Ulo—Kuchi Waputukile Nawa Mumu Liaka?

1, 2. (a) Ulo kuchi waputukile? (b) Yika lunga ni pwo atangu anyingikine hakutwala ku ulo? (Tala chizulie ha uputukilo.)

ULO uli chuma chilemu chinji ku mwono wa atu. Alioze kuchi ulo waputukile, nawa ulemu uka ukwete? Kunyingika kumbululo lia chihula chino, muchitukwasa kulemesa ulo ni kuzuka yiwape yatwamamo. Zambi katangile lunga mutangu Alama, chocho, yamwaha mulimo wa kuluka tushitu majina. Alama kamwene ngwenyi, tushitu eswe kapwile aali-aali, alioze “hali mwe mutu kawanyine niumwe chikwashi yoze malita nenyi.” Kashika, Zambi yapombesa Alama tulo anji, mba yamuchiza lupachi ni kutanga pwo. Yehova yatwala pwo wacho kuli Alama, mba yapwa mukwo-pwo. (Tanga Uputukilo 2:20-24.) Ngwe chize twamona, ulo uli chawana chakukatuka kuli Yehova.

² Muze te hikwapalika miaka yinji, Yesu yahilukila maliji waze Yehova ambile mu munda wa Endene ngwenyi: “Mutu akahichike tato ni naye, akalinunge ni mukwo-pwo; e aali kumakapwa musunya umuwika.” (Mateu 19:4, 5) Alama ni Eva katambile kunyingika ngwo, ayo kaatangile hanga atwame hamuwika, mumu Zambi katangile pwo mutangu kukatuka ku lupachi yoze achijile kuli Alama. Kashika, Yehova keshi kuzanga lunga ni pwo alilakule chipwe lunga kupwa ni mapwo aali hanji anji.

3. Mumu liaka Yehova alingile ulo?

³ Alama kazangile chinji mukwo-pwo, chocho, yamuluka jina ngwenyi, Eva. Aye kapwile chikwashi cha Alama. Alama ni Eva te mawahilila hamuwika ni chiseke ngwe pwo ni lunga. (Uputukilo 2:18) Chikuma chilemu chize Zambi alingilile ulo, chapwile ngwo, hashi heswe hazale too ni atu. (Uputukilo 1:28) Chipwe ngwe ana a malunga ni a mapwo te mazanga chinji yisemi jo, nihindu, te maahichika ha kulimbata ni kuputuka usoko wo ene. Chocho, atu te mazala too hashi ni kupwisaho heswe paraisu.

4. Yika yalingiwile kuli Alama ni Eva?

⁴ Alama ni Eva kaputukile kupwa ni yipikalo mu ulo wo, ha mukunda wa kuhona kukaula shimbi ja Yehova. “Kapela wa shakulu,” mwe Satana Ndiapu, wongele Eva ni kumulweza ngwenyi, nyi malia ku muhuko wa “mutondo wa chinyingi cha chipema ni chipi” manyingika yuma yinji. Satana yamba ngwenyi, nyi Eva malia muhuko wacho te muumukwasa kunyingika chipi ni chipema. Eva kakasolwele vumbi kuli mwata wenyi Alama muze alile muhuko chakuhona kuhanjika chitangu ni mukwo-lunga. Nawa Alama yahona kwononokena Zambi muze alile muhuko uze mukwo-pwo amuhele.—Usolwelo 12:9; Uputukilo 2:9, 16, 17;3:1-6.

5. Yika mutuhasa kulilongesa ha chize Alama ni Eva akumbulwile Yehova?

⁵ Muze Yehova ahulile Alama ni Eva ha upi uze alingile, mutu ni mutu yakalila yitanga yenyi. Alama yalamikiza mukwo-pwo, hakwamba ngwenyi: “Pwo wanguhele akapwe hamwe ni yami, iye wangwahanga ya ku mutondo mba yingulia.” Eva, yalamikiza kapela ngwenyi, mwe wamwongele. (Uputukilo 3:12, 13) Alama ni Eva yakalila yitanga yo yakuhona kwononoka, chocho, Yehova yaahisa ha mukunda wa uhulia wo. Yika twalilongesa hakutwala ha yitanga yo yipi? Twalilongesa ngwetu, lunga ni pwo katamba kwononokena Yehova, nawa mutu ni mutu katamba kutayiza upi wenyi mba mu ulo mupwe uwahililo.

