Yuma Yino, Yikunjike Kuli Malunga Ashishika

1, 2. Kuchi atu anji akwivwa hakutwala ku mulimo wo?

ATU anji kakwivwa ngwe kali alemu hanji ka ha mulimo uze akulinga ku mwono wo. Ku minyachi yinji atu nyi kanazange kunyingika umwe mutu, kanji-kanji, kakumuhula ngwo: “Mulimo uka wakulinga ku mwono we?”

² Mbimbiliya mashimbu amwe yakutongola atu ni mulimo uze apwile ni kulinga. Chakutalilaho, yakwamba ngwo, “Mateu mukwa-kufwetesa lijimu” ‘Semone, mukwa kukotongola malambu,’ nawa ngwo “Luka, mbuki wa zango.” (Mateu 10:3; Yilinga 10:6; A-Kolosu 4:14) Ha mashimbu akwo, Mbimbiliya yakutongola yiteli yize atu apwile nayo mu mulimo wa Yehova. Achinyonga hali Mwanangana Ndawichi, Profeta Eliya, ni hali postolo Paulu. Malunga wano kalemesene yiteli yize Yehova aehele. Chizechene nawa, ni yetu twatamba kulemesa chiteli cheswacho tuli nacho mu mulimo wa Yehova.

 3. Mumu liaka mandumbu waze hashinakajiwa atamba kulongesa akweze? (Tala chizulie ha uputukilo.)

³ Twakuzanga chinji kulingila Yehova ni kulemesa yiteli yetu. Anji akuli yetu twakuwahilila chinji ni mulimo wetu, kashika twakusa tachi hanga tununge ni kulinga mulimo wacho. Alioze chaluyinda, muze atu akushinakajiwa, ayo keshi kuhasa kulinga yuma yeswe ngwe muze apwile akweze. (Chilumbununyi 1:4) Chino chakuneha yikatalo yinji kuli tuvumbi twa Yehova. Musono, mulimo wakwambujola unayi ni kwoka chinji, nawa ululikiso wa Yehova unazachisa tecnologia yaha hanga utwale sango lipema hashi heswe. Alioze ha mashimbu amwe, muchihasa kukaliwa chinji kuli mandumbu waze hashinakajiwa kunyingika mitapu yino yaha yakulingilamo yuma. (Luka 5:39) Chikwo nawa, atu nyi hashinakajiwa kakuhonga chinji ni kuhona tachi. (Yishima 20:29) Kashika, chili kusolola zango nawa chipema muze mandumbu waze hashinakajiwa malongesa akweze hanga apwe ni yiteli yinji mu ululikiso wa Yehova.—Tanga Samu 71:18.

 4. Mumu liaka amwe akwete ukalu wakuhana yiteli kuli akwo? (Tala kasha “Mumu Liaka Muchihasa Kupwa Chikalu Kuhana Yiteli Kuli Akwetu.”)

⁴ Kanji-kanji hi chashi ko kuli waze akwete yiteli kuhana yiteli kuli akweze. Chino muchihasa kuneha yinyengo yinji kuli mandumbu ha kuhona milimo yize akuzanga chinji. Chino muchihasa nawa kwaanehena yikola ku mbunge mumu lia kwecha milimo yilemu yize akuwahilila nayo chinji. Hanji mahasa kulipikala mumu ngwo nyi ayo kasongwele milimo yacho, milimo kuyishi kwenda kanawa. Nawa kota kakwivwa ngwo ayo keshi ni mashimbu akulongesa akwo. Ha mashimbu jacho, akweze no katamba kuhwima mbunge muze keshi kwaaha yiteli yinji.

 5. Yihula yika mutulilongesa ha mutwe uno?

⁵ Mba mumu liaka chili ni ulemu mandumbu waze hakola kukwasa akweze hanga no apwe ni yiteli yinji? Kuchi ayo mahasa kuchilinga? (2 Timoteu 2:2) Nawa mumu liaka akweze atamba kusolola yitanga yalita muze anakalakala hamwe ni mandumbu waze hakola, waze akwete yakulitakana nayo yinji ni kulilongesa kuli ayo? Mba tuwane makumbululo, tutalenu chize Mwanangana Ndawichi akwashile mwanenyi Solomone ha mulimo ulemu chinji uze apwile nawo.

