Junho

Yombi kapwile ni mwono upema ni usepa upema ni Yehova. Kapwile ni usoko unene walinunga nawa te pichi munene. (Yombi 1:​1-5) Alioze ha tangwa limuwika, Yombi yatokesa yuma yeswe. Chitangu, yatokesa upite weswe. (Yombi 1:​13-17) Hanyima, ana jenyi eswe yafwa. . Achinyonga yikola yize Yombi ni mukwo-pwo evwile ha kufwisa ana kumi ha chisuho chimuwika. Yino yeswe yatukwasa kunyingika yize yatwalile Yombi mba asuwe mazalo ni kulimbila-mbila mu mavu! (Yombi 1:​18-20) Kusulaho, Yombi mwene yamwasa yikola kuli Satana. (Yombi 2:​6-8) Shimbu yino te kanda yilingiwa, Yombi kapwile ni kumusa vumbi linji kuli atu waze te atunga no. Ayo kapwile ni kumwita-ta yiyulo. (Yombi 31:18) Alioze hanyima lia yino, atu eswe yaputuka kumuchina. Kapwile ni kumwehuka kuli mandumbu jenyi, masepa chipwe lume tuvumbi twenyi!—Yombi 19:​13, 14, 16. w22.06 21 ¶5-6

Hanyima lia kutupapachisa, yetu eswe twatamba kukaula chiyulo chize postolo Paulu ahanyine kuli akwa-kristu-ni-akwo mu Efwesu. Iye kaakolwezele hanga apwe akwa-Kristu ajama. (Efwe. 4:13) Chino chinalumbunuka ngwo, ‘o te katamba kununga ni kukola ku ufulielo.’ Yena wakuzanga Yehova. Alioze, zango lie mulihasa kwoka nawa. Kuchi chino muchihasa kulingiwa? Paulu kanasolola mutapu umwe uze tunawane ha A-Fwilipu 1:9. Paulu kalembele hanga zango lia A-Fwilipu “likalumbame ni kuliwezela.” Mutuhasa kwokesa zango lietu hali Yehova. Kuchi mutuhasa kuchilinga? Mutuhasa kuchilinga, ha kwokesa “yinyingi ni mana.” Muze twakunyingika Yehova twakumuzanga chinji nawa twakulemesa utu wenyi ni mutapu uze akulingilamo yuma. Twakuzanga kumuvwisa kuwaha ha kwehuka kulinga yuma yize muyimuvwisa chinyengo. Twakusa tachi hanga tulinge yize mutuhasa ni kulinga upale wenyi. w22.08 2-3 ¶3-4

Yuma yize yinasonewa mu mukanda wa Usolwelo kuyatalile hali atu eswe, alioze hali yetu, tuvumbi twa Zambi. Yetu tuvumbi twa Zambi, kutwatambile kukomoka ha kunyingika ngwetu, tunamanununa uprofeto uze uli mu mukanda uno ulemu. Postolo Yoano kambile hakutwala ha mashimbu waze uprofeto wacho watamba kumanunuka. Iye ngwenyi: “Napwile mu Spiritu ha tangwa lia Mwene.” (Uso. 1:10) Muze Yoano asonekene maliji wano kota ha 96 M.J., “tangwa lia Mwene” te lichili kusuku. (Mateu 25:​14, 19; Luka 19:12) Alioze kulita ni uprofeto wa mu Mbimbiliya, tangwa liacho liaputukile ha mwaka 1914, muze Yesu amusele ngwe Mwanangana mu malilu. Kukatuka ha mwaka wacho, uprofeto uli mu mukanda wa Usolwelo uze unatale hali atu ja Zambi, yiuputuka kumanunuka. Chochene, haliapwila tuli ha “tangwa lia Mwene”!—Uso 1:3 w22.05 2 ¶2-3

Ngongo ni mwe profeta wa kwonga aanyashine a mwono mu chitende cha kahia chize cha kuyila ni fundanga.” Kashika, akwa-kole ja Zambi wano anayulu makaanongesa liakulu. Yika yino yinalumbunuka kuli yetu? Yetu akwa-Kristu, twatamba kushishika kuli Zambi ni ku Wanangana wenyi. (Yoa. 18:36) Mba tuchilinge, twatamba kununga ni kwehuka yuma ya mafwefwe. Alioze muchihasa kupwa chikalu kwehuka yuma yacho, mumu manguvulu kanazange hanga twakwase. Waze matayiza kwakwasa, maaha chilayi cha ngongo. (Uso. 13:​16, 17) Alioze mweswawo matambula chilayi chacho, makatokesa utayizo wa Yehova hamwe ni mwono wa mutolo. (Uso. 14:​9, 10; 20:4) Kashika, chili chilemu kununga ni kwehuka yuma yeswe ya mafwefwe, chipwe ngwe manguvulu matushinjila hanga twakwase! w22.05 10-11 ¶12-13

