Usolwelo wa Yesu Kristu Alwezele Kuli Yoano
18 Kulutwe lia yino yuma, namwene mungelo mukwo kanahulumuka mwilu, kali ni chiyulo chinene, mba hashi hapangulukile ni uhenya wenyi. 2 Iye wakololokele ni liji linene ngwenyi: “Hiyapuzuka! Hiyapuzuka Babilonia Yinene, hiyapwa zuwo lia andemoniu ni chiswamo cha maspiritu* eswe a luchisa, ni tujila eswe a luchisa waze atu keshi kuzanga! 3 Mumu mavungu eswe hananu vinyu ya ufwatulo wa utanji wenyi, mianangana a hashi hanalingi nenyi utanji,* ni akwa-kulanjisa* a hashi hanalipichisa mumu lia ndundo ja upite wenyi ulemu uze te keshi kuvwila sonyi.”
4 Nevwile liji likwo kukatuka mwilu ngwo: “Tuhukenumo, atu jami, nyi kunwazangile kulichinga ku shili yenyi, nyi kunwazangile nawa kumona lamba lize iye makamona. 5 Mumu shili yenyi hiyalumbama ndo mwilu ni Zambi hewuluka yitanga yenyi ya uhenge.* 6 Mulingenu ngwe chize alingile kuli akwo, ewa, cheswacho chuma alingile mulingenucho yisuho yiali; musenge weswawo aluliekelelemo walwa, neye mululiekelenumo yisuho yiali. 7 Mumu kwamba pundu, iye kakulinangamisa, chikwo nawa kali ni upite uze keshi kuvwila sonyi, kashika iye katamba kumona lamba ni kulila chikolo. Mumu iye kakwamba mu mbunge yenyi ngwenyi: ‘Ngunatwama ngwe mwanangana wa pwo, hi nguli tuliwa ko, mba chichi kalila nilimwe tangwa.’ 8 Kashika yilungo yenyi, kufwa, kulila ni kapunga, muyikeza ha tangwa limuwika wika, iye kumakamwocha liakulu mu kahia, mumu Yehova* Zambi, yoze unamupatwila ngolo akwete.
9 “Mba mianangana a hashi waze alingile nenyi utanji,* ni kutwama hamwe nenyi mu upite wenyi uze te keshi kuvwila sonyi, makalinyenga ni kulila mbimbi hali iye muze makamona mwishi wa kulila chenyi. 10 Makamana kusuku mumu lia woma wa kupinda chenyi ni kwamba ngwo: ‘Mama yami, mama yami mbonge yinene, Babilonia mbonge ya tachi, mumu upatwilo we hiweza ha ola yimuwika!’
11 “Chikwo nawa, akwa-kulanjisa a hashi makalila ni kunenganyana mumu hali iye, mumu kukuchi kapwa nawa yoze makalanda mingoso yo yeswe, 12 oru yeswe, ni prata, ni mawe alemu, ni tukanga apema, ni mahina a linyu yipema, ni a ufungo, ni a seda, ni achila; yuma yeswe yize akulinga ni mitondo ya vumba lipema ni yuma yeka ni yeka yakulinga ni mazo a njamba; ni ya mitondo yilemu yahiana, ni ya unengu, ni ya utale, ni ya mawe a ulombo weka ni weka; 13 ni kanela, ni milungo ya ku India, ni insensu, ni maji a vumba lipema, ni libano, ni vinyu, ni maji a mutondo wa olevwe, ni wunga wa fufunuka, ni tiliku, ni ngombe, ni mapanga; ni tuvwalu, ni matemba, ni ndungo ni miono* ya atu. 14 Ewa, yena Babilonia, yuma yeswe yipema yize wazangile* hiyakuchina, upite we weswe ni uhenya we weswe hiyakutoka. Kuuchi keza kayiwana nawa.
15 “Ni akwa-kulanjisa yuma yino, waze alipichishile mumu hali iye, makamana kusuku ni woma wa kupinda chenyi, mba kumakalila ni kunenganyana, 16 ni kwamba ngwo: ‘Mama yami, mama yami, mbonge yinene yinazala mahina a linyu, ni a ufungo, ni achila, walejimine ni oru ni mawe alemu ni tukanga apema, 17 mumu upite wenyi weswe, yawonwona ha ola yimuwika!’
“Tupitau eswe a maulungu, ni eswe waze akwenda mu maulungu, ni tahwili, ni eswe waze akukalakalila mu kalunga-lwiji, makamana kusuku 18 ni kukololoka ha kumona mwishi wa kuwema chenyi ngwo: ‘Mbonge yika yalifwa ni mbonge yinene?’ 19 O makalikuwa mavu ku mitwe ni kukololoka ni kulila, ni kunenganyana ngwo: ‘Mama yami, mama yami, mbonge yinene, yize upite wamo wapichishile eswe waze apwile ni maulungu mu kalunga-lwiji, hayonwona ha ola yimuwika!’
20 “Wahililenu yenu mwilu, ni yenu asandu hamwe ni apostolo ni aprofeta, mumu Zambi hanayipatwila mumu lia yuma yize alingile hali yenu!”
21 Mba mungelo wa ngolo wanjile liwe lialifwa ni liwe linene lia kutwa nalio, walinyashile mu kalunga-lwiji, ni kwamba ngwenyi: “Chenacho makanyasa hashi Babilonia ye mbonge yinene, chocho kechi kayiwana nawa. 22 Muli yena Babilonia, kechi kevwamo nawa liji lia akwa-kwimba tulialia, ni ngimba, ni akwa-kwimba ndembo, ni akwa-kwimba yitavwi. Muli yena, kechi kawanamo nawa mukwa-milimo niumwe chipwe kwivwamo nawa mishindo ya liwe lia kutwa nalio. 23 Muli yena, ndeya kuyichi katemukamo nawa, kechi kevwamo nawa liji lia sandungi hanji lia nandungi; mumu akwa-kulanjisa je apwile anene-anene a hano hashi, chikwo nawa, wongele mavungu eswe ni yitanga ye ya yipanda-panda.* 24 Ewa, muli yena, awanyinemo manyinga ja aprofeta, ja asandu, ni ja eswe waze ashihile hano hashi.”