Iye Je Tachi Ja Zambi

 1. Mumu liaka Paulu wambile ngwenyi “Kristu iye je tachi ja Zambi”?

YEHOVA kasolwele ndundo jenyi kupalikila muli Yesu Kristu mu jila yeka ni yeka. Muze Yesu apwile hano hashi iye kalingile yikomokeso. Yetu mutuhasa kutanga sango jacho mu Mbimbiliya, nawa mujihasa kukolesa ufulielo wetu. (Mateu 9:35; Luka 9:11) Chochene, Yehova kahanyine tachi kuli Yesu, kashika postolo Paulu wambile ngwenyi: “Kristu iye je tachi ja Zambi.” (1 A-Korindu 1:24) Kuchi yikomokeso ya Yesu muyihasa kutukwasa?

 2. Yika mutuhasa kulilongesa ha yikomokeso ya Yesu?

² Postolo Petulu kambile ngwenyi, Yesu kalingile yikomokeso hanji “yipekesa.” (Yilinga 2:22) Yika yikomokeso yacho yinatulongesa? Yinatulongesa yuma yize Yesu makalinga ha Kanunu Umuwika wa Miaka wa Kuyula chenyi. Ha shimbu liacho, iye makalinga yikomokeso yinji yize muyikakwasa atu eswe hano hashi. Yikomokeso yacho nawa yinatukwasa hanga tunyingike kanawa yitanga ya Yesu ni ya Tato. Ha mutwe uno, mutulilongesa yikomokeso yitatu ya Yesu, nawa mutunyingika chize yikomokeso yacho muyitukwasa musono ni kulutwe lia matangwa.

 3. (a) Mumu liaka Yesu alingile chikomokeso chenyi chitangu? (b) Kuchi Yesu asolwele yitanga ya kuhana mu Kanana?

³ Yesu kalingile chikomokeso chenyi chitangu ha umwe umbachiso mu mbonge ya Kanana. Kutushi kunyingika mumu liaka, alioze vinyu yitangu yize aseleho yakakumbanyine kuli ngeji waze apwileho. Chino kota chapinjishile chinji akwa-kulimbata waze aha, mumu chino te chiteli cho cha kutambula ngeji. Naye ya Yesu Maria, kapwile umwe wa kuli ngeji jacho. Shina aye kahulile Yesu hanga aakwase mumu te kanafuliela ngwo Yesu kali ni tachi ja kuchilinga nyi? Ha yino yeswe, Maria kota kanyongene ha sango jeswe ja uprofeto hakutwala kuli mwanenyi, nawa iye kanyingikine ngwo te mamuvuluka ngwo “Mwana wa Mwe Chitunda.” (Luka 1:30-32; 2:52) Kwamba umwenemwene, Maria ni Yesu kazangile kukwasa akwa-kulimbata jacho. Ha chikomokeso chacho Yesu yalumuna meya yapwa “vinyu yipema” sapa 380. (Tanga Yoano 2:3, 6-11.) Shina Yesu te katamba kulinga chikomokeso chacho? Ka. Iye kachilingile mumu iye te kakuzanga atu, nawa te kakwimbulula Tato, yoze uli chihanyi.

4, 5. (a) Chikomokeso chitangu cha Yesu yika chinatulongesa? (b) Yika chikomokeso cha ku Kanana chinatulongesa hakutwala kulutwe lia matangwa?

⁴ Ha chikomokeso chenyi Yesu kalingile vinyu yinji yipema, yize yakumbanyine mbunga yinene. Shina unamono yuma yize chikomokeso chino chinatulongesa? Chinatulongesa ngwo Yehova ni Yesu keshi ujiji wakukwasa, alioze kali yihanyi. Chikomokeso chino chinatwehe ujikijilo ngwetu ayo kananyingika kanawa manyonga ja atu. Chinasolola nawa ngwo Yehova makazachisa ndundo jenyi hanga akazalise hashi haha ni kulia chinji, chipwe mutukatwama ku chihela cheswacho hano hashi.—Tanga Izaia 25:6.

