Lemesa Mwono Ngwe Chize Zambi Akuulemesa

1, 2. Chiwape chika hitunatambula kuli Zambi nawa mumu liaka chili chilemu chipi-chipi musono?

TATA yetu wa mu malilu, hanatwehe chawana cha mwono ni uhashi wa kwimbulula yitanga yenyi. (Uputukilo 1:27) Ha mukunda wa chino, mutuhasa kunyingika shimbi ja Mbimbiliya. Ha kukaula shimbi jacho, mutuhasa kupwa atu akola mu spiritu, waze azanga Yehova nawa akwete mana akusa “chinyingi hakachi ka chipema ni chipi.”​—A-Hepreu 5:14.

² Mana akunyingika shimbi ja Mbimbiliya kali alemu, chipi-chipi musono, mumu hano hashi ha too ni yuma yipi, yize yinapwisa chikalu kupwa ni shimbi jeswe jize mujihasa kutukwasa ku yikuma yeswe yize muyilingiwa ku mwono wetu. Chino chakulingiwa chinji hakusakula uukiso, chipi-chipi uze wakuzachisa manyinga. Chino chili chikuma chilemu chinji chize twatamba kusela shindakenyo nyi tunazange kwononokena Yehova. Alioze, nyi twanyingika kanawa shimbi ja mu Mbimbiliya jize jinahanjika hakutwala ku chikuma chino, mutuhasa kukwata yiyulo yipema, yize muyitunehena sambukila ku mbunge nawa mutununga mu zango lia Zambi. (Yishima 2:6-11) Tushimutwinenu jimwe shimbi.

3, 4. Ha shimbu lika aputukile kuvuluka manyinga ngwo asandu mu Yisoneko, nawa hali hanakatuka shimbi yacho?

³ Yehova kasolwele ha chisuho chitangu ngwenyi, mwono ni manyinga kali asandu nawa kalita, muze Kene ashihile Abele. Iye kambile kuli Kene ngwenyi: “Yika walinga? Liji lia manyinga a mwanakwenu mu mavu linahete kuli yami.” (Uputukilo 4:10) Kuli Yehova manyinga ja Abele te kanalumbunuka mwono wenyi, uze ashihile. Kashika manyinga ja Abele te kanakololoka kuli Zambi ni kufupa ufweteso.​—A-Hepreu 12:24.

⁴ Muze Sanga lia Meya te hiliapalika, Zambi yalweza atu ngwenyi mahasa kulia yifwo ya tushitu alioze manyinga ka. Zambi kambile ngwenyi: “Kuchi kulia yifwo yize yikwete manyinga jayo, acho chinalumbunuka we mwono. Chikwo nawa manyinga jenu a mwono wenu mungwakala.” (Uputukilo 9:4, 5) Shimbi yino yinatale hali ana eswe ja Noa ndo ha matangwa jetu. Yino yinashindakenya ha yize Zambi ambile kuli Kene, ngwo mwono wa yitangiwa yeswe uli mu manyinga. Shimbi yino yinasolola nawa ngwo atu eswe waze akuhona vumbi ku mwono ni manyinga makakumbulula kuli Yehova, mwe Chishima cha mwono.​—Samu 36:9.

5, 6. Kuchi Shimbi ja Mose te jakusolola ngwo manyinga kali asandu nawa alemu? (Tala kasha ha lifwo 78.)

⁵ Umwenemwene uno wali te wapwa zwalala mu Shimbi ya Mose. Mukanda wa Ulevi 17:10, 11, unambe ngwo: “Nyi mutu mweswawo, malia amwe manyinga, mungusa meso jami a kulimika ni mukwa kulia manyinga, ngukamutete hakachi ka atu jenyi. Mumu mwono wa musunya watwama mu manyinga mba hinaahana ha chilumbilo hali yenu kufuka mwono wenu. Mumu manyinga akufuka, kapwa we mwono.”a—Tala kasha “Ulemu wa Manyinga,” ha lifwo 76.

⁶ Nyi manyinga ja amwe tushitu te kechi kuhasa kwaazachisa ha chilumbilo, te kaatamba kwaamwanga mu mavu. Chino te chakupwa ngwe kanafunyisa mwono kuli Mwene yoze wautangile. (Shimbi Yamuchiali 12:16; Ezekiele 18:4) Tunyingikenu ngwetu, A-Izalele te keshi kuhasa kuchiza manyinga eswe mu yifwo ya kashitu. Ha kushiha kashitu, A-Izalele te katamba kumupatula muliwu ni kumwanga manyinga eswe mu mavu, ha chino ayo te mahasa kulia yifwo ni mbunge yitoma, mumu chino te chakusolola vumbi kuli Chihanyi Cha Mwono.

