Lemesa “Chize Zambi Hananungu”

1, 2. Yika mukanda wa A-Hepreu 13:4 unatukolweza kulinga?

TULIESWE twakulemesa Yehova. Mumu katela ulemu wetu, ni iye kanalakenya kutulemesa. (1 Samuele 2:30; Yishima 3:9; Usolwelo 4:11) Iye nawa kanazange hanga tulemese atu-ni-akwetu, ngwe manguvulu. (A-Roma 12:10; 13:7) Alioze kuli chimwe ku mwono chize chinafupiwa kuchilemesa. Chuma chacho chili ulo.

² Postolo Paulu yasoneka ngwenyi: “Umbachiso akaulemese kuli eswe, ni muhela kanda akausela ku luchisa.” (A-Hepreu 13:4) Paulu te keshi kuhanjika wika ha ulo weswawo. Iye te kanalweze akwa-Kristu hanga alemese ulo, chekwamba kuumona ngwe chuma chilemu. Shina chino chinatale ha chize wakumona ulo, chipi-chipi ulo we nyi hiunambate?

 3. Chiyulo chika chilemu Yesu ahanyine hakutwala ku ulo? (Tala chizulie ha uputukilo.)

³ Nyi wakulemesa ulo, yena unakaula chilweza chipema chinji. Yesu neye kalemesele ulo. Muze A-Fwariseu amuhulile hakutwala ku kulilakula, iye yatongola yize Zambi ambile hakutwala ku ulo utangu ngwenyi: “Kashika lunga mahichika tato ni naye akalalaminye kuli mukwo-pwo, mba kumapwa musunya umuwika.” Yesu yawezela nawa ngwenyi: “Chize Zambi hananungu, niumwe mutu kanda akachihandununa.”—Tanga Marku 10:2-12; Uputukilo 2:24.

 4. Upale wa Yehova uka hakutwala ku ulo?

⁴ Yesu katayijile ngwenyi Zambi mwe walingile ulo, nawa ngwenyi ulo watamba kupwa wa mutolo. Muze Zambi alingile ulo utangu, iye kakalwezele Alama ni Eva ngwo, ayo mahasa kulilakula. Alioze, upale wenyi wapwile ngwo eswe “aali” anunge mu ulo ku miaka yeswe.

 5. Kuchi kufwa chakwachile ku ulo?

⁵ Tunanyingika ngwetu, muze Alama alingile shili, yuma yinji yiyalumuka. Kwalumuka chacho, chimwe chapwile kufwa cha atu, chocho chino yichikwata ha ulo. Postolo Paulo kalwezele akwa-Kristu ngwenyi, kufwa che kusula cha ulo nawa ngwenyi yoze masala ni mwono mahasa kumbata cheka.—A-Roma 7:1-3.

 6. Yika Shimbi ya Mose yinatulongesa hakutwala ku chize Zambi akunyonga ulo?

⁶ Shimbi yize Zambi ahanyine kuli A-Izalele yasolwele yimwe yuma hakutwala ku ulo. Chakutalilaho, lunga Ka-Izalele te mahasa kumbata luhali. Ndako yino yaputukile shimbu Zambi te kanda achaaha Shimbi. Hachino, Shimbi te yakufunga mapwo ni ana hanga ahone kwaamwesa lamba. Chakutalilaho, nyi lunga Ka-Izalele malimbata ni umwe ndungo, hi kulutwe mambata pwo mukwo, iye katamba kufunga pwo lienyi mutangu ngwe chize te akulinga ku uputukilo. Zambi te kakuzanga hanga lunga wacho anunge ni kufunga mukwo-pwo ni kumukwasa. (Kutuhuka 21:9, 10) Yetu kutushi kukaula Shimbi ya Mose musono. Chipwe chocho, yinatulongesa ngwo Zambi kakulemesa chinji ulo. Pundu lume, chino chakutukwasa chinji kulemesa ulo.

7, 8. (a) Yika Shimbi yili ha Shimbi Yamuchiali 24:1 yambile hakutwala ku kulilakula? (b) Kuchi Yehova akunyonga hakutwala ku kulilakula?

⁷ Yika Shimbi te yakwamba hakutwala ku kulilakula? Chipwe ngwe Yehova kakatangile lunga ni pwo hanga alilakule, nihindu Shimbi te yakutayiza lunga Ka-Izalele alakule mukwo-pwo nyi “hawana chuma cha sonyi muli iye.” (Tanga Shimbi Yamuchiali 24:1.) Shimbi kuyakalumbunwine chuma chize te mahasa kutongola ngwo “chuma cha sonyi.” Alioze, muchihasa kupwa chuma cha luchisa, chuma chipi kuhiana hi wika ko yuma yikehe-yiheke. (Shimbi Yamuchiali 23:14) Chaluyinda, ha matangwa ja Yesu, A-Yunda anji te kakulilakula ni mapwo jo “ha chikuma cheswacho.” (Mateu 19:3) Kashika yetu kutwazangile kupwa ni ndako yacho.

