Chize Ulo wa Akwa-Kristu Muuhasa Kupwa ni Uwahililo

1. Chipwe ngwe ulo wakuputuka ni uwahililo, yika lunga ni pwo atamba kushimbwila mu ulo wo? (Tala chizulie ha uputukilo.)

TANGWA lia umbachiso hi liakundama. Sandungi matala kupema cha nandungi. Eswe ni aali maputuka kuwahilila chinji. Muze te achili tusendo, zango lio yilikola hakehe-hakehe mba yafupa kulimbata ni kulilakenya ngwo makashishika kuli umwe ni mukwo. Muze halimbata, maputuka mwono waha, mba mutu ni mutu malumunako yimwe ku mwono wenyi hanga apwe ni uwahililo mu ulo wo. Yehova, yoze watangile ulo, kanazange hanga lunga ni pwo apwe ni uwahililo mu ulo. Kashika, iye akutwaha yiyulo ya mana yakukatuka mu Liji lienyi, Mbimbiliya. (Yishima 18:22) Chipwe chocho, Mbimbiliya yinambe ngwo, amu tuli akwa-shili, waze alimbata makapwa ni yipikalo hanji “luyinda ku mwono” wo. (1 A-Korindu 7:28) Yika lunga ni pwo atamba kulinga hanga atepulule yipikalo yo? Nawa kuchi akwa-Kristu waze alimbata mahasa kupwa ni uwahililo mu ulo?

2. Zango liamutapu uka lize lunga ni pwo atamba kusolola mu ulo wo?

² Mbimbiliya yakulongesa ngwo, zango likwete ulemu unji. Alioze kuli mutapu unji wa zango uze lunga ni pwo atamba kusolola mu ulo wo. Chakutalilaho, katamba kulizanga ene. Mba nyi kali ni ana, katamba nawa kwasolola zango lia usoko. Alioze zango lize liakatuka ha shimbi ja Zambi lie mulikwasa chinji lunga ni pwo hanga apwe ni uwahililo mu ulo. Postolo Paulu kalumbunwine zango liacho muze ambile ngwenyi: “Mutu ni mutu, akazange chocho mukwo-pwo, chizechene ngwe analizange iye mwene. Ha kutwala kuli pwo akavwile woma mukwo lunga.”—A-Efwesu 5:33.

3. Zango lia lunga ni pwo kuchi liatamba kupwa?

³ Paulu kasonekene ngwenyi: “Malunga, zangenu akwenu-mapwo, chizechene ngwe Kristu nawa wazangile chikungulwila, kashika walikunjikile.” (A-Efwesu 5:25) Akwa-Kristu musono, kakwimbulula chilweza cha Yesu hakulizanga umwe ni mukwo ngwe chize Yesu azangile tumbaji twenyi. (Tanga Yoano 13:34, 35; 15:12, 13.) Akwa-Kristu waze alimbata katamba kulizanga chinji umwe ni mukwo, chipwe kufwa mahasa kufwa ha mukunda wa mukwo. Alioze akwa-kulimbata amwe nyi mapwa ni yipikalo mu ulo wo, chakupwa chikalu chinji kuli ayo kusolola zango lingunu kuli umwe ni mukwo. Mba yika muyihasa kwakwasa? Zango lize liakatuka ha shimbi ja Zambi, lie muliakwasa kuhwisa yipikalo yo. Zango liacho, “kuliakulihumikiza ni yuma yeswe, kuliakufuliela yuma yeswe, kuliakutalatala yuma yeswe, kuliakunyongonona mu yuma yeswe.” Zango liamutapu au “kulishi kuhwa nilimwe tangwa.” (1 A-Korindu 13:7, 8) Lunga ni pwo katamba kwiwuluka ngwo, kalingile shingo hanji chilakenyo kuli umwe ni mukwo. Kalilakenyene ngwo, malizanga umwe ni mukwo ni ushishiko weswe. Kwiwuluka yuma yacho, muchikwasa akwa-Kristu waze alimbata hanga afupe ukwaso wa Yehova ni kukalakala hamuwika hanga ahwise yipikalo mu ulo wo.

4, 5. (a) Chiteli chika lunga akwete mu usoko? (b) Kuchi pwo atamba kunyonga hakutwala ku wata wa mukwo-lunga? (c) Yuma yika Yambenu ni Koji alumwine ku mwono wo?