Chuma chimwe chize muhasa kutesa kulinga ku ufulielo, chili kulilongesa utotombo uze mutuzachisa. Nyi twakolesa utotombo wetu, muchipwa chashi kutambula yiteli yikwo. Achinyonga ha unji wa mandumbu waze akufupiwa hanga atunge ma Mbetele, mazuwo a kukunguluka chinene ni Mazuwo a Wanangana. Anji a kuli ayo, kalilongesa kutunga ha kukalakala hamuwika ni mandumbu waze ananyingika mulimo wacho.Musono, mandumbu ni mapangi kanalilongesa utotombo uze mahasa kuzachisa ku mulimo wa kululieka mazuwo a kukunguluka chinene ni Mazuwo a Wanangana. Hachino, Yehova Zambi, “Mwanangana wa miakulwila” ni Yesu Kristu “Mwanangana . . . wa mianangana,” kanalingi yuma yakukomwesa kupalikila muli mandumbu jacho. (1 Timo. 1:17; 6:15) Tunazange kupwa yikilikita ni kuzachisa utotombo wetu hanga tuhalise Yehova hi yetu ene ko.—Yoa. 8:54. w22.04 24 ¶7; 25¶ 11

Solomone kapwile pichi wa lufuma nawa kapwile mu zuwo lipema chinji. (1 Mia. 10:​7, 14, 15) Kulisa ni Solomone, Yesu kakapwile ni yikumba yinji chipwe zuwo. (Mateu 8:20) Alioze, malunga wano aali kapwile ni nyonga lialita hakutwala ku yikumba mumu mana jo kakatukile kuli Yehova Zambi. Solomone kambile ngwenyi Nyi tuli ni mbongo mutuhasa kulanda yuma yize tunafupiwa ni yimwe yize tunazange. Alioze chipwe ngwe kapwile pichi, Solomone kanyingikine ngwenyi kuli yuma yize yinahiane mbongo. Chakutalilaho, yasoneka ngwenyi: ‘Lufuma mupema kanapeme kuhiana upite unji.’ (Yishi. 22:1) Solomone kamwene nawa ngwenyi, chili chikalu kuli atu waze akuzanga chinji mbongo kuwahilila ni yuma yize ali nayo. (Chilu. 5:​10, 12) Chocho yatutoweza ngwenyi, kanda tujikijila ha mbongo mumu mbongo jize tuli najo mujihasa kusoka mapulwa ni kuhumuka.—Yishi. 23:​4, 5. w22.05 21 ¶4-5

Muze twakupukuna ha yiwape yize tuli nayo, twakukolesa usepa wetu ni Yehova. Nawa muze twakupukuna ha yiwape ya kulutwe lia matangwa, kutalatala chetu cha kuwayila Yehova ku miaka yeswe chakupwa chamwenemwene. Yino yeswe muyitukwasa kulingila Yehova ni chiseke musono. Yehova ‘makalinangamisa’ akatukwase muze makaneha songo lia hano hashi hapi. Yetu tunanyingika ngwetu, Yehova kali “Zambi ya ululi,” kashika kechi kwecha Satana ha shimbu linji kuhiana lize hanatese. (Iza. 25:9) Yetu twakushimbwila ni uhumikizo tangwa lize Yehova makatulamwina. Amu shimbu liacho kanda liheta, twatamba kusolola usakwililo ha chawana cha kulemba, kulilongesa ni kusa mu yitanga yize twakulilongesa ni kupukuna ha yiwape yetu. Nyi twachilinga, Yehova matukwasa kunyongonona ni uwahililo muze tunamulingila. w22.11 13 ¶18-19

Chipwe ngwe Mbimbiliya kuyishi kuhanjika ha upapachiso wa Timoteu, nihindu mutuhasa kunyonga ha uwahililo uze naye Unise evwile ha tangwa liacho. (Yishi. 23:25) Chipwe ngwe Unise kapalikile mu yipikalo yinji, nihindu kalongesele mwanenyi kuzanga Yehova ni Yesu Kristu.Yisemi ja Timoteu kapwile mu uwayilo walisa.Tato kapwile Ka-Ngregu, naye ni kako kapwile A-Yunda. (Yili. 16:1) Chinasoloka ngwe muze Unise ni Loye apwile akwa-Kristu Timoteu te uchili mukweze. Alioze tato kakatayijile kupwa mukwa-Kristu. Mba uwayilo uka Timoteu te masakula? Ni musono nawa, yisemi a mapwo akwa-Kristu kakuzanga asoko jo. Ayo kakuzanga chinji kukwasa ana jo kupwa ni usepa upema ni Yehova. Nawa Zambi kakulemesa chinji tachi jize ayo akusa. (Yis 1:​8, 9) Yehova kakukwasa yisemi anji a mapwo kulongesa ana jo hanga amuzange ni kumulingila. w22.04 16 ¶1-3

