“Halisenu Yehova!” —Mumu Liaka?

1-3. (a) Ha mashimbu aka asonekene Samu 147? (b) Yika mutuhasa kulilongesa ha kutanga Samu 147?

KANJI-KANJI twakuhalisa hanji kuvumbika umwe mutu nyi matukomwesa ha yize ahanjika hanji alinga. Chino chakutukwasa hanga tuhalise chinji Yehova Zambi! Twakumuhalisa mumu lia ndundo jenyi jinene, jize twakumona mu yitangiwa yenyi, nawa twakumuhalisa mumu lia zango lienyi hali yetu, lize twakumona ha chitapo cha ukuule wa Mwanenyi.

² Muze twakutanga Samu 147, twakunyingika pundu ngwo, yoze wa usonekene kazangile chinji kuhalisa Yehova. Iye nawa kakolwezele akwo hanga ahalise Zambi hamwe nenyi.—Tanga Samu 147:1, 7, 12.

³ Kutwanyingikine yoze wasonekene Samu 147. Alioze mukwa-kuusoneka kota katwamine ha mashimbu waze A-Izalele afunyine ku Yerusaleme muze aatuswile mu undungo ku Babilonia. (Samu 147:2) Mukwa-kwimba masamu kahalishile nawa Yehova mumu atu Jenyi te mamuwayila mu chifuchi cho. Chocho yasolola yitela yakuhalishilamo Yehova. Yitela yika yenayo? Nawa yitela yika uli nayo yize muyikutwala ‘Kuhalisa Yehova’?—Samu 147:1.

 4. Muze Mwanangana Siru atuswile A-Izalele, kuchi ayo evwile, nawa mumu liaka?

⁴ Achinyonga chize A-Izalele evwile muze apwile mu undungo ku Babilonia. Waze aatwalileko te kakwaalenya hakwamba ngwo: “Twimbilenu kama umwe mwaso wa Zaione.” Alioze A-Yunda kakalivwile kanawa ha kuwimba. Mumu Yerusaleme, yize te yakwaanehena chiseke chinji, kayinongesene. (Samu 137:1-3, 6) Mbunge jo jamakukine, hachino, ayo te kanafupu utakamiso. Alioze ngwe chize liji lia Zambi liambile, Yehova kakwashile tuvumbi twenyi. Kuchi achilingile? Mwanangana Siru waku Persia kakumbile Babilonia ni kwamba hali Yehova ngwenyi: “Iye hangwaha shimbi ya kumutungila zuwo mu Yerusaleme.” Siru yalweza nawa A-Izalele ngwenyi: “Mweswawo uliko hakachi ka yenu eswe atu jenyi, akanduke, ni Yehova Zambi yenyi apwe hamwe nenyi.” (2 Sango ja Mianangana 36:23) Yino yatakamishine chinji A-Izalele mu Babilonia!

 5. Yika mukwa-kwimba masamu ambile ha ndundo ja Yehova jakutuwuka najo?

⁵ Yehova kakatakamishine wika vungu lia Izalele, alioze katakamishine nawa hita Ka-Izalele. Ni musono nawa Yehova che akulinga hali yetu. Mukwa-kwimba masamu yasoneka ngwenyi, Zambi “kakuwuka waze ali ni mbunge yamakuka; kakujichika yilonda yo.” (Samu 147:3) Muze mutuyiza hanji mutulema ku mbunge, mutuhasa kupwa ni shindakenyo ngwetu Yehova kakutuzanga. Yehova kanazange chinji kututakamisa ni kuhwisa yipikalo yetu yeswe. (Samu 34:18; Izaia 57:15) Iye kakutwaha mana ni tachi hanga tuhase kukumba kapinda mweswawo mutupalika ku mwono wetu.—Tiangu 1:5.