7. Kuchi Ndawichi asolwele ngwenyi manyinga kali asandu?

⁷ Mwanangana Ndawichi ‘lunga yoze te wakuvwisa mbunge ya Zambi kuwaha’ te kananyingika kanawa shimbi ja Zambi hakutwala ku manyinga. (Yilinga 13:22) Amwe mashimbu, iye yevwa pwila yinji, ha chino tunganda twenyi atatu a ndundo yanjila ha chilombo cha akwa-kole jenyi yataha meya a mu shima, yamunehena. Yika Ndawichi alingile? Aye yalihula ngwenyi, “te mungunwa manyinga ja wano malunga asele mwono wo mu utoji?” Kuli Ndawichi meya jacho te kanalumbunuka manyinga ja tunganda jenyi. Ha chino, chipwe ngwe kapwile ni pwila iye kakanwine, alioze “yaazujila kumeso ja Yehova.”​—2 Samuele 23:15-17.

8, 9. Shina nyonga lia Zambi hakutwala ku manyinga lialumukine muze alingile chikungulwila chitangu cha akwa-Kristu? Lumbununa.

⁸ Muze te hikwapalika 2.400 a miaka chize haze Yehova alwezele Noa ngwo katambila kulia manyinga, nawa ha kupalika cha miaka 1.500 chize muze alingile usendo wa Shimbi, Yehova kasongwele chizavu cha tusongo cha akwa-Kristu a ku sekulu yitangu hanga asoneke ngwo: ‘Se chapemena spiritu musandu, ni yetu, Kanda tunutwika chiteli chilemu kuhiana yino yuma chanutamba kulinga ngwetu, Kanda nulia yifwo yize akukombelela ku mahamba, chipwe manyinga, hanji yifwo ya tushitu akuhonda, ni kanda nulinga utanji.’​—Yilinga 15:28, 29.

⁹ Chino chinasolola ngwo, chizavu cha tusongo cha akwa-Kristu a ku sekulu yitangu te kananyingika ngwo, manyinga kali asandu, nawa ngwo nyi twaazachisa chipi chili shili yinene ngwe kukombelela mahamba ni kulinga utanji. Akwa-Kristu amwenemwene musono, no kakukaula shimbi yacho. Kashika, nyi twecha hanga shimbi ja mu Mbimbiliya jitusongwele mutuhasa kukwata yiyulo yipema hakutwala ku manyinga.

10, 11. (a) Nyonga lika Yela ja Yehova ali nalio hakutwala ku kutambula manyinga ni yuma yiwana ya mu manyinga? (b) Ha yikuma yika yize akwa-Kristu mahasa kupwa ni manyonga alisa?

¹⁰ Yela ja Yehova kananyingika ngwo ‘kulituna manyinga’ chinalumbunuka kwehuka kutambula manyinga, kuhana hanji kutulika manyinga jenyi mwene hanga amusewo nawa. Amu twakuvumbika shimbi ja Zambi, kutushi kutayiza nawa yuma yiwana yize yatwama mu manyinga, ngwe, glóbulos vermelhos, glóbulos brancos, plaquetas ni plasma.

¹¹ Musono, yuma yino yiwana twavuluka, kanayitete mu yihanda, hanga ayizachise mu majila eka ni eka. Shina mukwa-Kristu mahasa kutayiza yihanda yacho? Shina kutwakuyimona ngwetu, yili “manyinga”? Mutu ni mutu katamba kukwata yiyulo yenyi mwene hakutwala ku chikuma chino. Chino nawa chinatale hakutwala ku uukiso ukwo ngwe, wa hemodiálise, hemodiluição ni recuperação intraoperatória ya celula ja manyinga a mutu mwene waze hi akutulika ko.—Tala Apendice, mafwo 215-218.

12. Kuchi twatamba kumona yikuma yize mutu atamba kulisakwila mwene kulita ni mbunge yenyi, nawa yika twatamba kulinga?

¹² Shina yiyulo yetu kuyishi ni ulemu kuli Yehova? Hi chochoko, mumu iye kali ni zango ha manyonga ni yiyulo yetu. (Tanga Yishima 17:3; 24:12.) Ha chino, nyi hi tweta usongwelo kuli Yehova nawa twahengwola ha yuma yize yinatale ku manyinga hanji ku uukiso, twatamba kukwata yiyulo kulita ni mbunge yetu yize yakufumba ni Mbimbiliya. (A-Roma 14:2, 22, 23) Kashika atu akwo katambile kulimika ni chiyulo chetu nawa kutwatambile kwahula ngwetu: “Nyi yena te uli mu chihela chami yika te muulinga?” Hakutwala ku chikuma achi mukwa-Kristu mweswe katamba kumbata “chiteli chenyi mwene.”b​—A-Ngalashia 6:5; A-Roma 14:12; tala kasha “Shina Nakumona Ngwami Manyinga Kali Asandu?” ha lifwo 81.

