Asonekene Yoano
11 Umwe mutu te avuluka ngwo Lazaru te kanayiji, iye wa ku Mbetaniya, chihunda cha Maria ni yayo Marta. 2 Maria yono mwe wazujile maji a vumba lipema hali Mwene ni kukusumuna molu jenyi ni kambu. Ndumbwenyi Lazaru mwe te unayiji. 3 Kashika, mandumbu jenyi yatuma hanga alweze Yesu ngwo: “Mwene mutu yoze wakuzanga kanayiji.” 4 Alioze, muze Yesu hachivwa, yamba ngwenyi: “Kuyiza chino, kuchichikutwala ku kufwa, alioze ku uhenya wa Zambi, hanga Mwana wa Zambi, amuhalise mumu lia chino.”
5 Yesu te kakuzanga Marta ni mwana-kwo wa pwo, ni Lazaru. 6 Alioze, muze Yesu evwile ngwo Lazaru kanayiza, yanunga matangwa aali kuze apwile. 7 Mba yalweza tumbaji twenyi ngwenyi: “Tuyenu cheka ku Yundeya.” 8 Tumbaji twenyi yamulweza ngwo: “Longeshi, ha matangwa wano ene, kamba kukwasa mawe kuli Akwa-Yundeya, kwenako unazange kufuna nawa?” 9 Yesu yakumbulula ngwenyi: “Ngwami maola a mwalwa kali 12 nyi? Nyi mutu menda mu mwalwa, kechi kuhukana mumu kanamono pangu lia hashi. 10 Alioze nyi menda ufuku, mahukana, mumu keshi mu pangu.”
11 Muze hamba chino, yaweza nawa ngwenyi: “Sepa lietu Lazaru haya tulo, alioze munguyako hanga ngumulawise.” 12 Kashika, tumbaji yamba kuli iye ngwo: “Mwene, nyi mu tulo ali kumahinduka.” 13 Kumana Yesu te kanahanjika hakutwala ku kufwa cha Lazaru. Alioze ayo yanyonga ngwe iye kanahanjika hakutwala ku kupomba tulo. 14 Mba Yesu yaalweza zwalala ngwenyi: “Lazaru hafwa, 15 ngunawahilila hamukunda wa yenu, mumu chapwileko, hanga nufuliele. Alioze tuyenu ndo kuze ali.” 16 Kashika, Tomase yoze avuluka nawa ngwo, Pasa, yamba kuli tumbaji ni akwo ngwenyi: “Ni yetu tuyenu ko, hanga tufwe hamwe nenyi.”
17 Muze Yesu haheta, yanyingika ngwo Lazaru te halinga matangwa awana mu fuka. 18 Mbetaniya yapwile hakamwihi ni Yerusaleme, ha usuhwe wa kilometru* jitatu. 19 A-Yunda anji kayile ni kulembejeka Marta ni Maria mumu lia kufwa cha ndumbwo. 20 Muze Marta evwile ngwo Yesu kaneza, yaya ni kumupatwiza; alioze Maria yasala ku zuwo. 21 Mba Marta yamba kuli Yesu ngwenyi: “Mwene, nyi te wapwanga kama kuno, kachi ndumbwami kafwile. 22 Alioze, ngunanyingika ngwami, chipwe haliapwila cheswacho muwita kuli Zambi, makwahacho.” 23 Yesu yamulweza ngwenyi: “Ndumbwe kumahinduka.” 24 Marta yakumbulula ngwenyi: “Ngunanyingika ngwami iye makahinduka ha uhindukilo wa tangwa lia kasula.” 25 Yesu yamulweza ngwenyi: “Yami nguli uhindukilo ni mwono. Mweswawo mangufuliela, chipwe ngwe mafwa, nihindu makapwa cheka ni mwono; 26 mweswawo uli ni mwono ni kufuliela muli yami, kechi keza kafwa nilimwe tangwa. Yena unafuliela ha chino?” 27 Marta yamukumbulula ngwenyi: “Ewa, Mwene, ngunafuliela ngwami, yena mwe Kristu Mwana wa Zambi, yoze te meza hano hashi.” 28 Muze Marta hamba chino, yaya ni kusanyika mwanakwo Maria, yamulweza kutenga ngwenyi: “Longeshi kuno ali, kanakusanyika.” 29 Muze Maria hevwa chino, yakatuka kawashi yaya kuli Yesu.
