Mukanda Wamuchiali Kuli Timoteu
2 Kashika yena mwanami, kupalikila mu chawana cha keke chize chili muli Kristu Yesu, nunga ni kutakama; 2 hakutwala ku yuma yize wevwile kuli yami ni kuli yela anji, yilongese kuli malunga ashishika, hanga no ajame akayilongese kuli akwo. 3 Amu uli swalale mupema wa Kristu Yesu, tayiza kumona lamba. 4 Mutu yoze wakulinga mulimo wa uswalale, keshi kulinjisa mu mingoso hanga apemene kuli yoze wamupwishile swalale. 5 Chipwe mu yiheho, mutu kakumusa chipangula nyi makaula kanawa shimbi ya yiheho. 6 Njimi yoze wakukalakala chinji mwe watamba kulia chitangu mihuko ya mu munda wenyi. 7 Nyonga mashimbu eswe ha yuma yize nakuhanjika; Mwene makakwaha ulumbunwiso* ha yuma yeswe.
8 Iwuluka ngwe Yesu kamuhindwishile hakachi ka afu, kapwile wa ku munyachi wa Ndawichi kulita ni sango jipema jize nakwambujola, 9 jize ngunamwena lamba ni kungukasa mu malenge ngwe chingulungulu, alioze liji lia Zambi kulishi lia kukasa. 10 Kashika, ngunanungu ni kunyongonona mu yuma yeswe mumu lia waze atongwele, hanga ni ayo azuke ulamwino uze wakwiza kupalikila muli Kristu Yesu, ni uhenya wa mutolo. 11 Maliji wano kali amwenemwene, twatamba kwajikijila: Nyi hitunafu nenyi, che kwamba, ni yetu mutukapwa ni mwono hamwe nenyi; 12 nyi mutununga ni kunyongonona, ni yetu mutukayula hamwe nenyi, nyi mutulikalaye, neye makalikala yetu; 13 nyi mutuhona kushishika, iye manunga ni kushishika, mumu kechi kuhasa kulikala iye mwene.
14 Nunga ni kwewulula yuma yino, ni kwalongesa kumeso ja Zambi, hanga ahone kulihangujola mumu lia maliji, chuma chize kuchishi ulemu, chakupinjisa waze akuchivwa. 15 Sako tachi hanga upwe ni utayizo kumeso ja Zambi, ngwe mukwa-kukalakala yoze keshi nichimwe muchimuvwisa sonyi, yoze wakukalakala kanawa ni liji lia umwenemwene. 16 Litune pande jamokomoko jize jakulimika ni yuma yisandu, mumu mujitwala atu hanga alinge yuma yinji yipi, yize muyaahandununa kuli Zambi, 17 maliji jo malitanda ngwe chilonda chinene.* Hemeneu ni Fwiletu kali hakachi ka atu jacho. 18 Atu wano hanapianguka mu umwenemwene, kakwamba ngwo uhindukilo hiunalingiwa kulu, mba kanapihisa ufulielo wa amwe. 19 Chipwe chocho, fundamentu yikolo ya Zambi yinanungu ni chijikilo chino ngwo, “Yehova* kananyingika atu jenyi,” chikwo ngwo, “Mweswawo matambika jina lia Yehova,* eche yitanga yipi.”
20 Mu zuwo linene, kumushi kupwa wika yikwachilo ya oru ni ya prata, alioze mwakupwa nawa ya mapaya ni ya uma, yimwe yapwa ya milimo yilemu, yikwo ya milimo yilelu. 21 Kashika, nyi mutu masosoloka ku yikwachilo yino ya kasula, mapwa chikwachilo cha milimo yilemu, musandu, mulemu kuli mwene wenyi, mapwa wakululieka kanawa hanga alinge mulimo weswe upema. 22 Kashika, china usolo wa ukweze, alioze fupa ululi, ufulielo, zango ni sambukila hamuwika ni waze akutambika Mwene ni mbunge yitoma.
23 Chikwo nawa, litune pande ja uhepuke, jize kujishi mashina ni masongo, mumu unanyingika ngwe jakuneha mbwanja. 24 Ndungo wa Mwene katambile kuzwela, alioze katamba kupwa chimbovu kuli atu eswe, mukwa-kujama hanga alongese, mukwa-kulihumikiza muze mamulinga yuma yipi, 25 mukwa-kulihumikiza ha kulongesa waze ali ni yitanga yipi. Hanji Zambi maakwasa hanga alikonyeke ni kupwa ni chinyingi cha umwenemwene, 26 chino muchaakwasa hanga alikonyeke, matusuka mu muheto wa Ndiapu, mumu hanozo kuli Ndiapu hanga alinge upale wenyi.