Shina Muhasa Kukwasa Mulimo wa Kutayisa Tumbaji?

 1. Yika Yehova alingile hali yena?

KUCHI chapwile mba upwe Chela cha Yehova? Kota chitangu wevwile “sango lipema” kupalikila muli usoko hanji longi-ni-mukwenu ku shikola, mukwa-mulimo-ni-mukwenu, hanji muze mandumbu ayile ni kwambujola ku zuwo lienu. (Marku 13:10) Chino chinasolola ngwo, umwe wasele mashimbu ni kulihana chinji hanga akulongese Mbimbiliya. Kupalikila mu longeso lia Mbimbiliya, yiuputuka kuzanga Yehova ni kunyingika ngwo neye kakukuzanga. Yehova yakukoka mu umwenemwene, haliapwila hiwapwa kambaji ka Yesu hamwe ni kutalatala cha kutwama ku miaka yeswe. (Yoa. 6:44) Yehova kazachishile umwe hanga akulongese umwenemwene ni kukutayiza ngwo uli kavumbi kenyi. Kwamba pundu, yino yakukutwala hanga usakwilile chinji Yehova.

 2. Yika mutumona ha mutwe uno?

² Amu hitwanyingika umwenemwene, tuli ni chiteli cha kukwasa akwetu hanga apwe hamuwika ni yetu mu jila yino yinatwale ku mwono wa mutolo. Hanji muchihasa kupwa chashi kuli yetu kwambujola ku zuwo ni zuwo, alioze muchihasa kutukalila kuputuka ni kusongwela malongeso a Mbimbiliya. Shina che wakulivwa? Nyi che wakulivwa, yikuma yize yili ha mutwe uno muyikukwasa. Mutumona yize yakutukolweza kutayisa tumbaji. Mutumona nawa chize mutukumba kapinda yoze mahasa kutukinda kusongwela longeso lia Mbimbiliya. Chitangu, tutalenu mumu liaka kutwatambile kupwa wika akwa-kwambujola, alioze twatamba kupwa nawa alongeshi a sango lipema.

 3. Mumu liaka twakwambujola?

³ Muze Yesu apwile hano hashi, kahanyine yiteli yaali kuli tumbaji twenyi. Chitangu, iye kaalwezele ngwo katamba kwambujola sango lipema lia Wanangana, nawa yaalweza chize mahasa kuchilinga. (Mateu 10:7; Luka 8:1) Chakutalilaho, Yesu kalwezele tumbaji twenyi yize malinga nyi atu matayiza sango lipema, ni yize malinga nyi atu malituna sango jacho. (Luka 9:2-5) Iye nawa kalumbunwine ngwenyi, tumbaji twenyi te mambujola kuli atu anji ni ku yihela yinji “mu yifuchi yeswe ya hashi.” (Mateu 24:14; Yili. 1:8) Yesu kalwezele tumbaji twenyi hanga ambujole Wanangana wa Zambi ni kulweza atu yize Wanangana wacho muukalinga, chipwe ngwe atu matayiza hanji ka.

 4. Kulita ni Mateu 28:18-20 kuchizako kwambujola, yika nawa twatamba kulinga?

⁴ Chiteli chika chamuchiali chize Yesu ahanyine kuli tumbaji twenyi? Chili kulongesa waze eswe mazanga kupwa tumbaji hanga ononokene yuma yeswe yize iye ahanyine shimbi. Atu amwe kakwamba ngwo, Yesu kahanyine wika mulimo wa kwambujola ni kulongesa kuli akwa-Kristu ku sekulu yitangu. Shina maliji wano kali amwenemwene? Ka. Yesu kambile ngwenyi, mulimo uno ulemu te muununga ndo ha matangwa jetu, chekwamba, “ndo kumanunuka cha miaka.” (Tanga Mateu 28:18-20.) Kota Yesu kahanyine shimbi yino muze asolokele kuli tumbaji kuhiana 500. (1 Kori. 15:6) Nawa mu usolwelo uze ahanyine kuli Yoano, Yesu kasolwele pundu ngwo tumbaji twenyi eswe kali ni chiteli cha kukwasa atu anyingike Yehova.—Uso. 22:17.

 5. Kulita ni 1 A-Korindu 3:6-9, yika Paulu atesele yize yinasolola ngwo kwambujola ni kulongesa yinalite?

⁵ Postolo Paulu katesele mulimo wa kutayisa tumbaji ni mulimo wa kutumba mbuto. Kasolwele ngwenyi, twatamba kulinga yuma yinji hi wika ko kutumba mbuto. Paulu kewulwile mandumbu mu Korindu ngwenyi: “Ami natumbile, Apolu wahinjilile . . . Enu nuli ulime wa Zambi.” (Tanga 1 A-Korindu 3:6-9.) Yetu tuli akwa-milimo mu “ulime wa Zambi.” Twakutumba mbuto muze twakwambujola. Alioze muze twakulongesa, acho tunahinjila meya ku mbuto yacho. (Yoa. 4:35) Chipwe chocho, twatamba kunyingika ngwetu Zambi mwe wakukolesa mbuto, chekwamba, iye mwe wakukoka atu kuli iye.

