Asonekene Mateu
19 Muze te Yesu hahwisa kuhanjika yuma yino, yakatuka ku Ngalileya, yaya mu manjiza ja Yundeya, mu sali likwo lia Yordau. 2 Mbunga yinene ya atu, yiyimukaula nawa, mba yaauka eswe kuzekwene.
3 A-Fwariseu amwe yakundama kuli iye hanga amweseke, yamuhula ngwo: “Chinalite ni shimbi lunga kulakula mukwo-pwo ha chitela cheswacho?” 4 Iye yaakumbulula ngwenyi: “Kunwatangile ngwo yoze waatangile chize ku uputukilo waatangile lunga ni pwo, 5 ni kwamba ngwenyi: ‘Kashika ha chikuma chino, lunga makahichika tato ni naye, akalinunge* ni mukwo-pwo, mba eswe aali makapwa musunya umuwika?’ 6 Ha chikuma chino, ayo hi aali ko nawa, alioze musunya umuwika. Kashika, chize Zambi hananungu, mutu katambile kuchihandununa.” 7 Ayo yamuhula ngwo: “Mba mumu liaka Mose ambile ngwenyi lunga ahane mukanda wa kushiha ulo mba alakule mukwo-pwo?” 8 Iye yaalweza ngwenyi: “Mumu lia kukala cha mbunge jenu, kashika Mose anutayijile hanga nulakule mapwo jenu, alioze ku uputukilo kuchakapwile chocho. 9 Ngunanulweze ngwami, mweswawo yoze malakula mukwo-pwo yoze kalingile utanji ni kumbata pwo mweka, malinga upangala.”
10 Tumbaji yamba kuli iye ngwo: “Nyi chikuma cha lunga ni pwo chinapu chocho, kuchalitele kumbata.” 11 Iye yaalweza ngwenyi: “Hi malunga eswe ko akuhasa kuchitayiza, shina aze wika ali ni chawana chacho. 12 Mumu kwali malunga waze keshi kumbata, mumu hanasemuka chizechene, kwali nawa waze keshi kumbata* mumu hanaapwisa chocho kuli atu, mba kwali nawa akwo waze keshi kumbata mumu hanalipwisa ene chocho hamukunda wa Wanangana wa mu malilu. Yoze mahasa kuchitayiza, atayize.”
13 Atu amwe yaneha twanuke kuli Yesu hanga aasayike moko ni kwalembela, alioze tumbaji twenyi yakanjisa atu jacho. 14 Yesu yamba ngwenyi: “Echenu twanuke, kanda nwakanjisa kwiza kuli yami, mumu Wanangana wa mu malilu, uli wa waze apwa ngwe twanuke.” 15 Iye yasayika moko jenyi hali ayo mba yakatukako.
16 Umwe mutu yakundama kuli iye, yamuhula ngwenyi: “Longeshi, yuma yika yipema natamba kulinga mba ngukazuke mwono wa mutolo?” 17 Iye yamukumbulula ngwenyi: “Mumu liaka unanguhula hakutwala ku yuma yipema? Mupema umuwika watwamako. Kashika nyi unazange kuzuka mwono, nunga ni kwononokena shimbi.” 18 Iye yamuhula ngwenyi: “Shimbi jika?” Yesu yamulweza ngwenyi: “Kanda ushiha mutu, kanda ulinga upangala, kanda wiya, kanda ushindakenya yuma ya mahuza, 19 Lemesa tatenu ni noko, zanga mwenyembo we ngwe chize wakulizanga yena mwene.” 20 Mukweze yamba kuli iye ngwenyi: “Yami nakukaula shimbi jino jeswe. Yika yinanguhono nawa?” 21 Yesu yamukumbulula ngwenyi: “Nyi unazange kupwa mungunu, yako ulanjise yikumba ye, uhane mbongo kuli yiswale, mukapwa ni upite mwilu; mba wize ungukaule.” 22 Muze mukweze hevwa chocho, yaya kwenyi ni chinyengo, mumu kapwile ni yikumba yinji. 23 Yesu yamba kuli tumbaji twenyi ngwenyi: “Pundu ngunanulweze ngwami: Muchikapwa chikalu kuli pichi kunjila mu Wanangana wa mu malilu. 24 Cheka nawa ngunanulweze ngwami: Chili chashi kamelu kupalika mu chituwa cha ndongo, alioze chikalu kuli pichi kunjila mu Wanangana wa Zambi.”
25 Muze tumbaji achivwile, yakomoka chinji ni kwamba ngwo: “Mba iya chamwenemwene mahasa kulamwina?” 26 Yesu yahulikila meso jenyi hali ayo ni kwalweza ngwenyi: “Kuli atu chino chili chikalu, alioze kuli Zambi, yuma yeswe yapwa yashi.”
27 Petulu yamukumbulula ngwenyi: “Tala! Yetu hitwahichika yuma yeswe, hitwakukaula. Mba yika mutukazuka?” 28 Yesu yamba kuli ayo ngwenyi: “Pundu ngunambe kuli yenu ngwami: Ha shimbu lize yuma yeswe muyikapwa yaha, muze Mwana-mutu makatwama ha ngunja yenyi ya uhenya, yenu waze nwangukaula, munukatwama ha ngunja 12 ni kusopesa minyachi 12 ya Izalele. 29 Ni mweswe yoze wahichika mazuwo, mandumbu jenyi a malunga, ni a mapwo, tato, naye, ana hanji minda mumu lia jina liami, makazuka yuma yinji, ni mwono wa mutolo.
30 “Alioze anji waze ali atangu kumakapwa akasula, akasula kumakapwa atangu.