41 Mapwo wano, kapwile ni kukaula Yesu ni kumukwasa muze apwile mu Ngalileya. Kwapwile nawa mapwo akwo waze akandukile hamwe nenyi ku Yerusaleme.

42 Amu te kunayi ni kutoka, se liapwile tangwa lia Kululieka yuma, mumu tangwa lia Sambata te linakundama, 43 mba yikuheta Yosefwe wa ku Arimatea, chilolo wa mu Chota Chinene cha A-Yunda, yoze nawa wapwile ni kushimbwila Wanangana wa Zambi. Iye yahamuka yaya kuli Pilatu ni kumwita mujimba wa Yesu. 44 Alioze, Pilatu yazanga kupwa ni shindakenyo nyi iye te hafwa. Chocho yasanyika kapitau wa tujita yamuhula nyi Yesu hafwa kulu. 45 Mba muze te hapwa ni shindakenyo kupalikila muli kapitau wa tujita, yatayiza kuhana mujimba wa Yesu kuli Yosefwe. 46 Yosefwe walanjile hina lia linyu, mba muze te hachiza mujimba ha mutondo, yauvunga ha hina lipema lia linyu, yausa mu fuka lia kutota ku liwe. Kulutwe, iye yalangumwina liwe ku chikolo cha fuka. 47 Alioze, Maria Ka-Mandala ni Maria naye ya Yosefwe, yanunga ni kutala kuze amusele.