 6. Mukanda wa Uputukilo 3:15, yika unalumbununa?

⁶ Chipwe ngwe Satana kanehene lamba mu munda wa Endene, nihindu Yehova kahanyine atu kutalatala chipema cha kulutwe lia matangwa. Kutalatala chacho, chili mu uprofeto utangu wa mu Mbimbiliya. (Tanga Uputukilo 3:15.) Uprofeto wacho wasolwele ngwo, Satana makamuwonda kuli “munyachi” wa ‘pwo.’ Mu malilu muli yitangiwa yinji ya spiritu. Yitangiwa yacho yapwa ngwe ‘pwo’ lia Yehova ha mukunda wa usendo upema uze akwete ni Yehova. Zambi te makatuma umwe hakachi ka yitangiwa yacho ya spiritu hanga ‘akawonde’ hanji kushiha Ndiapu. Chino te muchikakwasa atu ashishika hanga akazuke yiwape yize Alama ni Eva atokesele. Nawa atu jacho te makapwa ni uhashi wakutwama ni mwono wa mutolo hano hashi ngwe chize Yehova azangile kuuputukilo.—Yoano 3:16.

7. (a) Yika yakulingiwa mu malo kukatuka haze Alama ni Eva ehukile? (b) Yika Mbimbilya yinambe ngwo lunga ni pwo atamba kulinga?

⁷ Uhulia wa Alama ni Eva kuwakapihishile wika ulo wo, alioze wapihishile nawa malo waze asulileho. Chakutalilaho, Eva hamwe ni mapwo eswe ha kusema te kumevwa yikola yinji. Mapwo te kumevwila malunga jo usolo unji hanji kwaazanga chinji, alioze malunga te mayula hali mapwo jo, ni kwamwesa lamba ha mashimbu amwe ngwe chize tunamono musono. (Uputukilo 3:16) Alioze Yehova kanazange hanga malunga apwe miata waze akwete zango hali asoko jo, nawa ngwenyi, mapwo azeyele malunga jo. (A-Efwesu 5:33) Akwa-Kristu waze alimbata nyi makalakala hamuwika ni kulivwashana, mehuka yipikalo yinji.

8. Lumbununa chize ulo wapwile ha matangwa ja Alama ndo ha Sanga Linene lia Meya?

⁸ Muze Alama ni Eva te kanda achifwa o yasema ana a malunga ni a mapwo. (Uputukilo 5:4) Mwano mutangu Kene, yambata mwanako wa pwo. Lameke wa ku munyachi wa Kene, mwe mutu mutangu yoze Mbimbiliya yinavuluka ngwo, wapwile ni mapwo aali. (Uputukilo 4:17, 19) Kukatuka ha matangwa ja Alama ndo ha matangwa ja Noa, kwapwile atu akehe wika hano hashi waze te akuwayila Yehova. Amwe akuli atu jacho te Abele, Enoke, Noa hamwe ni asoko jenyi. Ha matangwa ja Noa, ‘ana ja Zambi amwene ana a mapwo ja atu ngwo apema.’ Mbimbiliya yinambe ngwo: O “ambachile mapwo hakachi ka waze eswe azangile.” Alioze, chino chapwile chipi mumu Zambi kakatangile angelo hanga ambate, kashika o hamwe ni mapwo jacho asemene ana waze te avuluka ngwo, Yindululu. Ha mashimbu jacho, ‘ungulungulu wa atu, wahianyine chinji hano hashi’ nawa “kutaka cheswe cha manyonga ja mu mbunge jo, chapwile wika chipi matangwa eswe.”—Uputukilo 6:1-5.

9. Yika Yehova alingile hali atu api ha matangwa ja Noa, nawa yika twatamba kulilongesa ha yize yalingiwile ha matangwa jacho?