⁵ Achinyonga ha chino! Kwasala hakepe Yehova makatwaha chuma cheswacho yetu mutufupa. Mutu mweswe makapwa ni zuwo lipema ni kulia chipema. Twakuwahilila chinji muze twakunyonga hakutwala ku yuma yeswe yipema yize Yehova ni zango lieswe makatwaha mu Paraisu hano hashi.

 6. Kuchi Yesu mashimbu eswe te akuzachisa ndundo jenyi, nawa kuchi mutuhasa kumwimbulula?

⁶ Yesu kakazachishile chipi ndundo jenyi. Tuchinyongenu yize yalingiwile muze Ndiapu esekele Yesu hanga iye alumune mawe apwe mbolo. Yesu kalitunyine kuzachisa ndundo jenyi ha usolo wenyi mwene. (Mateu 4:2-4) Alioze Yesu kazachishile kanawa tachi jenyi hanga akwase akwo. Kuchi mutuhasa kwimbulula yitanga yipema ya Yesu? Iye kambile ngwenyi twatamba kupwa ni yitanga ya ‘kuhana.’ (Luka 6:38) Mutuhasa kulinga chino, ha kusanyika akwetu hanga tulie no hamuwika. Mutuhasa nawa kupalikisa mashimbu ha kuhwa cha kukunguluka hanga tukwase mweswao, ngwe kupanjika umwe ndumbu yoze unalulieka pande jenyi. Hanji mutuhasa kuhana ukwaso walita ni kulongesa akwetu mu mulimo wa kwambujola. Mutwimbulula kuhana cha Yesu muze mutukwasa akwetu ni zango lieswe ha yize ayo anafupa.

 7. Mulonga uka muununga hano hashi ha Satana?

⁷ Uswale hi mulonga waha ko. Yehova kalwezele A-Izalele ngwo “chifuchi chenu kuchichi kuhona chiswale.” (Shimbi 15:11) Ha kupalika cha kama ja miaka, Yesu neye kambile ngwenyi: “Yiswale kali hamwe ni yenu matangwa eswe.” (Mateu 26:11) Shina Yesu te kanambe ngwenyi, mashimbu eswe mukupwa yiswale nyi? Ka, aye te kanambe ngwenyi muhakapwa yiswale muze tuchili hano hashi ha Satana. Mu chifuchi chaha muchikapwa chocho! Ha matangwa aze hashi hechikapwa nawa yiswale. Eswe makapwa ni kulia chinji, eswe makawahilila!

8, 9. (a) Mumu liaka Yesu walishile tununu twa atu? (b) Kuchi wakunyonga ha chikomokeso chino?

⁸ Mukwa-Masamu kambile kuli Yehova ngwenyi: “Wakufukula kwoko lie nikuyukisa usona wa waze eswe atwama ni mwono.” (Samu 145:16) Muze Yesu apwile hano hashi kembulwile kanawa Tato ha kukwasa akwo ha yize te ayo akufupu. Iye kakalingile chino hanga alisolole ngwo kali mukwa-ndundo. Alioze Yesu pundu te kakuzanga chinji atu. Tuhengulenu Mateu 14:14-21. (Tanga.) Yimwe mbunga yakawile Yesu hashi ku mambonge eka ni eka. (Mateu 14:13) Ha kutoka cha tangwa, tumbaji yalipikala hakumona chize atu te anahongo nawa te anevu zala. Kashika ayo yeta Yesu hanga atume mbunga yiye ni kulanda kulia cho. Yika Yesu te malinga?

⁹ Ni yihanda yitano ya mbolo ni yishi aali, Yesu yalisa atu 5,000 malunga, kuchingaho mapwo ni ana. Mumu liaka Yesu alingile chikomokeso chino? Mumu iye te kakuzanga chinji atu nawa te kakuzanga kwafunga. Nawa Yesu kahanyine kulia chinji, mumu mbunga “eswe alile nikukuta.” Kulia chacho chehele tachi jize te anafupu hanga ahiluke ku mazuwo jo. (Luka 9:10-17) Nawa, muze eswe hijakuta, tumbaji yatongona yipalupalu yize yasalileho njeke 12!

