Kuli A-Roma
2 Kashika yena lunga, chipwe ngwe uli mutu mweswawo, nyi wakupatwila akwenu kuchi kasamba. Mumu ha kupatwila akwenu, wakulipatwila yena mwene, se yena wakupatwila akwenu, wakulinga yuma yizeyene. 2 Tunanyingika ngwetu, upatwilo wa Zambi kuunalite ni umwenemwene, chikwo nawa wakulimika ni waze akulinga yuma yacho.
3 Alioze, yena wakupatwila akwenu ku yuma yize yena mwene wakulinga. Shina wakunyonga ngwe kumukalilamwina ku upatwilo wa Zambi, nyi? 4 Shina unalelesa kulumbama cha utu Wenyi, ni uhumikizo, ni uhomboloji, kuwanyingikine ngwe utu wa Zambi unakukoko ulikonyeke nyi? 5 Alioze, mbunge yikalu* ukwete, kusolo kwalumuka. Kashika, wakulitulikila lamba liahiana ha tangwa lize Zambi makasolola utenu wenyi wa ululi. 6 Iye makahana kuli eswe ni kulita ni yitanga yo: 7 Atu waze akunyongonona ni kulinga yipema ha kufupa uhenya, ulemu ni mujimba uze kuushi kupola, makatambula mwono wa mutolo. 8 Mba kuli akwa-pami ni waze keshi kwononokena ku umwenemwene, alioze akwononokena ku uhenge kumukukapwa utenu ni ufwatulo. 9 Kumukukapwa luyinda ni lamba kuli atu eswe waze akulinga yuma yipi, chitangu kuli A-Yunda, mba kuli A-Ngresia; 10 alioze mukukapwa uhenya, ulemu ni sambukila kuli eswe waze akulinga yipema, chitangu kuli A-Yunda, mba kuli A-Ngresia. 11 Mumu Zambi keshi katonde.
12 Eswe waze hanavulumuna chakuhona shimbi, no kumakafwa keshi shimbi; alioze waze eswe hanavulumuna mushi lia shimbi, kumakapatwila kulita ni shimbi. 13 Mumu Zambi keshi kupwisa atu akwa-ululi ha kwivwa shimbi wika, alioze ha kulinga chize shimbi jinambe. 14 Mumu muze akwa-mavungu aze keshi shimbi, malinga ni mbunge jo yuma kulita ni shimbi, atu wano chipwe ngwe keshi shimbi, kanapu shimbi kuli ayo ene. 15 Yitanga yo yakusolola ngwo shimbi yiyinasonewa mu mambunge jo. Chikwo nawa, shimbi ya mbunge jo ni ayoene yakusolola nyi yitanga yo yili yipema hanji yipi. Kashika manyonga jo maahasa kwahisa hanji kwasambisa. 16 Chino muchikalingiwa ha tangwa lize Zambi makapatwila yuma yahengama ya atu, kupalikila muli Kristu Yesu kulita ni sango jipema jize nakwambujola.
17 Alioze, nyi kakukuvuluka ngwo Ka-Yunda, wakufuliela ha shimbi ni kulisamba muli Zambi, 18 nyi unanyingika upale wenyi ni kusa shindakenyo ha yuma yahiana ulemu mumu unanyingika Shimbi, 19 nyi uli ni shindakenyo ngwe uli mukwa-kusongwela tupuputa ni pangu kuli waze ali mu milima, 20 uli mukwa-kufumba yihepuke, longeshi ya twanuke, chikwo nawa uli ni chinyingi ni umwenemwene wa mu Shimbi, 21 kashika, yena wakulongesa akwenu, kuchi mba kushi kulilongesa yena mwene? Yena wakwambujola ngwe: “Kanda wiya,” kuchi mba wakwiya? 22 Yena wakwamba ngwe: “Kanda ulinga utanji,” mba kuchi yena wakulinga utanji? Yena wakuvwila lwaji mahamba, kuchi mba wakwiya yuma ya mu tembele? 23 Yena wakulisamba ha kunyingika shimbi, shina wakulelesa Zambi ha kwehuka Shimbi nyi? 24 Mumu chinasonewa ngwo: “Jina lia Zambi kanalishililika hakachi ka akwa-mavungu hamukunda wa yenu.”
25 Kwamba pundu, ungalami muupwa ni ulemu nyi wakwononokena shimbi; alioze nyi wapwa mukwa-kwehuka shimbi, ungalami we muupwa ulima. 26 Mumu nyi chilima kakufunga shimbi ja ululi, shina ulima wenyi kechi kaumona ngwe ungalami nyi? 27 Mutu yoze uli chilima alioze wakwononokena Shimbi, makakupatwila yena ngalami yoze kushi kwononokena shimbi, chipwe ngwe uli ni shimbi ja kusoneka. 28 Mumu Ka-Yunda wamwenemwene hi yoze ko wakumoneka kumeso ja atu, hanji yoze hanamupwisa ngalami ku mujimba wenyi. 29 Alioze, Ka-Yunda wamwenemwene yoze wa mu mbunge, ni ungalami wenyi wapwa wa mu mbunge, mu spiritu hi mu maliji akusoneka ko. Uhaliso wenyi hi wa kuli atu ko, alioze wakukatuka kuli Zambi.