 6. Kuchi mutuhasa kuyuka ha maliji a mukwa-kwimba masamu waze ali Samu 147:4? (Tala chizulie ha uputukilo.)

⁶ Kusulaho mukwa-kwimba masamu yatala mwilu ni kwamba ngwenyi, Yehova “kakwalula tutongonoshi” nawa “kakwalula eswe majina jo.” (Samu 147:4) Mukwa-kwimba masamu te kakumona tutongonoshi, alioze te kanyingikine kanawa unji wo. Musono, akwa-yinyingi kakwamba ngwo galaxia yetu yikwete tununu a tununu a tutongonoshi. Nawa kuli tununu anji a magalaxia mu chifuchi! Atu kechi kuhasa kwalula tutongonoshi eswe, alioze Sakatanga mahasa kwaalula. Kwamba pundu, iye kananyingika hita katongonoshi kashika akwaaluka majina. (1 A-Korindu 15:41) Twamona ngwetu, Zambi kanyingika hita katongonoshi kashika ni yena kanakunyingika. Iye kananyingika kuze watwama, chize wakwivwa, ni yize unafupiwa ku mwono!

7, 8. (a) Yika Yehova ananyingika hali yetu? (b) Hana chilweza chize chinasolola keke ya Yehova?

⁷ Yehova kananyingika kanawa yize unapalika ku mwono, nawa kali ni ndundo ja kukukwasa ha yipikalo ye. (Tanga Samu 147:5.) Muhasa kwivwa ngwe kapinda we kali mukalu chinji nawa kuuchi kuhasa kumukumba. Zambi kananyingika yize mutuhasa kulinga ni yize kutuchi kuhasa, ha ‘kutwiwuluka ngwo tuli fufuta.’ (Samu 103:14) Yetweswe tuli yihenge, kashika twakulinga uhenge wowene hita shimbu, nawa chino muchihasa kutuvwisa chinyengo. Twakunenganyana chinji mumu lia yimwe twakuhanjika, usolo upi uze twakwivwa, hanji ukwa uze twakwivwa! Yehova keshi ni ulelu niumwe, alioze iye kananyingika kanawa chize twakwivwa.—Izaia 40:28.

⁸ Shina hiunevu kama ukwaso wa kwoko lia ndundo lia Yehova muze unapalika mu yeseko? (Izaia 41:10, 13) Ayi ye yalingiwile kuli pionelu yoze avuluka ngwo Kyoko. Muze amuhele mulimo weka, aye kevwile chinyengo ku mbunge. Mba kuchi Kyoko anyingikine ngwenyi Yehova kamwene kapinda wenyi? Mu chikungulwila chaha muze apwile, mandumbu te kanyingika kanawa chize iye akwivwa ku mbunge. Chocho, yaputuka kwivwa ngwe Yehova kanamwambe ngwenyi: “Ami nakukuzanga hi mumu lia kupwa pionelu ko, alioze mumu uli mwanami nawa hiunalihane kuli yami. Ngunazange hanga uwahilile ku mwono hakupwa Chela chami!” Shina Yehova hanakusolwela kama ngwo “mana jenyi keshi haze anasulila”?

9, 10. Jila yika yilemu yize Yehova makatukwashilamo? Hana chimwe chilweza.

⁹ Tulieswe tunafupiwa yuma ngwe kulia, mazalo ni zuwo. Hanji muhasa kulipikala chinji ngwe kuuchi kuwana kulia chize chakumbana. Alioze Yehova katangile hashi hanga heme kulia chize muchikumbana eswe, chipwe ‘kuli ana ja yikwakwalo muze akwivwa zala.’ (Tanga Samu 147:8, 9.) Achinyonga, Yehova kakuhana kulia kuli yikwakwalo, kashika mutuhasa kupwa ni shindakenyo ngwetu iye matwaha yize tunafupiwa ku mwono.—Samu 37:25.