Kwasala hakehe Yehova masa manyonga jenyi mu mbunge ya akwa-mafwefwe hanga ‘alinge upale wenyi.’ Yika ayo makalinga? Manguvulu jacho hanji ngwetu, “kumi lia mianangana” makakatukila mayingeleja eswe a mahuza ni kwanongesa. (Uso. 17:​1, 2, 12, 16) Kuchi tunanyingika ngwetu kusula cha Babilonia Yinene chili hakamwihi? Mba tukumbulule chihula chino, ndo twiwuluke chize mbonge yikulu ya Babilonia yapwile ya kujingilika ni meya a Lwiji Ufrateze. Mukanda wa Usolwelo wakutesa tununu a tununu twa atu ali mu Babilonia Yinene ni “meya” waze akuyifunga. (Uso. 17:15) Alioze wakusolola nawa ngwo, meya jacho te “moma,” chekwamba, uwayilo wa mahuza wa hashi heswe te muutokesa atu jawo. (Uso. 16:12) Musono, tunamono umanunuko wa uprofeto uno mumu atu anji kanatuhuka mu mayingeleja ni kufupa kuhwisa yipikalo yo mu majila eka. w22.07 5-6 ¶14-15

Twakusakwilila Yehova muze twakukonekena akwetu. Ha chimwe chishima, Yesu yatesa Yehova ni mwanangana yoze wakonekenene umwe wa kuli ndungo jenyi kongo linene lize apwile nalio. Ndungo yono te kechi kuhasa kufweta kongo liacho. Alioze hanyima, iye yahona kukonekena ndungo-ni-mukwo yoze te umuli ni kongo likehe. (Mateu 18:​23-35) Yika Yesu te anambe kulongesa ha chishima chino? Nyi twakusakwilila Yehova ha chize akutukonekena, chino muchitutwala hanga ni yetu tukonekene akwetu. (Samu 103:9) Ha miaka yinji kunyima, Kaposhi wa Kutalila kalumbunwine chikuma chino ngwo: “Chipwe ngwe mutukonekena akwetu ha yisuho yinji, nihindu chino kuchichi kuhiana ukonekeno wa Yehova ni keke yize akutusolwela kupalikila muli Kristu.” Nyi mutukonekena akwetu, Yehova matukonekena. Yehova kapwa mukwa-keke kuli waze akusolola keke. (Mateu 5:7) Yesu kasolwele chikuma chino zwalala muze alongesele tumbaji twenyi chize malemba.—Mateu 6:​14, 15. w22.06 10 ¶8-9

Muze Yesu apwile hano hashi, iye kembulwile utu wa Tato ni ungunu weswe. (Yoa. 14:9) Kashika, nyi twanyingika Yesu muchitukwasa kunyingika kanawa Yehova ni kumuzanga. Chikwo nawa, twakuyuka chinji ha malongeso a Yesu ni mutapu uze akusongwelamo yikungulwila musono. Yesu kakutulongesa hanga tulinge yuma yize muyitukwasa kupwa ni utayizo wa Yehova. Nawa kufwa cha Yesu chize chinalumbunuka kumuwonda ku kashijino chakutuyukisa tulieswe. Muze Yesu ahindwishile, iye kasolwele ulemu wa manyinga jenyi ngwe chitapo chingunu hanga ‘atupemese ku shili yeswe.’ (1 Yoa. 1:7) Musono iye kali mwanangana. Kulutwe, Yesu makawonda mutwe wa kapela. (Upu 3:15) Chochene, muze Satana makamunongesa tuvumbi twa Zambi makapwa mu uhwimino! Alioze shimbu tangwa liacho kanda liheta, kanda uhonga. Fuliela muli Yehova ngwo, iye makazachisa munyachi wa pwo hanga awahise “mavungu eswe a hashi.” w22.07 18 ¶13; 19 ¶19

Twatamba kupwa atu ashi muze mutusakula kulinga yize twatesa ku ufulielo. Mumu liaka? Mumu kutwanyingikine yize muyilingiwa ku mwono wetu. Tutalenu chilweza cha postolo Paulu: Iye kakwashile kuputuka chikungulwila chaha mu mbonge ya Tesalonika. Alioze mumu lia yihungumiona, Paulu yakatuka mu mbonge yacho. (Yili. 17:​1-5, 10) Nyi kanungine mu mbonge yacho, kachi kasele mwono wa mandumbu jenyi mu ponde. Alioze iye kakahongele. Shimbu ahonge, yejilila ni yuma yize te yinalingiwa ku mwono wenyi. Kulutwe, yatuma Timoteu mu Tesalonika hanga akwase mandumbu jacho aha ku ufulielo. (1 Tesa. 3:​1, 2) Mandumbu a mu Tesalonika kota kanakawahilila chinji. Mutuhasa kulilongesa ha yuma yize yalingiwile kuli Paulu mu Tesalonika. Mutuhasa kutesa kulinga yimwe ku ufulielo, alioze mukuhasa kulingiwa yimwe ku mwono wetu yize muyitukwika kuyilinga. (Chilu. 9:11) Nyi yino hinalingiwa kuli yena, linga yize muhasa kulita ni uhashi we. w22.04 25-26 ¶14-15