 6. Yika Mwanangana Ndawichi azangile kulinga? Yika Yehova amulwezele?

⁶ Ha miaka yinji, Ndawichi kapalikile mu yihungumiona ni kututuluka ku yihele yeka ni yeka. Hachino, muze apwile Mwanangana, aye yapwa ni zuwo lipema chinji. Kashika iye yalweza profeta Natane ngwenyi: “Tala, yami natwama mu zuwo lia sedru alioze mushete wa usendo wa Yehova watwama mu mbalaka.” Ndawichi kazangile kutungila Yehova tembele yipema. Chocho, Natane yamulweza ngwenyi: “Yeenu nulinge yeswe yize yili mu mbunge yenu, mumu Zambi hwali hamuwika ni yenu.” Alioze Yehova kakazangile chocho. Iye yalweza Natane hanga alweze Ndawichi ngwenyi: “Yena kuchi kungutungila zuwo lia kutwama.” Chipwe chocho, Yehova yalakenya Ndawichi ngwenyi kumapwa nenyi hamuwika mashimbu eswe. Ndawichi yanyingika ngwenyi, umwe wakuli ana jenyi mwe te matunga tembele yacho. Mba kuchi Ndawichi evwile?—1 Sango ja Mianangana 17:1-4, 8, 11, 12; 29:1.

 7. Kuchi Ndawichi evwile ha usongwelo uze amuhele kuli Yehova?

⁷ Pundu lume Ndawichi kazangile chinji kutunga tembele ya Yehova, kashika kota kevwile yinyengo yinji. Chipwe chocho, aye kakwashile mulimo uze te mwanenyi Solomone malinga. Ndawichi yakwasa kukunga akwa-milimo nawa yakunga utale, unengu, prata, oru, ni mapaya. Aye kakapwile ni kulipikala hakutwala kuli yoze te mazuka lufuma wa kutunga tembele, yize kulutwe ya yivuluka ngwo tembele ya Solomone. Alioze yakolweza Solomone, hakumwamba ngwenyi: “Mwanami, Yehova akapwe hamwe ni yena akakuwahise. Tunga zuwo lia Yehova Zambi ye kulita ni liji lienyi.”—1 Sango ja Mianangana 22:11, 14-16.

 8. Yika kota yalingishile Ndawichi kunyonga ngwenyi, Solomone te kanda achipwaho ha kutunga tembele? Alioze yika Ndawichi alingile?

⁸ Tanga 1 Sango ja Mianangana 22:5. Ndawichi kota kanyongene ngwenyi, Solomone te kanda achipwaho ha kusongwela mulimo wacho ulemu. Mumu tembele te yatamba kupwa ‘yipema ya lufuma’ nawa Solomone te ‘uchili mukweze te kanda achinyingika yuma yinji.’ Alioze Ndawichi kanyingikine ngwenyi, Yehova te makwasa Solomone hanga alinge mulimo uno ulemu. Kashika Ndawichi alingile yeswe yize te mahasa hanga akwase Solomone kululieka mulimo wacho ulemu.

 9. Kuchi mandumbu waze hashinakajiwa mahasa kuwahilila hakuhana yiteli kuli akwo? Hana chilweza.

⁹ Mandumbu waze hashinakajiwa katambile kwivwa yinyengo muze mukufupiwa ayo kuhana yimwe yiteli kuli akweze. Yetweswe tunanyingika ngwetu chuma chilemu chinji musono, chili kulinga mulimo wa Yehova. Kashika kulongesa akweze apwe ni yiteli muchikwasa hanga mulimo wa Yehova wende kanawa. Achinyonga ha chilweza chino. Muze te uchili kanuke, kota wapwile ni kutala chize tatenu te akwendesa mashinyi jenyi. Muze hiwakola, yakulweza chize iye te akulinga. Kulutwe yiufupa kupwa ni mukanda wakwendesa nawo mashinyi, chocho yiuputuka kwendesa mashinyi ukawe. Chipwe chocho, nihindu tatenu te kakukwaha yiyulo. Ha mashimbu amwe, ni yena te wakwendesa. Alioze muze tatenu hashinakajiwa, ena yiuputuka kwendesa chinji. Shina tatenu te kakwivwa kupihia hachino? Ka, iye kota te kakuwahilila hakukumona unamumbate mu mashinyi. Chizechene nawa, mandumbu waze hashinakajiwa kakuwahila ha kumona akweze waze ayo akulongesa malinga kanawa milimo mu ululikiso wa Yehova.

