Fuliela Muli Yehova Muze Uli mu Yipikalo

 1. Mumu liaka twatamba kusa mbunge ku utowezo wa Yesu?

HA Uprofeto wenyi wa matangwa akusula, Yesu yamba ngwenyi: “Keyelenu hali yenwene kuchina hanji mbunge jenu mujilema ni . . . yipikalo ya mwono uno.” (Luka 21:34) Twatamba kusa mbunge ku utowezo uno. Mumu liaka? Mumu, ni yetu twakupalika mu yipikalo yize atu eswe akupalika.

 2. Yipikalo yika mandumbu jetu anapalika ku mwono?

² Ha mashimbu amwe, mutuhasa kupalika mu yipikalo yinji ha shimbu limuwika. Tutalenu yilweza yize yinasulaho. Yoanob umwe Chela cha Yehova, yoze ukwete musongo wa wongo (esclerose múltipla), kevwile yikola ku mbunge muze amuchinyine kuli mukwo-pwo yoze te alimbata nenyi ha miaka 19. Kusulaho, ana jenyi aali a mapwo yecha kuwayila Yehova. Alunga ni pwo Bob ni Linda, ayo kapalikile mu kapinda walisa ni wa Yoano. Ayo eswe aali yaahuma ku milimo, chocho kahashile nawa kutwama mu zuwo lize apwile. Kuchizako yipikalo yino, Linda yamulweza kuli ndotolo ngwo kali ni musongo wa ku mbunge uze muhasa kumushiha, nawa musongo ukwo yiuputuka kupihisa uhashi uze wa kukinda misongo mu mujimba wenyi, (sistema imunológico).

 3. Kulita ni A-Fwilipu 4:6, 7, shindakenyo yika mutuhasa kupwa nayo?

³ Mutuhasa kupwa ni shindakenyo ngwetu, Tangi kanda Tata yetu wa zango, Yehova, kananyingika chize twakwivwa muze tuli ni yipikalo. Nawa kanazange kutukwasa hanga tukumbe yipikalo yacho. (Tanga A-Fwilipu 4:6, 7.) Mu Mbimbiliya muli yilweza yinji yinasolola yipikalo yize tuvumbi twa Zambi apalikile ku mwono wo. Yinatulweze nawa, chize Yehova aakwashile kukumba yipikalo yacho. Tutalenu yimwe yilweza.

 4. Yipikalo yika Eliya amwene, nawa kuchi evwile hakutwala kuli Yehova?

⁴ Eliya te kakuwayila Yehova ha mashimbu akalu nawa kapalikile mu yipikalo yinji. Mwanangana Ahabe, umwe wa kuli mianangana waze te keshi kushishika mu Izalele, yambata Jezebele umwe pwo mupi yoze te wa kuwayila Mbale. Ayo eswe aali, yazalisa uwayilo wa Mbale mu chifuchi cheswe, nawa yashiha aprofeta anji a Yehova. Eliya kahashile kuchina. Iye nawa yalilamwina ku kapunga ha kufuliela muli Yehova. (1 Mia. 17:2-4, 14-16) Chikwo nawa, Eliya yafuliela muli Yehova muze alimikine ni aprofeta a Mbale. Yakolweza A-Izalele hanga awayile Yehova. (1 Mia. 18:21-24, 36-38) Ha mashimbu jacho akalu, Eliya kamwene chize Yehova amufungile ni kumukwasa ha yisuho yinji.

5-6. Kulita ni 1 Mianangana 19:1-4, kuchi Eliya evwile, nawa kuchi Yehova asolwele ngwenyi kakuzanga Eliya?

⁵ Tanga 1 Mianangana 19:1-4. Eliya kevwile woma, muze Mwazovu Jezebele afupile kumushiha. Hachino, yachinyina ku Mbia-shipa. Iye yalema ku mbunge, chocho “yeta kuli Zambi hanga te afwe.” Mumu liaka evwile chocho? Eliya te chihenge, “mutu wa kulifwa ni yetu mu mbunge yenyi.” (Tia. 5:17) Iye hanji kalemene ku mbunge, mumu lia kuzakalala ni kuhonga. Eliya kota kanyongene ngwenyi, tachi jize asele hanga akwase atu kuwayila Yehova jinakalitokela, mu Izalele yuma te kuyichi kupema, nawa ngwo iye wika mwe te unanungu ni kuwayila Yehova. (1 Mia. 18:3, 4, 13; 19:10, 14) Mutuhasa kukomoka ha chize evwile profeta yono washishika. Alioze, Yehova kanyingikine chize profeta wenyi evwile ku mbunge.

⁶ Yehova kakatenukinyine Eliya, mumu lia kusolola chize te anevu ku mbunge. Se achilinge, iye yamukwasa hanga apwe nawa ni tachi. (1 Mia. 19:5-7) Kulutwe, ni vumbi lieswe Yehova yakwasa Eliya alumune kunyonga chenyi ha kumusolwela ndundo Jenyi jahiana. Kusulaho, Yehova yamulweza ngwenyi, mu Izalele te muchili atu 7,000 waze alitunyine kuwayila Mbale. (1 Mia. 19:11-18) Ha kumulweza yino yuma, Yehova yasolola kuli Eliya ngwenyi te kakumuzanga.