Yehova kakututakamisa ha kutwaha kutalatala cha kulutwe lia matangwa. Tutalenu yimwe yisoneko yize muyihasa kutukwasa muze tunapalika mu yipikalo. Mu Mbimbiliya, Yehova kanatulweze ngwenyi, kukushi chuma nichimwe chize ‘muchituhandununa ku zango [lienyi]’ chipwe yipikalo yinji kuyichi kuhasa. (Roma 8:​38, 39) Kanatulweza nawa ngwenyi, “hakamwihi ali ni waze eswe akutambika kuli iye” mu yilemba. (Samu 145:18) Yehova kanambe ngwenyi, nyi mutujikijila muli iye, mutuhasa kunyongonona mu yipikalo yeswayo ni kuwahilila chipwe muze tunamono lamba. (1 Kori. 10:13; Tia. 1:2) Liji lia Zambi linatwiwulula nawa ngwo, yipikalo yetu yili ya mashimbu akehe nyi twayitesa ni yiwape yize mutukazuka kulutwe. (2 Kori. 4:​16-18) Yehova kanatulakenya ngwenyi makachiza yuma yeswe yize yakutumwesa lamba, kuchingako Satana ni waze eswe akumwimbulula. (Samu 37:10) Shina uli ni yimwe yisoneko ya mu Mbimbiliya yize muyikukwasa kunyongonona mu yipikalo yize muyiza kulutwe? w22.08 11 ¶11

Shina wakulihulumba nyi muhasa kutwama kulita ni shimbu ja Yehova tangwa ha tangwa, mwaka ha mwaka? Yehova kanatulakenya ngwenyi, ululi wetu muuhasa kupwa ngwe “mikanya ya kalunga-lwiji.” (Iza 48:18) Achinyonga ngwe uli kusesa lia kalunga-lwiji unatale mikanya yinalikaula yize kuyishi kuhwa. Ha chikuma chino, shina muhasa kushimbwila ngwo limwe tangwa mikanya yacho muyimana? Ka! Mumu liaka? Mumu unanyingika ngwe, kuyichi kuhwa, muyinunga. Ululi we muuhasa kupwa ngwe mikanya ya kalunga-lwiji! Mu mutapu uka? Nyi unazange kukwata chimwe chiyulo, chitangu watamba kupukuna ha yize Yehova anazange hanga ulinge. Hanyima, mba mukwata chiyulo chacho. Chipwe ngwe chiyulo chacho chikalu chinji, nihindu Tatenu wa zango makukwasa hanga ununge ni kukaula shimbi jenyi ja ululi hita tangwa.—Iza. 40:​29-31. w22.08 30 ¶15-17

Kusongo lia kanunu ka miaka, Satana makamutusula. Iye makazanga kupiangula atu waze ha shimbu liacho makapwa angunu. Ha cheseko chino cha kasula, atu eswe angunu hano hashi makapwa ni uhashi wa kusolola nyi kakulemesa jina lia Zambi ni Wanangana wenyi, nyi ka. (Uso. 20:​8-10) Yuma yize hita mutu makalinga ha cheseko chino cha kasula, muyikasolola nyi jina lienyi mulikanunga mu mukanda wa mwono ku miaka yeswe, nyi ka. Mbimbiliya yinalumbununa ngwo atu amwe kutwanyingikine nyi angahi, kechi kwononokena Yehova ngwe chize alingile Alama ni Eva. Nawa kechi katayiza Wanangana wenyi. Yika muyikalingiwa kuli ayo? Usolwelo 20:15 unambe ngwo: Mweswe yoze “kamuwanyine wa kusoneka mu mukanda wa mwono, amunyashine mu chitende cha kahia.” Waze eswe kechi kwononoka makaanongesa liakulu. Alioze atu anji angunu makapalika mu cheseko cha kasula. w22.09 23-24 ¶15-16

