Mukanda Utangu wa Yoano

3 Talenu zango lipwahaha lize Tata hanatusolwela, hakutuvuluka ngwenyi ana jami. Chochene tuli lume ana jenyi. Kashika akwa-hashi katunyingikine, mumu kanyingikine Zambi. 2 Mandumbu a zango, haliapwila tuli ana ja Zambi, alioze kanda achisolola chize mutukapwa. Tunanyingika ngwetu, muze makamusolola, mutukapwa ngwe iye, mumu mutukamumona chize apwa. 3 Mweswawo uli ni kutalatala chino muli iye, kakulipemesa mwene, ngwe chizechene iye apwa mupema.*

4 Mweswe yoze wakulinga shili kakulimika nawa ni shimbi, shili yili kulimika ni shimbi. 5 Yenu nunanyingika nawa ngwenu, Yesu kamusolwele hanga achize shili yetu, muli iye shili kuyishimo. 6 Yoze wakununga ni kulivwashana nenyi keshi kulinga shili; mweswawo wakulinga shili, kanda achimumona chipwe kumunyingika. 7 Ana jami a zango, niumwe kanda anupiangula. Mweswawo wakulinga ululi kali mukwa-ululi, ngwe chize iye ali mukwa-ululi. 8 Yoze wakuvulumuna kanakatuka kuli Ndiapu, mumu Ndiapu kakuvulumuna chize ku uputukilo. Mumu lia chino, Mwana wa Zambi yamusolola hanga anongese milimo ya Ndiapu.

9 Mweswe yoze wasemukine kuli Zambi, keshi kuvulumuna, mumu spiritu yisandu* ya Zambi yinanungu muli iye, kashika kechi kuhasa kulinga shili mumu hanasemuka kuli Zambi. 10 Ana ja Zambi ni ana ja Ndiapu tunaanyingikina ha chikuma chino: Yoze keshi kulinga ululi hi wa kuli Zambi ko, chipwe yoze keshi kuzanga ndumbwenyi. 11 Mumu yono mwe lusango nwevwile chize ku uputukilo ngwo, twatamba kulizanga umwe ni mukwo; 12 twatambile kupwa ngwe Kene yoze wakatukile kuli mwe mupi, washihile mwana-kwo. Mumu liaka amushihile? Mumu yitanga yenyi mwene yapwile yipi, alioze ya mwana-kwo te ya ululi.

13 Mandumbu kanda nukomoka, nyi manuvwila kole kuli akwa-hashi. 14 Yetu tunanyingika ngwetu, hitwakatuka ku kufwa tunayi ku mwono, mumu twakuzanga mandumbu. Yoze keshi kusolola zango, kananungu mu ufwe. 15 Mweswe wa kuvwila ndumbwenyi kole, kali mukwa-kushiha atu,* yenu nunanyingika ngwenu, mweswe yoze wakushiha atu keshi ni mwono wa mutolo. 16 Tunanyingika zango mumu lia chino: iye kahanyine mwono wenyi hali yetu, ni yetu twatamba kuhana mwono wetu hali mandumbu jetu. 17 Alioze, yoze uli ni yikumba ya hano hashi, nyi mamona ndumbwenyi kanahono yimwe, chipwe chocho makalisa mbunge yenyi ni kulituna kumukwasa, kuchi mahasa kwamba ngwenyi kakuzanga Zambi? 18 Ana jami a zango, zango lietu liatambile kusoloka wika ha yize twakwamba, alioze liatamba kusoloka nawa ha yize twakulinga, liatamba kupwa liamwenemwene.

19 Ha chikuma chino, mutunyingika ngwetu tuli mu umwenemwene ni kupwa ni shindakenyo ngwetu Zambi kakutuzanga, 20 nyi mbunge yetu muyituhisa mumu lia yikuma yeswayo, tunyingikenu ngwetu, Zambi kali munene kuhiana mbunge yetu, kananyingika nawa yuma yeswe. 21 Akwetu a zango, nyi mbunge yetu kuyishi kutuhisa, mutuhanjika ni Zambi chakuhona woma; 22 yeswe yize mutwita kuli iye, matwahayo, mumu twakwononokena shimbi jenyi ni kulinga yize yakupemena kumeso jenyi. 23 Kwamba pundu, yino ye shimbi yenyi: ngwo tufulielenu mu jina lia Mwanenyi, Yesu Kristu, ni kulizanga umwe ni mukwo, ngwe chize iye atuhele shimbi. 24 Chikwo nawa, yoze wakwononokena shimbi jenyi kakununga ni kulivwashana ni iye, ni iye kakulivwashana nenyi. Tunanyingika ngwetu, iye kakununga ni kulivwashana ni yetu, mumu lia spiritu yize atuhele.