KAPITULU 2
Mbimbiliya—Yili Mukanda wa Zambi
1, 2. Mumu liaka Mbimbiliya yili chawana chaukomokeso?
KUCHI muwivwa nyi umwe sepa makwaha chimwe chawana? Kuchi kushimbwila kuchazulula, nawa muwahilila chinji mumu sepa lie kakunyonga kama. Mumusakwilila chinji ha chawana chacho.
2 Mbimbiliya yili chawana cha Zambi. Yakutulweza sango jize kutuchi kuhasa kuwana mu mikanda yikwo. Chakutalilaho, yakutulweza chize Zambi atangile malilu, hashi, ni atu atangu, lunga ni pwo. Yakutwaha shimbi jize mujihasa kutukwasa muze mutumona lamba. Mu Mbimbiliya, yetu twakulilongesa chize Zambi makamanununa upale wenyi ni kululieka yuma hano hashi. Mbimbiliya yili chawana chaukomokeso!
3. Yika muunyingika muze mulilongesa Mbimbiliya?
3 Muze mulilongesa Mbimbiliya, munyingika ngwe Zambi kanazange hanga upwe sepa lienyi. Muze mulilongesa chinji hakutwala kuli iye, usepa we ni iye muukola chinji.
4. Yika yinakukomwesa hakutwala ku Mbimbiliya?
4 Mbimbiliya, hanayilumbununa mu unji wa malimi 2.600, nawa hanafwambwisa tununu a tununu a Mbimbiliya. Atu kuhiana 90% hashi heswe mahasa kutanga Mbimbiliya mu limi lio. Nawa ha poso jeswe, atu kuhiana kanunu kali ni Mbimbiliya! Chochene kukushi mukanda niumwe uze uli ngwe Mbimbiliya.
5. Kuchi Mbimbiliya “yapwa we mwiku wa Zambi”?
5 Mbimbiliya “yapwa we mwiku wa Zambi.” (Tanga 2 Timoteu 3:16.) Alioze amwe mahasa kwamba ngwo, ‘Mbimbiliya kayisonekene kuli atu, kuchi mba muyipwa ya Zambi?’ Mbimbiliya yene yinakumbulula ngwo: “Atu ahanjikile cha kuli Zambi, nikuhungumuka kuli spiritu musandu.” (2 Petulu 1:21) Chili ngwe umwe chisemi meta mwanenyi hanga amusonekeneko mukanda. Mukanda wacho waya? Wa chisemi, hi wa mwanenyi ko. Chizechene nawa, ni Mbimbiliya neyo yili ya Zambi, hi ya atu ko waze ayisonekene. Zambi kasongwelele atu hanga asoneke manyonga jenyi. Kashika, Mbimbiliya yili “liji lia Zambi.”—1 A-Tesalonika 2:13; tala Maliji Akusongo 2.
A Tradução do Novo Mundo das Escrituras Sagradas yili mu malimi anji
MBIMBILIYA YA YALITA
6, 7. Mumu liaka mutuhasa kwamba ngwetu, Mbimbiliya yalita?
6 Mbimbiliya yalingile miaka kuhiana 1,600 mba yiyihwa kusoneka. Waze ayisonekene kakatwamine ha mashimbu amuwika. Amwe kalilongesele, akwo ka. Chakutalilaho, umwe te ndotolo. Akwo te njimi, akwa-kuta yishi, tufunga-mapanga, aprofeta, akwa-kuyula ni mianangana. Chipwe ngwe waze ayisonekene kapwile ni kulinga milimo yeka ni yeka, nihindu Mbimbiliya yalita chize ku uputukilo ndo ku songo. Maliji a mu tupitulu ni tupitulu keshi kulimika.a
7 Tupitulu atangu a Mbimbiliya kakulumbununa chize lamba liaputukile hano hashi. Tupitulu akasula kakutulweza chize Zambi makahwisa lamba liacho ha kupwisa hashi heswe paraisu. Mbimbiliya yili ni sango jize hi jalinga miaka yinji nawa yakusolola ngwo upale wa Zambi muukamanunuka.
8. Hana yakutalilaho yize yinasolola ngwo Mbimbiliya yakwamba umwenemwene hakutwala ku ciencia.
8 Mbimbiliya kakayisonekene hanga yipwe ni kutulongesa ciencia hanji yinyingi ya ku shikola, alioze yakwamba umwenemwene hakutwala ku ciencia. Chino che watamba kupwa mukanda wa Zambi. Chakutalilaho, mukanda wa Ulevi uli ni shimbi jize apwile ni kukaula A-Izalele hakutwala ku kulinanga ni kusosolola akwa-yikola yipi mukachi lia akwo. Shimbi jacho kajisonekene miaka yinji kunyima muze te atu kanda achinyingika kanawa yuma yize yakuneha yikola. Mbimbiliya te hiyinambe ni ushindakenyo weswe ngwo hashi hazezala mu mutetela. (Yombi 26:7) Nawa muze atu anji apwile ni kwatamba ngwo hashi halulama, Mbimbiliya te hiyinambe kulu ngwo hashi ha jinguluka.—Izaia 40: 22.
