Yihula ya Waze Akutanga Mikanda Yetu

Mumu liaka Yesu atongwele maliji a Ndawichi ali ha Samu 22:1, muze te kwasala hakehe hanga afwe?

AAmwe a ku maliji akasula waze Yesu ambile shimbu kanda achifwa, kali ha Mateu 27:46 ngwo: “Zambi yami, Zambi yami, kuchi te hiwangwehuka?” Ha kwamba chino, Yesu yamanununa maliji a Ndawichi waze ali ha Samu 22:1. (Marku 15:34) Muchipwa chipi kwamba ngwo, Yesu kambile maliji wano mumu ngwo kamuvwishile kupiha hanji ngwo kahonene ufulielo ha amwe mashimbu. Yesu kanyingikine kanawa chikuma cha mumu liaka te atamba kufwa, nawa kazangile kuchilinga. (Mateu 16:21; 20:28) Iye nawa kanyingikine ngwenyi ha mashimbu a kufwa chenyi, Yehova te machiza “chipanga cha kumufunga” sali lienyi. (Yombi 1:10) Hachino, Yesu te masolola ushishiko wenyi kuli Yehova, chipwe ngwe mapalika mu yipikalo yeswayo.—Marku 14:35, 36.

Mba mumu liaka Yesu ambile maliji ali ha Samu? Chipwe ngwe kutushi kunyingika yuma yeswe, alioze tutalenu yimwe yize muyitukwasa.a

Ha kuhanjika maliji wano, kota Yesu te kanashindakenya ngwenyi Yehova kechi kukinda kufwa chenyi. Yesu kafupiwile kufweta ukuule chakuhona ukwaso wa Yehova. Iye te mutu ngwe yetu, kashika katambile kufwa hanga “akamone kufwa hali atu eswe.”—Hepre. 2:9.

Ha kutongola amwe maliji a samu yino, Yesu te kanashindakenya hanga atu akwo ewuluke samu yeswe. Ha matangwa a Yesu, A-Yunda te kakupachika masamu mu mitwe. Nyi mevwa amwe maliji a samu, acho ayo mewuluka samu yeswe. Nyi Yesu che anyongene, kota kazangile hanga tumbaji twenyi A-Yunda ewuluke ngwo, samu yacho yili ni uprofeto unji uze unatale ha kufwa chenyi. (Samu 22:7, 8, 15, 16, 18, 24) Chikwo nawa, samu yino kusongo, yinahalisa Yehova ni kulumbununa chize iye ali mwanangana wa hashi.—Samu 22:27-31.

Ha kutongola maliji wano a Ndawichi, kota Yesu kazangile kusolola ngwenyi keshi mulonga. Muze te kanda achifwa, Yesu kamusopesele mu mutapu uze kuwalitele ni kumwamba ngwo, kashililika Zambi. (Mateu 26:65, 66) Usopeso wacho wapwile kawashi-washi ha ufuku, nawa te kuushi kulita ni shimbi ja ha mashimbu jacho. (Mateu 26:59; Marku 14:56-59) Muze Yesu ambile ngwenyi: “Zambi yami, Zambi yami, kuchi te hiwangwehuka?”, iye kota kazangile kusolola ngwenyi, kalingile nichimwe chize te atela kumushihila.

Yesu kota kazangile kwiwulula akwo ngwo, lamba lize Ndawichi amwene kuliakalumbunukine ngwo, iye te keshi ni utayizo wa Yehova. Chihula cha Ndawichi kuchakasolwele ngwo te keshi ni ufulielo. Kashika hanyima lia kuhula, iye yasolola ngwenyi te kakufuliela ha ndundo ja ulamwino wa Yehova, nawa Yehova yanunga ni kumuwahisa. (Samu 22:23, 24, 27) Chizechene nawa, chipwe ngwe Yesu, “Mwana wa Ndawichi” kamwene lamba ha mutondo wa lamba, chino kuchakalumbunukine ngwo, iye te keshi ni utayizo wa Yehova.—Mateu 21:9.

Yesu kota kasolwele yikola yize te anevu a mu Yehova achijile ukwaso Wenyi ha mashimbu jacho hanga asolole ungunu wenyi. Ku uputukilo, Yehova kakazangile hanga Mwanenyi amone lamba ni kufwa. Chino chafupiwile wika hanyima lia uhulia utangu mu munda wa Endene. Yesu kakalingile uhenge, alioze te katamba kumona lamba ni kufwa hanga akumbulule yihula ya Satana, ni kuhana mwono wenyi ngwe ukuule hanga afunyise yize atu atokesele. (Marku 8:31; 1 Petu. 2:21-24) Chino te muchihasa kulingiwa ha mashimbu jacho nyi Yehova te mecha ha chisuho chitangu kufunga Yesu ku mwono wenyi.

Yesu kota kazangile hanga tumbaji anyonge ha chize Yehova echele hanga iye afwe mu mutapu wacho.b Yesu kanyingikine ngwenyi, kufwa chenyi ha mutondo wa lamba ngwe chingulungulu te muchitalingisa atu anji. (1 Kori. 1:23) Alioze nyi tumbaji twenyi te malihulikila ha chikuma chize afwilile, ayo te manyingika ulumbunwiso wamwenemwene wa kufwa chenyi. (Ngala. 3:13, 14) Hachino, ayo te mamumona ngwe Chilamwina hi ngwe chingulungulu ko.

Chipwe ngwe kuli yize yatwalile Yesu kutongola maliji wano, nihindu iye kanyingikine ngwenyi, katambile kufwa ha mutondo wa lamba hanga upale wa Yehova umanunuke. Ha mashimbu akehe muze te hatongola maliji wano a samu, Yesu yamba ngwenyi: “Chinamanunuka.” (Yoa. 19:30; Luka 22:37) Chochene, muze Yehova ha amwe mashimbu achijile ufunge wenyi hali Yesu, chino chatwalile Yesu kumanununa yeswe yize anakamutuma kulinga hano hashi. Chikwo nawa, chino chakwashile kumanununa yuma yeswe yize asonekene hakutwala kuli iye “mu Shimbi ya Mose ni mu Mikanda ya Aprofeta ni ya Masamu.”—Luka 24:44.