⁸ Ha matangwa ja profeta Malakia, chapwile chako malunga kulakula mapwo jo atangu, kota te kakuchilinga hanga ambate ana-mapwo waze te keshi kuwayila Yehova. Alioze Zambi yasolola zwalala nyonga lienyi hakutwala ku kulilakula. Yamba ngwenyi: “Kulakula changupihila.” (Malakia 2:14-16) Nyonga lia Zambi hakutwala ku ulo kulialumukine chize ku uputukilo, muze ambile ngwenyi, lunga “akalalaminye kuli mukwo-pwo, mba kumapwa musunya umuwika.” (Uputukilo 2:24) Yesu kakwashile nyonga lia Tato hakutwala ku ulo muze ambile ngwenyi: “Chize Zambi hananungu, niumwe mutu kanda achihandununa.”—Mateu 19:6.

 9. Yika maliji a Yesu ha Marku 10:11, 12, analumbunuka?

⁹ Amwe mahasa kulihula ngwo, ‘Shina kuli chimwe chitela chize muchitwala mukwa-Kristu kulilakula hanga ambate cheka?’ Yesu kambile ngwenyi: ‘Mweswawo malakula mukwo-pwo akambate mweka mavulumuna pwo lienyi mulonga wa utanji: Nyi kachi pwo malakula mukwo-lunga akaye ulo weka, malinga utanji.’ (Marku 10:11, 12; Luka 16:18) Kwamba pundu, Yesu kalemesele ulo, kashika azangile hanga ni akwo achilinge. Nyi lunga malakula mukwo-pwo yoze washishika ni kumbata mweka kalinga utanji. Chino chinatale nawa hali pwo yoze malilakula ni mukwo-lunga washishika ni kulimbata ni lunga mweka. Mumu kulilakula ukawacho kuchalumbunukine songo lia ulo. Kumeso ja Zambi atu jacho achili “musunya umuwika.” Yesu kambile nawa ngwenyi nyi lunga malakula pwo chakuhona chitela, muchihasa kupwa chashi kuli pwo kulinga utanji. Kuchi acho? Mumu, pwo yoze hanamulakula mahasa kulivwa ngwe katamba kuya ulo weka mumu lia kuhona mbongo. Ulo wacho che chimuwika ni kulinga utanji.

10. Chitela chika muchihasa kutwala mukwa-Kristu alilakule ni yoze alimbata nenyi, ni kumbata cheka?

¹⁰ Yesu kalongesele ngwenyi kuli chitela chimuwika chize muchihasa kutwala mutu alilakule ni yoze alimbata nenyi, hakwamba ngwenyi: “Ngunambe kuli yenu ngwami, Mweswawo malakula mukwo-pwo shina ha upangala, mba mambata mukwo, malinga utanji.” (Mateu 19:9) Ha Longeso lia ha Mulundu, iye yashindakenya ha nyonga lioliene. (Mateu 5:31, 32) Ha yisuho yino yaali, Yesu te kanahanjika hakutwala ku “upangala.” Upangala muuhasa kuchinga utanji, ukoi, kulisumbakenya cha atu waze kalimbachile, utumwa ni kulisumbakenya ni kashitu. Chakutalilaho, nyi lunga yoze hanambata malinga upangala, mukwo-pwo mahasa kulilakula nenyi, hanji ka. Nyi iye malilakula ni mukwo-lunga, acho kuli Zambi keshi nawa alunga ni pwo.

11. Mumu liaka mukwa-Kristu mahasa kwecha kulilakula chipwe ngwe yoze alimbata nenyi kalinga utanji?

¹¹ Nyingika ngwe Yesu kakambile ngwenyi nyi umwe yoze wambata malinga utanji, yoze washishika katamba kulilakula nenyi. Chakutalilaho, pwo mahasa kusakula kutwama ni mukwo-lunga chipwe ngwe mukwo-lunga kalinga utanji. Mumu liaka? Iye hanji machinunga ni kuzanga mukwo-lunga nawa mamukonekena ni mbunge yeswe ni kusa tachi hamuwika hanga alulieke ulo wo. Chikwo nawa, nyi iye mazanga kulilakula ni mukwo-lunga ni kufupa kuya ulo weka, mahasa kupwa ni yimwe yipikalo. Chakutalilaho, kuchi mutwamba hakutwala ku yize mafupiwa ku musunya ni kulisumbakenya? Shina mahasa kutwama ukawenyi? Kuchi kulilakula muchikwata hali ana? Kutala mahasa kulela ana ukawenyi mu umwenemwene? (1 A-Korindu 7:14) Ha yino yeswe, lunga hanji pwo yoze washishika nyi mazanga kulilakula, acho mapwa ni yipikalo yinji ku mwono wenyi.