⁹ Yehova kambile ngwenyi, maneha sanga linene lia meya hanga ashihe atu eswe api. ‘Noa, mukwa kwambujola ululi,’ yaputuka kulweza atu jacho hakutwala kukwiza cha Sanga Linene lia Meya. (2 Petulu 2:5) Alioze atu jacho kakapanjikile Noa, mumu kapwile ni kulalwoka ni yuma ya ha tangwa ni tangwa, hamwe ni ulo. Yesu kambile ngwenyi, yuma yize yalingiwile ha matangwa ja Noa muyilingiwa nawa ha matangwa jetu. (Tanga Mateu 24:37-39.) Musono, atu anji keshi kupanjika sango jize twakwaambulwila hakutwala ku Wanangana wa Zambi. Tunambujola sango jacho shimbu hashi hano hapi kanda achinongesaho. Yika mutuhasa kulilongesa ha yize yalingiwile ha matangwa ja Noa? Twalilongesa ngwetu, kutwatambile kwecha yuma, ngwe ulo hanji ana hanga yipwe ni ulemu unji ku mwono wetu ni kutulingisa hanga tuvulame ngwetu tangwa lia Yehova hiliakundama.

10. (a) Mu mavungu anji, kuchi atu te akunyonga hakutwala ku upangala? (b) Kuchi Apalahama ni Sara ahichikile chilweza chipema cha ulo?

¹⁰ Noa ni ana jenyi atatu, mutu ni mutu kapwile ni pwo umuwika. Alioze muze sanga lia meya te hiliapalika, malunga anji yaputuka kumbata mapwo anji. Mu mavungu anji atu kapwile chinji ni kulinga upangala nawa kuli amwe upangala wapwile chihanda cha uwayilo wo. Muze Apalahama ni Sara ayile ku Kanana, ayo kapwile ni kutwama hamwe ni yipangala, atu waze te keshi kuvumbika ulo. Chocho, Yehova yanongesa mbonge ya Sondome ni Ngomora mumu atu kapwile ni kulinga chinji upangala. Alioze Apalahama te kalisa chinji ni atu jacho. Iye kapwile mwata mupema mu usoko wenyi, nawa Sara kapwile ni kumuvumbika ni mbunge yeswe. (Tanga 1 Petulu 3:3-6.) Apalahama yasa tachi hanga mwanenyi Izake ambate pwo yoze te wakuwayila Yehova. Izake neye yalinga chochene kuli mwanenyi Yakomba, yoze wapwile kalamba ka minyachi 12 ya Izalele.

11. Kuchi Shimbi ja Mose jakwashile A-Izalele?

¹¹ Hakupalika cha matangwa, Yehova yalinga usendo ni vungu lia Izalele. Yaaha shimbi yize avuluka ngwo Shimbi ja Mose. Shimbi jacho te jakukwasa malunga ni mapwo hanga awayile Yehova ni mbunge yitoma. Chakutalilaho, kwapwile shimbi jize te jakukanjisa malunga kumbata mapwo anji, jikwo te jakukanjisa A-Izalele kulimbata ni atu waze te keshi kuwayila Zambi. (Tanga Shimbi Yamuchiali 7:3, 4.) Muze malunga ni mapwo te akupwa ni yipikalo mu malo jo, o te kakwakwasa kuli makulwana. Chikwo nawa, kwapwile shimbi hakutwala ku kuhona ushishiko, ku ukwa, ni muze lunga ni pwo mahona kulijikijila. Kulilakula te kakuchitayiza, alioze kwapwile nawa shimbi jize te jakufunga lunga ni pwo waze alimbata. Chakutalilaho, lunga te mahasa kulakula mukwo-pwo nyi malinga “chuma cha sonyi.” (Shimbi Yamuchiali 24:1) Mbimbiliya kuyishi kuhana ulumbunwiso wa “chuma cha sonyi,” chipwe chocho, lunga te katambile kuzachisa tupalia akehe-akehe hanga alilakule ni mukwo-pwo.—Ulevi 19:18.

12, 13. (a) Yuma yika malunga amwe te akulinga hali mapwo jo ha matangwa ja Malakia? (b) Yika muyihasa kulingiwa kuli mukwa-Kristu yoze malumbula pwo hanji lunga liambala?