30 Yesu te kanda achinjila mu chihunda, alioze te uchili kuzekwene Marta amuwanyine. 31 Muze A-Yunda waze apwile ku zuwo lia Maria ni kumulembejeka hamona ngwo, kakatuka kawashi ni kutuhuka, yamukaula, yanyonga ngwo kanayi ku fuka ni kulililako. 32 Muze Maria ahetele kuze Yesu te ali, yamumona, yafulamana ku molu jenyi, yamba kuli iye ngwenyi: “Mwene, nyi te wapwanga kama kuno, kachi ndumbwami kafwile.” 33 Muze Yesu amwene Maria ni A-Yunda waze amukawile kanalila, yevwa chinyengo ni yikola ku mbunge. 34 Iye yahula ngwenyi: “Kulihi nwamusanga?” Yamulweza ngwo: “Mwene, tweyenu kuno nutale.” 35 Yesu yaputuka kulila. 36 Hachino, A-Yunda yamba ngwo: “Talenu chize te akumuzanga!” 37 Alioze, amwe hakachi ko yamba ngwo: “Lunga yono walawisanga meso ja kapuputa te kechi kuhasa kama kukwika kufwa cha Lazaru?”
38 Mba muze Yesu hashikwoka cheka, yaya ku fuka. Kwamba pundu, fuka liacho liapwile chivwenge, ku chikolo kafukileko liwe. 39 Yesu yamba ngwenyi: “Chizenuko liwe.” Marta, ndumbu ya mufu, yamulweza ngwenyi: “Mwene, kota haputuka kunuka, mumu hikwapalika matangwa awana.” 40 Yesu yamukumbulula ngwenyi: “Chakulwezele ngwami nyi wafuliela mumona uhenya wa Zambi?” 41 Kashika yachiza liwe. Mba Yesu yatala mwilu, yamba ngwenyi: “Tata, ngunakusakwilila mumu wakungwivwa. 42 Kwamba pundu, ngunanyingika ngwami wakungwivwa mashimbu eswe, alioze nachamba mumu lia mbunga yino yinangujingilika hanga afuliele ngwo yena mwe wangutumine.” 43 Muze hamba yuma yino, yakololoka ni liji mwilu ngwenyi: “Lazaru tuhukamo!” 44 Mutu yoze te hanafu yatuhuka, wa kukasa mahina ku molu ni ku moko, ku meso jenyi kwakujinga ni hina. Yesu yamba kuli ayo ngwenyi: “Mukasululenu, numweche aye.”
45 A-Yunda anji waze ayile ni kumeneka Maria, yamona yize Yesu alingile, yafuliela muli iye, 46 alioze, amwe a kuli ayo yaya ni kulweza A-Fwariseu yize Yesu alingile. 47 Chocho, asasendote a lutwe ni A-Fwariseu yalikungulwila mu Chota cha usopelo ni kwamba ngwo: “Lunga yono kanalinga yilayi yinji, yika mutulinga? 48 Nyi mutumwecha chizechene, atu eswe mamufuliela, A-Roma meza matutambula chifuchi ni vungu lietu.” 49 Alioze, umwe wa kuli ayo avuluka ngwo, Kayafwa yoze wapwile mwata wa sasendote ha mwaka wacho, yaamba ngwenyi: “Yenu kunwanyingikine nichimwe, 50 kunwanyongene kama ngwenu, chili chipema mutu umuwika kufwila atu, shimbu vungu lieswe alinongese.” 51 Iye kakambile maliji wano ku nyonga lienyi mwene, alioze amu apwile mwata wa asasendote a lutwe ha mwaka wacho, kaprofetezele ngwenyi, Yesu te mafwila vungu lieswe, 52 hi mumu lia vungu lio wika ko, alioze hanga akungulule mu chizavu chimuwika ana ja Zambi eswe waze hanamwangana. 53 Kashika, kukatuka ha tangwa liacho, yamutwama punga hanga amushihe.
54 Kashika, Yesu yalitwamina kwenda ha mbunga hakachi ka A-Yunda, alioze yakatukako yaya ku yimwe mbonge hakamwihi ni puya, yize te akuvuluka ngwo, Eframe, yatwamamo hamwe ni tumbaji twenyi. 55 Chizomboka cha A-Yunda te chinakundama, mba atu anji a mu yihunda yakanduka ku Yerusaleme shimbu Chizomboka te kanda chichiputuka hanga alipemese kulita ni shimbi. 56 Ayo te kanafupu Yesu, kapwile ni kulilweza umwe ni mukwo muze te ali mu tembele ngwo: “Kuchi nunanyongo? Shina kechi kwiza ha chiwanyino nyi?” 57 Alioze asasendote a lutwe ni A-Fwariseu kahanyine shimbi ngwo, nyi mutu manyingika kuze Yesu ali, aalweze hanga amukwate.