10. Kuchi Mose evwile hakutwala ku kupwa ni lufuma nawa ni chiyulo?

¹⁰ Twatamba kukanyama hanga tuhone kwivwila akwetu ukwa hanji chipululu ha milimo yize alinayo. Mutuhasa kulilongesa ha chize Mose evwile muze amwe A-Izalele aputukile kukalakala ngwe aprofeta. (Tanga Kwalula 11:24-29.) Yoshua kazangile kwaakinda, alioze Mose yamwamba ngwenyi: “Unaavwila ukwa mumu hali yami nyi? Ngunazange kachi atu eswe a Yehova kapwa aprofeta, hanga Yehova ase hali ayo spiritu yenyi!” Mose kanyingikine ngwenyi, Yehova te kanasongwela mulimo wenyi. Shimbu afupe lufuma wenyi mwene, Mose kazangile hanga atu eswe a Yehova apwe ni yiteli. Yika mba mutwamba hali yetu? Shina twakuwahilila muze akwetu matambula yiteli mu mulimo wa Yehova?

11. Yika umwe ndumbu anambe hakutwala ku kuhana yiteli kuli akwo?

¹¹ Kuli mandumbu anji waze akukalakala chinji mu ululikiso wa Yehova ha miaka yinji nawa ayo kakulongesa akweze hanga apwe ni yiteli yinji. Chakutalilaho, tutalenu chilweza cha ndumbu Petulu. Ha miaka 74 mu mulimo wa shimbu lieswe, aye kakalakalile miaka 35 ku umwe mutangu mu Europa. Ha miaka yinji, aye yakalakala ngwe kalayi mu Chipatulo cha Mulimo. Chocho mulimo wacho yauhana kuli Paulu, umwe mukweze yoze Petulu alongesele. Shina Petulu kevwile chinyengo mumu lia kuhana mulimo wacho kuli mukwo? Ka. Aye yamba ngwenyi: “Nakuwahilila chinji ha kumona mandumbu waze akutambula fumbo matayiza yiteli yinene-yinene ni kulinga kanawa milimo yo.”

12. Yika mutuhasa kulilongesa ha chilweza cha Rehoboame?

¹² Muze Rehoboame mwana wa Solomone apwile mwanangana, aye yeta chiyulo kuli makulwana hanga amulweze chize atamba kulinga mulimo wenyi waha. Alioze aye yalituna kukaula chiyulo chacho! Hachino, yakaula yiyulo ya akweze waze akolele no hamuwika. Chino chanehene lamba linji. (2 Sango ja Mianangana 10:6-11, 19) Yika twalilongesa ha chilweza chino? Twalilongesa ngwetu, chili chipema kwita yiyulo kuli mandumbu waze hakola nawa waze ajama kuhiana yetu. Akweze katambile kupwa ni mbunge ya kalusulusu ha kulinga yuma ngwe chize apwile ni kuyilinga ku mashimbu akunyima. Alioze, katamba kulemesa yiyulo ya mandumbu waze hakola. Akweze nawa katambile kulipupula kunyonga ngwo mutapu uze mandumbu waze hakola akulingila yuma hi upema ko.

13. Nyonga lika akweze atamba kupwa nalio muze anakalakala hamwe ni mandumu waze hakola?

¹³ Ha mashimbu amwe, akweze kakwaaha yiteli ya kusongwela mulimo uze te akulinga kuli mandumbu waze hakola, nawa waze ajama chinji. Muchilita akweze kulilongesa kuli mandumbu wano a makulwana. Ha chilweza chize twatongola, muze Paulu asalakanyine Petulu ha kupwa kalayi mu chimwe chipatulo ku Mbetele, aye yamba ngwenyi, “te nakusa shimbu hanga ngukaule yiyulo ya Petulu, nawa nakukolweza akwetu mu chipatulo chetu hanga no alinge chochene.”