10. Kulutwe lia matangwa, yika muyikalingiwa kuli yiswale?

¹⁰ Ha mukunda wa manguvulu a kuzo ni kalimbalimba, atu anji kali yiswale. Chipwe amwe akuli mandumbu jetu no kanahono yuma yakulia. Alioze kwasala hakehe, atu waze akwononokena Yehova akatwame hashi haze kuhechi kapwa kalimbalimba ni uswale. Yehova kali Zambi mukwa-ndundo jeswe, nawa kali ni ndundo ni usona uze unasolola ngwo makamanununa yuma yeswe yize yinafupiwa kuli atu. Iye kanalakenya ngwo—kwasala hakehe hanga ahwise lamba!—Tanga Samu 72:16.

11. Mumu liaka tuli ni shindakenyo ngwo kwasala hakehe Kristu azachise ndundo jenyi hashi heswe, nawa yika twatamba kulinga?

¹¹ Muze Yesu apwile hano hashi, iye kalingile yikomokeso mu mbonge jikehe ha miaka yitatu ni chipinji. (Mateu 15:24) Ngwe Mwanangana, Yesu makakwasa atu eswe ha kanunu umuwika wa Miaka wa Kuyula chenyi. (Samu 72:8) Yikomokeso ya Yesu yinatwehe shindakenyo ngwo iye kanazange kuzachisa ndundo jenyi hanga atukwase. Yetu kutushi ni ndundo ja kulinga yikomokeso, alioze yika yize mutuhasa kulinga? Mutuhasa kuzachisa mashimbu jetu ni tachi jetu hanga tulweze akwetu yuma yipema yize Mbimbiliya ya kulakenya. Chili chiteli chetu ngwe Yela ja Yehova. (A-Roma 1:14, 15) Muze mutunyonga yuma yize Kristu makalinga, mutupwa ni zango lia kuya ni kulweza sango jacho kuli akwetu.—Samu 45:1; 49:3.

12. Mumu liaka mutuhasa kupwa ni shindakenyo ngwo Yesu kananyingika kanawa yuma yeswe yize yakulingiwa hano hashi?

¹² Muze Zambi atangile hashi ni yuma yize yiliho, Yesu “kapwile nenyi hamuwika ngwe chilangaji.” (Yishima 8:22, 30, 31; A-Kolosu 1:15-17) Yesu kananyingika kanawa yuma yize yakulingiwa hano hashi. Iye kananyingika kanawa chize atamba kuzachisa ni kusongwela yuma yeswe ya mu chisemewa.

13, 14. Hana chimwe chilweza chize chinasolola ngwo Kristu kali ni ndundo ja kusongwela tachi ja chisemewa.

¹³ Muze Yesu apwile hano hashi, iye kasolwele ngwo iye kapwile ni ndundo ja Zambi ha kusongwela tachi ja chisemewa. Achinyonga, ha chilweza, cha chize Yesu aholesele kakundukundu. (Tanga Marku 4:37-39.) Umwe mukanda uze wakulumbununa Mbimbiliya unambe ngwo liji lia Ngregu “kakundukundu” lili mu mukanda wa Marku kakulizachisa hanga alumbunune chimwe chijimbi hanji fuji yinji. Yino kanayitesa ni vula munji wa chiwe, wa fuji ya tachi yinji. Muze yino yakulingiwa, yakupihisa yuma yeswe! Postolo Mateu kanalumbununa kakundukundu ngwe “kangonga munene.”—Mateu 8:24.

¹⁴ Achinyonga chikuma chino: Mikanya ya meya yinasupokela mu ulungu, nawa ulungu unaputuka kuzala ni meya. Chipwe kangonga kanalingi zungo linji ni kuhungisa ulungu sali ni sali, nihindu Yesu te kanapombo mumu te kanahongo. Alioze tumbaji te kanevu woma unji, ayo yahindwisa Yesu ni kwamba ngwenyi: “Tulamwine kama, tunatoko!” (Mateu 8:25) Kuchi Yesu alingile? Iye yahinduka ni kwambila fuji ni kalunga-lwiji: “Hwima! Hola.” (Marku 4:39) Kangonga yahwa ni “kuhola kulu.” Cho kuwaha ha chilweza cha ndundo ja Yesu ha kusongwela tachi ja chisemewa!