⁴ Paulu kalumbunwine yiteli yize mutu ni mutu akwete mu ulo, muze ambile ngwenyi: “Mapwo, zeyelenu kuli akwenu-malunga, chizechene ngwe kuli Mwene. Mumu lunga iye mutwe wa mukwo-pwo, chizechene ngwe Kristu nawa iye mutwe wa chikungulwila.” (A-Efwesu 5:22, 23) Chino kuchalumbunukine ngwo, lunga kali ni ulemu unji kuhiana mukwo-pwo. Yehova kasolwele chiteli chilemu cha pwo muze ambile ngwenyi: “Kuchapemene mutu akatwame ukawenyi, mungumulingila chikwashi yoze malita nenyi.” (Uputukilo 2:18) Pwo katamba kukwasa mukwo-lunga hanga apwe mutwe hanji mwata mupema mu usoko. Nawa lunga katamba kwimbulula chilweza cha zango lia Yesu, mwe mwata hanji “mutwe wa chikungulwila.” Nyi lunga malinga chocho, mukwo-pwo mawahilila ha chize akumufunga nawa muchipwa chashi kuli pwo kuvumbika ni kulemesa mukwo-lunga.

⁵ Yambenu, pwo lia Koji, yamba ngwenyi: “Muze napwile twamishi, te nakulinga yuma yeswe ukawami ni kulifunga yami mwene. Alioze ulo walumwine mwono wami ha kulilongesa kujikijila kuli mukwetu-lunga. Chino hi chashi ko, alioze twakukalakala hamuwika ngwe lunga ni pwo ha kukaula usongwelo wa Yehova ku mwono wetu.”^[1]

(Tala maliji ali kusongo.) Mukwo-lunga Koji yamba ngwenyi: “Kuli yami kukwata yiyulo chapwile chikalu chinji. Muze hi nambata yichikaliwa nawa chinji, mumu te ndo ngukwate yiyulo ya atu aali. Alioze kufupa usongwelo wa Yehova ha kulemba ni kupanjika kanawa yiyulo ya mukwetu-pwo, chakungukwasa kukwata yiyulo yipema. Haliapwila nakwivwa kuwaha ha kukalakala hamuwika ngwe chizavu!”

6. Kuchi lunga ni pwo mahasa kusolola ngwo zango “liapwa muya wa ungunu” ha kuhwisa yipikalo mu ulo wo?

⁶ Ulo muuhasa kukola nyi lunga ni pwo ‘malihumikiza umwe ni mukwo, nikulikonekena umwe ni mukwo.’ Lunga ni pwo kakuhengesa, mumu eswe ni aali kali akwa-shili. Muze chino muchilingiwa, mahasa kulilongesa ku uhenge wo, ni kulikonekena ni kusolola zango lize liakatuka ha shimbi ja Mbimbiliya. Zango liacho “liapwa muya wa ungunu.” (A-Kolosu 3:13, 14) Lunga ni pwo mahasa kusolola zango liacho nyi mapwa ni uhomboloji ni keke chakuhona “kushinginyeka yipi.” (1 A-Korindu 13:4, 5) Nyi mahona kulivwashana, katamba kusa tachi hanga ahwise kawashi yikokojola yo, muze tangwa kanda litoka. (A-Efwesu 4:26, 27) Chakufupiwa kulipalumwisa ni hamu mba twambe ngwetu, “Ngukonekeneko ha yize namba,” alioze kulinga chino muchikwasa atu waze alimbata hanga ahwise yipikalo yo ni kulivwashana umwe ni mukwo.

7, 8. (a) Yika Mbimbiliya yinambe hakutwala ku kulisumbakenya cha lunga ni pwo? (b) Mumu liaka lunga ni pwo atamba kulizanga chinji?

⁷ Mu Mbimbiliya muli chiyulo chipema chize muchihasa kukwasa lunga ni pwo apwe ni nyonga lialita hakutwala ku kulisumbakenya. (Tanga 1 A-Korindu 7:3-5.) Chili chilemu lunga ni pwo kusa mbunge ha chize umwe ni mukwo akwivwa ni yize akufupa. Nyi lunga keshi kusolola zango kuli mukwo-pwo, muchihasa kupwa chikalu kuli pwo kuzanga kulisumbakenya nenyi. Kashika, malunga katamba kutwama ni mapwo jo “nikulita ni mana.” (1 Petulu 3:7) Kulisumbakenya cha lunga ni pwo kuchatambile kupwa chakulitacheka, alioze chatamba kulingiwa ni zango. Lunga kakwivwa usolo kawashi-kawashi kuhiana pwo. Alioze muze mazanga kulisumbakenya, ayo eswe ni aali katamba kulivwashana ni mbunge yeswe.

⁸ Mbimbiliya kuyishi kuhana pundu shimbi hakutwala ku chize lunga ni pwo atamba kusolola zango kuli umwe ni mukwo. Alioze Mbimbiliya yakuhanjika hakutwala ku zango liacho. (Mwaso wa Solomone 1:2; 2:6) Kashika, akwa-Kristu waze alimbata katamba kulizanga chinji umwe ni mukwo.