14. Yika twalilongesa hali Timoteu ni postolo Paulu hakukalakala hamuwika?

¹⁴ Timoteu kapwile chinji mukweze kuhiana postolo Paulu, chipwe chocho ayo kakalakalile hamuwika ha miaka yinji. (Tanga A-Fwilipu 2:20-22.) Paulu yalweza mandumbu amu Korindu ngwenyi: “Natumine kuli yenu Timoteu, yoze wapwa mwanami wa zango ni wamwenemwene muli Mwene. Iye makanwiwulula majila jami aze ali muli Kristu Yesu, chizechene ngwe nakulongesa kweswe mu yikungulwila yeswe.” (1 A-Korindu 4:17) Hano, mutuhasa kumona pundu ngwetu, Paulu ni Timoteu kakalakalile kanawa hamuwika nawa kalikwashile umwe ni mukwo. Paulu kasele shimbu hanga alongese Timoteu ‘majila jenyi aze ali muli Kristu,’ nawa Timoteu kalilongesele kanawa. Paulu kapwile sepa mupema wa Timoteu nawa kapwile ni shindakenyo ngwenyi aye te mafunga kanawa mandumbu ni mapangi amu Korindu. Makulwana amu chikungulwila no mahasa kwimbulula postolo Paulu muze analongesa mandumbu akwo hanga asongwele chikungulwila.

15. Kuchi A-Roma 12:3-5 muuhasa kutukwasa hanga tukumbe kwalumuka chize chinalingiwa?

¹⁵ Tuli ha mashimbu alemu chinji. Ululikiso wa Yehova hano hashi unakola mu majila anji. Chino chinalumbunuka ngwo yuma muyinunga ni kwalumuka. Kwalumuka chacho chimwe muchitukwata ku mwono wetu nawa kuchichi kupwa chashi kuchikumba. Chuma muchitukwasa chili kulikehesa ni kulihulikila ha yuma yipema mu mulimo wa Wanangana kuhiana kulihukila ha yize mutuhasa kuzanga ku mwono wetu. Nyi twalinga chocho, mutununga ni kulivwashana. Paulu yasonekena akwa-Kristu amu Roma ngwenyi: “Ngunambe kuli mutu mweswe hakachi kenu ngwami, kanda alinyongena kuhiana chize chamutamba kunyonga.” Kusulaho, aye yalumbununa ngwenyi, ngwe chize yalisa yihanda ya mujimba wetu, hita ndumbu mu chikungulwila kali ni mulimo walisa.—A-Roma 12:3-5.

16. Yika hita mukwa-Kristu mahasa kulinga hanga afunge sambukila ni kulinunga mu ululikiso wa Yehova?

¹⁶ Tuvumbi twa Yehova eswe kakuzanga kukwasa mulimo wa Wanangana nawa kakulinga mulimo weswawo akwaaha. Mandumbu waze hakola mahasa kulongesa akweze. Mandumbu waze achili akweze mahasa kupwa ni yiteli yinji mu ululikiso wa Yehova nyi mapwa akwa-kulikehesa hamwe ni vumbi. Nawa mandumbu waze hanambate kakuwahilila ha ukwaso wa mapwo jo muze yimwe muyalumuka ku mwono wo. Mapwo jacho mahasa kwimbulula Prisila, yoze wakalakalile ni ushishiko weswe hamwe ni mukwo-lunga, Akwila.—Yilinga 18:2.

17. Mulimo uka Yesu alongesele tumbaji twenyi kulinga?

¹⁷ Yesu kahichikile chilweza chipema ha kulongesa akwo ni mbunge yeswe. Yesu kanyingikine ngwenyi, akwo te manunga ni kulinga mulimo wenyi. Chochene, aye kanyingikine ngwenyi tumbaji twenyi te akwa-shili. Alioze kapwile ni kwaajikijila ngwenyi te matwala sango lipema hashi heswe kuhiana chize iye alingile. (Yoano 14:12) Iye kaalongesele kanawa, nawa ayo kambulwile sango lipema ku yifuchi yeswe kuze ahashile kuheta.—A-Kolosu 1:23.

18. Mulimo uka mutukapwa nawo kulutwe lia matangwa? Mulimo uka tuli nawo haliapwila?

¹⁸ Muze Yesu afwile, Yehova yamuhindwisa nawa yamwaha milimo yinji hamwe ni wata “helu lia mawanangana eswe ni yiyulo yeswe, ni tachi jeswe, ni wene weswe.” (A-Efwesu 1:19-21) Nyi mutufwa ngwe tuvumbi ashishika a Yehova shimbu Armagedone kanda yiza, iye makatuhindwisa nawa mutukapwa ni milimo yinji mu chifuchi chaha. Alioze haliapwila yetweswe tuli ni mulimo ulemu chinji wa kwambujola sango lipema ni kutayisa tumbaji. Chipwe ngwe tuli akweze hanji tushinakaji, yetweswe mutuhasa kununga “matangwa eswe mu milimo ya Mwene.”—1 A-Korindu 15:58.