13. Yika shimbi ja Yehova jakusolola hakutwala kuli iye? Hana chimwe chilweza.

¹³ Shimbi jize jili mu Mbimbiliya jinasolola ngwo, Yehova kali Mukwa-Kuhana Shimbi nawa kali Tata ya zango, yoze wakuzanga hanga ana jenyi atwame kawape. (Samu 19:7-11) Chipwe ngwe shimbi ya ‘kulituna manyinga’ kakayihanyine hanga yipwe ngwe uukiso, alioze nihindu nyi twayikaula mutuhasa kwehuka utoji uze wa kwiza ha kutambula manyinga. (Yilinga 15:20) Mandotolo anji kakwamba ngwo, kupasula mutu chakuhona kumusa manyinga chapwa “chilweza” chipema ha matangwa wano. Kuli akwa-Kristu amwenemwene, sango jino jinasolola mana ni zango lia tata yetu Yehova.​—Tanga Izaia 55:9; Yoano 14:21, 23.

14, 15. (a) Zango lia Zambi hali atu jenyi te liakusoloka ha shimbi jika? (b) Kuchi mutuhasa kukaula shimbi jino hanga tulifunge?

¹⁴ Kuli shimbi jinji jinasolola chize Zambi te akufunga A-Izalele. Chakutalilaho, Yehova katumine A-Izalele hanga atunge mazuwo jo ni yisakala ha fulumba hanga mutu ahone kulilemeka, mumu ha fulumba te kakulingaho milimo yinji. (Shimbi Yamuchiali 22:8; 1 Samuele 9:25, 26; Nehemia 8:16; Yilinga 10:9) Zambi nawa kalwezele ngwo te katamba kukasa ngombe jo. (Kutuhuka 21:28, 29) Kulengulula shimbi jino te chili kuhona vumbi kuli akwo nawa te mahasa kumona mulonga nyi umwe mutu mafwa ha mukunda wa kalengululo wacho.

¹⁵ Kuchi muhasa kukaula maliji wano a shimbi? Achinyonga ha mashinyi je, kwendesa che, yimuna ye, zuwo lie, chihela che chakukalakalila ni yiheho yize wakusakula. Ku yihela yinji, ponde yakuneha chinji kufwa hali akweze, mumu ayo kanji-kanji keshi kulifunga. Chipwe chocho akweze waze anazange kununga mu zango lia Zambi kakulemesa mwono, keshi kufupa yiheho ya ponde. Keshi kunyonga ngwo amu achili akweze nichimwe chuma chipi kuchichi kulingiwa. Alioze kakuzachisa ukweze wo ha kwehuka yuma ya ponde.​—Chilumbununyi 11:9, 10.

16. Shimbi yika yinatale ha chikuma cha kuchiza ufumba? (Tala maliji ali mushi.)

¹⁶ Chipwe mwono wa mwana yoze uchili mu jimo newo uli ni ulemu unji ku meso ja Zambi. Kushakulu mu Izalele, nyi te umwe mutu malemeka umwe kafumba, nyi te kafumba wacho hanji mwana mafwa, ha chino mutu wacho te kakupwa ni mulonga ku meso ja Zambi, iye te katamba kufuta “mwono ha mwono.”c (Tanga Kutuhuka 21:22, 23.) Yehova kakwivwa chinyengo chinji ha chize atu anji akuchiza ufumba ha miaka yeswe hanga apwe ni uhashi wa kununga ni kulinga utanji.

17. Kuchi muhasa kutakamisa mutu yoze wachijile ufumba muze te kanda achinyingika shimbi ja Zambi?

¹⁷ Yika mba mutwamba kuli mapwo waze achijile ufumba muze te kanda achinyingika umwenemwene wa mu Mbimbiliya? Shina Zambi kakwevwila keke? Ewa kakwevwila! Mumu mutu nyi malikonyeka ku shili yenyi ni mbunge yeswe, Yehova mahasa kumukonekena kupalikila ku manyinga ja Yesu. (Samu 103:8-14; A-Efwesu 1:7) Kwamba umwenemwene, Kristu kambile ngwenyi: “Ami nguneza kutambika yivulumunyi alikonyeke, hi akwa ululi ko.”​—Luka 5:32.

