Kuli A-Hepreu
1 Ku mashimbu akunyima, Zambi kahanjikile ni tulamba twetu kupalikila kuli aprofeta ha yisuho yinji ni mu mitapu yinji. 2 Haliapwila, ha matangwa wano akusula, kahanjika ni yetu kupalikila muli Mwanenyi, yoze atongwele hanga apwe swana wa yuma yeswe. Chikwo nawa, yuma yeswe mu malilu ni hashi, kayitangile kupalikila muli iye. 3 Iye kali uhenya wa Zambi, pundu lume kulifwa chenyi chili ngwe chize apwa Zambi, kakukolesa yuma yeswe ku ndundo ja liji lienyi. Muze hatupemesa ku shili yetu, yatwama ku kwoko lia chindume lia Mukwa-Ndundo-Jeswe mu malilu. 4 Chocho, yapwa mulemu chinji kuhiana angelo, mumu iye kahingile jina lipema chinji kuhiana majina jo.
5 Achinyongenu ha chino, mungelo muka Zambi ambile limwe tangwa ngwenyi: “Yena uli mwanami, musono yami hinapwa tatenu?” Cheka nawa ngwenyi: “Mungupwa tato, iye mapwa mwanami?” 6 Alioze, muze anehene cheka Mwanenyi Mutangu hano hashi, iye yamba ngwenyi: “Angelo eswe a Zambi afulamane kumeso jenyi.”
7 Chikwo nawa, yamba hakutwala kuli angelo ngwenyi: “Iye kakupwisa angelo jenyi spiritu, ni tuvumbi twenyi mulengi wa kahia.” 8 Alioze hakutwala kuli Mwana, iye yamba ngwenyi: “Zambi iye ngunja yenyi ndo ku miaka ya mutolo, lukanda wa Wanangana wenyi kali lukanda wa ululi. 9 Yena yiuzanga ululi ni kwivwila kole yuma yize kuyishi kulita ni shimbi. Kashika Zambi, Zambi ye, akuwayishile ni maji a uwahililo kuhiana akwenu.” 10 Chikwo nawa, ngwenyi: “Aa Mwene, ku uputukilo yena wasele fundamentu ya hashi, malilu kali milimo ya ku moko je. 11 Yuma yino yeswe muyikahwa, alioze yena mununga ni kupwako; yeswe muyikazamuka ngwe hina, 12 yena mukayivunga ngwe chikuto, ngwe hina limuwika, mba muyikalumuka. Alioze yena kuuchi kwalumuka, chipwe miaka ye kuyichi keza kapwa ni songo.”
13 Alioze, hali mungelo muka iye ambile tangwa limwe ngwenyi: “Twama ku kwoko liami lia utata, ndo muze mungukasa akwa-kole je kushi lia yiliato ye”? 14 Ngwami ayo eswe kali maspiritu waze akulinga mulimo usandu, kakwatuma hanga akalakalile waze makahinga ulamwino?