Kuli A-Roma
9 Ngunambe umwenemwene muli Kristu; chahanjikile mahuza, mbunge yami yakusongwela kuli spiritu yisandu yinashindakenya ngwo: 2 Chinyengo chinji ngunevu mu mbunge ni yikola yize kuyishi kuhwa. 3 Nyi muchilita, ngunazange anguhandunune ni Kristu ngwe mukwa-kushingiwa mumu hali mandumbu jami, atu a ku munyachi wami, 4 A-Izalele. O kali waze Zambi asakwile hanga apwe ana jenyi. Zambi yaasolwela uhenya wenyi, yalinga no usendo, yaaha Shimbi, yaaha yilakenyo ni chiwape cha kumulingila. 5 O kali a ku munyachi wa tulamba twetu, kuli ayo nawa kwe kwasemukinyine Kristu ku musunya. Zambi yoze uli helu lia yuma yeswe akamuhalise ku miaka yeswe. Amene.
6 Alioze chilakenyo cha Zambi chahonene. Mumu hi eswe ko a ku munyachi* wa Izalele, ali lume “A-Izalele.” 7 Hi eswe ko a ku munyachi* wa Apalahama kali ana jenyi; alioze Zambi kalwezele Apalahama ngwenyi: “Yoze makavuluka ngwo munyachi we, makeza kupalikila muli Izake.” 8 Chino chinalumbunuka ngwo, ana ja Apalahama a ku musunya, hi ana ja Zambi ko. Alioze, ana waze akusemuka kulita ni chilakenyo, e akuvuluka ngwo munyachi.* 9 Mumu Zambi kalakenyene ngwenyi: “Ha mwaka muwizaho ha shimbu ngwe lino, mungukeza, mungukawana Sara hasema mwana wa lunga.” 10 Chino che chalingiwile nawa kuli Rebeka muze asesekele ufumba wa ana-pasa kuli kalamba ketu Izake. 11 Shimbu o te kanda asemuka ni kulinga chimwe chuma chipema hanji chipi, Zambi yalianga kusolola yoze te masakula. Mumu iye keshi kusakula kulita ni yitanga ya mutu, alioze kakusakula yoze mazanga. 12 Zambi yalweza pwo ngwenyi: “Mukulwana makapwa ndungo ya kanuke.” 13 Ngwe chize chinasonewa ngwo: “Hingunazange Yakomba, alioze Esau hingunamuvwila kole.”
14 Mba kuchi mutwamba? Shina Zambi kali chihenge nyi? Ka, hi chocho ko! 15 Mumu Zambi hanambe kuli Mose ngwenyi: “Mungusolola zango kuli yoze mungusakula, mungusolola keke kuli yoze munguzanga kusolwela keke.” 16 Chino kuchatalile ha kuzanga cha mutu hanji ha tachi jenyi, alioze chinatale ha keke ya Zambi. 17 Mumu chisoneko chimwe chakwamba hali Falau ngwo: “Ha chikuma chino nakwechele ni mwono hanga muli yena ngukasolole ndundo jami, chikwo nawa ni jina liami likafumane hashi heswe.” 18 Kashika, iye kakusolola keke kuli yoze mazanga, alioze kakwecha hanga amwe akalise mbunge jo.
19 Amwe mahasa kunguhula ngwo: “Mumu liaka iye machiwana tupalia muli yetu? Iya mahasa kulimika ni upale wenyi?” 20 Alioze, yena iya mba ulimike ni Zambi? Shina chuma cha kuumba muchihasa kwamba kuli yoze wachiumbile ngwo: “Mumu liaka wangulingile chize?” 21 Shina tengi keshi ni chiyulo ha uma, hanga ku uma umuwika mahasa kulinga chikwachilo chilemu, uma uzewene malinga nawa chikwachilo chilelu? 22 Mba yika mutwamba hali Zambi yoze chipwe ngwe kazangile kusolola utenu ni ndundo jenyi, hindu wanyongonwene ni uhomboloji unji ha yikwachilo ya utenu yize atesele kwonona? 23 Iye kalingile chino hanga akasolole kulumbama cha uhenya wenyi ku yikwachilo ya keke yize iye aliangile kululieka hanga yikatambule uhenya. 24 Yetu tuli waze iye atambikile hi hakachi ka A-Yunda wika ko, alioze ni hakachi ka mavungu akwo. 25 Ngwe chize Zambi anambe ha mukanda wa Hozeia ngwenyi: “Waze te hi a ku vungu liami ko, mungukaavuluka ngwami, ‘a ku vungu liami;’ waze te chishi kuzanga, mungukamba ngwami, ‘nakwazanga.’ 26 Kuma kuze aambile ngwo: ‘Hi nuli a ku vungu liami ko,’ kwenako makavuluka ngwo ‘ana ja Zambi ya mwono.’”
27 Chikwo nawa, Izaia kanakololoka hakutwala kuli A-Izalele ngwenyi: “Chipwe ngwe A-Izalele ahiana naye kwoka ngwe masekeseke a ku kalunga-lwiji, akehe wika makalamwina. 28 Mumu Yehova* makapatwila akwa-hashi, iye makaneha upatwilo wacho ni kawashi.” 29 Ngwe chize Izaia aliangile kwamba nawa ngwenyi: “Nyi ngwe Yehova* wa tujita katuhichikilile umwe munyachi* kachi mutupwa ngwe Sondome ni kulifwa ngwe Ngomora.”
30 Mba yika mutwamba? Atu a ku mavungu akwo kasolwele ufulielo chocho yaamona ngwe akwa-ululi, chipwe ngwe te keshi kukaula ululi, 31 alioze A-Izalele chipwe ngwe kasele tachi hanga akaule shimbi ja ululi, nihindu kahashile kufunga shimbi yacho. 32 Mumu liaka? Mumu o kachilingile kupalikila mu yitanga hi kupalikila mu ufulielo ko. Chocho yahukana ku “liwe lia kuhukanyisa”; 33 ngwe chize chinasonewa ngwo: “Talenu! Mungusa mu Zaione liwe lia kuhukanyisa ni luliwe lwa kutalingisa, alioze yoze mafuliela kuli iye kechi kaliseha.”