¹⁰ Chahiana ulemu, Yehova kakutwaha yize tunafupu hanga tununge ni kukolesa ufulielo wetu, nawa kakutwaha “sambukila ya Zambi, yize yakuhiana kunyonga cheswe.” (A-Fwilipu 4:6, 7) Ndumbu Mutsuo ni mukwo-pwo kamwene chize Yehova aakwashile ku mwono wo. Muze tsunami yalingiwile mu Japão ha mwaka 2011, ayo kalamwine mwono wo hakunyina ku fulumba lia zuwo lio. Ha tangwa liacho, ayo yatokesa yuma yeswe apwile nayo. Yapomba mu chipatulo cha kwilu mu milima nawa ni chishika. Ha chimene, yafupa yize te muyihasa kwaatakamisa. Chuma chize awanyine wika te Mukanda wa Mwaka 2006 wa Yela ja Yehova. (Anuário) Muze Mutsuo afukwile mafwo yawana chikuma, “Tsunamis Anene Waze Hanalingiwa.” Chikuma chacho chahanjikile ha munyiko uze walingiwile mu Sumatra ha mwaka 2004 uze wapihishile yuma yinji ya atu. Mutsuo ni mukwo-pwo kalilile muze atangile yize yalingiwile kuli mandumbu jo amu ufulielo. Ayo yalivwa ngwe Yehova kaehele utakamiso uze te anafupu ku mwono wo. Yehova yaafunga nawa mu mitapu yikwo. Mandumbu amu mbonge jikwo mu Japão yaatwalila kulia ni mazalo. Alioze yize yaatakamishine kuhiana yapwile kutambula mandumbu waze ululikiso wa Zambi te akutuma hanga ameneke yikungulwila. Mutsuo yamba ngwenyi: “Nevwile ngwami, Yehova kapwile hakamwihi kuli umwe ni umwe wa kuli yetu ni kutufunga. Uno wapwile utakamiso unene!” Zambi kakutwaha chitangu yize tunafupiwa ku mwono hanga tununge ni kukolesa ufulielo wetu, mba hi matwaha yuma ya ku musunya.

11. Yika twatamba kulinga mba tuyuke ha ukwaso wa Zambi?

¹¹ Yehova “kakujikijisa yimbovu.” Iye kakutuzanga nawa kali hakamwihi hanga atukwase. (Samu 147:6a) Mba kuchi mutuhasa kuyuka ha ukwaso wenyi? Tunafupiwa kupwa ni usepa ukolo ni Zambi. Mba tupwe nawo, twatamba kupwa yimbovu. (Zefania 2:3) Yimbovu kakufuliela muli Yehova hanga ahwise uhenge ni lamba lio. Hachino, Yehova kakwaatayiza.

12, 13. (a) Mba tuyuke ha ukwaso wa Zambi, yika twatamba kwehuka? (b) Atu amutapu uka Yehova akuwahilila no?

¹² Chikwo nawa, kuli Zambi “yingulungulu kakualimbula hashi.” (Samu 147:6b) Kutwazangile hanga chino chilingiwe kuli yetu! Tunazange hanga Zambi atusolwele zango lienyi lia ululi. Kashika twatamba kwivwila lwaji yuma yize iye akuvwila lwaji. (Samu 97:10) Chakutalilaho, twatamba kwivwila lwaji utanji. Chino chinalumbunuka ngwo twatamba kwehuka chuma cheswacho muchihasa kutusongwela ku utanji, ngwe pornografia hanji yizulie ya sonyi. (Samu 119:37; Mateu 5:28) Chino muchihasa kupwa chikalu kuchilinga, alioze nyi twachilinga chili kuyuka chinene mumu mutukazuka yiwape ya Yehova.

¹³ Kutuchi kuhasa kwasa jita yacho ukawetu. Twatamba kujikijila muli Yehova. Kutala mevwa kuwaha nyi mutujikijila ha ukwaso wa yuma yize atu analinga? Ka, Yehova “keshi kuwahilila mu tachi ja kavwalu.” Shina twatamba kujikijila ku tachi jetu hanji ja atu akwo? Yehova keshi kukomoka ‘molu akolo a mutu.” (Samu 147:10) Hachino, twatamba kununga ni kulemba kuli Yehova hanga atukwase ni kumwita hanga atufunge ku ulelu wetu. Yehova keshi kuhonga kupanjika yilemba yetu. Iye ‘kakuwahilila muli waze akumuvwila woma, ni muli waze akushachila ha zango lienyi lia ululi.’ (Samu 147:11) Mumu lia ululi ni zango lienyi hali yetu, tunanyingika ngwetu, iye manunga ni kutukwasa hanga tukumbe manyonga api.