9. Mumu liaka hi chipema ko kusolola zango lia ulo kuli mutu yoze kutwalimbachile nenyi?

⁹ Nyi mutuzanga chinji Zambi hamwe ni enyembo jetu, kutuchi kwecha chuma nichimwe hanga chipihise ulo wetu. Atu amwe hanapihisa malo jo ha mukunda wa kutala-tala pornografia. Kashika, twatamba kwehuka kutala pornografia ni yuma yeswe ya utanji. Chikwo nawa, kutwatambile kulinga yuma yize muyisolola ngwo, tuli ni zango lia ulo hali mutu yoze kutwalimbachile nenyi. Nyi twalinga chocho, mutusolola ngwetu, kutushi ni zango lingunu. Nawa twatamba kunyingika ngwetu, Zambi kananyingika kanawa manyonga ni yitanga yetu yeswe. Chino muchitukwasa hanga tukolese zango lietu kuli iye ni kununga ni kushishika kuli mutu yoze twalimbata nenyi.—Tanga Mateu 5:27, 28; A-Hepreu 4:13.

10, 11. (a) Mumu liaka atu anji akulilakula? (b) Yika Mbimbiliya yinambe hakutwala ku kulihandununa? (c) Yika muyikwasa waze alimbata hanga ahone kulihandununa?

¹⁰ Akwa-kulimbata amwe kakuzanga kulihandununa hanji kulilakula ha mukunda wa yipikalo yize akupwa nayo mu malo jo. Mu yifuchi yimwe akwa-kulimbata anji kakulilakula. Alioze yuma yacho kuyishi kulingiwa chinji mu malo ja Yela ja Yehova. Chipwe chocho, ha mashimbu wano akwa-Kristu waze alimbata kali ni yipikalo yinji mu malo jo.

¹¹ Mbimbiliya yinambe ngwo: “Pwo kanda alihandununa ni mukwo-lunga. Alioze nyi malihandununa kuli iye, akatwame chizechene utwamishi, nyi ka akawane mukwo-lunga. Lunga kanda akahichika mukwo-pwo.” (1 A-Korindu 7:10, 11) Akwa-kulimbata amwe kakunyonga ngwo, katamba kulihandununa mumu yipikalo yo yili yinene chinji. Alioze Yesu kasolwele ngwenyi, kulihandununa chili chuma chipi, muze afunyinyine maliji waze Zambi ambile hakutwala ku ulo ni kuwezelaho ngwenyi: “Chize Zambi hanunga, niumwe mutu kanda achihandununa.” (Mateu 19:3-6; Uputukilo 2:24) Chino chinasolola ngwo, Zambi kanazange lunga ni pwo anunge ni kutwama hamuwika. (1 A-Korindu 7:39) Tulieswe twatamba kwiwuluka ngwetu, Yehova makatusopesa ha mukunda wa yitanga yetu. Chino muchitukwasa tuhwise kawashi-kawashi milonga yize tulinayo shimbu kanda yoka.

12. Yika muyihasa kulingisa akwa-kulimbata amwe hanga anyonge kulihandununa?

¹² Mumu liaka akwa-kulimbata amwe akupwa ni yipikalo yinji? Mumu amwe keshi kumona yuma yize te akushimbwila mu malo jo, kashika akwivwa yinyengo hamwe ni uli. Chikwo nawa, mutu ni mutu kali ni yitanga ni manyonga alisa ni a mukwo, mumu kaalelele mu usoko walisa. Amwe keshi kulivwashana kanawa ni asoko ja lunga hanji ja pwo. Nawa kuzachisa mbongo ni kulela ana necho muchihasa kuneha yipikalo yinji mu ulo. Kashika, chili chipema kunyingika ngwo, akwa-Kristu anji waze alimbata kakuhasa kuhwisa yipikalo yo mumu kakukaula usongwelo wa Zambi.

13. Yuma yika muyihasa kulingisa lunga ni pwo hanga alihandunune?

¹³ Kuli yimwe yuma yize muyihasa kulingisa lunga ni pwo hanga alihandunune. Chakutalilaho, nyi chamwenemwene lunga keshi kuzanga kufunga usoko wenyi, chino muchihasa kwaahandununa. Lunga ni pwo mahasa nawa kulihandununa nyi umwe kali ni ndako ya kulamba mukwo ni kumumwesa lamba hanji keshi kuzanga mukwo awayile Yehova. Muze mandumbu waze alimbata mapwa ni yipikalo mu ulo wo, katamba kufupa ukwaso kuli makulwana amu chikungulwila. Makulwana kakwete yinyingi yinji, kashika mahasa kukwasa waze alimbata akaule shimbi ja Zambi ku mwono wo. Chikwo nawa, nyi waze alimbata meta spiritu yisandu kuli Yehova, muyihasa kwaakwasa hanga akaule shimbi ja mu Mbimbiliya ni kusolola yitanga ya Ukristu. (A-Ngalishia 5:22, 23)^[2]—Tala maliji ali kusongo.