 6. Muze tunalongesa atu, twatamba kwakwasa alinge yika?

⁶ Yetu twakufupa atu waze “Zambi hanafunjikila ku mwono wa mutolo.” (Yili. 13:48) Mba atu jacho apwe tumbaji, twatamba kwakwasa (1) anyingike, (2) atayize, ni (3) akaule yize analilongesa mu Mbimbiliya. (Yoa. 17:3; Kolo. 2:6, 7; 1 Tesa. 2:13) Mandumbu eswe mu chikungulwila, mahasa kukwasa alongi a Mbimbiliya. Twakuchilinga ha kwatambwisa ni kwasolwela zango muze akwiza ha kukunguluka. (Yoa. 13:35) Chipwe waze ali ni longi umuwika wa Mbimbiliya, no katamba kusa mashimbu ni tachi hanga amukwase “kupupa,” chekwamba, kwehuka malongeso ni ndako jipi. (2 Kori. 10:4, 5) Kashika, kukwasa umwe mutu kwalumuna yimwe ku mwono wenyi ni kuheta ku upapachiso muchihasa kumbata tukweji anji. Chipwe chocho, tachi jize masa hanga alumune yitanga yenyi kujichi kulitokela.

 7. Yika yakutukolweza kwambujola ni kutayisa tumbaji?

⁷ Mumu liaka twakwambujola ni kutayisa tumbaji? Chitangu, mumu twakuzanga Yehova. Nyi mulinga yize muhasa hanga wononokene shimbi ya kwambujola ni kutayisa tumbaji, acho musolola ngwo wakuzanga Zambi. (1 Yoa. 5:3) Achinyonga hachino: Waputukile kwambujola ku zuwo ni zuwo mumu wakuzanga Yehova. Shina chapwile chashi kuli yena kwononokena shimbi yino? Kota, ka. Unewuluka chize wevwile muze wayile ku zuwo litangu ni kwambujola sango lipema? Kota wevwile woma! Alioze wanyingikine ngwo, uno we mulimo uze Yesu atwehele, chocho yiwononokena shimbi yenyi. Hakupalika cha mashimbu, yiuputuka kwijilila mu mulimo wa kwambujola. Mba yika mutwamba hakutwala ku kusongwela malongeso a Mbimbiliya? Muze wakunyonga ha kusongwela longeso lia Mbimbiliya, shina wakwivwa woma? Nyi che wakwivwa, lemba kuli Yehova ni kumwita hanga akukwase kukumba woma. Iye makukwasa hanga uzange mulimo wa kutayisa tumbaji!

 8. Kulita ni Marku 6:34, yika nawa yakutukolweza hanga tulongese akwetu?

⁸ Chamuchiali, zango hali enyembo jetu liakutukolweza hanga twambulwile sango lipema. Tangwa limwe, Yesu ni tumbaji twenyi te kanahongo mumu lia kwambujola chinji. Ayo te kanafupu chihela kuze mahwimina, alioze mbunga yinene ya atu yiyaawana. Mumu lia keke, Yesu yaputuka kwalongesa “yuma yinji.” (Tanga Marku 6:34.) Kwamba pundu, Yesu kasele tachi jinji hanga ambujole ha tangwa liacho, chipwe ngwe te kanahongo. Mumu liaka? Mumu kalisele mu chihela cha atu jacho. Yesu kamwene ngwenyi, atu jacho kanamono lamba nawa kanafupiwa kutalatala, chocho yaakwasa. Ni musono, atu kanamono lamba nawa keshi ni kutalatala. Ayo mahasa kusoloka ngwe kanawahilila ku mwono. Chipwe chocho, kutwatambile kwecha kwambulwila mumu lia chize anasoloka. Ayo kali ngwe mapanga waze hanatoko, nawa keshi kafunga yoze maasongwela. Postolo Paulu kambile ngwenyi, atu amutapu au kanyingikine Zambi nawa keshi ni kutalatala. (Efwe. 2:12) Ayo kali mu jila yize yatwala “ku kwonwona!” (Mateu 7:13) Muze twakumona chize atu mu njiza yetu anafupiwa kunyingika Zambi, zango ni keke yakututwala hanga twakwase. Jila yipema yakwakwashilamo, yili kwalongesa Mbimbiliya.