18. Kuchi Mbimbiliya yinasolola chikota cha kupwa ni manyonga akushiha?

¹⁸ Yehova kazangile wika hanga twehuke kulinga akwetu upi, alioze kanazange nawa hanga tuchize ku mbunge jetu manyonga eswe akushiha mutu—ngwe kole. Postolo Yoano kambile ngwenyi: “Mweswawo mapwa ni kole kuli ndumbwenyi iye chingalwe.” (1 Yoano 3:15) Mutu wacho, keshi kuvwila wika ndumbwenyi kole, alioze kakuzanga nawa hanga afwe. Kole yacho muyihasa kusoloka ha mahuza hanji ha yuma ya saki yize mamuliongela, kuli iye nyi yuma yacho te yili yamwenemwene kachi mutu wacho katamba kutambula upatwilo wa kufwa kuli Zambi. (Ulevi 19:16; Shimbi Yamuchiali 19:18-21; Mateu 5:22) Kashika chili chilemu kusa tachi hanga tuchize kole yeswayo yize yili ku mbunge jetu!​—Tiangu 1:14, 15; 4:1-3.

19. Kuchi mutu yoze wakukaula shimbi ja mu Mbimbiliya akumona Mukanda wa Samu 11:5 ni A-Fwilipu 4:8, 9?

¹⁹ Atu waze akulemesa mwono ngwe chize Yehova akuulemesa ni kuzanga kupwa mu zango lienyi, kakwehuka upupilo weswawo. Mukanda wa Samu 11:5 unambe ngwo: “Yehova kakuvwila kole waze akuzanga upupilo.” Maliji wano hi shimbi wika ko ya Zambi; kali nawa usongwelo wa ku mwono. Nawa kakukwasa yoze wakuzanga Zambi hanga ehuke yiheho ya mutapu weswawo yize yashinjila mutu ku upupilo. Chizechene nawa, kunyingika ngwetu Yehova iye “Zambi ya sambukila” chakukwasa tuvumbi twenyi hanga apwe ni manyonga ni mbunge ja zango, jipema nawa jatela uchichimieko ni kuneha sambukila.​—Tanga A-Fwilipu 4:8, 9.

20-22. Nyonga lika akwa-Kristu ali nalio hakutwala ku yuma ya hashi, nawa mumu liaka?

²⁰ Ku meso ja Zambi, hashi heswe ha Satana hali ni mulonga wa kumwanga manyinga. Ululikiso wa mafwefwe uze anasolola ha Yisoneko hiunashihi atu anji hamwe ni tuvumbi twa Yehova. (Daniele 8:3, 4, 20-22; Usolwelo 13:1, 2, 7, 8) Akwa-mingoso ni akwa-mana a hashi kakukalakala hamuwika ni manguvulu, kapwa ngwe ngongo hanga alinge amwe mata api ni kutambula fweto linji. Kwamba pundu, “hashi heswe lukombo kuhakupomba mu chiyulo cha mwe chingulungulu.”​—1 Yoano 5:19.

²¹ Tumbanji twa Yesu hi “akwa hashi” ko, kashika, ayo keshi kulinjisa mu yuma ya mafwefwe ni mu jita, nawa keshi kumwanga manyinga.d (Yoano 15:19; 17:16) O kakwimbulula Kristu ha kwehuka upupilo muze akwahungumiona. Alioze kakusolola zango ni kulembela atu jacho.​—Mateu 5:44; A-Roma 12:17-21.

²² Chikwo nawa akwa-Kristu amwenemwene kakwehuka kulinjisa mu ‘Babilonia Yinene,’ chizavu chinene cha ulembelo wa mahuza, yize yili ni mulonga wa kumwanga manyinga. Liji lia Zambi linambe ngwo, “Namwene pwo kanazengewa ni manyinga ja asandu, ni manyinga a yela ja Yesu.” Kashika kanatulweza ngwo: “Atu jami, tuhukenumo.”​—Usolwelo 17:6; 18:2, 4, 24.