 7. Shindakenyo yika twapwa nayo ha chize Yehova akwashile Eliya?

⁷ Shina unapalika mu yimwe yipikalo? Chili utakamiso kunyingika ngwetu, Yehova kanyingikine chize Eliya evwile! Chino chinatwehe shindakenyo ngwo, iye kananyingika nawa yipikalo yetu. Iye kananyingika yize mutulinga ni yize kutuchi kuhasa kulinga, nawa kananyingika yize twakunyonga ni chize twakwiva ku mbunge. (Samu 103:14; 139:3, 4) Nyi mutwimbulula Eliya ha kufuliela muli Yehova, iye matukwasa tukumbe yipikalo yize yinatulemesa ku mbunge.—Samu 55:22.

 8. Kuchi Yehova makukwasa kukumba yipikalo ye?

⁸ Yipikalo muyihasa kukunyongesa ulivwe ngwe, kapinda we kechi kuhwa ni kukuhongesa. Nyi chino muchilingiwa, iwuluka ngwe Yehova makukwasa hanga umukumbe. Kuchi iye makukwasa? Iye kanakwite hanga umulweze yipikalo ye ni chize unevu. Nyi wachilinga, iye makumbulula kwita che. (Samu 5:3; 1 Petu. 5:7) Kashika, lemba mashimbu eswe kuli Yehova ha kumulweza yipikalo ye. Iye kechi kuhanjika ne ngwe chize ahanjikile ni Eliya, alioze mahanjika ne kupalikila mu Mbimbiliya ni mu ululikiso wenyi. Lusango yoze mutanga mu Mbimbiliya mahasa kukutakamisa ni kukwaha kutalatala. Chikwo nawa, mandumbu je amu ufulielo mahasa kukutakamisa.—Roma 15:4; Hepre. 10:24, 25.

 9. Kuchi umwe sepa mupema mahasa kutukwasa?

⁹ Yehova kalwezele Eliya hanga ahane yimwe yiteli yenyi kuli Elisha. Ha kulinga chino, Yehova yahana kuli Eliya sepa mupema yoze te mamutakamisa muze malema ku mbunge. Chizechene nawa, ni yetu muze mutulweza sepa litu chize tunevu ku mbunge, iye mahasa kutukwasa kumbata yiteli yetu. (2 Mia. 2:2; Yishi. 17:17) Nyi mulivwa ngwe kukushi ni umwe yoze mulweza yipikalo ye, lemba kuli Yehova hanga akukwase kuwana umwe ndumbu wajama ku ufulielo yoze mahasa kukutakamisa.

10. Kutalatala chika chilweza cha Eliya chinatwehe, nawa kuchi chilakenyo chili ha Izaia 40:28, 29 muchihasa kutukwasa?

¹⁰ Yehova kakwashile Eliya kukumba yipikalo yenyi ni kununga kumuwayila ni ushishiko weswe. Chilweza cha Eliya chinatwehe kutalatala. Ha mashimbu amwe, mutuhasa kupwa ni yipikalo yinji yize muyituhongesa. Alioze, nyi mutufuliela muli Yehova, iye matwaha tachi jize tunafupiwa hanga tununge ni kumuwayila.—Tanga Izaia 40:28, 29.

11-13. Kuchi yipikalo yapinjishile tuvumbi wano atatu a Zambi?

¹¹ Mu Mbimbiliya muli atu akwo waze apalikile mu yipikalo. Chakutalilaho, Hana kapalikile mu yipikalo mumu kapwile mumba nawa mukwo chihalika te kakumukekuna. (1 Samue. 1:2, 6) Yipikalo ya Hana yamunehenene yinyengo yinji, chocho yaputuka kulila ni kuhona mate akulia.—1 Samue. 1:7, 10.

¹² Ha mashimbu amwe, Mwanangana Ndawichi kalemene ku mbunge hamukunda wa yipikalo. Achinyonga ha lamba lize amwene. Iye kapwile ni kwivwa chinyengo mumu lia yuma yipi yize alingile. (Samu 40:12) Mwanenyi Absalome yalimika nenyi, chino yichimushihisa. (2 Samue. 15:13, 14; 18:33) Nawa umwe wa kuli masepa ja Ndawichi, yamukunjika kuli waze te analimika nenyi. (2 Samue. 16:23–17:2; Samu 55:12-14) Samu jinji jize Ndawichi asonekene, jinasolola yinyengo ni ufulielo wenyi ukolo muli Yehova.—Samu 38:5-10; 94:17-19.

¹³ Ha mashimbu amwe, umwe mukwa-kwimba masamu yaputuka kuvwila yingulungulu chipululu, mumu lia mwono wo upema. Iye kota kapwile umwe wa ku chisemuko cha Ka-Levi Asafwe nawa te kakukalakala “muma musandu mwa Zambi.” Mukwa-kwimba yono, kapinjile chinji mu manyonga, chocho yahona chiseke ni uwahililo ha yuma yize apwile nayo. Iye yaputuka nawa kuyambashana ha yiwape yize yakwiza ha kulingila Zambi.—Samu 73:2-5, 7, 12-14, 16, 17, 21.