 9. Kulita ni A-Fwilipu 2:13, kuchi Yehova mahasa kukukwasa?

⁹ Kota wakwivwa woma, mumu unanyingika ngwe kusongwela longeso lia Mbimbiliya chakufupiwa mashimbu anji. Nyi che wakwivwa, lweza Yehova chize unevu. Mwite hanga akukwase kuwana mutu yoze mulongesa Mbimbiliya. (Tanga A-Fwilipu 2:13.) Postolo Yoano kambile ngwenyi, Zambi kakukumbulula yilemba yize yinalite ni upale Wenyi. (1 Yoa. 5:14, 15) Kashika, pwako ni shindakenyo ngwe, Yehova makukwasa hanga uzange mulimo wa kutayisa tumbaji.

10-11. Yika muyihasa kutukwika kusongwela malongeso a Mbimbiliya?

¹⁰ Yetu twakulemesa shimbi ya kutayisa tumbaji yize Yesu atuhele. Alioze ha mashimbu amwe, twakupalika mu kapinda yoze wakutukwika kulinga yize tunazange mu mulimo wacho. Tushimutwinenu kapinda wacho ni yize mutuhasa kulinga hanga tumukumbe.

¹¹ Yize tunapalika ku mwono muyihasa kutukwika kulinga yize tunazange. Chakutalilaho, mandumbu amwe hapwa tushinakaji hanji kakupinda ni yimwe misongo. Shina yino ye wakupinda nayo? Nyi chenacho, achinyonga yimwe ndambu ha yize twalilongesa ha musongo wa COVID-19. Twamona ngwetu, mutuhasa kusongwela malongeso a Mbimbiliya kupalikila ha telefone hanji ha internet! Kashika, muhasa kusongwela malongeso a Mbimbiliya chakuhona kukatuka ku zuwo lie. Chikwo nawa, atu amwe kanazange kulilongesa Mbimbiliya, alioze keshi kuhasa kuchilinga ha maola waze mandumbu jetu akuya ni kwambujola. Shina hiunanyongo kama kulihana hanga wakwase? Muhasa kulihana hanga ulilongese no ha ola yize ayo anazange, muchihasa kupwa chimene-mene hanji ufuku. Shina muhasa kulilongesa ni mutu ha ola yacho? Nikondemu kazangile kuhanjika ni Yesu ha ufuku, chocho Yesu yamulongesa ha ola yacho.—Yoa. 3:1, 2.

12. Yika yakutwaha shindakenyo ngwo mutuhasa kupwa alongeshi apema?

¹² Kulivwa ngwe kutushi utotombo wa kusongwela longeso lia Mbimbiliya. Mutuhasa kunyonga ngwe, mba tulongese mutu Mbimbiliya, tunafupiwa kupwa ni yinyingi hanji utotombo unji. Tutalenu yikuma yitatu yize muyikukwasa kupwa ni shindakenyo ngwo, muhasa kulilongesa Mbimbiliya ni mutu. Chitangu, Yehova kanakumono ngwo unajame hanga ulongese akwenu. (2 Kori. 3:5) Chamuchiali, Yesu yoze uli ni “yiyulo yeswe mwilu ni hashi,” hanakwehe chiteli cha kulongesa atu Mbimbiliya. (Mateu 28:18) Chamuchitatu, muhasa kujikijila ha ukwaso wa akwenu. Yehova kalongesele Yesu yize te mahanjika, nawa Yesu kanakajikijila ha malongeso a Tato. Ni yena muhasa kuchilinga. (Yoa. 8:28; 12:49) Chikwo nawa, muhasa kwita kuli kasongo wa chizavu cha kuya mu munda, umwe pionelu hanji mukwa-kwambujola yoze wajama hanga akulweze chize muputuka longeso lia Mbimbiliya ni kulisongwela. Mba upwe longeshi mupema, yako ni mandumbu wano muze maya ni kusongwela malongeso jo a Mbimbiliya, nawa tala chize ayo akuchilinga.

13. Mumu liaka twatamba kukaula majila aha akulongeselamo?

¹³ Muchihasa kutukalila kuzachisa mikanda ni majila aha akwambulwilamo. Mutapu uze twakusongwela malongeso a Mbimbiliya walumuka. Haliapwila mukanda uze tunasongwela nawo malongeso a Mbimbiliya uli, Wahilila Ku Mwono Ku Miaka Yeswe!. Mutapu wa kusongwela ni kululieka malongeso a Mbimbiliya walumuka. Twakutanga maparagrafu akehe nawa hitwapwa ni mashimbu anji a kushimutwina ni longi. Ha kulongesa twakuzachisa chinji yinema ni yikwata yikwo yize yili mu JW Library^®. Nyi kuwanyingikine kuzachisa kanawa yikwata yacho, eta kuli umwe ndumbu hanga akulongese chize muhasa kuyizachisa. Yetu atu tukwete chako cha kulikwachilila ha yuma yize tunanyingika. Kashika, chakutupwila chikalu kwijilila ni mutapu waha wa kulingilamo yuma. Alioze, ni ukwaso wa Yehova ni wa akwenu, muchipwa chashi kwijilila ni majila wano aha ni kuzanga kulongesa atu Mbimbiliya. Ngwe chize umwe pionelu ambile, mutapu uno waha wa kusongwela malongeso a Mbimbiliya, uli “upema kuli longi chipwe kuli longeshi.”