Amwe mu chikungulwila cha ku sekulu yitangu, kapwile ni kwamba ngwo akwa-Kristu waze hi A-Yunda ko katamba kwatwala ku mukanda, kota hanga A-Yunda ahone kwamba yuma yipi. (Ngala. 6:12) Postolo Paulu kakatayijile nyonga lio, alioze shimbu ajijiminye ha nyonga lienyi, yatwala chikuma chacho kuli apostolo ni makulwana mu Yerusaleme. (Yili. 15:2) Amu Paulu afupile kululieka yuma mu jila yino, iye yakwasa mandumbu hanga anunge ni kuwahilila ni kupwa ni sambukila mu chikungulwila. (Yili. 15:​30, 31) Nyi mukusoloka umwe kapinda, mutuhasa kuneha sambukila ha kufupa usongwelo wa waze Yehova atongwele hanga afunge chikungulwila. Kanji-kanji, usongwelo uze unakatuka mu Mbimbiliya mutuhasa kuuwana mu mikanda yetu, hanji mu mikanda ya usongwelo yize twakutambula mu ululikiso wetu. Nyi twakaula kanawa usongwelo wa mikanda yino, kutuchi kulihulikila wika ha manyonga jetu, alioze mutulinga yize muyineha sambukila mu chikungulwila. w22.08 22 ¶8-9

Ha mashimbu amwe, twakufupiwa kushimutwina ni masepa jetu ha kwalweza chize tunevu ku mbunge. Ha mashimbu akwo, kulweza akwetu chize tunevu ku mbunge muchihasa kupwa chikalu. Hanji kutushi ni chako cha kulweza akwetu yize yakutupikala, kashika mutwivwa yikola ku mbunge nyi mutunyingika ngwetu, sepa lietu yoze twalwezanga yimwe kayilweza atu akwo. Chikwo nawa, chili chipema kupwa ni masepa waze mutuhasa kujikijila. Makulwana a mu chikungulwila waze keshi kumwanga sango jambala, kapwa ‘ngwe chiswamo ha fuji, uchinyino ha kangonga’ kuli mandumbu jo. (Iza. 32:2) Tunanyingika ngwetu, mutuhasa kulweza makulwana yuma yeswayo chakuhona kwivwa woma ngwo mayilweza atu akwo. Ni yetu nawa kutwatambile kushinjila mandumbu wano hanga atulweze yuma yize kutushi ni ulite wa kuyinyingika. Chikwo nawa, tunasakwilila mapwo ja makulwana mumu keshi kushinjila malunga jo hanga aalweze sango jambala. Kwamba pundu, chili chipema muze mapwo ja makulwana keshi kunyingika sango jimwe hakutwala kuli mandumbu mu chikungulwila. w22.09 11 ¶10-11

Mutuhasa kupwa ni shindakenyo ngwetu, Yehova makalamwina tuvumbi twenyi ashishika ha “luyinda munene” yoze unakundama. (Mateu 24:21; Danie. 12:1) Iye makachilinga muze chizavu cha akwa-mavungu avuluka ngwo, Ngoke wa Mangoke makalukukila tuvumbi twenyi ashishika hashi heswe. Chipwe ngwe chizavu chino cha akwa-mavungu muchichinga atu eswe 193 waze analingi chihanda ku Nações Unidas, ayo kechi kahiana Chitunda ni tujita twenyi a mu malilu! Yehova kanalakenya ngwenyi: “Mungukasolola unene wami ni usandu wami, ni kulisolola yami mwene kumeso ja mavungu anji. Henaho makanyingika yami nguli Yehova.” (Eze. 38:​14-16, 23) Kulimika cha Ngoke wa Mangoke ni atu ja Yehova, muchikatutwala ndo ku jita ya Armagedone, haze Yehova makanongesa “mianangana a yifuchi yeswe ya hashi.” (Uso. 16:​14, 16; 19:​19-21) Alioze, “akwa ululi makatungisa chifuchi; atu angunu kumakalindulukamo.”—Yishi. 2:21. w22.10 16-17 ¶16-17

Yetu kutuchi kuhasa kunyingika yize yili ku ma mbunge jo, Yehova wika mwe unayinyingika. (Yishi. 16:2) Yehova kakuzanga atu a mutapu weswe. Kashika, kanatukolweza hanga ‘tutohese mbunge jetu.’ (2 Kori. 6:13) Nyi twachilinga, mutuzanga mandumbu jetu eswe a ku ufulielo chakuhona kwapatwila. Chino chinalumbunuka nawa ngwo, kutwatambile kupatwila atu waze hi Yela ja Yehova ko. Shina muhasa kupatwila usoko we yoze hi Chela cha Yehova ko, ha kumwamba ngwe: “Au kechi keza kalilongesa umwenemwene?” Ka, mumu nyi wachilinga, acho unalizate ni kulipwisa mukwa-ululi. Yehova kananungu ni kuhana uhashi kuli “atu eswe” hanga alikonyeke. (Yili. 17:30) Twiwulukenu mashimbu eswe ngwetu, kulipwisa yetwene akwa-ululi chili chipi kumeso ja Yehova. Kuzanga shimbi ja Yehova ja ululi muchihasa kutukwasa kuwahilila ni kukwasa akwetu hanga akundame kuli yetu ni kuli Zambi. w22.08 31 ¶20-22