15. Kuchi Yehova akusolola ngwo iye mahasa kusongwela tachi ja chisemewa?

¹⁵ Ndundo ja Kristu jakwiza kuli Yehova, kashika tunanyingika ngwo Zambi Mukwa-ndundo jeswe mahasa kusongwela tachi ja chisemewa. Chakutalilaho, shimbu te kanda kuchiza Sanga lia meya, Yehova yamba ngwenyi: “Kwasala matangwa shimbiali mba mungunokesa vula hashi, makumi awana a matangwa ni makumi awana a ufuku.” (Uputukilo 7:4) Nawa mu mukanda wa Kutuhuka 14:21, tunatange ngwetu: “Yehova yasosolola kalunga-lwiji ni fuji ya tachi ya ku Chivumbuko.” Twakutanga nawa mu Yona 1:4 ngwenyi: “Yehova yatuma fuji yimwe yinene ha kalunga-lwiji, kashika wato wambile kumakuka.” Chili chipema kunyingika ngwo hashi haha, Yehova makasongwela yuma yeswe.

16. Mumu liaka chili utakamiso ha kunyingika ngwetu, Yehova ni Yesu kali ni ndundo ja kusongwela tachi ja chisemewa?

¹⁶ Chili utakamiso unji kunyingika ngwo Yehova ni Yesu kali ni ndundo ja kusongwela tachi ja chisemewa. Ha Kanunu Umuwika wa Miaka wa Kuyula cha Kristu eswe waze makatwama hashi makapwa kawape. Niumwe makafwa ku luyinda ngwe kakundukundu, kangonga, hanji ku minyiko ya mavu wakwihi. Yetu kutuchi kevwa woma wa luyinda niumwe mumu “zuwo lia Zambi” mulikapwa hamwe ni atu. (Usolwelo 21:3, 4) Kashika tupwenu ni shindakenyo ngwetu, Yehova makahana kuli Yesu ndundo ja kusongwela tachi ja chisemewa ha Kanunu Umuwika wa Kuyula chenyi.

17. Kuchi mutuhasa kwimbulula Zambi ni Kristu?

¹⁷ Chochene, yetu kutuchi kuhasa kumanyisa luyinda. Alioze Yehova ni Yesu mahasa kuchilinga. Kuli yuma yize mutuhasa kulinga. Mutuhasa kukaula shimbi jili mu mukanda wa Yishima 3:27. (Tanga.) Muze mandumbu mapwa mu luyinda, yetu mutuhasa kwakwasa ku yuma yize yinafupiwa ku musunya ni ku ufulielo ni kwaatakamisa. (Yishima 17:17) Chakutalilaho, mutuhasa kwaakwasa ha luyinda. Umwe tuliwa yoze zuwo lienyi liauzukile ha luyinda yamba chino: “Ami ngunasakwilila chinji ku ululikiso wa Yehova, ha ukwaso uze angwaha ku musunya ni ku ufulielo.” Ndumbu mukwo wa pwo twamishi yevwa chinyengo muze zuwo lienyi liauzukile. Muze mandumbu amukwashile kululieka zuwo, aye yamba chino: “Chili chikomokeso! Ami kuchiso kumona chize mungwamba ha chize ngunevu.” Yamba nawa chino kuli Yehova: “Ngunasakwilila Yehova!” Usakwililo unji tunahane kuli mandumbu jetu ha ukwaso uze akutwaha. Chikwo nawa tunasakwilila chinji kuli Yehova ni Kristu, pundu ayo kakutufunga.

18. Yika yakukomwesa ha yikomokeso yize Yesu alingile?

¹⁸ Ha mashimbu waze te akwambujola sango lipema, Yesu kasolwele ngwo iye kali “ndundo ja Zambi.” Mumu te keshi kuzachisa ndundo jenyi hanga alisolole kuli akwo hanji aliyukise mwene, ka. Alioze, Yesu kalingile yikomokeso mumu te kakuzanga atu. Mutulilongesa chinji chikuma chacho ha mutwe uze muusulaho.