¹² Ha matangwa ja profeta Malakia, malunga anji A-Yunda te kakuzachisa kapalia mweswawo hanga alilakule ni mapwo jo. Malunga jacho te kakulilakula ni mapwo jo, hanga alimbate ni ana-pwo hanji mapwo waze te keshi kuwayila Yehova. A-Yunda a malunga ha matangwa ja Yesu kapwile ni kulakula mapwo jo ‘ha chikuma cheswacho.’ (Mateu 19:3) Alioze, Yehova Zambi keshi kuzanga atu kulilakula chakuhona kukaula shimbi ja mu Mbimbiliya.—Tanga Malakia 2:13-16.

¹³ Musono, kuhona kushishika kuchatambile kulingiwa mu ulo wa akwa-Kristu. Alioze achinyonga ngwe, umwe mukwa-Kristu kalinga utanji mba mafupa kulilakula ni yoze alimbata nenyi hanga alimbate ni mutu weka. Ndumbu wacho nyi kalikonyekene, mamusosolola hanga ahone kupihisa chikungulwila ni upi wenyi. (1 A-Korindu 5:11-13) Nyi mema “mihuko ya kutela kulikonyeka” mamutayiza hanga afune nawa mu chikungulwila. (Luka 3:8; 2 A-Korindu 2:5-10) Kukushi shimbu lize mutu wacho atamba kupwa haze lia chikungulwila. Mahasa kumbata mwaka umuwika hanji miaka yinji mba asolole ngwenyi kanalikonyeka ni mbunge yeswe mba ahase kumufunyisa mu chikungulwila. Alioze chipwe ngwe mamufunyisa nihindu mutu wacho, ‘makamana kulutwe lia chitwamo cha upatwilo wa Zambi.’—A-Roma 14:10-12; tala Kaposhi wa Kutalila 1, fevereiro de 1980, ha mafwo 31-32.

14. Kuchi Shimbi ja Mose jakwashile tuvumbi twa Zambi ku shakulu?

¹⁴ A-Izalele kapwile mushi lia Shimbi ja Mose ha miaka kuhiana 1,500. Shimbi jacho jakwashile tuvumbi twa Zambi mu majila anji. Chakutalilaho, shimbi jacho te jakukwasa atu kuhwisa milonga mu usoko, ni kukwasa atu kwononokena Zambi ndo ha kwiza cha Mesaya. (A-Ngalishia 3:23, 24) Muze Yesu afwile, shimbi jacho yijihwa, chocho Zambi yalinga usendo waha. (A-Hepreu 8:6) Kashika, yuma yimwe yize yapwile ni kulingiwa mu Shimbi ja Mose akwa-Kristu keshi kuyilinga.

15. (a) Kulita ni chikungulwila cha akwa-Kristu, ulo kuchi watamba kupwa? (b) Yika akwa-Kristu atamba kunyonga nyi mafupa kulilakula?

¹⁵ Limwe tangwa A-Fwariseu yahula Yesu chihula hakutwala ku ulo. Yesu yakumbulula ngwenyi, Shimbi ja Mose japwile ni kwamba ngwo, A-Izalele mahasa kulilakula, chipwe ngwe ku uputukilo te Zambi kakazangile chocho. (Mateu 19:6-8) Kumbululo lia Yesu liasolwele ngwo, nyonga lia Zambi hakutwala ku ulo lie atamba kukaula akwa-Kristu musono. (1 Timoteu 3:2, 12) Ha chino, lunga ni pwo katamba kununga ni kutwama hamuwika mumu kali “musunya umuwika.” Zango lio kuli Zambi ni kuli umwe ni mukwo, lie muliakwasa hanga anunge ni kutwama hamuwika. Waze alimbata nyi malilakula chakuhona umwe mukachi ko kulinga utanji, katambile kumbata cheka. (Mateu 19:9) Mutu mahasa kukonekena mukwo yoze walinga utanji nyi malikonyeka. Chino che chalingiwile kuli profeta Hozeia muze mukwo-pwo Ngome alingile utanji. Ni Yehova neye, che alingile muze akonekenene A-Izalele waze alikonyekene. (Hozeia 3:1-5) Chikwo nawa, nyi umwe manyingika ngwenyi, mukwo-lunga hanji mukwo-pwo kalinga utanji, alioze matayiza kulisumbakenya nenyi, chekwamba, kamukonekena. Ha chino, kulita ni Mbimbiliya atu jacho katambile kulilakula.