12, 13. (a) Yika yalingiwile mu ulo wa Hozeia? (b) Mumu liaka Hozeia afunyishine Ngome, nawa yika mutuhasa kulilongesa ha ulo wacho?

¹² Chilweza cha profeta Hozeia chinatulongesa yuma yinji hakutwala ku chize Zambi akumona ulo. Zambi kalwezele Hozeia hanga ambate pwo te avuluka ngwo Ngome, yoze te mapwa “chikoi” ni kusema “ana ja ukoi.” Ngome ni Hozeia yasema mwana wa lunga. (Hozeia 1:2, 3) Kulutwe, Ngome yaya kuli lunga mukwo yasema nenyi ana aali wa lunga ni pwo. Chipwe ngwe Ngome kalingile utanji unji, nihindu Hozeia yanunga nenyi. Hachino, iye yahichika Hozeia ni kupwa ndungo. Chipwe chocho, Hozeia yamulanda cheka nawa. (Hozeia 3:1, 2) Yehova kazachishile Hozeia hanga asolole chize te akukonekena vungu lia Izalele ha yisuho yinji muze ayo te akuhona kushishika kuli iye ni kuwayila tuzambi akwo. Yika mutuhasa kulilongesa ha ulo wa Hozeia?

¹³ Nyi mukwa-Kristu malinga utanji, mukwo yoze washishika katamba kukwata chiyulo. Yesu kambile ngwenyi yoze washishika kali ni ulite wakulilakula ni kuya ulo weka. Chipwe chocho, hi chipi ko nyi yoze washishika mazanga kukonekena mukwo yoze wavulumuna. Hozeia yafunyisa Ngome. Muze hafuna kuli Hozeia, iye yamulweza ngwenyi katambile nawa kulisumbakenya ni lunga mukwo. Ha limwe shimbu, Hozeia kakalisumbakenyene nawa ni Ngome. (Hozeia 3:3, maliji mushi lia lifwo, NM.) Alioze, kulutwe Hozeia kota kaputukile nawa kulisumbakenya ni mukwo-pwo. Chino chinasolola chize Zambi apwile ni kutayiza A-Izalele waze te akufuna kuli iye ni kununga kupwa ni usepa upema ni ayo. (Hozeia 1:11; 3:3-5) Mba yika chino chinatulongesa hakutwala ku ulo musono? Chinatulongesa ngwo, nyi yoze washishika maputuka nawa kulisumbakenya ni yoze walinga utanji, chino muchisolola pundu ngwo yoze washishika kakonekena mukwo. (1 A-Korindu 7:3, 5) Acho kechi kupwa nawa ni chitela cha kulilakula. Nyi yino muyilingiwa, ayo katamba kulikolweza ni kulikwasa hanga amone ulo ngwe chize Zambi akuumona.

14. Kulita 1 A-Korindu 7:10, 11, yika muyihasa kulingiwa mu ulo?

¹⁴ Akwa-Kristu eswe katamba kulemesa ulo ngwe chize Yehova ni Yesu akulinga. Alioze, ha mashimbu amwe kutushi kuhasa kuchilinga, mumu tuli yihenge. (A-Roma 7:18-23) Chipwe chocho, chino kuchatambile kutuvwisa yikola ku mbunge, mumu amwe akwa-Kristu ku sekulu yitangu no kapwile ni yipikalo yinji mu malo jo. Paulu yasoneka ngwenyi, “pwo kanda alihandununa ni mukwo-lunga.” Alioze ha mashimbu amwe chino chakulingiwa.—Tanga 1 A-Korindu 7:10, 11.

15, 16. (a) Yika waze alimbata mahasa kulinga nyi mapwa ni kapinda mu ulo, nawa mumu liaka? (b) Kuchi chino chinatale hali alunga ni pwo waze umwe keshi kuwayila Yehova?

