Mukanda Utangu wa A-Korindu

7 Haliapwila, hakutwala ku yize nwasonekene, muchipema nyi lunga kakwachile* kuli umwe pwo; 2 alioze amu kuli utanji* unji, kashika lunga mweswe chamutamba kumbata pwo lienyi, ni pwo mweswe chamutamba kupwa ni lunga lienyi. 3 Lunga akahane chize chinatambe kuli mukwo-pwo, ni pwo neye akalinge chizechene kuli mukwo-lunga. 4 Pwo keshi ni chiyulo ha mujimba wenyi mwene, alioze mukwo-lunga kali nacho, chizechene nawa ni lunga keshi ni chiyulo ha mujimba wenyi mwene, alioze mukwo-pwo kali nacho. 5 Niumwe kanda akwika mukwo kupomba hamwe nenyi. Alioze nyi lunga ni pwo matesa kuchilinga ha amwe mashimbu akehe hanga alisele ku kulemba, malinga chuma chipema. Kulutwe o mahasa kupomba cheka nawa hamuwika hanga achine kuholokela mu muheto wa Satana, mumu lia kuhona kusuula. 6 Yize nambile yili yuma yize munuhasa kulinga, alioze hi shimbi ko. 7 Nihindu te muchipema nyi atu eswe mapwa ngwe yami. Alioze mutu mweswe chawana chenyi ali nacho cha kuli Zambi, umwe ngwe chino, mukwo ngwe chichi.

8 Haliapwila ngunambe kuli twamishi ni tuliwa ngwami, muchipema chinji nyi manunga chizechene ngwe yami. 9 Alioze nyi kahashile kusuula ambate, mumu muchipema kumbata, hi kusasaminyako ni usolo wa kulisumbakenya.

10 Mba kuli waze hanalimbata ngunambe, nihindu hi yami ko, alioze Mwene ngwenyi, pwo kanda alihandununa ni mukwo-lunga. 11 Alioze nyi malihandununa kuli iye, kanda aya ulo weka, chamutamba kulivwashana ni mukwo-lunga; lunga neye katambile kwecha mukwo-pwo.

12 Alioze, hakutwala kuli akwo, yami ngunambe, ewa, yami, hi Mwene ko, ngwami: Nyi ndumbu umwe mapwa ni pwo yoze keshi kufuliela, mba pwo wacho matayiza kutwama nenyi, kanda akamwecha. 13 Chikwo nawa, pwo neye nyi mapwa ni lunga yoze keshi kufuliela, mba lunga wacho matayiza kutwama nenyi, kanda akamwecha. 14 Mumu lunga yoze keshi kufuliela, mamusela ku usandu mumu lia mukwo-pwo, ni pwo yoze keshi kufuliela, mamusela ku usandu mumu lia mukwo-lunga, nyi ka, ana jenu mapwa a luchisa, alioze haliapwila kanapu asandu. 15 Mba nyi yoze keshi kufuliela mazanga kwecha yoze alimbata nenyi, amweche hanga aye. Ha chikuma ngwe chino, mutu yoze wakufuliela katambile kumushinjila kutwama nenyi, mumu Zambi hananutambika ku sambukila. 16 Mumu yena pwo, kuchi muhasa kunyingika nyi mulamwina mukwenu-lunga nyi ka? Hanji yena lunga, kuchi muhasa kunyingika nyi mulamwina mukwenu-pwo nyi ka?

17 Kashika, mutu mweswe chamutamba kutwama kulita ni chawana chize Yehova* amuhele, ngwe chize Zambi amutambikile. Shimbi yino ngunayihana mu yikungulwila yeswe. 18 Nyi mutu te kali kulu ngalami muze atayijile kutambika cha Zambi, chamutamba kupwa lume ngalami. Nyi mutu te chilima muze atayijile kutambika cha Zambi, kanda alipwisa ngalami. 19 Ungalami nichimwe ko, ni ulima nichimwe ko; alioze chuma chilemu chili kwononokena shimbi ja Zambi. 20 Mutu ni mutu chamutamba kutwama ngwe chize apwile muze amutambikile. 21 Shina te uli ndungo muze akutambikile? Kanda ulipikala ha chikuma chacho; alioze nyi muhasa kutusuka, chilinge. 22 Mumu mweswe yoze atambikile kuli Mwene shimbu te achili ndungo, haliapwila hanatusuka, wambala wa Mwene. Chizechene nawa, yoze te watusuka muze amutambikile, haliapwila kali ndungo ya Kristu. 23 Kanulanjile ni ndando; kashika kanda nupwa ndungo ja atu. 24 Mandumbu, mutu ni mutu chamutamba kutwama ngwe chize apwile muze amutambikile, ni kufunga usepa wenyi ni Zambi.