Mutuhasa kushimbwila kupalika mu yihungumiona muze tunalingi mulimo wetu wa kwambujola. Yihungumiona yacho kota muyikoka chinji kulutwe lia matangwa. (Danie. 11:44; 2 Timo. 3:12; Uso. 16:21) Alioze tuli ni shindakenyo ngwetu, Yehova matukwasa ha yize mutufupiwa. Mumu liaka? Mumu iye mashimbu eswe kakukwasa tuvumbi twenyi hanga alinge milimo yo chipwe ngwe muchipwa chikalu. Tunyongenu hali profeta Ezekiele, muze ambujolwele kuli A-Yunda apwile mu undungo ku Babilonia. Ezekiele te mambulwila atu a mutapu uka? Yehova kambile ngwenyi, atu jacho kali “akwa shino,” “akwa pami,” nawa “kapwa munyachi wa yihulia.” Chapwile ngwe, Ezekiele kali mukachi ka mbimbo ni tuvwanda. Kashika, kutushi kukomoka ha unji wa yisuho yize Yehova amulwezele ngwenyi: “Kanda uvwila woma!” (Ezekiele 2:​3-6) Ezekiele kahashile kulinga mulimo wenyi mumu (1) kamutumine kuli Yehova, (2) spiritu yisandu yamuhele tachi ni (3) maliji a Zambi kakolesele ufulielo wenyi. w22.11 2 ¶1-2

Shina Yehova kalingile yitangiwa yeswe yikapwe ni mwono wa mutolo? Ka. Atu wika e atangile akapwe ni mwono wa mutolo. Yehova katutangile nawa ni nyonga lia kutwama ku miaka yeswe. Mbimbiliya yinambe ngwo, Zambi hanase “ye miaka yeswe mu mbunge.” (Chilu. 3:11) Kashika twakumona kufwa ngwe mukwa kole yetu. (1 Kori. 15:26) Chakutalilaho, nyi twanyingika ngwetu mutu umwe kanayiji, shina twakumwecha chizechene? Ka. Kanji-kanji twakufupa mbuki hanga amuwuke. Kwamba umwenemwene, yetu eswe twakulifunga hanga tuchine kufwa. Muze twakufwisa mutu yoze twazanga, chipwe ngwe kali kanuke hanji mukulwana, nihindu twakunenganyana ni kwivwa yikola ku mbunge. (Yoa. 11:​32, 33) Kwamba pundu, nyi Yehova kazangile tutwame ha miaka yikehe, kachi katutangile ni nyonga lia kutwama ku miaka yeswe. w22.12 3 ¶5; 4 ¶7

Anji a kuli mandumbu jetu kanayiji, kanevu woma ni kunenganyana. Kashika nunga ni kulihanjikisa ni mandumbu a mu chikungulwila. Misongo muyihasa kutukinda kupwa hamuwika ni mandumbu jetu. Hamukunda wa chino, mutuhasa kulivwa ngwe postolo Yoano yoze wazangile kumona meso ni meso sepa lienyi Ngayu. (3 Yoa. 13, 14) Alioze, kanyingikine ngwenyi ha mashimbu jacho chino te kuchichi kulingiwa. Kashika yalinga yize te mahasa, yamusonekena mukanda. Nyi kuwahashile kulimona ni mandumbu je a mu chikungulwila, sako tachi hanga uhanjike no mu jila yeka. Muze twakuhanjika ni mandumbu jetu twakupwa ni sambukila, kutushi kulivwa ukawetu. Nyi ngwe mununga ni kulipikala fupa ukwaso wa makulwana ni kutayiza ukwaso wo.—Iza. 32:​1, 2. w22.12 17-18 ¶6-7

Mbimbiliya yakusolola ngwo ha shimbu limwe, molu ja Yosefwe kaasele mu kuuli ni kumukasa malenge. (Samu 105:​17, 18) Yuma ku mwono wa Yosefwe yiyinunga ni kupiha chinji. Iye kapwile ndungo yoze te akujikijila, haliapwila hapwa funge wamokomoko. Shina hiunapalika mu yimwe yuma ku mwono, mba yiulemba chipwe chocho yiyinunga ni kupiha? Chino muchihasa kulingiwa. Mumu liaka? Mumu Yehova keshi kukwika yuma yipi yilingiwe hali yetu mu chifuchi chino cha Satana. (1 Yoa. 5:19) Chipwe chocho, mutuhasa kupwa ni shindakenyo ngwetu, Yehova kakumona yuma yeswe yize tunapalika, nawa mahasa kutukwasa. (Mateu 10:​29-31; 1 Petu. 5:​6, 7) Chikwo nawa, Yehova kanalakenya ngwenyi: “Chichi kukuhichika nichimwe, chipwe kukwehuka, ka.” (Hepre. 13:5) Yehova mahasa kukukwasa chipwe ngwe unapalika mu yuma yize yinasoloka ngwe kuuchi kuhasa kuyikumba. w23.01 16 ¶7-8