¹⁵ Ha chisoneko chino, Paulu kakalumbunwine yuma yize te yakuhandununa alunga ni pwo. Alioze tunanyingika ngwetu, chitela kuchakapwile ngwo lunga kalinga utanji. Nyi chenacho, kachi pwo kapwile ni chitela cha kulilakula ni mukwo-lunga ni kuya ulo weka. Paulu kasonekene ngwenyi, pwo yoze walihandununa ni mukwo-lunga katamba kununga ‘twamishi, nyi ka akafune kuli mukwo-lunga.’ Mumu kuli Zambi ayo achili lunga ni pwo. Paulu kambile ngwenyi kapinda hanji lamba lieswalio lunga ni pwo mahasa kupwa nalio, nyi umwe wa kuli ayo kalingile utanji, ayo katamba kulivwashana hanga anunge hamuwika. Ayo mahasa kwita ukwaso kuli makulwana a mu chikungulwila. Makulwana kechi kupwa sali nilimwe, alioze mahasa kwaaha chiyulo cha mu Mbimbiliya.

¹⁶ Mba, yika mutwamba nyi umwe mukwa-Kristu hanalimbata ni mutu yoze keshi kuwayila Yehova? Shina ayo katamba kulihandununa, muze mapwa ni kapinda mu ulo wo? Ngwe chize hitwamba, Mbimbiliya yinambe ngwo utanji wika we muhasa kutwala waze alimbata ku kulilakula. Alioze Mbimbiliya kuyasolwele yitela yize muyihasa kutwala alunga ni pwo hanga alihandunune. Paulu yamba ngwenyi: “Pwo yoze mapwa ni mukwo-lunga yoze keshi kufuliela, iye matayiza kutwama nenyi, kanda akahichika mukwo-lunga.” (1 A-Korindu 7:12, 13) Maliji wano kanatale nawa hali yetu musono.

17, 18. Mumu liaka akwa-Kristu amwe akunyongonona mu ulo, chipwe ngwe kali ni yipikalo yinji?

¹⁷ Chipwe chocho, mukuhasa kupwa yimwe yize “lunga yoze keshi kufuliela” masolola ngwo kazangile “kutwama” ni mukwo-pwo. Chakutalilaho, iye mahasa kumulamba, chipwe kusa mwono wenyi mu ponde. Mahasa kulituna kumwaha mbongo hanji kukwasa usoko chipwe kumukwika kuwayila Zambi. Ha yuma yino, pwo mukwa-Kristu mahasa kukwata chiyulo mwene ngwo, chipwe ngwe mukwo-lunga mamba yeswayo, nihindu iye katelele “kutwama nenyi,” hachino mahasa kulihandununa. Alioze akwa-Kristu akwo ha yuma yacho, ayo kakwachile chiyulo cha kutwama ni waze alimbata no. Ayo kakunyongonona ni kusa tachi hanga alulieke ulo wo. Mumu liaka ayo akwachile chiyulo chacho?

¹⁸ Nyi alunga ni pwo malihandununa hamukunda wa chikuma chino, ayo nihindu mahasa kupwa ni yipikalo yize twatongola helu. Postolo Paulu kasolwele nawa chitela chize muchihasa kukwasa alunga ni pwo hanga anunge hamuwika. Yasoneka ngwenyi: “Lunga yoze keshi kufuliela mamusela ku usandu muli mukwo-pwo, ni pwo yoze keshi kufuliela mamusela ku usandu muli mukwo-lunga; nyi ka, acho ana jenu mapwa a luchisa; alioze haliapwila kanapu ku usandu.” (1 A-Korindu 7:14) Akwa-Kristu anji kakukwata chiyulo cha kununga ni waze alimbata no keshi kuwayila Yehova, chipwe ngwe kali ni yipikalo yinji. Anji kakuwahilila chinji hakumona waze alimbata no mapwa Yela ja Yehova, mumu lia tachi jize asele.—Tanga 1 A-Korindu 7:16; 1 Petulu 3:1, 2.

19. Mumu liaka malo anji mu chikungulwila cha akwa-Kristu anawahilila?

¹⁹ Yesu kahanyine chiyulo hakutwala ku kulilakula, alioze postolo Paulu kahanyine chiyulo hakutwala ku kukulihandununa. Ayo eswe aali kazangile hanga tuvumbi twa Zambi alemese ulo. Musono hashi heswe, hali malo anji mu ululikiso wa Yehova waze ali ni uwahililo. Yena muhasa kumona mu chikungulwila chenu, anji alimbata waze akuwahilila mumu lia zango lize malunga ashishika akusolola kuli mapwo jo ni mapwo akuvumbika malunga jo. Ayo eswe kakulemesa ulo. Nawa tunawahilila hakumona tununu twa malunga ni mapwo makaula maliji wano a Zambi ngwo: “Ha chikuma chino, lunga akahichike tato ni naye, akalinunge ni mukwo-pwo; mba e aali kumakapwa musunya umuwika.”—A-Efwesu 5:31, 33.