16. Yika Yesu ambile hakutwala kuli twamishi?

¹⁶ Yesu kambile ngwenyi, utanji we wika muuhasa kulingisa akwa-Kristu amwenemwene waze alimbata hanga alilakule. Yamba nawa hali “waze aahelecho kuli Zambi” kununga ni kupwa twamishi ngwenyi, “yoze mahasa kuchitambula, akachitambule.” (Mateu 19:10-12) Mandumbu anji kakusakula ene kupwa twamishi hanga akalakale chinji milimo ya Yehova. Kashika, twatamba kwachichimieka!

17. Yika muyihasa kukwasa mukwa-Kristu hanga anyingike nyi mambata nyi ka?

¹⁷ Yika muyihasa kukwasa mutu kunyingika nyi manunga ni kupwa twamishi nyi ka? Mutu mwene mwe watamba kukwata chiyulo nyi manunga kupwa twamishi. Postolo Paulu kambile ngwenyi, chili chipema kupwa twamishi. Alioze yamba nawa ngwenyi: “Mumu ha utanji, mutu mweswe akapwe ni pwo lienyi mwene, ni pwo mweswe akapwe ni lunga lienyi mwene.” Yawezela nawa ngwenyi: ‘Nyi kahashile kulifunga, akambate, mumu hapwa kumbata, hi kusasaminya ko.’ Kashika, ndumbu mahasa kumbata hanji kusomboka hanga ehuke usolo wa utanji hanji kulihehesa mwene ku mujimba chipwe kulinga utanji. Mandumbu waze achili twamishi, katamba kunyonga kanawa amone nyi hakola ni kumbata nyi ka. Paulu yamba ngwenyi: ‘Nyi umwe mashinginyeka ngwe katambile kununga twamishi, nawa, muze mahiana kukula cha miaka yenyi, nyi muchilita akalinge chize mapala, kavulumwine, akambate.’ (1 A-Korindu 7:2, 9, 36; 1 Timoteu 4:1-3) Mutu katambile kulinga usendo hanji kumbata mumu lia kwivwa chinji usolo wa kulimona cha lunga ni pwo uze twakupwa nawo muze tuchili akweze. Nawa ha mashimbu jacho hanji mutu kanda achikola kanawa ni kupwa ni yiteli ya mu ulo.

18, 19. (a) Kuchi watamba kuputuka ulo wa mukwa-Kristu? (b) Yika mutulilongesa ha mutwe uze muusulaho?

¹⁸ Mukwa-Kristu katamba kulimbata ni ndumbu hanji pangi yoze hanapapachisa nawa yoze wakuzanga Yehova ni mbunge yeswe. Ayo katamba kulizanga umwe ni ukwo ni kununga ni kutwama hamuwika ku mwono wo weswe. Nyi malinga chocho, Yehova maawahisa, mumu kanononokena chiyulo chakumbata wika “muli mwe Mwene.” (1 A-Korindu 7:39) Nawa ulo wo muupwa kanawa nyi manunga ni kukaula shimbi ja mu Mbimbiliya ku mwono wo.

¹⁹ Musono, tuli “ha matangwa a kusula,” nawa atu anji keshi ni yitanga yize yakukwasa kupwa ni ulo upema. (2 Timoteu 3:1-5) Mutwe uze muusulaho, mutulilongesamo shimbi ja Mbimbiliya jize mujihasa kukwasa akwa-Kristu hanga apwe ni ulo upema, chipwe muze mukusoloka yimwe yipikalo. Chino muchakwasa hanga anunge ni kwenda mu jila ya kutwala ku mwono wa mutolo.—Mateu 7:13, 14.