Yilinga ya Apostolo
24 Kulutwe lia matangwa atano, Ananiya mwata wa asasendote yapalumuka ni amwe makulwana hamwe ni umwe mukwa-kwahanjikila avuluka ngwo, Tertulu. Mba yasolola mulonga uze asumine Paulu kuli Nguvulu. 2 Muze amusanyikine, Tertulu yaputuka kusuma Paulu mulonga ngwenyi:
“Yetu twakutwama ni uhwimino mumu hali yena nguvulu wetu, ku mana je wakuyula kanawa milonga ya ku vungu lietu, 3 Nguvulu Fwelishia ha mashimbu eswe ni ku yihela yeswe twakwiwuluka chikuma chino ni usakwililo. 4 Chazangile kunulalwisa, kashika ngunaliumbu kuli yena utwivwe kama hakepe kulita ni upeme wa mbunge. 5 Mumu hitunawane yono lunga koki, mukwa-kuvundula A-Yunda eswe mu yifuchi yeswe ya hashi. Iye kali umwe wa kuli akwa-lutwe a mbunga ya Nazare.’ 6 Iye kesekele nawa kukisa tembele, alioze yetu yitumukwata. 7* —— 8 Kashika nguvulu wetu, muze munumusopesa, munupwa ni shindakenyo ya yuma yeswe yize tunamusumina mulonga.”
9 Chocho ni A-Yunda no yatayiza mulonga wacho, ni kushindakenya ngwo yuma yacho yapwile yamwenemwene. 10 Muze mukwa-kuyula hatenya Paulu ni mutwe hanga ahanjike, Paulu yamba ngwenyi:
“Ngunanyingika ngwami yena uli ngaji mukulu wa vungu lino, kashika, ngunahanjika hanga ngulisambise. 11 Ngwe chize yenu nguvulu munuhasa kuhengwola, kanda kuchipalika matangwa kuhiana 12 chize muze nakandukile ku Yerusaleme mu kuwayila. 12 O kanguwanyine ngunazwele ni umwe mutu mu tembele, chipwe kuvundula mbunga mu masunangonga hanji ku chihela chikwo mu mbonge. 13 Chikwo nawa o kechi kuhasa kunulweza atu waze angumwene ngunalingi yuma yize o anangulamikiza ha mashimbu wano. 14 Alioze ngunatayiza kumeso jenu ngwami, nakuwayila Zambi ya tushakulu twetu ni kukaula jila yize o akwamba ngwo ya mahuza. Chikwo nawa, nakufuliela yuma yeswe yize yinalite ni Shimbi ya Zambi ni yize yinasonewa mu mikanda ya Aprofeta. 15 Nguli ni kutalatala muli Zambi, kutalatala chize wano malunga no ali nacho ngwami, kumukukapwa uhindukilo wa akwa-ululi ni wa yihenge. 16 Kashika nakulikolweza hanga ngupwe ni mbunge yipema kumeso ja Zambi ni kumeso ja atu. 17 Mba kulutwe lia miaka yinji, yingwiza mu Yerusaleme hanga nguhane yawana* kuli akwa-vungu liami ni kulambula milambu kuli Zambi. 18 Muze te ngunatale ha yikuma yino, o yanguwana mu tembele te hinalipemesa kulu, alioze chakapwile mukachi ka mbunga chipwe kuvundula atu. Ewa, hapwile A-Yunda amwe a mu mbonge ya Azia, 19 waze te atamba kupwa hano kumeso ja yenu nguvulu, hanga angusume mulonga, nyi chamwenemwene lume mulonga nguli nawo, 20 nyi ka malunga wano asolole chitela chize awanyine muli yami muze namanyine kumeso ja Akwa-Kuyula jo. 21 Chuma chimuwika lume nalingile muze namanyine kumeso jo, yingukololoka ngwami: ‘Nunangusopesa musono mumu nakufuliela ngwami, afu kumakahinduka!’”
22 Alioze amu Fwilishia te ananyingika kanawa hakutwala ku Jila ya Mwene, yeta hanga ashimbwile ni kwamba ngwenyi: “Muze Lishia mwata wa maswalale meza, mba mungukapatula milonga yenu.” 23 Fwilishia yahana shimbi kuli kapitau wa maswalale ase Paulu mu zuwo lia ususu, alioze amwehe yimwe ndambu ya utuswilo ni kutayiza hanga atu jenyi amukwase ha yize mafupiwa.
24 Kulutwe lia matangwa amwe, Fwilishia wahetele hamwe ni mukwo-pwo Ndrusela yoze te Ka-Yunda. Yatuma kusaka Paulu ni kumwivwa muze te anahanjika hakutwala ku ufulielo wenyi, muli Kristu Yesu. 25 Alioze muze Paulu aputukile kuhanjika hakutwala ku ululi, kusuula ni upatwilo uze te muuwiza, Fwilishia yevwa woma ni kwamba ngwenyi: “Haliapwila yako, alioze muze mungupwa ni uhashi mungutuma kukusanyika cheka.” 26 Iye yasa nawa mbunge ngwenyi hanji Paulu mamwaha mbongo. Kashika yatuma kumusanyika ha yisuho yinji ni kuhanjika nenyi. 27 Ha kupalika cha miaka yaali, Fwilishia yamusalakana kuli Porshiu Fesetu, alioze amu Fwilishia azangile kupwa ni utayizo wa A-Yunda yahichika Paulu mu zuwo lia ususu.