14. Yika Mbimbiliya yinambila akwa-Kristu waze alimbata ni mutu yoze keshi kuwayila Yehova?

¹⁴ Mbimbiliya yinambe ngwo, chili chipema lunga ni pwo waze alimbata anunge hamuwika chipwe ngwe umwe wa kuli ayo keshi kuwayila Yehova. (Tanga 1 A-Korindu 7:12-14.) Lunga hanji pwo yoze keshi kuwayila Yehova kamusela “ku usandu” ha mukunda wa kulimbata ni kavumbi ka Yehova. Ana ja kavumbi ka Yehova kapwa ‘asandu’ nawa kakwafunga kuli Zambi. Paulu kakwashile akwa-Kristu waze alimbata ngwenyi: ‘Kuchi munyingika, yena pwo, hanji mukalamwina mukwenu-lunga? Kuchi munyingika, yena lunga, hanji mukalamwina mukwenu-pwo?’ (1 A-Korindu 7:16) Kuli yilweza yinji ya akwa-Kristu alimbata waze hanakwase malunga hanji mapwo jo kupwa Yela ja Yehova.

15, 16. Yika Mbimbiliya yinambe hali mapwo akwa-Kristu waze malunga jo keshi kuwayila Zambi? (b) Yika mukwa-Kristu atamba kulinga nyi lunga hanji mukwo-pwo ‘yoze kafulielele mazanga alihandunune’?

¹⁵ Postolo Petulu kakolwezele mapwo akwa-Kristu apwe ni kuzeyela malunga jo, hakwamba ngwenyi: ‘Chipwe kachi amwe keshi kwononoka ku liji lia Zambi, akaazuke ni liji liakuhi ku kwenda cha akwo-mapwo, ha kutala ku kwenda chenu cha vumbi hamwe ni woma.’ Chochene, pwo mukwa-Kristu katambile kuhanjika mashimbu eswe ni mukwo-lunga hakutwala ku ufulielo wenyi, alioze mahasa kumukwasa atayize umwenemwene ha kusolola ‘spiritu ya kushimbika ni ya kuhola, yize yikwete ndando yinene kumeso ja Zambi.’—1 Petulu 3:1-4.

¹⁶ Mba kuchi mutwamba nyi lunga hanji pwo yoze kafulielele, mazanga kulihandununa ni Chela cha Yehova yoze alimbata nenyi? Mbimbiliya yinambe ngwo: “Nyi yoze keshi kufuliela makatuka, akatuke; ndumbu hanji pangi keshi mu undungo hakutwala ku yuma yino: alioze Zambi hanatutambika ku sambukila.” (1 A-Korindu 7:15) Kulihandununa muchihasa kunehena mukwa-Kristu sambukila, alioze kulita ni Mbimbiliya aye katambile kumbata nawa. Chikwo nawa, mukwa-Kristu katambile kushinjila mutu yoze alimbata nenyi hanga anunge ni kutwama hamuwika. Chipwe chocho, lunga hanji pwo yoze keshi kuwayila Yehova mahasa kufuna hanga alulieke ulo wenyi. Hanji kulutwe lia matangwa, mutu wacho mahasa kupwa Chela cha Yehova.

17. Mu ulo wa akwa-Kristu, yika yatamba kupwa ha chihela chitangu ku mwono wo?

¹⁷ Twakumona lamba linji mumu tuli “ha matangwa a kusula.” (2 Timoteu 3:1-5) Ha chino, twatamba kukolesa usepa wetu ni Yehova. Paulu kasonekene ngwenyi: ‘Miaka hiyatepuluka; hanga waze ali ni mapwo akapwe ngwe keshi no, . . . waze malinga yuma ya hashi, ngwe kayilingile.’ (1 A-Korindu 7:29-31) Ha maliji wano, Paulu te keshi ni kwamba ngwenyi lunga ni pwo waze alimbata katamba kulilengulula umwe ni mukwo. Alioze amu tuli ha matangwa akusula nawa akalu, twatamba kusa uwayilo wetu kuli Yehova ha chihela chitangu ku mwono wetu.—Mateu 6:33.

18. Yika muyikwasa akwa-Kristu waze alimbata hanga apwe ni ulo upema wakuwahilila?

¹⁸ Ha matangwa wano akalu, tunamono malo anji kanafwa-fwa. Shina mutuhasa kupwa ni ulo upema wakuwahilila nyi? Ewa, chino muchihasa kulingiwa nyi mutununga ni kukundama kuli Yehova ni tuvumbi twenyi, ni kukaula shimbi ja mu Mbimbiliya ni usongwelo wa spiritu yisandu ya Yehova. Nyi twalinga chocho, mutuhalisa “chize Zambi hananungu.”—Marku 10:9.