Mbimbiliya yinasolola jila yikwo yize Yehova akutusolwelamo zango. Yisoneko yinatwehe shindakenyo ngwo, Zambi kechi kutwehuka muze mutulinga umwe uhenge. A-Izalele kalingile shili ha yisuho yinji, alioze muze apwile ni kulikonyeka ni mbunge yeswe, Zambi te kakwakonekena. Akwa-Kristu atangu no kanyingikine ngwo, Yehova kakwazanga chinji. Yehova katumine Paulu hanga akolweze mandumbu mu chikungulwila, ‘akonekene ni kutakamisa’ lunga yoze walingile shili yinene hanyima yalikonyeka. (2 Kori. 2:​6, 7; 1 Kori. 5:​1-5) Chili chipema kunyingika ngwo, Yehova keshi kwehuka tuvumbi twenyi chipwe ngwe mahengesa! Shimbu achilinge, ni zango lieswe iye kakwakwasa, kwafumba ni kwatayiza cheka hanga apwe masepa jenyi. Musono, yino ye Yehova analakenya kuli tuvumbi twenyi waze akulikonyeka muze mavulumuna. (Tia. 4:​8-10) Mbimbiliya yakusolola, mana a Zambi, ululi ni zango lienyi. Mukanda uno wakusolola ngwo, Zambi kanazange hanga tumunyingike ni kupwa masepa jenyi. w23.02 7 ¶16-17

Hi chipi ko kulihulikila ha yuma yinalingiwa hano hashi yize yinamanununa uprofeto wa mu Mbimbiliya. Chakutalilaho, Yesu katulwezele yuma yize te muyitukwasa kunyingika ngwo, songo lia hano hashi linakundama. (Mateu 24:​3-14) Postolo Petulu kanatukolweza tulihulikile ha yuma yize yinamanununa uprofeto hanga tununge ni kukolesa ufulielo wetu. (2 Petu. 1:​20, 21) Iye kanatukolweza hanga tununge ni “kupupwisa kuheta cha tangwa lia Zambi.” (2 Petu. 3:​11-13) Mumu liaka? Hi ko ngwo mumu tunazange kunyingika “tangwa ni ola” yize Yehova maneha Armagedone, alioze mumu tunazange kuzachisa kanawa mashimbu waze asalako hanga tupwe “ni kwenda chisandu.” (Mateu 24:36; Luka 12:40) Tunazange kusolola yitanga yipema ni kusa shindakenyo ngwetu, yuma yeswe yize twakulingila Yehova yili mumu twakumuzanga. Mba tufunge nyonga liacho, twatamba kukeya hali yetu ene. w23.02 16 ¶4, 6

Mapanga akwo katamba kulinga yimwe haliapwila mba akatwame mu Paraisu. Twatamba kusolola zango lietu muli Yesu ha chize twakutwama ni mandumbu jenyi Akwa-Kristu akuwayisa. Yesu mwene kambile ngwenyi, te kumapatwila “mapanga akwo” kulita ni chize akutwama ni Akwa-Kristu akuwayisa. (Mateu 25:​31-40) Mutuhasa kwakwasa ha kulinga mulimo wa kutayisa tumbaji. (Mateu 28:​18-20) Kutwatambile kunyonga ngwetu, twatamba kupwa mu Paraisu mba tulinge yuma yalita. Chipwe haliapwila mutuhasa kusa tachi hanga tulinge yuma yeswe kanawa ngwe yize twakuhanjika ni kulinga. Chikwo nawa, kupwa ni nyonga lialita ha chize twakumbata mwono wetu. Mutuhasa nawa kushishika kuli Yehova, kuli waze twalimbata no, ni kuli mandumbu jetu. Nyi twononokena Yehova haliapwila muchipwa chashi kumwononokena mu chifuchi chaha. Kashika twatamba kupwa ni yitanga yize muyisolola ngwo tunalilulieka hanga tukatwamemo. w22.12 11-12 ¶14-16