14. Nyi tunakalakala mu njiza yize atu keshi kupanjika sango jetu, yika twatamba kwiwuluka, nawa kuchi 1 A-Korindu 3:6, 7 unatukolweza?

¹⁴ Hanji twatwama mu njiza yize chapwa chikalu kuputuka malongeso a Mbimbiliya. Muchihasa kupwa ngwe atu keshi kuzanga kutupanjika hanji kakulimika ni sango jetu. Yika muyitukwasa kufuliela ngwetu, atu jacho mahasa kupanjika sango ja mu Mbimbiliya? Iwuluka ngwe hano hashi, yuma ku mwono wa atu muyihasa kwalumuka susumuku. Atu waze alitunyine kutupanjika ha chisuho chitangu mahasa kumona ngwo, kanafupiwa usongwelo wa Zambi ku mwono wo. (Mateu 5:3) Nawa, atu amwe waze apwile ni kulituna mikanda yetu, kulutwe yatayiza kulilongesa Mbimbiliya. Chikwo nawa, tunanyingika ngwetu Yehova mwe Mwenya mulimo. (Mateu 9:38) Iye kanazange hanga tununge ni kutumba ni kuhinjila meya, alioze mwene matatwisa. (1 Kori. 3:6, 7) Kashika chipwe ngwe kutushi longi wa Mbimbiliya, nihindu twiwulukenu ngwetu, Yehova keshi kuwahisa tachi jetu mumu lia unji wa alongi a Mbimbiliya waze tuli no!b

15. Kuchi Yehova akwivwa muze umwe akutayiza kulilongesa Mbimbiliya ni kusa mu yitanga yize analilongesa?

¹⁵ Yehova kakuwahilila chinji muze umwe mutu akutayiza umwenemwene wa mu Mbimbiliya ni kuwambujola kuli akwo. (Yishi. 23:15, 16) Yehova kakuwahilila chinji muze akumona atu jenyi mambujola sango lipema musono! Chakutalilaho, chipwe ngwe ha mwaka wa mulimo wa 2020, musongo wa Covid-19 wapinjishile chinji atu hashi heswe, nihindu tunakasongwela malongeso a Mbimbiliya 7.705.765. Chino chakwashile atu 241.994 kulihana kuli Yehova ni kwapapachisa. Tumbaji wano aha, no masongwela malongeso a Mbimbiliya ni kutayisa tumbaji anji. (Luka 6:40) Kwamba pundu, Yehova kakuwahilila muze akutumona mutulihana mu mulimo wa kutayisa tumbaji.

16. Yika mutuhasa kutesa kulinga?

¹⁶ Kutayisa tumbaji chakufupiwa tachi jinji, alioze ni ukwaso wa Yehova mutuhasa kulongesa mandumbu aha kuzanga Tata yetu wa mu malilu. Kutala kuchishi kulita kutesa kusongwela kama limwe longeso lia Mbimbiliya? Nyi mutuzachisa uhashi weswawo tuli nawo hanga tukolweze atu kulilongesa Mbimbiliya, mutuhasa kukomoka ha yize muyilingiwako. Yehova mawahisa tachi jetu!

17. Kuchi mutwivwa nyi twapwa ni limwe longeso lia Mbimbiliya?

¹⁷ Kwambujola ni kulongesa akwetu umwenemwene wa mu Mbimbiliya, chili chiwape chinene. Mulimo uno wakuneha uwahililo unji. Postolo Paulu yoze wakwashile atu anji kupwa tumbaji mu Tesalonika, yamba hakutwala ku chize te akwivwa ngwenyi: “Kutalatala chetu kuchi chapwa; hanji uwahililo wetu, hanji chipangula cha kulisamba chetu? Ngwami, Yenwene kumeso ja Mwene wetu Yesu ha kuheta chenyi. Mumu yenu nuli uhenya wetu ni uwahililo wetu.” (1 Tesa. 2:19, 20; Yili. 17:1-4) Mandumbu anji musono no che akwivwa. Umwe pangi avuluka ngwo Stéphanie, yoze hamwe ni mukwo-lunga akwashile atu anji kuheta ku upapachiso yamba ngwenyi: “Kukwasa atu hanga alihane kuli Yehova chakuneha uwahililo unji, kuhiana chuma cheswacho mutulinga.”