14. Mukwa-kwimba masamu kapwile ni shindakenyo ha yika?

¹⁴ Yehova kanatulweza pundu ngwenyi makatukwasa muze mutupalika mu yipikalo. Muze A-Izalele afunyine ku Yerusaleme, mukwa-kwimba masamu yanyonga ha chize Yehova aakwashile. Yemba ngwenyi: Yehova “hanakolesa kwachiliji ja mapito je; hanawahisa ana je muli yena. Hapwisa sambukila mu manjiza je.” (Samu 147:13, 14) Ha kunyingika ngwo, Yehova te makolesa mapito, mukwa-kwimba masamu yapwa ni ukulungunga. Chino chamwehele shindakenyo ngwo, Yehova te mafunga atu jenyi.

15-17. (a) Ha mashimbu amwe kuchi mutuhasa kwivwa hakutwala ku yipikalo, alioze kuchi Yehova akuzachisa Liji lienyi hanga atukwase? (b) Hana chilweza chize chinasolola ngwo liji lia Zambi “liakutambuka” hanga litukwase.

¹⁵ Hanji muhasa kulipikala mumu lia kapinda yoze unamono, alioze Yehova mahasa kukwaha mana hanga umukumbe. Mukwa-kwimba masamu yamba ngwenyi: Zambi “kakutuma shimbi yenyi hashi, liji lienyi liakutambuka.” Hano, mukwa-kwimba masamu yatongwola neve, mbundu ni chiwe hakuhula ngwenyi: “Iya mahasa kujikiza mu chishika chenyi?” Mba hi yamba ngwenyi: Yehova “kakutuma liji lienyi, akayisangunune.” (Samu 147:15-18) Zambi yetu, yoze wanyingika yuma yeswe mahasa kulinga chuma cheswacho hanga atukwase kukumba kapinda mweswawo mutupwa nenyi, mumu iye kakusongwela chiwe ni neve.

¹⁶ Musono, Yehova kakutusongwela kupalikila mu Liji lienyi Mbimbiliya. Mukwa-kwimba masamu yamba ngwenyi, liji lia Yehova “liakutambuka” hanga litukwase. Zambi kakutusongwela mu jila yalita nawa ha shimbu lialita. Achinyonga ha chize wakuyuka muze mutanga Mbimbiliya, mikanda ya “ndungo wamwenemwene, wa kanyama,” kutala JW Broadcasting, site jw.org, ukwaso wa makulwana amu yikungulwila ni wa mandumbu jetu. (Mateu 24:45) Ha yino yeswe, shina hiunamona ku mwono we chize Yehova anatambuka hanga akukwase?

¹⁷ Simone umwe ndumbu wa pwo, hanamono chize Liji lia Zambi liamukwashile. Iye te kakulivwa ngwe keshi ulemu nawa te kakunyonga ngwenyi Yehova te keshi kumuzanga. Hachino, muze te anahono utakamiso, iye yalemba kuli Yehova, yaliumba kuli iye hanga amukwase. Iye nawa yanunga ni kulilongesa Mbimbiliya. Simone yamba ngwenyi: “Kanda nguchipwa mu kapalia yoze kanda nguchivwa kama tachi ja Yehova ni usongwelo wenyi.” Chino chamukwashile hanga apwe ni nyonga lialita.

18. Mumu liaka unevu ngwe Yehova kali hamwe ni yena?

¹⁸ Mukwa-kwimba masamu kanyingikine ngwenyi mu mavungu eswe a hashi, Yehova kasakwile wika vungu lia A-Izalele ku shakulu hanga apwe tuvumbi twenyi. Ayo kapwile vungu limuwika lize liapwile ni kutambula “liji” lia Zambi ni “yiyulo yenyi.” (Tanga Samu 147:19, 20.) Musono, chili uhenya unene kutuvuluka mu jina lia Zambi. Twakusakwilila chinji hakumunyingika, ni hakunyingika ngwetu Liji lienyi liakutusongwela, nawa ngwetu mutuhasa kupwa ni usepa upema ni iye. Ngwe mukwa-kusoneka Samu 147, ni yetu tuli ni yitela yinji ya ‘Kuhalisa Yehova!’ ni kukolweza akwetu hanga no achilinge.