9. Yika ushishiko wa atu waze asonekene Mbimbiliya unatukwasa kunyingika?
9 Muze Mbimbiliya yakuhanjika hakutwala ku sango ja atu, yakwamba umwenemwene. Alioze mikanda yinji ya sango ja atu kujishi kuhanjika umwenemwene mumu akwa-kuyisoneka keshi akwa-kushishika. Chakutalilaho, ha mashimbu amwe, ayo te keshi kusoneka hakutwala ku chize te akukumba vungu lio. Alioze, atu asonekene Mbimbiliya kapwile atu ashishika. Yasoneka ni sango ja kukumba A-Izalele. Yasoneka nawa hakutwala ku upi wo. Chakutalilaho, mu mukanda wa Kwalula, Mose kanatulweze ngwenyi kalingile uhenge, mba Zambi yamumwesa lamba hamukunda wa chikuma chacho. (Kwalula 20:2-12) Kushishika cha atu waze asonekene Mbimbiliya chinasolola ngwo Mbimbiliya yili ya Zambi. Chino chinalumbunuka ngwo mutuhasa kufuliela yuma yize yili mu Mbimbiliya.
MUKANDA WA TOO NI YIYULO YIPEMA
10. Mumu liaka shimbi ja mu Mbimbiliya mujihasa kutukwasa musono?
10 Mbimbiliya yakuhwima kuli Zambi nawa “kuyafumbuka ha kulongesa, ni ha kukumika, ni ha kululamisa.” (2 Timoteu 3:16) Chochene, Mbimbiliya yili ni shimbi jize mujihasa kutukwasa musono. Yehova kananyingika chize twapwa, nawa kanyingika manyonga jetu ni chize twakwivwa. Katunyingika kanawa kuhiana yetwene, mba kanazange hanga tuwahilile. Kananyingika yize yili yipema kuli yetu ni yize yili yipi.
11, 12. (a) Chiyulo chika chipema chize Yesu alongesele chili mu Mateu 5 ndo 7? (b) Yikwo yika nawa mutuhasa kulilongesa mu Mbimbiliya?
11 Mu Mateu kapitulu 5 ndo 7, muli chiyulo chipema chize Yesu alongesele ha chize twatamba kupwa akuwahilila, kutwama kanawa ni akwetu, kulemba ni chize twatamba kunyonga ha mbongo. Chipwe ngwe hikwapalika miaka 2,000 chize haze Yesu ambile maliji jacho, nihindu achili ni ulemu unji musono.
12 Mu Mbimbiliya, Yehova kakutulongesa nawa shimbi jize jakutukwasa hanga tupwe ni mwono upema mu usoko, tupwe akwa-kukalakala apema ni kupwa ni sambukila ni akwetu. Chipwe ngwe tuli aya, hanji kweswako twatwama chipwe tuli ni mulonga weswao, nihindu shimbi ja mu Mbimbiliya mujihasa kutukwasa.—Tanga Izaia 48:17; tala Majili Akusongo 3.
MUHASA KUFULIELA UPROFETO WA MBIMBILIYA
Izaia umwe wa kuli waze asonekene Mbimbiliya, kambile uprofeto wa kunongesa cha Babilonia
13. Yika Izaia ambile te muyikalingiwa mu mbonge ya Babilonia?
13 Uprofeto unji wa mu Mbimbiliya, hiunamanunuka. Chakutalilaho, Izaia kambile ngwenyi Babilonia makayinongesa. (Izaia 13:19) Kalumbunwine pundu chize mbonge yacho te mayikumba. Ayi mbonge te yapwile yakufunga kanawa ni yajilo yinene-yinene ni umwe lwiji. Alioze Izaia yamba ngwenyi, lwiji wacho makamwomesa nawa yajilo muyikapwa ya washi. Maswalale makatambula mbonge chakuhona kwasa jita. Izaia katongwele nawa jina lia lunga yoze te makanongesa Babilonia, ngwenyi iye Siru.— Tanga Izaia 44:27–45:2; tala Majili Akusongo 4.
14, 15. Kuchi uprofeto wa Izaia wamanunukine?
14 Muze kwapalikile miaka kama jaali chize haze asonekene awu uprofeto, yikwiza maswalale hanga anongese Babilonia. Kasongo wo te iya? Siru, mwanangana wa Persia, kulita ni chize uprofeto wambile. Yino yeswe yalingiwile hanga uprofeto umanunuke.