14-15. Yika twalilongesa ha yilweza yitatu ya mu Mbimbiliya hakutwala ku kufupa ukwaso wa Yehova?

¹⁴ Tuvumbi wano atatu a Yehova, eswe kafulielele muli iye hanga aakwase. Ayo kalembele kuli Yehova hakutwala ku yipikalo yo. O yazulula mbunge jo ni kumulumbunwina mumu liaka te analeme ku mbunge. Nawa yanunga ni kuya ku chihela cha kuwayila Yehova.—1 Samue. 1:9, 10; Samu 55:22; 73:17; 122:1.

¹⁵ Ni keke yeswe, Yehova yakumbulula yilemba ya hita umwe wa kuli ayo. Hana yapwa ni sambukila ya ku mbunge. (1 Samue. 1:18) Ndawichi yasoneka ngwenyi: “Mukwa ululi lamba linji akumona, alioze Yehova kakumupulula ku luyinda wenyi mweswe.” (Samu 34:19) Kulutwe, mukwa-kwimba masamu yalivwa ngwe Yehova te kanamukwate ku “kwoko [lienyi] lia chindume,” ni kumusongwela ni chiyulo cha zango. Yemba ngwenyi: “Chipema kuli yami kukundama kuli Zambi. Hinasa ufulielo wami muli Mwene Yehova.” (Samu 73:23, 24, 28) Yika twalilongesa ha yilweza yino? Twalilongesa ngwetu, ha mashimbu amwe mutukapwa ni yipikalo yize muyitulemesa ku mbunge. Alioze, mutuhasa kuyikumba nyi mutupukuna ha chize Yehova akwashile akwetu, kujikijila muli iye mu yilemba ni kumwononokena ha kulinga yeswe yize matwita.—Samu 143:1, 4-8.

16-17. (a) Mumu liaka kutwatambile kulihandununa kuli Yehova ni tuvumbi twenyi? (b) Kuchi mutuhasa kuzuka nawa tachi?

¹⁶ Yilweza yino yitatu yatulongesa nawa longeso likwo lilemu—kutwatambile kulihandununa kuli Yehova ni tuvumbi twenyi. (Yishi. 18:1) Pangi Nancy, yoze walemene ku mbunge muze mukwo-lunga amuchinyine, yamba ngwenyi: “Kwapwile matangwa anji waze te chishi kuzanga kumona chipwe kuhanjika ni mutu niumwe. Muze te nakulihandununa hali akwetu, yinyengo yami te yakwoka chinji.” Yuma yalumukine muze Nancy afupile majila akukwashilamo akwo waze no te akupalika mu yipikalo. Mwene yamba ngwenyi: “Te nakupanjika akwetu muze anangulweze yipikalo yo. Chocho, yingumona ngwami muze te nakulihulikila hali akwetu ni ha yipikalo yo, te chakungukwasa nguhone kulihulikila chinji ha yipikalo yami.”

¹⁷ Mutuhasa kuzuka nawa tachi hakuya ku kukunguluka chetu cha chikungulwila. Muze tunayi ku kukunguluka, acho tunahane Yehova uhashi hanga ‘atukwase, ni kutulembejeka.’ (Samu 86:17) Koko, iye kakutukolweza kupalikila mu spiritu yisandu, Liji lienyi ni muli tuvumbi twenyi. Kukunguluka cha kutwaha uhashi wa “kulianyina” utakamiso. (Roma 1:11, 12; MW 1991.) Pangi Sophia yamba ngwenyi: “Yehova ni mandumbu jetu amu ufulielo kangukwashile hanga ngununge ni kunyongonona. Chuma chilemu ku mwono wami, chapwile kukunguluka cha chikungulwila. Yingunyingika ngwami, kuya mu munda mashimbu eswe, kupwa hamwe ni mandumbu, yangukwashile kukumba yipikalo ni kuzakalala.”

18. Nyi mutulema ku mbunge, yika Yehova mahasa kutwaha?

¹⁸ Muze mutulema ku mbunge, twiwulukenu ngwetu, Yehova kalakenyene wika kuhwisa yipikalo kulutwe lia matangwa, alioze kanazange nawa kutukwasa hanga tunyongonone mu yipikalo yetu musono. Iye kakutwaha “tachi” hanga jitukwase kukumba manyonga waze akutulemesa ku mbunge ni kuhona kutalatala.—Fwili. 2:13; MW 1991.

19. Chilakenyo chika chili ha A-Roma 8:37-39?

¹⁹ Tanga A-Roma 8:37-39. Postolo Paulu kanatukwase tupwe ni shindakenyo ngwetu, kukushi nichimwe chize muchituhandununa ku zango lize Zambi akwete hali yetu. Kuchi mutuhasa kukwasa mandumbu jetu waze anase tachi hanga akumbe yipikalo yo? Mutwe uze muusulaho, muulumbununa chize mutuhasa kwimbulula Yehova hakusolola keke ni kukwasa mandumbu jetu muze ali mu yipikalo.