Daniele

8 Ha mwaka wamuchitatu wa kuyula cha Beleshazare, yami Daniele yingumona usolwelo ukwo kuchizako uze naliangile kumona. 2 Mu usolwelo wacho te nguli mu zuwo lia kukolesa mu Shushane yize yatwama mu mbonge ya Elame. Yingumona usolwelo te nguli ku lwiji Ulai. 3 Muze nahetwile meso, yingumona kuji wa panga kanamana ku sesa lia lwiji, iye te kali ni mbinga jaali. Mbinga jacho japwile jisuku-jisuku, alioze lumbinga umwe te musuku chinji kuhiana mukwo, lumbinga musuku mwe wasokele wa kasula. 4 Yingumona kuji wa panga wacho kanayi ni kupupa mbinga ku chitokelo, ku uto ni ku chivumbuko. Niumwe kashitu wa mu yambu te wakuhasa kumana kulutwe lienyi wakuhi, niumwe te mahasa kutusula chize chili mu moko jenyi wakuhi. Iye te kakulinga yeswayo mazanga ni kulinangamisa.

5 Muze te munguchitala, yingumona umwe kuji wa pembe kanakatuka ku chitokelo, yatangunuka hashi heswe, kaliachile hashi. Pembe wacho te kali ni lumbinga munene hakachi ka meso. 6 Iye te kanatalikisa kuli kuji wa panga wa mbinga jaali, yoze namwene ku sesa lia lwiji, te kanazomboka ni kutalikisa kuli iye ni ufwatulo unji.

7 Yingumumona kanakundama kuli kuji wa panga, te kanamwivila ufwatulo unji. Yapupa kuji wa panga wacho, yamumakuna mbinga jaali, kuji wa panga kahashile kupwa ni tachi ja kulimika ni kuji wa pembe. Iye yalimbula kuji wa panga, ya muliata-liata, kwakapwile niumwe yoze te mahasa kumutusula kuli iye.*

8 Mba kuji wa pembe, yalinangamisa chinji, alioze muze te hapwa ni ndundo jenyi yamumakuna lumbinga munene. Chocho yikusoka mbinga jikwo jiwana ha chihela cha lumbinga wacho, mbinga jacho te jatalikisa ku mambango awana a mwilu.

9 Hakachi ka mbinga jacho, ha lumbinga umwe, yihasoka lumbinga mukwo mukehe, yasuhwa chinji, yatalikisa ku uto, ku chivumbuko ni ku Chifuchi cha Uhenya. 10 Yasuhwa chinji, yaheta ku yuma* yize yatwama mwilu, yaholola yimwe ya ku yuma yacho ni tutongonoshi, yayiliata-liata. 11 Iye yalinangamisa chinji ha kulimika ni Mwata wa yuma* yatwama mwilu, yakinda atu kuhana milambu kuli iye matangwa eswe, yapuzula chihela chenyi chisandu. 12 Yamwaha yuma ya mwilu hamwe ni milambu ya tangwa ha tangwa mumu lia utanguko, lumbinga wacho yanunga ni kumbila umwenemwene hashi, yasa tachi jinji, yakumba.

13 Yingwiva musandu umwe kanahanjika, mba musandu mukwo yahula yoze te unahanjika ngwenyi: “Mashimbu angahi muulinga usolwelo hakutwala ku milambu ya tangwa ha tangwa, utanguko uze wakuneha unongeso, kuliata-liata cha mu chihela chisandu ni hakutwala ku yuma yatwama mwilu?” 14 Iye yamukumbulula ngwenyi: “Ndo muze mukupalika 2,300 ja ufuku ni chimene. Mba chihela chisandu makachilulieka chikapwe ngwe chize chapwile.”

15 Yami Daniele muze te munguchimona usolwelo ni kufupa ulumbunwiso wawo, susumuku yingumona kulutwe liami umwe unalifu ni mutu. 16 Yingwiva liji lia mutu kukatuka mukachi ka Ulai, iye yakololoka ngwenyi: “Gabriele, mulumbunwine yize amona.” 17 Iye yakundama haze te nguli, alioze muze ahetele yingwiva woma unji, yingufulamana hashi. Iye yamba kuli yami ngwenyi: “Yena mwana-mutu nyingika ngwe usolwelo uno muukamanunuka ku matangwa a kusula.” 18 Alioze shimbu te machihanjika ni yami, yinguya tulo anji muze te ngunachifulamana hashi. Chocho iye yangusunga, yangumanyisa haze te nguli. 19 Iye yamba ngwenyi: “Mungukusolwela yize muyikalingiwa ku songo lia matangwa a ufwatulo, mumu usolwelo uno muukamanunuka ku songo lia matangwa.

20 “Kuji wa panga wa mbinga jaali yoze wamwene, kanalumbunuka mianangana A-Media ni A-Persia. 21 Pembe yoze uli ni wona unji kanalumbunuka mwanangana wa Ngresia, lumbinga munene yoze te uli hakachi ka meso jenyi, kanalumbunuka mwanangana mutangu. 22 Hakutwala ku lumbinga yoze amakwine mba yikusoloka mbinga jikwo jiwana ha chihela cha lumbinga wacho, mukukapwa wanangana uwana uze muukakatuka ku vungu lienyi, alioze kuuchi kapwa ni ndundo jenyi.

23 “Ku songo lia mawanangana wano, muze yitanguke makahwisa kulinga upi wo weswe, mukukasoloka mwanangana umwe wa kukolesa woma, yoze wanyingika ulumbunwiso wa maliji a kwonga. 24 Makapwa ni ndundo jinji, alioze ndundo jacho hi ja kuli iye mwene ko. Makaneha unongeso wa kukomwesa, yuma yeswe makalinga muyikenda kanawa. Makanongesa akwa-ndundo ni asandu. 25 Ni kukanyama chenyi, makalionga hanga akumbe, makalizata mu mbunge yenyi, ha mashimbu a ukulungunga makanongesa atu anji. Makalimika chipwe ni Mwata wa miata, alioze makamumakuna hi ni moko ja mutu ko.

26 “Yize ambile mu usolwelo hakutwala ku ufuku ni chimene yili yamwenemwene, alioze yena watamba kusweka usolwelo uno mumu unatale ku matangwa a kulutwe chinji.”

27 Yami Daniele yinguhonga chinji, yinguyiza ha matangwa amwe. Mba yingukatuka, yinguya ni kukalakalila mwanangana. Alioze te ngunalifwichi mumu lia usolwelo wacho, niumwe te mahasa kunyingika ulumbunwiso wawo wakuhi.