25 Haliapwila hakutwala kuli waze ali virgem,* chishi ni shimbi niyimwe ya kuli Mwene, alioze ngunahana nyonga liami ngwe mutu yoze washishika mumu lia keke ya Mwene. 26 Kashika, mumu lia yipikalo ya mwakono, muchipema nyi mutu manunga chizechene ali. 27 Nyi uli ni pwo kanda unyonga kumwecha, alioze nyi kushi ni pwo kanda ufupa kumbata. 28 Kashika nyi mumbata, kuwavulumwine. Chikwo nawa, nyi umwe mutu virgem masomboka hanji mambata, neye kavulumwine. Alioze waze machilinga kumakapwa ni yipikalo ku mwono* wo. Kashika ngunazange kunufunga ku lamba lino.

29 Mandumbu, ngunambe kuli yenu ngwami, mashimbu akehe asalako. Kashika chize haliapwila, waze ali ni mapwo apwe ngwe keshi no, 30 waze akulila, apwe ngwe waze keshi kulila, waze akuwahilila, apwe ngwe waze keshi kuwahilila, waze akulanda apwe ngwe kalanjile, 31 ni waze akuyuka ni yuma ya hano hashi, apwe ngwe waze keshi kuyuka nayo; mumu yuma ya hano hashi yinayi ni kwalumuka. 32 Alioze ngunazange nukapwe kunushi yipikalo. Mutu yoze kambachile kakulipikala wika ni mulimo wa Mwene, mumu kanazange kuvwisa Mwene kuwaha. 33 Mutu yoze hanambata kakulipikala ni yuma ya hano hashi, mumu kanazange kuvwisa mukwo-pwo kuwaha, 34 chikwo nawa kali ni mbunge jaali. Pwo yoze kanda asomboka ni yoze kanda achilimona ni lunga, kakulipikala ni yuma ya Mwene, hanga apwe asandu ku mujimba ni ku spiritu. Alioze pwo yoze uli ku ulo, kakulipikala ni yuma ya hano hashi, mumu kakuzanga kuvwisa mukwo-lunga kuwaha. 35 Ngunambe chino mumu ha upeme wenu, hi hanga ngunukwike ko,* alioze hanga ngunukolweze kulinga chize chinalite ni kulihana chinji mu mulimo wa Mwene chakuhona yikwiko.

36 Alioze nyi mutu yoze kambachile hanji kusomboka mamona ngwenyi, kahashile kulihumikiza ha usolo wa kulisumbakenya, aye nawa hakola, muchipema nyi mambata hanji masomboka. Nyi malinga chino, kavulumwine. 37 Kashika, nyi umwe makwata chiyulo mu mbunge yenyi mwene, ni kulikwachilila ha chiyulo chacho, mba mamona ngwenyi kafupiwile kumbata hanji kusomboka mumu mahasa kulihumikiza ha usolo wenyi ni kununga ni kutwama twamishi, iye malinga chuma chipema. 38 Chizechene nawa, yoze mambata hanji masomboka malinga kanawa, alioze yoze kambachile hanji kasombokele malinga kanawa kuhiana.

39 Pwo yoze uli ku ulo kanakashiwa kuli lunga lienyi ha shimbu lieswe lize lunga lienyi ali ni mwono. Alioze nyi lunga lienyi mafwa, iye matusuka, mba mahasa kulimbata ni mutu yoze mazanga, alioze chamutamba kulimbata wika ni yoze wakukaula Mwene. 40 Ku nyonga liami, iye mawahilila chinji nyi manunga chizechene ali; chikwo nawa, nguli ni shindakenyo ngwami ni yami nguli ni spiritu ya Zambi.