15 Ha ufuku, A-Babilonia te kanalinga chiwanyino chinene. Ayo te kanajikijila ku yipanga yinene yize te yafunga mbonge yo. Haze lia mbonge, Siru ni maswalele jenyi yapiangula meya a lwiji. Meya yatepuluka, mba maswalele A-Persia yazauka lwiji. Alioze kuchi te maswalale jacho mahasa kunjila mu mbonge? Ngwe chize uprofeto wambile, yikolo ya mbonge kayihichikile yawashi, mba maswalale yanjila ni kunongesa mbonge yacho chakuhona kwasa jita.
16. (a) Yika uprofeto wa Izaia wambile hakutwala ku Babilonia?(b) Kuchi tunanyingika ngwetu uprofeto wa Izaia wamanunukine?
16 Izaia kambile ngwenyi mutu niumwe kechi kutunga nawa mu Babilonia. Aye yasoneka ngwenyi: “Atu kechi katungako, chipwe kutwamako ndo ku yisemuko yeswe. Chipwe A-Arabia kechi kasako mbalaka jo, chipwe tufunga kechi kapombesako yimuna yo.” (Izaia 13:20) Shina yino yalingiwile? Ku chihela kuze kwapwile Babilonia, kilometro 80 kusango ya Bagdá mu Iraque, nihindu kuli yikulu yamokomoko. Chipwe musono kukushi mutu niumwe. Yehova kakombele Babilonia “ni lukombo wa kwonwona.”—Izaia 14:22, 23.b
Yikulu ya Babilonia
17. Mumu liaka mutuhasa kujikijila ku yilakenyo yeswe ya Zambi?
17 Kunyingika ngwetu uprofeto unji wa Mbimbiliya unamanunuka chinalumbunuka ngwo mutuhasa kujikijila ku yuma yize Mbimbiliya ya kwamba hakutwala kulutwe lia matangwa. Mutuhasa kupwa ni ushindakenyo ngwetu Yehova makamanununa chilakenyo chenyi cha kupwisa hashi paraisu. (Tanga Kwalula 23:19.) Ewa, tuli ni kutalatala cha “mwono wa mutolo, uze Zambi, yoze keshi mahuza, alakenyene ku miakulwila.”—Titu 1:2.c
MBIMBILIYA MUYIHASA KWALUMUNA MWONO WE
18. Kuchi postolo Paulu ambile ha “liji lia Zambi”?
18 Hitwalilongesa ngwetu kukushi mukanda uze walifwa ni Mbimbiliya. Mbimbiliya yalita, nawa muze yakuhanjika hakutwala ku ciencia hanji ku sango ja yuma yize yalingiwile kushakulu, yakwamba umwenemwene. Yakutwaha nawa chiyulo chipema nawa yili ni uprofeto unji uze hiunamanunuka. Alioze Mbimbiliya yili ni ulemu unji hi wika ko ku yuma ayi twamba. Postolo Paulu kasonekene ngwenyi: “Liji lia Zambi mwono lili nawo, kuliakulinga ni tachi.” Yika maliji wano analumbunuka?—Tanga A-Hepreu 4:12.
19, 20. (a) Kuchi Mbimbiliya muyihasa kukukwasa hanga unyingike chize wapwa? (b) Kuchi muhasa kusolola usakwililo we ha chawana cha Zambi, Mbimbiliya?
19 Mbimbiliya muyihasa kwalumuna mwono we. Muyihasa kukukwasa hanga unyingike chize wapwa. Muyihasa nawa kukukwasa hanga unyingike kanawa manyonga ni yitanga ye. Chakutalilaho, hanji twakunyonga ngwetu twakuzanga Zambi. Alioze, twatamba kukaula yize Mbimbiliya ya kulongesa mba tunyingike nyi pundu twakumuzanga lume.
20 Mbimbiliya pundu lume yili mukanda wa Zambi. Zambi kanazange hanga uyitange, ulilongeseyo, ni kuyizanga. Solola usakwililo we ha chawana chino, ni kununga kulilongesayo. Nyi walinga chino, munyingika upale wa Zambi hali atu. Mu kapitulu yoze masulaho mutulilongesa hakutwala ku upale wa Zambi.
a Atu amwe kakwamba ngwo Mbimbiliya kuyishi kulita, alioze chino hi chamwenemwene ko. Tala kapitulu 7 wa mukanda A Bíblia—Palavra de Deus ou de Homem? uze asoneka Yela ja Yehova.
b Nyi mufupa kunyingika uprofeto ukwo wa Mbimbiliya, tala ha mafwo 27-29 mu mukanda Um Livro para Todas as Pessoas, wakufwambwisa kuli Yela ja Yehova.
c U nongeso wa Babilonia uli chilweza chimuwika cha umanunuko wa uprofeto wa mu Mbimbiliya. Muhasa kuwana uprofeto hakutwala kuli Yesu Kristu ha Maliji Akusongo 5.