23. Yika chinalumbunuka kukatuka mu Babilonya Yinene?

²³ Kutuhuka mu Babilonia Yinene, chinalumbunuka yuma yinji hi kuchiza wika ko jina lie ku ulembelo wacho. Chino nawa chinalumbunuka kwecha ndako jipi jize akwa-ulembelo wa mahuza akutayiza hanji jize akusolola, ngwe, utanji, kulinjisa mu yuma ya mafwefwe ni kupwa ni kuzo ya kufupa kupwa ni upite unji. (Tanga Samu 97:10; Usolwelo 18:7, 9, 11-17) Kanji-kanji ndako yacho yakuneha ponde ya kumwanga manyinga!

24, 25. (a) Mumu liaka Zambi akuvwila atu waze ali ni mulonga wa manyinga keke muze o akulikonyeka? (b) Kuchi chino chakutwiwulula ululikiso wa mashimbu akunyima?

²⁴ Shimbu te kanda tuchitayiza uwayilo wamwenemwene, etu eswe te twakulinga yuma ya hano hashi ha Satana, kashika te tukwete ndambu ya mulonga wa manyinga. Alioze, hitwaputuka kufuliela ku ukuule wa Kristu nawa hitwahana mwono wetu kuli Zambi. Ha chino, twakupwa ni keke ya Zambi nawa iye kakutufunga ni spiritu yenyi mumu hitwalumuna manyonga jetu. (Yilinga 3:19) Ukwaso uno wakutwiwulula yize te yakulingiwa mu mbonge ja uchinyino ku mashimbu akuyima.​—Kwalula 35:11-15; Shimbi Yamuchiali 21:1-9.

²⁵ Kuchi ululikiso uno te wakulingiwa? Nyi umwe ka-Izalele te mashiha mutu chakuhona kunyingika, iye te katamba kuchinyina mu mbonge ja uchinyino. Muze te sopi masopa mulonga wacho, mutu yoze washahanga mukwo cha kuhona kunyingika te katamba kutwama kuzekwene ku mbonge ja uchinyino ndo muze sasedote wa lutwe mafwa. Mba hi iye mapwa ni utuswilo wa kutwama kweka. Chino chili chilweza chingunu cha keke ya Zambi ni ulemu uze iye akusa ha mwono wa atu! Ngwe chize te mbonge ja uchinyino japwile ni kufunga waze te akuchinyinamo, ni ululikiso wa Zambi wa chitapo cha ukuule wa Kristu, uli ukwaso wa kutufunga ahone kutushiha ha kwehuka shimbi ja Zambi chakuhona kuchinyingika hakutwala ku usandu wa mwono ni manyinga. Shina wakulemesa ululikiso wacho? Kuchi muhasa kuulemesa? Jila yimwe yili kusanyika akwenu hanga no atambule ufunge wa Zambi, chipi-chipi ha mashimbu wano mumu “luyinda munene” kanakundama kawashi-washi​—Mateu 24:21; 2 A-Korindu 6:1, 2.

26-28. Kuchi matangwa jetu kali ngwe a profeta Ezekiele, nawa kuchi mutununga mu zango lia Zambi?

²⁶ Yuma yize atu ja Zambi anapalika musono, yinatwiwulula uprofeto wa Ezekiele, yoze Yehova asakwile hanga apwe kalayi wa ku zuwo lia Izalele. Zambi ngwenyi: “Ha kwivwa liji lia mu kanwa liami muatoweza.” Nyi Ezekiele te malengulula mulimo uno aye te mamufwetesa manyinga ja atu waze Yehova mashiha muze te mapatwila Yerusaleme. (Ezekiele 33:7-9) Alioze, Ezekiele kanakononoka, ha chino, kakapwile ni mulonga wa manyinga.

²⁷ Musono tuli ha kamwihi ni mashimbu akusula cha chifuchi cha Satana. Ha chino, Yela ja Yehova kali ni chiteli nawa ni chiwape cha kwambujola sango ja Wanangana hakutwala ku “tangwa lia Zambi lia kukala milonga.” (Izaia 61:2; Mateu 24:14) Shina unalingi chinji mulimo uno ulemu? Postolo Paulu kasele chinji mbunge yenyi ku mulimo wa kwambujola. Ha chino aye yahasa kwamba ngwenyi: “Ngunasambe ku manyinga ja atu eswe. Mumu chalitwaminyine kwambujola kuli yenu mana eswe a Zambi.” (Yilinga 20:26, 27) Chili chilweza chipema kuli yetu!

²⁸ Chochene, twatamba kulinga yuma yinji hanga tununge mu zango lia Tata yetu Yehova, hi wika ko kulemesa mwono ni manyinga ngwe chize Yehova akwaalemesa. Twatamba nawa kupwa asandu ku meso jenyi ngwe chize mutumona mu kapitulu yoze masulaho.