Yetu twakuzanga Yesu mumu kali Mwanangana mupema. Yehova mwene kafumbile Mwanenyi ni kumusakula hanga ayule. (Iza. 50:​4, 5) Nyonga nawa ha zango lize Yesu asolwele ha kuhana mwono wenyi ngwe chitapo. (Yoa. 13:1) Yesu katela zango lietu mumu kali Mwanangana wetu. Kambile ngwenyi, waze mapwa masepa jenyi kali waze akumuzanga ni kwononokena shimbi jenyi. (Yoa. 14:15; 15:​14, 15) Chili chiwape chinene kupwa sepa lia Mwana wa Yehova! Wakumona chize Yesu akwimbulula kanawa kulikehesa cha Tato. Walilongesa ngwe Yesu kalishile mbunga, katakamishine waze a makuka mbunge ni kuwuka mieji. (Mateu 14:​14-21) Unamono chize iye akusongwela chikungulwila musono. (Mateu 23:10) Chikwo nawa, unanyingika ngwe amu ali Mwanangana, kwasala hakehe matulingila yuma yinji yipema. Kuchi muhasa kusolola ngwe wakumuzanga? Muhasa kuchilinga ha kukaula chilweza chenyi. Chuma chitangu chize mulinga chili kulihana kuli Yehova ni kukupapachisa. w23.03 4 ¶8, 10

Yehova kanazange hanga tuhengwole yitangiwa. Mukanda wa Izaia 40:26 unambe ngwo: “Hetulenu meso jenu kwilu nukamone, iya watangile yino yuma?” Kumbululo lili zwalala. Yehova katangile yuma yinji yipema mu malilu, hashi ni mu kalunga-lwiji. Yitangiwa yacho yakutulongesa yuma yinji hali iye. (Samu 104:​24, 25) Achinyonga ha chize Zambi atutangile. Iye katutangile ni uhashi wa kumona upeme wa yitangiwa. Chino chakulingiwa mumu Yehova katutangile ni meso, matwi, chikowa, limi ni mazulu. Mbimbiliya yakutukwasa nawa hanga tumone ulemu wa kulilongesa hakutwala ku yitangiwa. Yitangiwa yakutukwasa kunyingika yitanga ya Yehova. (Roma 1:20) Chakutalilaho, yuma yeswe mu malilu ni hashi yili yakululieka kanawa mu jila yakukomwesa. Yino yakusolola mana a Zambi. Achinyonga nawa ha kulia cheka ni cheka chize tukwete. Chino chakusolola zango lize Zambi akwete hali yetu. Muze twakumona yitanga ya Yehova kupalikila mu yuma yize atangile, twakumunyingika kanawa ni kukundama kuli iye. w23.03 16 ¶4-5

Chifuchi chino chinanungu ni kupiha chinji, kashika ujikijilo wetu ha Liji lia Zambi muupalika mu cheseko. Atu amwe mahasa kutulweza yimwe yize muyitutwala hanga tukakajane ha umwenemwene wa mu Mbimbiliya. Chakutalilaho, ayo mahasa kwamba ngwo, Mbimbiliya kuyishi kuhanjika umwenemwene hanji ngwo, Yehova keshi kuzachisa ndungo wamwenemwene hanga atusongwele. Alioze nyi twapwa ni shindakenyo ngwetu, Mbimbiliya yili yamwenemwene, yuma yacho kuyichi kukokolola ufulielo wetu. Mutununga ni kwononokena ‘yiyulo [ya Yehova] matangwa eswe ndo ku songo.’ (Samu 119:112) Kutuchi kwivwa sonyi ja kulweza akwetu umwenemwene ni kwakolweza hanga akaule yiyulo ya mu Mbimbiliya. (Samu 119:46) Chikwo nawa, muhasa kukumba yihungumiona ni “uhomboloji hamwe ni uwahililo.” (Kolo. 1:11; Samu 119:​143, 157)Twakusakwilila chinji Yehova ha kutukwasa kunyingika umwenemwene! Umwenemwene wakutukwasa kulihumikiza ni kujikiza. Wakutwaha nawa kutalatala chipema cha kulutwe lia matangwa muze Wanangana wa Zambi mukayula. w23.01 7 ¶16-17

Ha ufuku muze te kanda afwa, Yesu yalembela chinji tumbaji twenyi ha kwita kuli Tato hanga ‘aafunge kuli mwe mupi.’ (Yoa. 17:15) Chino chasolwele zango lize Yesu apwile nalio hali tumbaji twenyi. Chipwe muze anyingikine ngwenyi kwasala hakehe hanga amushihe, nihindu yalihulumba hali apostolo jenyi. Chizechene ngwe Yesu, muze tunalembe kutushi kulihulikila wika hali yetwene. Shimbu tuchilinge, yetu twakulembela mandumbu ni mapangi jetu. Muze twakuchilinga, twakusolola ngwetu tunakaula shimbi ya Yesu ya kulizanga umwe ni mukwo, nawa twakusolola kuli Yehova chize twakuzanga mandumbu jetu a mu ufulielo. Kulembela mandumbu ni mapangi jetu hi kukisa mashimbu ko. Mbimbiliya yinatulweze ngwo, “kuliumba cha mukwa ululi chili ni tachi jinji.” (Tia. 5:16) Twatamba kulembela mandumbu jetu a ku ufulielo mumu kakupalika mu yipikalo yinji. w22.07 23-24 ¶13-15