Asonekene Mateu
7 “Litwaminenu kupatwila* akwenu, hanga ni yenu ahone kunupatwila; 2 mumu ni upatwilo uze nwakupatwila nawo akwenu, ni yenu we makanupatwila nawo. Ni cheseko chize nwakwesekela nacho akwenu, ni yenu che makanwesekela nacho. 3 Mba, mumu liaka unatale kachiswaswa kakehe kali mu liso lia ndumbwe, alioze kuwamwene lumutondo* luze luli mu liso lie? 4 Hanji kuchi muhasa kulweza ndumbwe ngwe, ‘Mana ngukuchize kachiswaswa kali mu liso lie,’ alioze yena mwene kuwamwene lumutondo luze luli mu liso lie? 5 Chilembekese! Lianga kuchiza lumutondo luze luli mu liso lie, mba uhase kumona kanawa chize muchiza kachiswaswa kaze kali mu liso lia ndumbwe.
6 “Kanda nuhana yuma yisandu kuli tuwa, kanda numbila mawe jenu a ndando kumeso ja ngulu, ahone kwaliata ni kunutewulukila hanga anusume.
7 “Nungenu ni kwita mba kumakanwaha; nungenu ni kufupa mba kumunukawana; nungenu ni kungongwela mba kumakanwazulwila; 8 mumu mweswawo meta, kumamwaha, yoze mafupa, kumawana; ni mweswawo mangongwela, kumamwazulwila. 9 Iya wa kuli yenu, nyi mwanenyi mamwita lumbolo mamwaha liwe? 10 Hanji nyi mamwita yishi mamwaha lunoka?* 11 Kashika, nyi yenu, chipwe ngwe nuli atu api nunanyingika kuhana yuma yipema kuli ana jenu, kuma Tatenu yoze uli mu malilu kechi kuhana yuma yipema kuli waze mamwitayo nyi?
12 “Kashika, yuma yeswe nunazange hanga akwenu alinge hali yenu, ni yenu nawa yilingenu hali ayo. Mumu yino ye anambe mu Shimbi ni kuli Aprofeta.
13 “Njilenu ku chikolo chikehe, mumu chinene che chikolo ni yinene ye jila, yize yakutwala ku kufwa* ni waze akunjilamo anji; 14 alioze chikolo chikehe ni jila yikehe ye yakutwala ku mwono, ni waze akuyiwana akehe.
15 “Kanyamenu ni aprofeta a mahuza waze akusoloka kuli yenu ni chifwa cha panga, alioze muchima kali mikuza.* 16 Ku yitanga* yo, munukaanyingika. Shina atu mahasa kuhela mihuko ya vinyu* ku mingonga? Hanji kuhela makuyu* ku mikalale? 17 Chizechene nawa, mutondo upema wakwima mihuko yipema, alioze mutondo upi wakwima mihuko yipi. 18 Mutondo upema chikalu kwima mihuko yipi, chipwe mutondo upi chikalu kwima mihuko yipema. 19 Mutondo weswe uze kuushi kwima mihuko yipema, kakuupatula ni kuukonga mu kahia. 20 Pundu, atu wano, munukaanyingikina ku yitanga* yo.
21 “Hi eswe ko akungusanyika ngwo, ‘Mwene, Mwene,’ makanjila mu Wanangana wa mu malilu, alioze waze wika akulinga upale wa Tata yoze watwama mu malilu. 22 Ha tangwa liacho, anji makamba kuli yami ngwo: ‘Mwene, Mwene, ngwami tunakaprofeteza mu jina lienu, ngwami tunakahuma andemoniu mu jina lienu, ngwami twalingile yikomokeso yinji mu jina lienu? 23 Alioze, yami mungukaakumbulula ngwami: ‘Chanunyingikine! Katukenu kuli yami, yenu waze kunushi kwononokena shimbi!’
24 “Kashika, mweswawo mevwa wano maliji jami ni kwononokena, mapwa ngwe lunga chikanyame yoze watungile zuwo lienyi ha liwe. 25 Muze vula anokene, mihuji yejile ni fuji ya tachi yalambile ku zuwo lize, alioze kuliapuzukile, mumu ha liwe alitungile. 26 Chikwo nawa, mweswawo mevwa wano maliji jami, alioze kechi kwakaula, mapwa ngwe lunga chihepuke yoze watungile zuwo lienyi ha lusenga. 27 Muze vula anokene, mihuji yejile, ni fuji ya tachi yalambile ku zuwo lize, mba liapuzukile ni kupuzuka chalio chapwile chinene.
28 Muze Yesu ahwishile kuhanjika maliji wano, mbunga yawahilila chinji ha chize apwile ni kulongesa, 29 mumu waalongesele ngwe yoze uli ni chiyulo hi ngwe alongeshi a shimbi ko.